Loos ka sala—Lia-loos kona-ba Jesus
Loos ka sala—Lia-loos kona-ba Jesus
TUIR ITA-NIA HANOIN, LIAFUAN TUIRMAI NEʼE LOOS KA SALA?
Jesus moris iha loron 25 Dezembru.
Kuandu Jesus foin moris, liurai naʼin-tolu bá vizita nia.
Jesus la iha alin.
Jesus mak Maromak neʼebé halo an ba mane.
Jesus laʼós ema diʼak deʼit, nia ema espesiál.
EMA barak hatete katak liafuan sira-neʼe hotu loos. Ema balu hatete: ‘Haʼu la hatene.’ Iha mós ema balu neʼebé hatete katak ita ema la bele hatene ho loos. Karik sira hanoin katak fiar ba Jesus deʼit toʼo ona no la presiza atu buka-hatene liután.
Maibé, Bíblia fó laran-manas mai ita “atu hatene ita Naʼi Jesus Kristu”. (2 Pedro 1:8) Ita bele hatene didiʼak kona-ba Jesus kuandu ita estuda Evanjellu sira. Evanjellu sira-neʼe fó-hatene ho loos kona-ba Jesus no ajuda ita atu hatene se liafuan sira neʼebé ema baibain koʼalia kona-ba Jesus mak loos ka sala. Entaun, mai ita buka-hatene lia-loos kona-ba liafuan sira neʼebé hakerek iha leten.
EMA HATETE: Jesus moris iha loron 25 Dezembru.
LOOS KA SALA: SALA.
Bíblia la hakerek kona-ba fulan no loron saida mak Jesus moris iha rai. Se nuneʼe, data 25 Dezembru foti husi neʼebé? Livru The Encyclopædia Britannica hatete katak ema balu neʼebé temi sira-nia an nuʼudar kristaun “hakarak hili loron neʼe tuir data festa jentiu sira-nian iha rai-Roma atu selebra . . . loron neʼebé loro-matan sai fraku liu, katak husi data neʼe ba oin, rai sei komesa fali naroman kleur liu no loro-matan sei komesa saʼe aas”. Livru neʼe mós hatete katak toman barak iha loron Natál mai husi “festa jentiu nian kona-ba agrikultura no kona-ba loro-matan, neʼebé sira selebra iha tempu malirin”.
Jesus sente kontente atu haree ema neʼebé selebra ninia loron-moris iha loron 25 Dezembru ka lae? Tuir loloos, ita la hatene data neʼebé Jesus moris. Liután neʼe, Bíblia la haruka ita atu selebra nia loron-moris, no Bíblia mós la hakerek buat ida kona-ba ema kristaun iha tempu uluk selebra Jesus nia loron-moris. Bíblia hakerek deʼit kona-ba loron neʼebé Jesus mate, no Jesus mós haruka nia dixípulu sira atu komemora ninia loron-mate. * (Lucas 22:19) Klaru katak Jesus hakarak duni nia dixípulu sira atu hanoin liuliu kona-ba ninia mate nuʼudar sakrifísiu, laʼós kona-ba loron neʼebé nia moris.—Mateus 20:28.
EMA HATETE: Kuandu Jesus foin moris, liurai naʼin-tolu bá vizita nia.
LOOS KA SALA: SALA.
Karik ita haree ona iha dezeñu ka iha prezépiu laran, kosok-oan Jesus toba hela iha balada han-fatin no liurai naʼin-tolu lori sira-nia prezente. Maibé ida-neʼe laloos.
Bíblia hakerek duni katak ema matenek balu husi Lorosaʼe bá vizita atu hanaʼi Jesus. (Mateus 2:1) Sira hetan Jesus toba hela iha balada han-fatin ka lae? Lae; sira vizita nia iha uma. Kuandu sira hetan Jesus, Jesus boot uitoan ona.—Mateus 2:9-11.
