Aligen so Pananisia Ra

Akaaral si Pedro ed Panamerdona na Katawan

AGBALOT nalinglingwanan nen Pedro iman a bekta sanen sikatoy ninengneng nen Jesus. Kasin anengneng to ed mata na Katawan to so impakadismaya odino pakakapasnok? Agtayo naseguro itan ta say imbaga labat na Biblia et “linmingaw so Katawan tan ninengneng toy Pedro.” (Lucas 22:61) Balet diad saman ya inlinggis nen Jesus, atalosan nen Pedro so kabaleg na lingo to. Tan diman to labat atalosan ya agawaan to imay mismon impasakbay nen Jesus, samay imbaga ton agton balot gawaen. On, imburi toy inad-aro ton Katawan. Talagan naer-ermenan si Pedro ed saman a ginawa to, ompan alikna to ni ingen a saman la so sankaermenan a bekta ed bilay to.

Balet, agkabaliksan na saya ya anggapo lay ilalo nen Pedro. Mabiskeg so pananisia to kanian sarag to nin ipetek iray lingo to tan makaaral ed maabig a leksion ya imbangat nen Jesus nipaakar ed panamerdona. Nepeg tayo met a naaralan itan, kanian pantongtongan tayo so impakaaral nen Pedro ed sayan mairap a leksion.

Dakel ni so Kaukolan Ton Aralen

Manga anem bulan antis na satan, diad baley to a Capernaum et inasinggeran nen Pedro si Jesus tan tinepetan to: “Katawan, anggad maminpiga a perdonaen koy agik a mankasalanan ed siak? Anggad maminpito?” Mapatnag ya inisip nen Pedro a mabulos lay pameperdona to. On, ta nensaman et ibabangat na saray lider na relihyon a nepeg a mamitlo labat so pamerdona! Inmebat si Jesus: “Aliwa ya, Anggad maminpito, noagta, Anggad maminpitomplo tan pito.”​—Mateo 18:21, 22.

Kasin say labay ya ibaga nen Jesus et ilista nen Pedro so lingo na arum? Andi. Sanen imbaga ton nepeg a magmaliw a 77 imay 7 ya imbaga nen Pedro, say labay ton ibaga et agnepeg a bilangen so pamerdona. Impanengneng nen Jesus a si Pedro so naimpluensyaan na ugali na maslak a totoo’d saman a panaon. Anawet so puso ra tan mairap day mamerdona, a singano ra managkuenta a mangirerekord ed amin a kasalanan ed sikara. Balet, say panamerdonan labay na Dios et malaknab tan mabulos.

Agla nankatunongan si Pedro. Balet, talaga kasin akasabi’d puso to imay imbaga nen Jesus? No maminsan et mas makaaral itayon mamerdona sano sikatayon mismo so makalikna a kakkaukolan tayo itan. Pawilen tayo sirin iramay agawa sakbay na impatey nen Jesus. Diad saraman ya oras, dakel so agawa nen Pedro a mankaukolay panamerdona na Katawan.

Lalo a Nakaukolan Toy Panamerdona

Agnalinglingwanan iman a labi​—say sampot a labi nen Jesus diad dalin. Dakel ni kaukolan ton ibangat ed saray apostol to, a singa say inkamapaabeba. Impanengneng to itan sanen inurasan toy sali ra. Sayan kimey et maslak a gagawaen na saray sankaabebaan ya aripen. Diad primero et kontra si Pedro ed gagawaen nen Jesus tan agto labay a paurasan iray sali to. Balet, impilit to lanlamang a paurasay sali to pati say  ulo to tan saray lima to! Ingen, agnaandi so pasensia nen Jesus, noagta kalmado ton impaliwawa so kaimportantian tan kabaliksan na gagawaen to.​—Juan 13:1-17.

Balet, ag-abayag et nansasangsangan iray apostol no siopay manunaan ed sikara. Seguradon kaibay Pedro ed satan a makapabaing a panagpaatagey. Anggaman ontan, maaro iran impetek nen Jesus tan kinomendaan to ni ra ingen ed katooran da, a nansiansia ra’d Katawan da. Ingen, impasakbay to a sikatoy taynan dan amin. Imbaga nen Pedro ya agton balot taynan si Jesus anggan ipatey to ni ingen itan. Impasakbay balet nen Jesus a diad satan a mismon labi, antis ya onkukaok a mamidua so sakey a lalong et mamitlon iburi nen Pedro so Katawan to. Aglabat iya kinontra nen Pedro noagta impasirayew to ni a sikatoy mas manmatoor nen say arum ya apostol!​—Mateo 26:31-35; Marcos 14:27-31; Lucas 22:24-28.

