Naghahapot an mga Parabasa . . .

Si Jesus daw Iyo an Arkanghel na si Miguel?

▪ Sa simpleng pagtaram, an simbag iyo. An pagtao sa tawo nin labi sa sarong ngaran kaugalean sa dakol na kultura. Totoo man iyan sa mga ngaran na nasa Biblia. Halimbawa, an patriarkang si Jacob nginaranan man na Israel. (Genesis 35:10) Si apostol Pedro inapod sa limang magkakalaen na paagi—Simeon, Simon, Pedro, Cefas, asin Simon Pedro. (Mateo 10:2; 16:16; Juan 1:42; Gibo 15:7, 14) Paano kita makakasegurado na an Miguel saro pang ngaran ni Jesus? Estudyare an minasunod na ebidensia na sono sa Kasuratan.

Limang beses na sinambit sa Biblia an makapangyarihan na espiritung linalang na si Miguel. An tolo digdi yaon sa libro nin Daniel. Sa Daniel 10:13, 21, mababasa niato na an sarong ipinadarang anghel sinukorohan ni Miguel, na inaapod na “saro sa pangenot na mga prinsipe” asin “an saindong prinsipe.” Sunod, sa Daniel 12:1, naaraman niato na sa panahon kan katapusan, “si Miguel matindog, an dakulang prinsipe na nagtitindog para sa mga aki kan saimong banwaan.”

An saro pang pagsambit ki Miguel yaon sa Kapahayagan 12:7, na dian ilinaladawan “si Miguel asin an saiyang mga anghel” na nakikipaglaban sa sarong mahalagang marhay na guerra na nagresulta sa pagpalayas sa langit ki Satanas na Diablo asin sa marigsok na mga anghel nia.

Mangnoha na sa kada saro kan nasambit na mga pangyayari sa enotan, si Miguel ilinaladawan bilang guerrerong anghel na nakikipaglaban para sa mga lingkod nin Dios asin pinoprotehiran sinda, na inaatubang pa ngani an pinakapangenot na kaiwal ni Jehova, si Satanas.

Sa Judas bersikulo 9, si Miguel inaapod na “arkanghel” (archangel sa Ingles). An prefix na “arch” nangangahulogan na “pangenot,” asin an terminong “arkanghel” dai noarin man ginamit sa Biblia sa pormang plural. An solamenteng ibang bersikulo na nasambitan an arkanghel iyo an 1 Tesalonica 4:16, na dian ilinaladawan ni Pablo an binuhay liwat na si Jesus, na nagsasabi: “An Kagurangnan [si Jesus] mismo mahilig hale sa langit na may tingog na nagboboot, may tingog nin arkanghel asin may trumpeta nin Dios.” Kaya si Jesu-Cristo mismo ipinapamidbid digdi bilang an arkanghel, o pangenot na anghel.

Huli sa mga nasambitan sa enotan, ano an puede niatong ikongklusyon? Si Jesu-Cristo iyo si Miguel na arkanghel. An duwang ngaran—Miguel (na nangangahulogan “Siisay an Arog nin Dios?”) asin Jesus (na nangangahulogan “Si Jehova Kaligtasan”)—isinesentro an atension sa saiyang papel bilang an pangenot na paradepensa kan pagkasoberano ni Jehova. An Filipos 2:9 nagsasabi: “Ilinangkaw sia [an pinamuraway na si Jesus] nin Dios sa superyor na posisyon asin may kabootan na itinao sa saiya an ngaran na halangkaw kisa sa lambang ibang ngaran.”

Importanteng mangnohon na an pagkamundag ni Jesus bilang tawo bako an kapinonan kan saiyang buhay. Bago mamundag si Jesus, si Maria binisita nin anghel na nagsabi sa saiya na sia mangingidam nin sarong aki paagi sa banal na espiritu asin na ngangaranan nia an aki na Jesus. (Lucas 1:31) Durante kan saiyang ministeryo, parateng sinasambit ni Jesus an pag-eksister nia bago nagin tawo.—Juan 3:13; 8:23, 58.

Kaya si Miguel na arkanghel iyo si Jesus sa saiyang pag-eksister bago nagin tawo. Pagkatapos kan saiyang pagkabuhay liwat asin pagbalik sa langit, ipinagpadagos ni Jesus an saiyang paglilingkod bilang si Miguel, an pangenot na anghel, “para sa kamurawayan nin Dios na Ama.”—Filipos 2:11.