Ema naʼin-hira mak vizita Jesus? Naʼin-2, 3, ka 30? Bíblia la hakerek kona-ba neʼe. Ema barak hanoin ema naʼin-tolu, karik tanba Eskritura temi prezente oin tolu. * (Mateus 2:11) Iha mós ema balu neʼebé hatete katak liurai naʼin-tolu reprezenta ema rasa ho kór oioin. Maibé Bíblia la hakerek nuneʼe. Livru ida neʼebé esplika kona-ba Evanjellu dehan katak ideia ida-neʼe mai husi “ema matenek kona-ba istória ida neʼebé moris maizumenus iha tinan 800 liutiha Kristu, neʼebé gosta inventa istória oioin”.
EMA HATETE: Jesus la iha alin.
LOOS KA SALA: SALA.
Evanjellu sira hakerek ho klaru katak Jesus iha alin. Evanjellu Lucas hatete katak Jesus mak Maria nia “oan-mane boot”, neʼe hatudu katak Maria iha oan seluk tan. * (Lucas 2:7) Evanjellu Marcos hakerek katak ema balu iha sidade Nazaré la fiar Jesus, hodi hanoin katak nia ema baibain hanesan nia alin sira. Sira husu: “Nia laʼós badain ai nian, Maria nia oan; Tiago, José, Judas no Simão nia maun-alin? Nia feton sira la horik iha ita leet?” (Marcos 6:3; Mateus 12:46; Joao 7:5) Liafuan gregu neʼebé tradús nuʼudar maun-alin no feton iha Marcos 6:3 mak adelfoí no adelfaí, no livru New Catholic Encyclopedia (1967, Vol. IX, p. 337) hatete katak liafuan sira-neʼe mak “kona ba maun-alin no biin-alin rasik”.
Maski Evanjellu sira hatete nuneʼe, ema matenek barak hatete nafatin katak Jesus mak Maria nia oan mesak. Ema balu hatete katak sira neʼebé temi iha Evanjellu sira-neʼe mak Jesus nia primu no prima sira. * Iha mós ema balu tan neʼebé hatete katak sira mak Maria nia oan hakiak. Maibé hanoin toʼok: Se Jesus mak Maria nia oan mesak karik, ema iha Nazaré husu pergunta hanesan neʼe ka lae? Lae. Karik sira balu haree rasik Maria isin-rua. Sira hatene katak Maria iha oan barak no Jesus mak boot liu.
EMA HATETE: Jesus mak Maromak neʼebé halo an ba mane.
LOOS KA SALA: SALA.
Husi tempu uluk toʼo ohin loron, ema barak fiar katak Maromak mak halo an ba mane no hanaran an Jesus hodi moris iha rai. Hodi fiar hanesan neʼe, sira apoia doutrina Trindade, maibé Jesus la hanorin hanesan neʼe. Livru The Encyclopædia Britannica hatete: “Iha Testamentu Foun, ita la hetan liafuan Trindade, no la iha mós liafuan ruma neʼebé apoia ho klaru doutrina neʼe. . . . Doutrina neʼe sai metin neineik-neineik iha tinan atus ba atus nia laran, ho ideia barak neʼebé kontra malu.”
Hanorin husi relijiaun neʼebé dehan katak Jesus mak Maromak neʼebé halo an ba mane, tuir loloos neʼe la hatudu respeitu ba Jesus. Tanbasá? Hanoin toʼok ezemplu tuirmai neʼe. Serbisu-naʼin balu husu buat ruma ba sira-nia xefe, maibé xefe neʼe hatete: ‘Haʼu la bele hatán tanba haʼu la iha direitu.’ Se buat neʼebé nia hatete mak loos duni, ida-neʼe hatudu katak xefe neʼe mós iha tan xefe ida neʼebé iha pozisaun aas liu nia. Maibé se nia koʼalia hanesan neʼe tan deʼit nia lakohi atu halo desizaun maski nia bele, neʼe hatudu katak nia koʼalia buat neʼebé laloos.
Agora, mai ita koʼalia kona-ba pergunta neʼebé Jesus nia apóstolu naʼin-rua husu ba nia. Kuandu sira husu atu hetan pozisaun neʼebé boot, saida mak Jesus hatete? Nia hatete: “Tuur iha haʼu-nia sorin kuana eh karuk, neʼe laʼós haʼu mak fó; neʼe ba sira neʼebé haʼu Aman hadiʼa hela.” (Mateus 20:23) Se Jesus mak Maromak duni, nia iha direitu atu fó ka la fó buat neʼebé sira husu, loos ka lae? Tuir loloos, Jesus hatudu ezemplu neʼebé kapás kona-ba haraik-an, katak nia mós halo tuir Ukun-Naʼin neʼebé boot liu nia. No ida-neʼe mós hatudu ho klaru katak nia la hanesan ho Maromak. *
EMA HATETE: Jesus laʼós ema diʼak deʼit, nia ema espesiál.