Napasensyaan ni kasi nen Jesus si Pedro? On, ta say nenengnengen nen Jesus ed saray aliwan perpekton apostol to et say kamaongan da anggaman wala ra’d mairap a panaon. Amta ton sikatoy iburi nen Pedro, ingen ta imbaga to: “Impikasi ta ka lan masimsimoon ta pian ag-onkapuy so pananisiam; tan sano akapawil ka la, pabiskeg mo iray agagim.” (Lucas 22:32) Sirin, nanmatalek si Jesus ya ipetek nen Pedro iray lingo to tan ompawil ed matoor a panaglingkor to. Talagan maomaong si Jesus tan mainomay a mamerdona!

Ag-abayag, aminpiga lamet a nipetek si Pedro sanen wala ra’d hardin na Getsemani. Kinerew nen Jesus ed sikato pati di Santiago tan Juan a mantultuloy iran manbantay legan a Sikatoy manpipikasi. Diad saman et maniirap a maong so liknaan nen Jesus tan kaukolan toy suporta, balet ta aminpigan akaugip si Pedro tan saray kakaiba to. Ingen, lapud pililikna tan panamerdona nen Jesus et oniay imbaga to: “Magunaet so espiritu, balet maletey so laman.”​—Marcos 14:32-38.

Kabebekta, walay grupon sinmabi. De-awit ira na silew tan armado iray espada tan pekpek. Saya la so panaon a kaukolan di Pedro so manalwar tan agbengatbengat. Balet, agla nannonot si Pedro tan sinigbat ton tampol si Malco ya aripen na atagey a saserdote, tan atapyas so layag to. Ingen, kalmadon impetek nen Jesus si Pedro, pinaabig toy sugat, tan impaimano toy sakey a prinsipyo na agpagmaliw a bayolenti ya iyaaplika ni anggad natan na papatumbok to. (Mateo 26:47-55; Lucas 22:47-51; Juan 18:10, 11) Dakel lay agawa nen Pedro a mankaukolay panamerdona na Katawan to. Ipapanonot na satan ya “amin tayo et naynay a nalilingo.” (Santiago 3:2) Wala ta’y agmankaukolan na panamerdonay Dios diad kada agew? Balet, dakel ni mas graben nagawa ed si Pedro ed saman a labi.

Sankagrabian a Lingo nen Pedro

Imbaga nen Jesus ed grupo a no sikato labat so aanapen da, paulyanan da lan onalis iray apostol to. Anggapoy agawaan nen Pedro sanen babaloren da lay Jesus. Sikatoy binmatik, pati saray arum ya apostol.

Akasabi ira di Pedro tan Juan diad asingger ed abung na datin Atagey a Saserdoten si Anas, a diman so primeron angawitan ed si Jesus. Sanen iyaakar lay Jesus diman, tinmumbok ira di Pedro tan Juan balet wala ra’d “bandad arawi.” (Mateo 26:58; Juan 18:12, 13) Aliwan payakot si Pedro ta kaukolan a talaga so pakpel pian makatumbok. Armado imay grupo, tan asugatan la nen Pedro so sakey ed sikara. Ingen, agtayo dia nanengneng so matoor ya aro ya impaseguro ton mismo ed gapo​—anggano nakaukolan ya ompatey et agto taynan so Katawan to.​—Marcos 14:31.

Singa si Pedro, panseseetan na dakel natan so ontumbok ed Kristo balet wala ra’d “bandad arawi” ta labay dan ag-ira naimanoy arum. Balet  diad saginonor et insulat nen Pedro a no labay tayon natumbok so Kristo ed dugan paraan, kaukolan tayon gawaey anggaay nayarian tayon onapit ed sikato, ya aligen tayon amin so alimbawa to, antokaman so nagawa.​—1 Pedro 2:21.

