Huñunakunapaq wasikuna: Chaypim Jesuswan qatiqninkuna predicarqaku

‘Purirqam lliw Galilea law llaqtakunapi, huñunakunanku wasikunapi Diospa munaychakusqanmanta allin noticiata willakustin.’ (MATEO 4:23.)

JESUSMANTA rimaq tawa librokunam willawanchik huñunakunapaq wasikunaman Jesus risqanmanta. Rirqam Nazaret llaqtapi hinaspa Capernaum llaqtapi kaqkunamanpas, rirqataqmi kimsa wata masnin predicasqan llaqtakunapi kaq huñunakunapaq wasikunamanpas. Chaypim Diospa Gobiernonmanta predicaspan yachachirqa. Arí, Dios servisqanpi yuyaymanaspanmi Jesusqa nirqa: “Tukuy tiempom yachachirqani huñunakuna wasikunapipas chaynataq llapa judiokunapa huñunakunan templopipas”, nispa (Juan 18:20).

Chaynallataqmi Jesuspa apostolninkunapas hinaspa huk cristianokunapas chay wasikunapi sapa kuti yachachiqku. ¿Haykapim qallaykurqa kay wasikunapi huñunakuyqa? ¿Imaynataq karqa Jesuspa tiemponpiqa? Kaymantayá qawasun.

Ancha allinmi karqa judiokunapaq. Watapi kimsa kutita Diosta yupaychanankupaq Jerusalen temploman qarikuna riptinkupas, huñunakunapaq wasikunaqa servikuqmi llaqtachakunapi Diosta sapa punchaw yupaychanankupaq. Hinaspa Palestinapi  otaq huk nacionkunapi kaq judiokuna huñunakunankupaqpas.

¿Haykapim qallaykurqa kay wasikunapi huñunakuyqa? Wakinmi ninku 607-537 watakunapi Babiloniaman judiokuna apasqa kasqankumantapacha qallarisqanta, chaypim Diospa templon purmachisqa karqa. Wakinñataqmi ninku Babiloniamanta kutiramusqanku qepallanta qallarisqanta, sacerdote Esdras judiokunata Diospa leyninta yachanankupaq kallpanchaptin (Esdras 7:10; 8:1-8; 10:3).

Qallariypiqa huñunakunapaq wasi niq rimayqa “asamblea” otaq “congregacion” ninanmi karqa. Chaytam Septuaginta niq Diospa Palabranpas nin. Ichaqa tiempopa risqanman hinam kay rimaytaqa servichikuyta qallaykurqaku Jehová Diosta yupaychanapaq wasikunata sutichanankupaq. Punta cristianokunapa tiemponpiqa Jesuspa risqan lliw llaqtachakunapim huñunakunapaq wasikunaqa karqa. Achkataqmi karqa hatun llaqtakunapipas, Jerusalenpiñataqmi aswan achkaraq. Ichaqa, ¿imaynataq chay wasikunaqa karqa?

Diosta yupaychanapaq wasi. Judiokuna huñunakunapaq wasikunata ruranankupaqqa, moqokunatam maskaqku, hinaspam planota ruraqku punkun Jerusalenman qawaqta (1). Ichaqa wakinpiqa manam chaynatachu ruraqku mana atikusqanrayku.

Hatarichiyta tukuruspankuñataqmi, chay huñunakunapaq wasiman churaqku tiyanapaq kaqkunatawan hukkunatapas. Karqataqmi apanapaq baulpas (2), chaypim waqaychaqku judiokunapa ancha respetasqanku Diospa Palabranta. Chay baultaqa allin waqaychasqa sitiopim churaqku (3), huñunakuy kaptinñataqmi runakunapa qayllanpi churaqku. Tukuruptinñataqmi kaqllamanta chay sitioman kutichiqku.

Baulpa hichpallanpi hinaspa runakunapa tiyasqanku ñawpaqninpim karqa yachachiqkunapa hinaspa invitasqa kaqkunapa tiyananku (4) (Mateo 23:5, 6). Yaqa chawpipim karqataq lliw qawanankupaq hina yachachiqkunapa sayananku, karqataqmi atrilpas chaynataq tiyanapas (5). Chaypa muyuriqninpim karqataq runakunapa tiyanankupas (6).

Huñunakunapaq wasikunataqa yaqa llapanpim chay llaqtapi kaqkuna cuidarqaku. Wakchapas apupas sonqonkumantam qollqeta qoqku, chaynapi allin cuidasqa kananpaq. Ichaqa, ¿imaynam huñunakuykunaqa karqa?

