Rọ Aro Kele Ẹrọwọ rai

O Wuhrẹ Erọvrẹ Mi Olori Na

UMINITI yena nọ Pita avọ Olori riẹ a ro gbẹro ku ohwohwo na, o rẹ thọrọ Pita ẹro vievie he. Kọ ọ jọ ovao Jesu ruẹ evedha hayo oka igbamẹ? Ma sae ta ha; oware nọ ikuigbe nọ a rọ ẹzi kere na e ta họ, “Ọnowo na, o te kuomarẹriẹ ri Pita.” (Luk 22:61) Rekọ ẹsiẹvo yena nọ Jesu o rri rie na, o lẹliẹ Pita ruẹ epanọ oware nọ o ru na u gbo te. O vuhumu inọ uzedhe oware nọ Jesu ọ ta nọ Pita o ti ru nọ Pita ọ vravro fihọ inọ ọ sai ru vievie he na oye o ru na—ọ vro Olori riẹ nọ o you gaga na. Oma o lọhọ Pita thesiwa, ẹsejọhọ onana o jọ etoke nọ oware o da riẹ kpaobọ evaọ ẹdẹ nọ ọ mai yoma kẹe evaọ uzuazọ.

Dede na, o nwani dhesẹ nọ u re kẹe no ho. Fikinọ Pita o wo ẹrọwọ ọgaga, o gbe wo uvẹ nọ ọ sae rọ ruẹrẹ usu riẹ họ kugbe Jesu je wuhrẹ oware ulogbo jọ mi ei. Oware yena họ erọvrẹ. U fo nọ ma re wuhrẹ oware ovona re, fikiere joma rọ kpahe Pita re ma ruẹ epanọ o ro wuhrẹ oware nana nọ o lọhọ họ na.

Ọzae nọ O Wo Eware Buobu nọ O ti Wuhrẹ

Nọ a jọ Kapaniọm, ẹwho Pita oware wọhọ emera ezeza nọ i kpemu, Pita ọ nyabru Jesu jẹ nọe inọ: “Olori, bro ẹse omoni mẹ o re ru omẹ thọ no mẹ jẹ rọ vrẹ e? Kọ u re te asiahrẹ?” Ẹsejọhọ Pita o je roro nọ ọyomariẹ o rolobọ gaga. Ọ rẹ sai roro ere keme isu egagọ oke yena a je wuhrẹ ahwo inọ isiasa ọvo ohwo ọ rẹ rọ vrẹ ọrivẹ riẹ! Jesu ọ ta kẹe inọ: ‘Asiahrẹ hẹ, rekọ ri te udhẹse-osa gbe ikpegbihrẹ.’—Matiu 18:21, 22.

Kọ Jesu ọ be jọ etenẹ ta kẹ Pita inọ ọ hai kere unuẹse nọ a ru rie thọ fihotọ? Ijo; ukpoye, ẹkwoma uyo nọ ọ kẹ inọ orọnọ asiahrẹ hẹ rekọ asia udhosa gbe ikpegbihrẹ, Jesu ọ rọ ere dhesẹ inọ u wo unuẹse nọ a rẹ rọ vrẹ ohwo te he. Eme Jesu na i dhesẹ inọ eriwo Pita na yọ orọ evega gbe ẹzi ababọ erọvrẹ nọ o dotọ fia oke yena, onọ ohwo o re ro kele unuẹse nọ omọfa o ru rie thọ gbe unuẹse nọ ọ rẹ rọ vrẹ riẹ. Dede na, erọvrẹ Ọghẹnẹ i vi ere.

Pita o lele Jesu vravro kpahe onana ha. Kọ ginọ uzẹme inọ eme Jesu na i te Pita udu? Ẹsejọ, okenọ ma tẹ gwọlọ erọvrẹ mi amọfa ẹsiẹe ma rẹ mai ro vuhu epanọ erọvrẹ i wuzou. Enẹna joma wariẹ rọ iroro kpohọ eware nọ e via taure Jesu o te ti whu. Evaọ etoke obẹbẹ yena nọ Jesu ọ rẹriẹ ovao dhe na, Pita o ru Olori riẹ eware buobu nọ ọ jọ gwọlọ erọvrẹ.

