Pamangkot sang mga Bumalasa . . .

Si Jesus Bala Amo si Miguel nga Arkanghel?

▪ Ang sabat, huo. Kinaandan na sa madamo nga kultura nga ang mga tawo may pila ka ngalan. Amo man sini sa Biblia. Halimbawa, ang patriarka nga si Jacob ginatawag man nga Israel. (Genesis 35:10) Si apostol Pedro gani may lima ka ngalan—Simeon, Simon, Pedro, Cefas, kag Simon Pedro. (Mateo 10:2; 16:16; Juan 1:42; Binuhatan 15:7, 14) Paano naton masiguro nga Miguel ang isa pa ka ngalan ni Jesus? Binagbinaga ang masunod nga pamatuod halin sa Kasulatan.

Sa Biblia, ang gamhanan nga espiritu nga tinuga nga si Miguel mabasa sing lima ka beses. Ang tatlo sini makita sa tulun-an ni Daniel. Suno sa Daniel 10:13, 21 (APD), ang isa ka anghel nga ginpadala sa isa ka asaynment, ginluwas ni Miguel nga amo ang “pangulo sang mga anghel” kag ‘pangulo sang mga katawhan.’ Dayon, sa Daniel 12:1 mabasa naton nga sa tion sang katapusan, “magatindug si Miguel, ang daku nga principe nga nagatindug tungud sa mga anak sang imo katawohan.”

Nagsiling man ang Bugna 12:7 nga “si Miguel kag ang iya mga anghel” nagpakig-away kay Satanas nga Yawa kag sa iya malaut nga mga anghel sa langit kag gintagbong niya sila sa duta.

Talupangda nga ginapakita sa kada teksto nga ginsambit nga si Miguel isa ka anghel nga nagapakig-away bisan sa pinakagamhanan nga kaaway sang Dios nga si Satanas para proteksionan ang Iya katawhan.

Sa Judas bersikulo 9, gintawag si Miguel nga “archangel” ukon “arkanghel.” Ang “arch” nagakahulugan nga “pangulo” ukon “panguna.” Ginapakita sang Biblia nga isa lamang ang ginapatuhuyan sang tinaga nga “arkanghel.” Ang ikaduha kag katapusan nga teksto nga nagsambit sang arkanghel amo ang 1 Tesalonica 4:16. Ginlaragway diri ni Pablo ang ginbanhaw nga si Jesus nga nagasiling: “Ang Ginuo [nga si Jesus] mismo magapanaug gikan sa langit nga may mabaskog nga pagmando, nga may tingog sang arkanghel kag may trumpeta sang Dios.” Gani, ginapakilala diri si Jesucristo subong arkanghel, ukon pangulo nga anghel.

Base sa aton ginbinagbinag, makasiling kita nga si Jesucristo amo si Miguel nga arkanghel. Ang Miguel nagakahulugan “Sin-o ang Kaangay sang Dios?” kag ang Jesus nagakahulugan “Si Jehova ang Kaluwasan.” Ini nga mga ngalan pareho nga nagapakilala sa iya nga amo ang panguna nga nagasakdag sa pagkasoberano sang Dios. Ang Filipos 2:9 nagasiling: “Ginbayaw sia [ang ginhimaya nga si Jesus] sang Dios sa mataas gid nga posisyon kag mainayuhon nga ginhatagan sia sing ngalan nga labaw sa tanan iban pa nga ngalan.”

Dapat man naton dumdumon nga ang pagkabun-ag ni Jesus sa duta, indi ang panugod sang iya kabuhi. Antes matawo si Jesus, ginsilingan sang anghel si Maria nga magapanamkon sia sing bata paagi sa balaan nga espiritu kag ngalanan niya ini nga Jesus. (Lucas 1:31) Sa tion sang iya ministeryo, pirme nagasiling si Jesus nga nagkabuhi na sia anay antes nangin tawo sa duta.—Juan 3:13; 8:23, 58.

Gani si Miguel nga arkanghel amo si Jesus sang wala pa sia matawo sa duta. Pagkatapos sang iya pagkabanhaw nagbalik sia sa langit. Didto, nag-alagad sia liwat subong si Miguel, ang pangulo nga anghel, “sa himaya sang Dios nga Amay.”—Filipos 2:11.