Maal-alwar ya inmasingger si Pedro ed puerta na sakey ed saray sankabalegan a mansyon ed Jerusalem. Abung itan na mayaman tan maimpluensyan atagey a saserdoten si Caifas. Kaslakan et walay sular na saratan ya abung tan walay puerta to’d arap. Akaasingger lay Pedro ed puerta balet agda pinaloob. Diad saman et wala la’d loob si Juan tan kinombinse to imay bantay kanian akaloob si Pedro. Mapatnag ya arawi si Pedro ed si Juan, tan agto met sinali so onloob ed abung pian mansiansia ed abay na Katawan to. Sikatoy wadman labat ed sular, a kaiba na pigaran aripen tan lingkor a mandadangdang tan manbabantay legan ya onloloob tan ompapaway iray palson testigo.​—Marcos 14:54-57; Juan 18:15, 16, 18.

Lapud liwaway apoy, si Pedro et alupaan na samay biin bantay ed puerta. Kabat toy Pedro kanian oniay inkuan to: “Sika met, kaiba ka nen Jesus a taga Galilea!” Abiglay Pedro, kanian imbaga ton agto kabat si Jesus tan inkuan to ni ingen ya agto amta so ibabaga na samay bii. Inmalagey si Pedro ed abay na puerta pian agnaimano balet siansia nin abidbir na sananey nin bii a nankuan: “Sayan too et kaiba nen Jesus a Nazareno.” Ingen, insamba nen Pedro: “Agko kabat itan a too!” (Mateo 26:69-72) Nayarin diad sayan komaduan impangiburi to so impakadngel to’d inkukaok na lalong, balet sikatoy naaaburidon maong kanian alingwanan to imay impropesiya nen Jesus pigaran oras ni labat so linmabas.

Kayari na satan, siansia nin pinmaliis si Pedro pian agnaimano na arum. Balet sikatoy inasinggeran na sakey a grupo na totoo a wadman ed sular. Say sakey ed sikara et kanayon nen Malco, samay aripen a sinigbat nen Pedro. Inkuan to’d si Pedro: “Agta sika imay anengneng kon kaiba to ed hardin?” Labay nen Pedro a paneknekan a nalilingo ra kanian sikatoy nansamba, ya imbaga ton walay mauges a nagawa’d sikato no mantitila. Kapkapangibaga to ni labat ed satan et kinmukaok a tampol so lalong​—say komaduan kukaok a nadngel nen Pedro ed saman a labi.​—Juan 18:26, 27; Marcos 14:71, 72.

Kabekta et pinmaway si Jesus ed balkonahe a ditan et sankabantag so sular. Singa adeskribe ed gapo, nilinggis toy Pedro. Diman atalosan nen Pedro so kabaleg na kasalanan to’d Katawan to. Lapud nakokonsiensian maong si Pedro, sikatoy tinmaynan tan nanakar-akar ed saray karsada na syudad, a naliliwawaan na managaag a bulan. Maguloy kanonotan to. Kabekta et inmagus iray lua to. Agto la napokpokay liknaan to tan inmaki-akis.​—Marcos 14:72; Lucas 22:61, 62.

Diad oniaran situasyon, magmainomay ya  isipen na sakey a lapud grabe lay kasalanan to et agla itan naperdona. Nayarin ontan met so inisip nen Pedro. Ontan kasin talaga?

Kasin Agla Naperdona si Pedro?

Isip mo pa labat so ermen ya alikna nen Pedro legan ya ombubutay so agew, tan nagkalalo la sanen naamtaan to iray nagawa ni’d saman ya agew. Seguradon tinetel toy inkasikato sanen inatey si Jesus ed saman a ngarem kayari na pigay oras ya impamairap ed Sikato! Maseguron nakokonsiensian maong si Pedro no naiisip to ya akaarum imay ginawa to ed sakit ya alikna na Katawan to lapud saman la manayay sampot ya agew na bilay nen Jesus bilang too. Balet, anggaman maer-ermen a maong si Pedro, sikatoy agsinmuko. Nibaga tayon ontan ta ag-abayag et akiulop lamet ed saray agagi to. (Lucas 24:33) Andi-duaruwan say ginawa na saray apostol ed saman a labi et nagbabawian dan amin, tan niligliwa ray balang sakey.