Eware Buobu nọ Ọ Jọ Gwọlọ Erọvrẹ

O jọ owọwọ nọ o rẹ thọrọ ẹro ho—aso urere taure Jesu o te ti whu. Jesu o gbe wo eware buobu nọ ọ gwọlọ wuhrẹ ikọ riẹ—wọhọ oriruo, evaọ abọ omaurokpotọ. Jesu o fi oriruo h’otọ kẹ ae ẹkwoma awọ rai nọ ọ wozẹ, iruo nọ odibo nọ ọ mae kawo o re ru evaọ oke yena. Orọ ọsosuọ, Pita ọ nọ Jesu oware nọ o je bi ru oyena. Ọ tẹ se inọ Jesu ọ wozẹ awọ riẹ hẹ. Uwhremu na, Pita o te sikẹ inọ orọnikọ awọ riẹ ọvo Jesu ọ rẹ wozẹ hẹ rekọ te abọ gbe  uzou riẹ! Jesu ọ dheva kẹ Pita ha, rekọ ọ rọ oma totọ dhesẹ otofa oware nọ o bi ru na gbe oware nọ u ro wuzou.—Jọn 13:1-17.

Omoke jọ o nwane vrẹ no, ikọ na a te mu ikẹ họ esi kpahe ohwo nọ ọ mae rro evaọ udevie rai. U muẹro nọ Pita o kuomagbe ikọ edekọ na evaọ oware omovuọ nana. Ghele na, Jesu ọ rọ unu kpotọ kpọ ae họ, je tube jiri ai dede kẹ oware ezi jọ nọ a ru—a dadamu Olori rai. Dede na, ọ ta kẹ ae inọ aikpobi na a te dhẹ siẹe ba. Pita ọ kpahe zihe kẹe inọ ọ te dadamu ei makọ rite uwhu dede. Rekọ Jesu ọ ta inọ taure ọkpa o te ti bo isiava aso yena, Pita ọ te vro riẹ isiasa. Pita ọ vro ẹme Jesu nana, je tube seha inọ o tẹ make rọnọ ikọ edekọ na kpobi a dhẹ siọ Jesu ba, ọyomariẹ ọ te dhẹ vievie he!—Matiu 26:31-35; Mak 14:27-31; Luk 22:24-28.

Kọ onana o lẹliẹ eva Pita dha Jesu? Uzẹme riẹ họ, evaọ etoke obẹbẹ nana kpobi, Jesu ọ gbẹ jẹ tẹrovi abọ owoma ikọ sebaẹgba riẹ na. Ọ riẹ inọ Pita ọ te vro riẹ, ghele na ọ ta kẹe nọ: “Mẹ lẹ kẹ owhẹ re ẹrọwọ ra ọ seba ere; jegbe oke nọ whọ wariẹ kurẹriẹ no who ve ru imoni ra ga.” (Luk 22:32) Jesu ọ rọ enẹ dhesẹ nọ o wo evaifihọ inọ Pita ọ tẹ wariẹ kru ga jẹ ruabọhọ ẹrọwọ riẹ. Ẹwo gbe erọvrẹ Jesu i gbunu kẹhẹ!

Uwhremu na nọ a kpohọ ọgbọ Getsemane, Pita o ru eware efa nọ e gwọlọ erọvrẹ. Jesu ọ ta kẹe avọ Jemis gbe Jọn inọ a lele iei rroro nọ ọyomariẹ ọ be nyae lẹ na. Jesu ọ jọ ẹrova gaga jẹ gwọlọ ohwo nọ ọ rẹ bọe ga, rekọ Pita avọ ikọ edekọ na a jẹ wezẹ vrẹ. Jesu ọ tẹ ta eme nana nọ i dhesẹ inọ o wo ororokẹ gbe erọvrẹ: “O ghinẹ ruọ ẹzi, rekọ uwo o [lọhọ].”—Mak 14:32-38.

