Ni runi cré binni de Jesús. Dxandíʼ cani la? o coʼ
Ni runi cré binni de Jesús. Dxandíʼ cani la? o coʼ
BIINDAʼ CANI ZEEDA RARÍʼ. GUNÁʼ DE LAACANI RÁBILUʼ DXANDÍʼ.
Gule Jesús 25 stiʼ diciembre.
Yeganna chonna rey magu laabe casi gúlebe.
Laasibe nga guca xiiñiʼ María.
Laaca Jesús nga Dios ne bibánibe casi binni ndaaniʼ Guidxilayú.
Cadi ti binni nachaʼhuiʼ si nga gúcabe.
ZÁNDACA stale binni zaníʼ dxandíʼ cani bizéʼtenu ca. Laaca nuu tu zaníʼ gastiʼ modo para ganna binni pa dxandíʼ nga ni runi cré de Jesús, ni jma risaca nga guni crécabe laabe.
Peru Biblia rabi laanu risaca nga gunibiáʼ chaahuinu Señor Jesucristu (2 Pedro 1:8). Ximodo zanda gunibiaʼnu laabe yaʼ. Ra guidúʼndanu ca Evangeliu ca. Nga runi, galán iquiiñenu cani para gánnanu pa dxandíʼ cada tobi de ca cosa ni runi cré binni.
NI RUNI CRÉ BINNI: Gule Jesús 25 stiʼ diciembre.
DXANDÍʼ NI LA? O COʼ: CADI DXANDÍʼ DIʼ NI.
Lu Biblia cadi cá diʼ xi dxi ne xi beeu gule Jesús. Yanna, xiñee riníʼ stale binni gúlebe dxi ca yaʼ. Sicaríʼ cusiene ti diccionariu de Biblia ni: «Ndaaniʼ guidxi Roma la? [...] biquiiñeʼ Yuʼduʼ (Religión católica) 25 stiʼ diciembre [...] para guni saa stiʼ Natividad. Dxi que nga ni maca riquiiñeʼ ca binni ni qué ñuni adorar Dios para gúnicaʼ saa stiʼ Gubidxa ni qué runiti (Sol Invicto). Ca binni que biʼniʼ crecaʼ runi ganar Gubidxa huaxhinni cada iza lu invierno, ngue runi ruzulú raca ca dxi ca jma naroʼbaʼ» (Diccionario de la Biblia, stiʼ W. R. F. Browning). Sti libru ni nabé ruundaʼ binni laaca ruzeeteʼ zeeda stale de cani runi binni para Navidad ca de «ca saa ni biʼniʼ ca binni ni qué runi adorar Dios, biʼniʼ binni ca saa que para Gubidxa ne para ca dxiiñaʼ rúnicaʼ lu layú sticaʼ lu invierno» (The Encyclopædia Britannica).
Cumu qué liica gánnanu padxipeʼ nga gule Jesús la? xi para ndiʼ gúninu saa 25 stiʼ diciembre purtiʼ si rábinu dxi ca nga gúlebe. Stiidxaʼ Dios qué rabi diʼ laanu gúninu ni, ne gastiʼ nin ti razón ni gusihuinni dxandíʼ biʼniʼ ca primé xpinni Cristu ni. Peru ni cayabi Biblia laanu nga padxipeʼ gútibe, ne Jesús peʼ biʼniʼ mandar ca discípulo stiʼ guietenaláʼdxicaʼ guendaguti stiʼ (Lucas 22:19). a Pur cani maʼ bidúʼyanu ca, rudiʼnu cuenta qué ñuulaʼdxiʼ diʼ Jesús ñúninu saa stiʼ Natividad. Laabe qué ñacaláʼdxidibe nusisácanu dxi gúlebe, sínuque gusisácanu guendaguti stibe (Mateo 20:28).
NI RUNI CRÉ BINNI: Yeganna chonna rey magu Jesús casi gule.
DXANDÍʼ NI LA? O COʼ: CADI DXANDÍʼ DIʼ NI.
Ñee huayuuyaluʼ xiixa cuadru o ra rúnicabe modo gule Jesús la? Lu cani rihuinni nexheʼ ti baʼduhuiiniʼ ra ró yuze, ne cusigaʼdeʼ chonna rey laabe caadxi cosa. Ñee dxandíʼ zacapeʼ gúcani la? Coʼ.
Ni nánnanu nga beeda caadxi binni de neza ra rindani gubidxa ra nuu Jesús para gusisácacaʼ laabe. Peru cadi rey diʼ ca binni que, sínuque nácacabe astrólogo (Mateo 2:1, Biblia del nuevo milenio). Laaca qué ñeeda guuyadícabe laabe dxi nacubi gúlebe ora néxhebe ra ró yuze; yegánnacabe laabe dxi maʼ nabézabe ndaaniʼ ti yoo, ne zándaca guca nga gudiʼdiʼ si chupa chonna beeu despué de gúlebe (Mateo 2:9-11).
