Ka Ui ta Tatou Aronga Tatau . . .

Ko Iesu Ainei te Angera Maata ko Mikaela?

▪ Mama ua te pauanga e, ae. E mea matauia i roto i te au peu e manganui no tetai tangata kia maata tona ingoa e kapikiia ana. Mei te reira rai te au ingoa i roto i te Pipiria. Ei akaraanga, kua kapiki katoaia te pateriareka ko Iakoba e ko Iseraela. (Genese 35:10) E rima o te apotetoro ko Petero au ingoa tukeke​—ko Simeona, Simona, Petero, Kepha, e Simona Petero. (Mataio 10:2; 16:16; Ioane 1:42; Angaanga 15:7, 14) Peea ra tatou e papu ei e ko Mikaela tetai ingoa mai o Iesu? Ka akamanako ana i te akapapuanga Tuatua Tapu ka aru mai.

E rima taikuanga no runga i te vaerua ririnui ko Mikaela i roto i te Pipiria. E toru taime i roto i te puka o Daniela. I roto ia Daniela 10:13, 21, ka tatau tatou e na Mikaela, tei kapikiia e ko “tetai ariki maata” e “to kotou ariki,” i tauturu i tetai angera i tukuia mai. Aru mai, i roto ia Daniela 12:1 ka kite tatou e, a te tuatau openga “e tu mai ei te ariki maata ra ko Mikaela, ko tei tu mai ei tika no te tamariki a toou ra au tangata.”

Kua taiku katoaia mai a Mikaela i roto ia Apokalupo 12:7, tei akakite mai e te tamaki ra a “Mikaela e tana au angera” i tetai tamakianga puapinga tikai, i uriia mai ei a Satani te Tiaporo e tana au angera kino mei te rangi mai.

Ka akara ana, e i te au tu anake tei taikuia mai i runga akenei, kua akatutuia mai a Mikaela ei angera toa e tamaki ra e e paruru ra i te iti tangata o te Atua, e te aro katoa atu anga i to Iehova enemi maata roa atu, ko Satani.

Te kapiki ra a Iuda irava 9 ia Mikaela e ko “te angera maata.” Ko te kupu “maata,” tona aiteanga e “tumu” me kore e “pu,” e te tuatua “angera maata,” okotai rai ia tu tuatua e taangaangaia ana i roto i te Pipiria. Ko te irava ke ua rai tei taikuia mai tetai angera maata koia oki tei roto ia 1 Tesalonia 4:16, i akamarama mai ei a Paulo no runga ia Iesu tei akatuia mai, i te na ko anga e: “Ko te Atu [ko Iesu] uaorai oki te ka eke mai mei te rangi mai ma te maeva, ma te reo o te angela maata, e ma te pu a te Atua.” No reira ko Iesu Karaiti uaorai tei akatakaia mai i konei e ko te angera maata, me kore ko te pu o te angera.

Me akamanakoia tei taikuia akenei, eaa ra ta tatou ka taopenga mai? Ko Iesu Karaiti a Mikaela te angera maata. Teia nga ingoa​—a Mikaela (te aiteanga “Koai Tei Aite Atu ki te Atua?”) e Iesu (te aiteanga “Ko Iehova oki te Ora”)—​te akamanako ra te reira no runga i tana tuanga angaanga ei vaa tuatua no to te Atua turanga ngateitei. Te akakite ra a Philipi 2:9 e: “I akateitei rava atu ei te Atua iaia [Iesu tei akakakaia], e kua oronga mai i te ingoa i maata ua atu i te teitei i te au ingoa ravarai nei nona.”

E mea puapinga kia kite e kare to Iesu oraanga i akamata mai i tona anau mai anga ei tangata. I mua ake ka anau mai ei a Iesu, kua tae tetai angera kia Maria e kua akakite kiaia e ka nui aia i tetai tamaiti na roto i te vaerua tapu e kia tapa aia i te ingoa o te tamaiti ko Iesu. (Luka 1:31) I te tuatau o tana angaanga orometua, e tuatua ua ana rai a Iesu no runga i tona oraanga i mua ake ka riro mai ei aia ei tangata.​—Ioane 3:13; 8:23, 58.

No reira ko Iesu te angera maata ko Mikaela, i tona oraanga i mua ake ka riro mai ei ei tangata. Muri ake i tona tuakaouanga e te oki anga ki te rangi, kua oki akaou aia ki tona turanga mua ei angera maata koia oki ko Mikaela, “kia kakā te Atua Metua.”​—Philipi 2:11.