U ri kri hi na, ogbotu ahwo jọ nọ i kru ikpẹ jẹ wha egbọdọ gbe elọkọ a tẹ nya ze. Onana yọ oke nọ a jọ gwọlọ omoyọrọ gbe orimuo. Rekọ Pita ọ rọ okpakpa yolo ọgbọdọ ze jẹ nyawo ozọ Malkọs, odibo ozerẹ okpehru na la no. Jesu ọ rọ udu kpotọ kpọ Pita họ, ta ozọ ọzae na họ, jẹ ta oware nọ u gbe fo re a ru ozighi hi, yọ ehri-uzi nana o gbẹ be kpọ ilele riẹ rite inẹnẹ. (Matiu 26:47-55; Luk 22:47-51; Jọn 18:10, 11) Whaọ, Pita o ru Olori riẹ eware buobu thọ no nọ o jọ gwọlọ erọvrẹ. Onana o rẹ sae kareghẹhọ omai inọ “eva idhere buobu ma bi ro ru thọ.” (Jemis 3:2) Ono evaọ usu mai o re ru Ọghẹnẹ thọ kẹdẹ kẹdẹ nọ o jọ gwọlọ erọvrẹ hẹ? Rọkẹ Pita, eware efa e te gbẹ thọe obọ aso ọvo yena. Onọ o mai yoma o gbẹ rrọ obaro be tha.

Ethobọ Pita nọ E Mae Rro

Jesu ọ ta kẹ ahwo nọ a wọ bru ae ze na inọ otẹrọnọ ọyomariẹ a be gwọlọ, jọ a kẹ ikọ riẹ uvẹ re a nyavrẹ. O da Pita gaga inọ a be gba Jesu vrẹ ababọ ohwo ọvo nọ ọ be kioja. Kẹsena, Pita ọ tẹ dhẹ wọhọ epanọ ikọ edekọ a ru.

Pita avọ Jọn a tẹ dowọji omojọ, ẹsejọhọ kẹle uwou Annas, ọnọ ọ jọ Ozerẹ Okpehru vẹre, oria ọsosuọ nọ a rehọ Jesu kpohọ nyae nọ enọ. Nọ a be rehọ Jesu no etẹe na, Pita avọ Jọn a tẹ rọ kpahe ae, rekọ “eva ugbo.” (Matiu 26:58; Jọn 18:12, 13) Orọnọ Pita yọ ọdhozọ họ. Ọmọziẹ aruọwha ha re a tube lele ogbotu na ukuke dede! Ogbotu na a wha egbọdọ gbe elọkọ, yọ Pita o bru ozọ omọvo rai jọ ẹsiẹe. Dede na, evaọ etenẹ, ma jọ oma Pita ruẹ oghẹrẹ ọtalamuo nọ o seha riẹ vẹre na ha—inọ ọ rẹ sai whu lele Olori riẹ otẹrọnọ o gwọlọ ere.—Mak 14:31.

Wọhọ Pita, ahwo buobu nẹnẹ a rẹ gwọlọ jọ “eva ugbo” lele Kristi—evaọ oghẹrẹ nọ ohwo ọvo o re ro muẹrohọ ae he. Rekọ wọhọ epanọ Pita omariẹ o kere uwhremu na, uvi edhere ọvo nọ ma re ro lele Kristi họ, ma rẹ dadamu ei, rọ aro kele oriruo riẹ kpekpekpe  evaọ eware kpobi, ghelọ uye nọ u re noi ze kẹhẹ.—1 Pita 2:21.