Panda ca binni que yaʼ. Biblia qué ruzeeteʼ diʼ pa chúpacabe, pa chónnacabe... o pa treintacabe. Yanna, xiñee riníʼ binni chónnacabe yaʼ. Zándaca purtiʼ ruzeeteʼ relatu ca beedanécabe chonna clase regalu (Mateo 2:11). b Nuu tu riníʼ de gadxé gadxé raza cada tobi de ca hombre que, peru lu Biblia cadi cá diʼ pa dxandíʼ zacá ni. Ti libru ni riníʼ de cani cá lu ca Evangeliu ca, ruzeeteʼ biree historia stiʼ guionnaʼ rey magu ca de «ndaaniʼ ique si ti historiador ni bibani lu siglu VIII ni nabé riuulaʼdxiʼ gucaa modo ruxuiʼlú guca stale cosa».
NI RUNI CRÉ BINNI: Jesús si nga guca xiiñiʼ María.
DXANDÍʼ NI LA? O COʼ: CADI DXANDÍʼ DIʼ NI.
Ca Evangeliu ca rusihuínnicaʼ dxandíʼ gupa Jesús biʼchiʼ ne bizaʼnaʼ. Casi Lucas la? ruzeeteʼ naca Jesús «primé xiiñi [María]», nga runi zanda guiénenu gúpabe jma xiiñibe (Lucas 2:7). c Ne Marcos ruzeeteʼ de caadxi binni de Nazaret ni bíʼyacaʼ Jesús cásica xcaadxi biʼchiʼ ne bizaʼnaʼ. Guníʼcabe: «Cadi dxa carpinteru xiiñi María que ndiʼ, biʼchi Jacobo (Santiagu) ne José ne Judas ne Simón. Ca bizaʼna be laca rarí nabeza caʼ» (Marcos 6:3; Mateo 12:46; Juan 7:5).
Neca zacá, stale teólogo dede yanna riniʼcaʼ Jesús si nga guca xiiñiʼ María. Xcaadxi riníʼ xprímube nga ca binni ni ruzeeteʼ ca Evangeliu ca casi bíʼchibe ne bizáʼnabe. d Ne nuu tu riníʼ xiiñiʼ José laacabe ne gucuaa si María laacabe casi xiiñiʼ. Peru pa ñaca Jesús si nga xiiñiʼ María, ñee niníʼ ca binni de Nazaret que zaqué la? Cadi guiaandaʼ laanu biiyaʼ stale de laacabe gucaxiiñiʼ María xcaadxi biaje, ngue runi gúnnacabe gúparuʼ Jesús biʼchiʼ ne bizaʼnaʼ.
NI RUNI CRÉ BINNI: Laaca Jesús nga Dios ni bibani casi binni ndaaniʼ Guidxilayú.
DXANDÍʼ NI LA? O COʼ: CADI DXANDÍʼ DIʼ NI.
Ca binni ni runi cré Trinidad la? riníʼ íquecaʼ Dios nga beeda ndaaniʼ Guidxilayú riʼ lu xcuerpu Jesús. Nécapeʼ maʼ xadxí nga de runi cré binni zacá la? bizulú biʼniʼ crécabe ni despué de beeda Jesús. Sicaríʼ caníʼ ti enciclopedia: «Lu Nuevo Testamento cadi zeeda diʼ diidxaʼ Trinidad nin ni rusiidicabe ora riníʼcabe chonna binni nga Dios [...]. Ra zidiʼdiʼ ca siglu ca nga gudixhe chaahuicabe ni ne nabé gudinde diidxacabe pur laani» (The Encyclopædia Britannica).
Ca binni ni rusiidiʼ laaca Jesús nga Dios la? casi ñaca niníʼcabe cusiguii Jesús. e Xiñee rininu zacá yaʼ. Guzéʼtenu ti ejemplu stiʼ caadxi binni ni canábacaʼ xiixa patrón sticaʼ, peru patrón ca na qué zanda diʼ gudii laacabe ni canábacabe. Pa dxandíʼ zanda gúnibe ni, peru qué násibe gudiibe ni la? zusihuínnibe nácabe ti patrón ni rusiguii ne qué runi ni jneza.
Ti dxi gunabaʼ chupa apóstol stiʼ Jesús laa gudiibe laacaʼ ti puestu jma risaca. Xi bicábibe laacaʼ yaʼ. «Para cui tu cuee ladu derechu ne ladu biga la? cadi nexhe ni lu naya para gudieeʼ, purti maca gudixhe Bixhoze tuu nga icaa ni.» (Mateo 20:23.) Pa ñaca Jesús nga Dios la? nihuinni cusiguiibe pur cani guniʼbe que. Peru laabe qué racaláʼdxibe gusiguiibe guirutiʼ, sínuque rápabe gana ganna binni jma napa Dios poder para guni mandar que laabe. Zacá bisihuínnibe chupa cosa: primé la? qué rudxiibabe laca laabe, ne guiropa la? cadi laadibe nga Dios.