Huñunakuykuna imayna apakusqanmanta. Chay huñunakuykunapiqa takiqkum, orakuqkum, Diospa Palabrantapas leeqkum, yachachiqkum hinaspa predicaqkutaqmi. Puntatam judiokunaqa Shemá nisqata rezaqku. Chayna sutichasqam karqa puntata servichikusqanku textopa qallariyninpi kayna nisqanrayku: “Uyariychik [Shemá], Israel casta runakuna: Jehová Diosninchikqa chullalla Jehová Diosmi” (Deuteronomio 6:4, NM).

Chaymantañataq Moisespa qellqasqan Torá sutiyoq pichqa librokunata leeqku, hinaspam chay leesqankumanta rimaqku (Hechos 15:21). Chaymantañataqmi leeqku Haftarot nisqapa otaq Profetakunapa wakin qellqasqankunata, hinaspam yachachiqku imayna yanapachikunankumanta. Wakinpiqa chay huñunakuypim yachachiqku invitasqa  kaqkuna. Kaytam qawanchik Lucas 4:16-21 nisqan versiculokunapi, chaypim willakun huñunakunapaq wasiman Jesus riptin Diospa Palabranta leenanpaq qosqankumanta.

Piensarisun imayna rurasqanpi. Chay tiempopiqa manam kunan tiempopi hinachu Diospa Palabranqa capitulokunapi hinaspa versiculokunapi rakisqachu karqa. Hinaptinqa, Jesusqa ichoq makinwanmi kichanan karqa, alleq makinwanñataq kaqlla wankunan karqa chaynapi leey munasqanta tarinanpaq. Leeyta tukuruspanñataqmi costumbrasqankuman hina qallariyninkama wankurqa.

Yaqa llapallanpim hebreo rimaypi leeqku, hinaspam arameo rimayman tikraqku. Griego rimaypi huñunakuykunapiñataqmi servichikuqku Septuaginta nisqa Diospa Palabranta.

Anchatam servichikuqku. Huñunakunapaq wasikunaqa ancha allinmi karqa judiokunapaqqa. Anchatam servichikuqku. Chaypim ruraqku juciokunata, llaqtapa huñunakuyninkunata hinaspa asambleakunatapas. Wakinpiqa huñunakunapaq wasikunaqa rurasqam karqa muyuriqninpi achka wasichantinkuna otaq sapaq cuartoyoqkuna. Chaypim mikunapaq hinaspa samapakunankupaq cuartokunapas karqa.

Yaqa lliw llaqtakunapim huñunakunapaq wasikunaqa escuelayoq karqa, yaqa llapanpim chay huñunakunapaq wasipi apakuq. Yaqapaschá chaypiqa achka warmachakuna karqaku, chaynapi velapa ceranwan llusisqa tablachapi profesorpa qellqasqanta leeyta yachanankupaq. Chay escuelakuna kasqanraykum, ñawpa tiempopi judiokunaqa wakcha kaspankupas allin yachachisqa karqaku hinaspa Diospa Palabranmantapas allinta yacharqaku.

Ichaqa huñunakunapaq wasikunaqa astawanmi Diosta yupaychanapaq karqa. Hinaptinqa, ñawpaq tiempopi judiokunapa chayna huñunakusqankuman hinam karqa punta cristianokunapa huñunakuyninkupas. Paykunapas huñunakurqakum Jehová Diosta yupaychanankupaq; orakurqakum, takirqakum hinaspa Diospa Palabrantam leespanku estudiarqakupas. Manam chayllapichu rikchakurqa. Cristianokunapas sonqonkumantam qollqenkuta qoqku gastokunapaq. Diospa Palabrantapas manam reqsisqa kaqkunallachu leeqku. Hinaspa yuyayniyoq ancianokunam huñunakuykunamantaqa encargakuqku.

Kunan tiempopipas Jehová Diospa testigonkunaqa Jesucristopa hinaspa punta cristianokunapa rurasqankutam qatipakunku. Salonpi huñunakuykunaqa rikchakuntaqmi ñawpaq tiempopi huñunakuna wasikunapi imayna rurakusqanman. Jehová Diospa Testigonkunaqa ñawpa tiempopi Diospa serviqninkuna hinam huñunakunku Diosman asuykunankupaq (Santiago 4:8).

[16 hinaspa 17 kaq paginakunapi dibujo]

Kay dibujom rurakurqa punta cristianokunapa tiemponpi Gamla llaqtapi kaq huñunakunapaq wasipa rurakusqanman hina

[18 kaq paginapi dibujo]

Huñunakunapaq wasikunapi kaq escuelakunapiqa warmachakunatam yachachiqku 6-13 watankama