Pita ọ rọ areghẹ lele ogbotu na ukuke bẹsenọ o ro te unuẹthẹ ighẹ ilogbo jọ evaọ Jerusalẹm, uwou Kayafas, ozerẹ okpehru nọ o fe gaga. A jẹ hae bọ iwou itieye na wariẹ avọ otegu ologbo nọ ọ rẹ jọ udevie ighẹ na, gbe unuẹthẹ nọ o rẹ jọ obaro. Nọ Pita o te unuẹthẹ ighẹ na, a kẹ riẹ uvẹ rueva ha. Jọn nọ ọ rueva no vẹre o te zihe nyae vuẹ ohwo nọ o bi riwi unuẹthẹ na inọ ọ kẹ Pita uvẹ rueva. Rekọ o wọhọ nọ Pita ọ jọ kẹle Jọn he; yọ ọ rueva uwou na nyai dikihẹ gba Olori riẹ hẹ. Ọ daji otegu ighẹ na, oria nọ idibo jọ a be jọ ria erae fiki ekpahe nọ e jariẹ aso yena, yọ ọ be jọ etẹe ruẹ isisẹri erue nọ e be nyaze unọjọ utọjọ be wọ eku họ Jesu uzou nọ a be rehọ iẹe guẹdhọ evaọ uwou na.—Mak 14:54-57; Jọn 18:15, 16, 18.

Fikiọ elo erae na, ọmọtẹ nọ ọ kẹ Pita uvẹ rueva ighẹ na ọ tẹ ruẹ ovao riẹ ziezi. Ọmọtẹ na o vuhu Pita. Ọ tẹ ta kẹe nọ: “Whẹ avọ Jesu, ohwo Galili na a gbẹ jọ re.” Fikinọ o rẹro oware utiona ha, Pita ọ tẹ se inọ ọ riẹ Jesu hu—inọ ọ tubẹ riẹ ẹme nọ ọmọtẹ na ọ be ta dede he. Ọ tẹ nyai dikihẹ kẹle unuẹthẹ ighẹ na, be gwọlọ kuọ oma dhere, rekọ ọmọtẹ ọfa jọ o te muẹrohọ iẹe, jẹ ta ẹme ọvona: “Ohwo ọnana avọ Jesu obọ Nazarẹt a gbẹ jọ re.” Pita ọ tẹ vro avọ ehao ebọwo inọ: “Mẹ riẹ ohwo na ha.” (Matiu 26:69-72) Ẹsejọhọ nọ Pita ọ vro Jesu orọ avivẹ nana no o ro yo edo ọkpa nọ o bo, rekọ fiki iroro nọ i bu rie udu hrọ, ọ sae kareghẹhọ ẹme nọ Jesu ọ ta kẹe euwa jọ nọ i kpemu hu inọ ọ tẹ vro riẹ.

Nọ oke o be nya na, Pita o te gbe bi ru re a siẹe ba evuhu. Rekọ ahwo jọ nọ a dikihẹ otegu na a tẹ nya kẹle iẹe. Omọvo rai jọ yọ omoni Malkọs, odibo nọ Pita ọ nyawo ozọ riẹ na. Ọ tẹ ta kẹ Pita nọ: “Mẹ ruẹ owhẹ avọ iẹe obọ ọgbọ?” Pita ọ tẹ ruẹ nọ u ku bae no, o re ru oware kpobi ro ru ahwo na roro nọ a ta thọ. Fikiere, o te bi duwu omariẹ iyei, ẹsejọhọ be ta nọ ekela i re tei otẹrọnọ ọrue ọ be ta na. Nọ ẹme na ọ gbẹ riẹe unu na, ọkpa o te bo—ubo avivẹ ọkpa nọ Pita o yo aso yena.—Jọn 18:26, 27; Mak 14:71, 72.

Whaọ, a rọ Jesu ziọ ogebara nọ o rẹriẹ ovao ku otegu ighẹ na no. Ẹsiẹe ọyomariẹ avọ Pita a ro gbẹro ku ohwohwo wọhọ epanọ ma jọ emuhọ dhesẹ na. Ẹsiẹe Pita o ro vuhu oware ulogbo nọ o ru Olori riẹ. Pita avọ udu nọ u bi brukpei ọ tẹ ruọ otafe. Ọ tẹ ruọ iyẹrẹ okpẹwho na, nọ otọ kpobi o rrọ vevẹ fiki elo ọvẹre nọ o ghelie no. Eware kpobi i bi reghe iei aro. Oviẹ o gba riẹ udu. O te duruọ oviẹ.—Mak 14:72; Luk 22:61, 62.