LOOS KA SALA: LOOS.
Jesus hatete ho klaru katak nia laʼós ema diʼak deʼit. Nia dehan: “Haʼu Maromak nia Oan.” (Joao 10:36) Maski ema naran deʼit bele hatete, ‘Haʼu Maromak nia Oan’, maibé se ema bosok kona-ba neʼe, nia ema la diʼak duni. Jesus la hanesan neʼe, nia ema diʼak, nia laʼós bosok-teen!
Razaun ida tan ita bele fiar Jesus nia liafuan neʼe tanba Maromak rasik mós hatete nuneʼe. Ba dala rua nia hatete kona-ba Jesus: “Ida-neʼe mak haʼu-nia Oan doben.” (Mateus 3:17; 17:5) Hanoin toʼok, Bíblia esplika katak baibain Maromak koʼalia ba ema iha rai liuhusi anju ka mehi. Maibé ba dala rua ema rona Maromak rasik nia lian hatete sai katak Jesus mak ninia Oan! Ida-neʼe halo ita fiar duni katak Jesus mak Maromak nia Oan.
Informasaun neʼebé Ita foin lee inklui buat neʼebé foun ba Ita ka lae? Se nuneʼe, diʼak atu Ita lee kona-ba Jesus iha Evanjellu sira. Hodi halo nuneʼe, Ita sei sente kontente tanba hatene buat barak liután kona-ba Jesus. No mós, Jesus rasik hatete katak hodi hatene lia-loos kona-ba nia no ninia Aman sei lori ita ba “moris rohan-laek”.—Joao 17:3.
[Nota–rodapé]
^ par. 13 Jesus mate iha loron 14 fulan-Nisan, Loron Páskua, tuir ema judeu sira-nia kalendáriu.—Mateus 26:2.
^ par. 18 Evanjellu Mateus hakerek katak sira “loke sira-nia ai-balun” no fó sira-nia osan-mean, ai-been morin, no mina-morin ba Jesus. Karik Jesus nia família hetan prezente neʼe iha tempu neʼebé loos tanba sira laʼós ema riku no lakleur sira tenke halai ba rai seluk.—Mateus 2:11-15, Liafuan diak ba imi, primeira edisaun.
^ par. 21 Maria koʼus Jesus liuhusi milagre, maibé liutiha neʼe, Maria ho José moris hamutuk nuʼudar kaben-naʼin no hetan tan oan sira seluk.—Mateus 1:25.
^ par. 22 Ema barak apoia ideia neʼe, neʼebé mai husi ema matenek ida naran Jerônimo maizumenus iha tinan 383 liutiha Kristu, tanba sira fiar katak Maria mak virjen ba nafatin. Liutiha tinan balu Jerônimo hatete fali katak nia duvida kona-ba ideia neʼe, maibé ema barak no mós Igreja Katólika kontinua kaer metin ba ideia neʼe.
^ par. 27 Atu hetan informasaun liután kona-ba doutrina Trindade, haree livru Tuir Loloos, Saida mak Bíblia Hanorin? iha pájina 201-4. Livru neʼe husi Testemuña ba Jeová.
[Kaixa/Dezeñu iha pájina 14]
Ita hatene ka lae, informasaun sira-neʼe?
Jesus ema hanesan saida? Nia ema neʼebé sempre sériu no halo ema taʼuk atu hakbesik ba nia ka lae? Ema balu dehan sin. Karik sira sei sente hakfodak no kontente atu hatene katak Jesus . . .
• haksolok atu tuir festa sira.—Joao 2:1-11.
• gaba ema nia hahalok diʼak.—Marcos 14:6-9.
• gosta atu labarik sira hakbesik ba nia.—Marcos 10:13, 14.
• tanis iha ema nia oin.—Joao 11:35.
• hanoin ema neʼebé iha terus laran.—Marcos 1:40, 41.