NI RUNI CRÉ BINNI: Cadi ti binni nachaʼhuiʼ si nga guca Jesús.
DXANDÍʼ NI LA? O COʼ: DXANDÍʼ NI.
Jesús peʼ guníʼ cadi ti binni nachaʼhuiʼ si laa, sínuque guniʼbe: «Xiiñi Dios naa» (Juan 10:36). Tutiica binni zanda guiníʼ casi guníʼ Jesús ca. Peru pa ñaca niníʼ Jesús Xiiñiʼ Dios laa, nánnaca cadi dxandíʼ ni la? qué ñanda diʼ nininu gúcabe ti binni nachaʼhuiʼ. Cadi jma nagueenda nininu cayuube lugar stiʼ sti binni la?
Razón ni jma naroʼbaʼ para guininu dxandíʼ ngue ni guníʼ Jesús la? rihuínnini guiropaʼ biaje guníʼ Dios: «Ndi nga Xiiñe» (Mateo 3:17; 17:5). Huaxiéʼ biaje ruzeeteʼ Biblia binadiágacabe stidxi Dios ndaaniʼ Guidxilayú riʼ, ne chupa de ca biaje ca guniʼbe para ganna binni Jesús nga Xiiñibe. ¡Ndiʼ nga razón jma naroʼbaʼ nápanu para guni crenu dxandíʼ Jesús nga Xiiñiʼ Dios!
Ñee maʼ biziidiluʼ xiixa cosa nacubi de cani bizéʼtenu runi cré binni la? Pa cueeluʼ tiempu para gúʼndaluʼ ne guiéneluʼ ca Evangeliu ca la? ziuuláʼdxiluʼ cani jma ne laaca zabeenduluʼ stale cosa galán. Cadi guiaandaʼ lii ni bisiidiʼ Jesús, pa gunibiáʼ chaahuinu laabe ne gunibiáʼ chaahuinu Bixhózebe la? zacaanu «enda nabani» ni qué zaluxe (Juan 17:3).
[Cani cá ñee yaza]
a Jesús guti dxi raca Pascua, o 14 stiʼ nisán lu calendariu stiʼ ca judíu (Mateo 26:2).
b Mateo na «ulee cabe irá ni bedané cabe» ne bisigáʼdecabe laabe oro, guʼxhuʼ ne nisa rindáʼ naxhi. Cumu pobre bixhoze ne jñaa Jesús la? biáʼsipeʼ ora ngue gucuaacabe ni beedané ca hombre que, purtiʼ biquiiñecabe ni dxi bireecabe de xquídxicabe ne yendézacabe xquidxi binni (Mateo 2:11-15).
c Gucaxiiñiʼ María Jesús pur ti milagru, peru xcaadxi xiiñibe que gúpabe laacaʼ ne José xheelabe, cásica guiráʼ guendaxheelaʼ (Mateo 1:25).
d Biaʼ lu iza 383 guníʼ Jerónimo qué nusaana María de ñaca binnidxaapaʼ, ne dede yanna stáleruʼ binni runi cré ni guniʼbe ca. Nécapeʼ despué guníʼ Jerónimo zándaca cadi dxandíʼ zaqué ni la? stale binni dede yanna runi cré ni, ne laaca laani nga tobi de ca cosa ni rusiidiʼ Iglesia Católica.
e Zadxélaluʼ jma ni rusiidicabe de Trinidad lu folletu ¿Debería creer usted en la Trinidad?, ni biʼniʼ ca testigu stiʼ Jiobá.
[Cuadro ne dibuju/foto ni zeeda lu yaza 14]
Xcaadxi ni naquiiñeʼ gánnanu de Jesús
Tu clase de binni guca Jesús. Ñee gúcabe ti hombre ni guníʼ naquiiñeʼ gaca guiráʼ cosa jneza la? Ñee gúcabe tuuxa ni qué ñuu nayecheʼ ne qué niná ñapa xhamigu la? Zándaca nuu tu runi cré zacá ni. Peru zadxagayaacabe ora gánnacabe xcaadxi de ca cosa ni biʼniʼ Jesús...
• guyebe ra guca saa (Juan 2:1-11).
• biéchebe ora biʼniʼ binni ni jneza ne gúdxibe laacaʼ galán ni bíʼnicaʼ (Marcos 14:6-9).
• guyuuláʼdxibe chuʼ ca xcuidi ca gaxha de laabe (Marcos 10:13, 14).
• qué nituílube ora bíʼnabe nezalú binni (Juan 11:35).
• biabe ca binni ni biiyabe cayacaná (Marcos 1:40, 41).