 Nọ ohwo o te vuhu epanọ ethobọ riẹ e gbẹdẹ te, o sae jariẹ oma inọ uzioraha riẹ na u vi epanọ o re ro wo erọvrẹ. Ẹsejọhọ Pita o je roro ere re. Kọ ginọ uzẹme inọ Pita ọ te sai wo erọvrẹ hẹ?

Kọ Ethobọ Pita I Kpehru Vi Erọvrẹ?

A gbe du ta ha epanọ edada Pita e ga te nọ oke u rie no, nọ eware efa i muhọ ẹvia ẹdẹ yena. Avro ọ riẹ hẹ inọ Pita o brukpe omariẹ gaga nọ Jesu o whu no uvo ẹdẹ yena nọ a gboja kẹe euwa buobu no! Ẹsejọhọ udu o jẹ hae nyawo Pita oke kpobi nọ o roro kpahe epanọ o ro fiba edada Olori riẹ evaọ ẹdẹ urere uzuazọ riẹ wọhọ ohwo-akpọ. Oghẹrẹ kpobi nọ onana o da Pita te kẹhẹ, ọ kuvẹ hẹ re iroro obrukpe i whrehe ẹrọwọ riẹ. Ma riẹ onana keme ikuigbe na e ta nọ u kri hi re ọyomariẹ avọ ikọ nọ i kiọkọ a te ti kuomagbe. (Luk 24:33) Ababọ avro, ikọ na kpobi a vioja fiki uruemu nọ a dhesẹ aso ọyena, rekọ a sasa ohwohwo oma nọ a wariẹ kuomagbe no.

Onana yọ emamọ oware jọ nọ Pita o ru. Otẹrọnọ odibo Ọghẹnẹ jọ ọ nyathọ, orọnikọ epanọ uzioraha riẹ o rro te họ oware nọ o mae r’oja ha, rekọ ọtamuo nọ ọ rẹ rọ kpọ idhere riẹ vi je zihe bru Ọghẹnẹ ze. (Itẹ 24:16) Pita o dhesẹ uvi ẹrọwọ ẹkwoma oma nọ o kugbe inievo abọ-ẹzi riẹ ghelọ uweri nọ o jariẹ oma. Nọ ohwo ọ tẹ rrọ uweri hayo wo elọhoma fiki ethobọ jọ, o rẹ jariẹ oma inọ ọ jọ oriẹ sa, rekọ oma ohẹriẹ no amọfa o rẹ wha enwoma ze. (Itẹ 18:1) Oware areghẹ nọ ma re ru họ, ibe Ileleikristi mai nọ ma re bigba re ma sae wariẹ bọ edikihẹ abọ-ẹzi mai ga.—Ahwo Hibru 10:24, 25.

Fikinọ Pita ọ jọ kugbe inievo abọ-ẹzi riẹ, o yo okenọ usi u do ze inọ uki Jesu o rrọ ufofe. Pita avọ Jọn a tẹ dhẹ kpohọ oria nọ a ki Jesu fihọ nọ a wuhu unu riẹ di na. Jọn, ọnọ o wọhọ nọ ọ mae maha evaọ usu rai imava ọ kaki te obei. Nọ ọ ruẹ uki na nọ u rovie fihọ, ọ tẹ d’owọ ji. Rekọ ozọ u mu Pita ha. Dede nọ Pita ọ jẹ wẹ fuele  fuele fiki ohrẹ na, o du ruọ eva uki na. O jọ ufofe!—Jọn 20:3-9.

Kọ Pita ọ rọwo nọ Jesu ọ kparoma no? Ọ rọwo ẹsiẹsiẹe he, dede nọ eyae nọ i wo ẹrọwọ e ta kẹ ae inọ ikọ-odhiwu e romavia kẹ ae jẹ vuẹ ae inọ Jesu ọ kparoma no uwhu ze no. (Luk 23:55-24:11) Rekọ taure oke u te ti kpo ẹdẹ yena, amavro kpobi nọ ọ jọ udu Pita ọ rayẹ. Jesu ọ kparoma no, ọ rrọ omama ẹzi ologbo enẹna! Ọ romavia kẹ ikọ riẹ kpobi. Dede na, ọ kaki ru oware jọ tao evaọ emu ikọ na jọ. Ikọ na e ta evaọ ẹdẹ yena inọ: “Ọnowo na ọ ghinẹ kparoma, ọ rọ oma via kẹ Saimọn!” (Luk 24:34) Epọvo na re, Pọl ukọ na o kere uwhremu na kpahe ẹdẹ igbunu yena inọ Jesu ọ “rehọ oma via kẹ Kifas, nọ u no oyeino ọ tẹ rehọ oma via kẹ ikpogbivẹ na.” (1 Ahwo Kọrint 15:5) Kifas gbe Saimọn yọ edẹ efa Pita. Jesu ọ roma via kẹe evaọ ẹdẹ yena—u muẹro inọ okenọ Pita ọvo ọ jọ oria.

Ebaibol na e vuẹ omai hi eware nọ e via evaọ oke nana nọ Jesu ọ roma via kẹ Pita na. Rekọ o rẹ sai mu omai ẹro inọ eva e were Pita gaga nọ ọ ruẹ Olori riẹ nọ ọ kparoma no, jẹ rọ uvẹ na ta epanọ oware nọ o ru Jesu na o da riẹ te je wounu kẹe. Oware nọ o mae jọ Pita oja kpobi họ erọvrẹ. Ono ọ rẹ vro inọ Jesu ọ rọ vrẹ Pita ha, jẹ tubẹ sasa iẹe oma dede he? U fo re Ileleikristi nọ i kie ruọ uzioraha nẹnẹ a kareghẹhọ oware nọ o via kẹ Pita na. Joma roro vievie he inọ uzioraha mai u kpehru vi epanọ Ọghẹnẹ ọ sae rọ vrẹ omai. Jesu o dhesẹ uruemu Ọsẹ riẹ gbagba, Ọnọ ọ “rẹ te rehọ vrẹ” evaọ edhere ologbo.—Aizaya 55:7.

Imuẹro Erọvrẹ Efa

Jesu ọ vuẹ ikọ riẹ inọ a kpohọ Galili, obonọ a te jọ wariẹ rue riẹ. Nọ a te obei, Pita ọ tẹ jiroro nọ ọ rẹ nyai kpe iyei evaọ Abade Galili. Ikọ efa jọ i lele i rie. Pita ọ wariẹ te awae nọ ọ jọ kpe iyei no otọ ze no. Fikiere, o wọhọ nọ edo ame nọ ọ be tehe okọ na, ame nọ ọ be wọ kpotọ kpehru, gbe iriri nọ o kru na e kareghẹhọ iẹe edẹ nọ i kpemu. Kọ o sae jọnọ evaọ aso yena o je roro kpahe oware nọ ọ rẹ rọ uzuazọ riẹ ru enẹna nọ odibọgba otọakpọ Jesu o kuhọ no na? Kọ uzuazọ okuori u bi si ei urru? Oghẹrẹ nọ o jọ kpobi kẹhẹ, a kpe uvumọ eri aso yena ha.—Matiu 26:32; Jọn 21:1-3.

Dede na, nọ oke u rie no, a te yo urru ohwo jọ evaọ obọ okpa, nọ ọ be ta kẹ ae nọ a fi iriri rai họ ame evaọ abọdekọ okọ na. A ru ere, ẹriri na o te mu iyei udhuhrẹ gbe ikpegbesa (153) nọ a si ruọ okọ! Pita ọ tẹ nwani vuhu ohwo na. Ọ tẹ la no okọ na ruọ ame jẹ ya ruọ okpa. Nọ aikpobi a ziọ okpa no, Jesu ọ tẹ kẹ ae eri nọ ọ rọ tọ. Ọ tẹ rẹriẹ ovao ku Pita.

Jesu ọ nọ Pita sọ o you rie “vi enana”—ẹsejọhọ be riobọ rri iyei nọ a kpe na. Kọ uyoyou Pita kẹ iruo iyei ikpe na o rro vi uyoyou riẹ kẹ Jesu? Wọhọ epanọ Pita ọ vro Olori riẹ isiasa na, ere ọvona Jesu ọ jọ etenẹ kẹe uvẹ isiasa nọ ọ rọ jọ iraro ikọ nọ i kiọkọ na kẹ imuẹro uyoyou nọ o wo kẹ Jesu. Nọ Pita o bi ru ere na, Jesu ọ tẹ vuẹe epanọ ọ sai ro dhesẹ uyoyou utioye na: ẹkwoma eware abọ-ẹzi nọ ọ rẹ rọ kobaro kẹ eware efa kpobi, rọ emu abọ-ẹzi ko jẹ rẹrote igodẹ Kristi, ilele Jesu.—Jọn 21:4-17.

Jesu ọ rọ ere kẹ imuẹro inọ ọyomariẹ avọ  Ọsẹ riẹ a gbe rri Pita ghaghae. Pita ọ te jọ ukoko Ileleikristi na wo obọdẹ owha-iruo evaọ otọ ekpakpọ Kristi. Imuẹro erọvrẹ nọ Jesu o wo kẹe e rro kẹhẹ! Uzẹme, ohrọ-oriọ nana nọ a dhesẹ kẹ Pita na u te rie udu.

Pita ọ rọ ẹrọwọ ru iruo nọ a kẹ riẹ evaọ ikpe buobu. Ọ bọ inievo riẹ ga, wọhọ epanọ Jesu ọ vuẹ riẹ aso urere taure o te ti whu. Pita ọ rọ ẹwo gbe odiri rẹrote jẹ ko ilele Jesu. Saimọn ọ tẹ te ginẹ rria te odẹ nọ Jesu ọ kẹ riẹ na—Pita hayo Utho—ẹkwoma edikihẹga gbe ajọwha riẹ nọ u fi obọ họ ru amọfa evaọ ukoko na ga. Ma rẹ ruẹ imuẹro onana evaọ ileta ejaja ivẹ nọ Pita ọ rọ obọriẹ kere, nọ i zihe ruọ abọjọ ebe Ebaibol na. Ileta yena i te je dhesẹ inọ oware nọ Pita o wuhrẹ mi Jesu kpahe erọvrẹ o thọrọ e riẹ ẹro vievie he.—1 Pita 3:8, 9; 4:8.

Joma si uwuhrẹ yena te udu re. Kọ ma be hae yare Ọghẹnẹ kẹdẹ kẹdẹ inọ ọ rọ vrẹ omai fiki iruthọ ibuobu mai? Kọ ma be hai wo imuẹro kpahe erọvrẹ yena jẹ rọwo inọ erọvrẹ Ọghẹnẹ o rẹ sai ru omai fo? Kọ ma be hae rọ vrẹ amọfa nọ i ru omai thọ re? Ma te bi ru ere, koyehọ ma be raro kele ẹrọwọ Pita—gbe ohrọ-oriọ Olori riẹ.

[Ẹme nọ a fi ẹgba họ nọ ọ rrọ ẹwẹ-obe avọ 22]

Pita o ru Olori riẹ eware buobu thọ nọ o jọ gwọlọ erọvrẹ, kọ ono evaọ usu mai ọ rẹ gwọlọ erọvrẹ mi Ọghẹnẹ kẹdẹ kẹdẹ hẹ?

[Uwoho nọ o rrọ ẹwẹ-obe avọ 23]

“Ọnowo na, o te kuomarẹriẹ ri Pita”

[Uwoho nọ o rrọ ẹwẹ-obe avọ 24]

“Ọnowo na . . . ọ rọ oma via kẹ Saimọn!”