Nanengneng tayo dia so maabig a desisyon nen Pedro. Sano napelag ed kasalanan so sakey a lingkor na Dios, say importante et aliwan say kabaleg na kasalanan to, noagta say determinasyon ton ombangon lamet. (Uliran 24:16) Impatnag nen Pedro so peteg a pananisia sanen akitipon ed agagi to anggan naeermenan a maong. Sano nabebelatan ka la lapud ermen tan pakakakonsiensia, nayarin naisip moy manbukbukor balet delikado itan. (Uliran 18:1) Say maabig a gawaen et mansiansia kan maapit ed saray agagi tan pabiskeg mo lamet so espiritualidad mo.​—Hebreos 10:24, 25.

Lapud kaiba nen Pedro iray kaagian to, nadngelan toy makapabiglan balita ya anggapo la’d lubok imay bangkay nen Jesus. Batik ira di Pedro tan Juan diad angiponponan ed si Jesus. Akaunan sinmabi si Juan ta mas ugaw ni. Sikatoy nanduaruwa ta akapotan komon itan, balet asabian ton lukas. Ingen si Pedro et dirediretson linmoob anggan naknaksawan. Anggapo la’d man so bangkay! ​—Juan 20:3-9.

Kasin anisian tampol si Pedro ya apaoli lay Jesus? Andi ni, anggano imbalita na saray matoor a bibii a nampanengneng ed sikara iray  anghel ya angibagan apaoli lay Jesus. (Lucas 23:55–24:11) Balet antis a manampot itan ya agew, nakal lan amin so ermen tan panduaruwa nen Pedro. On, mabilay si Jesus, tan sakey lan makapanyarin espiritu! Sikatoy nampanengneng ed amin ya apostol to. Balet antis na satan et wala ni ginawa to. Diad satan ya agew et inkuan na saray apostol: “Tua ya apaoli so Katawan tan nampanengneng ed si Simon!” (Lucas 24:34) Insulat met nen apostol Pablo so nipaakar ed satan ya agnalingwanan ya agew a “nampanengneng [si Jesus] ed si Cefas, insan diad sikaran labindua.” (1 Corinto 15:5) Say Cefas tan Simon et arum nin ngaran nen Pedro. Mapatnag sirin a diad satan ya agew et nampanengneng si Jesus ed si Pedro sanen bukbukor to.

Agnabasa ed Biblia iray detalye na impannengneng lamet nen Jesus tan si Pedro. Sikaran dua labat so makaamta ed satan. Maseguron atenyeg so puso nen Pedro sanen anengneng ton mabilay lamet so inad-aro ton Katawan tan nibalikas toy ermen tan pagbabawi to. Say pirawat to labat ed saman a bekta et say panamerdona na Katawan to. Tan seguradon ginawa itan nen Jesus, a mabulbulos ni ingen. Sayan agawa ed si Pedro et kaukolan a tandaan na saray Kristianon akagaway kasalanan. Agtayon balot iisipen ya ag-itayo la perdonaen na Dios. Si Jesus et kaparparan maong nen Ama to a ‘mameperdona na daakan.’​—Isaias 55:7.

Kaaruman nin Paneknek na Panamerdona

Imbaga nen Jesus ed saray apostol to ya onla ra’d Galilea ta diman ira mannenengneng. Kasabi ra’d man, si Pedro et linman nansigay ed Dayat na Galilea tan walaray akila’d sikato. Kanian, si Pedro et wadman lamet ed dayat a datin pansisigayan to. Seguradon nailiwan ton narengel so panateet na baloto, sipwak na daluyon, tan say pakabemben to lamet na iket. Natan ta asumpal lay ministeryo nen Jesus diad dalin, kasin ninonot nen Pedro ed saman a labi no anto lay gawaen to’d bilay to? Labay to kasin pawilen lamet imay simplin bilay to bilang managsigay? Antokaman so agawa, anggapon balot so narel dan sira ed saman a labi.​—Mateo 26:32; Juan 21:1-3.

Balet kasabi palbangon et walay too diad gilig na dayat ya angibagan ipelag day iket da ed bandad kawanan na baloto. Tinmulok ira tan akarel iray 153 a sira! Kabat nen Pedro iman a too. Sikatoy tinmaboy tan linmangoy a paarap ed gilig na dayat. Ditan et pinakan ira nen Jesus na inkalot a sira. Insan to kinatongtong si Pedro.

Tinepetan nen Jesus si Pedro no mas inaro toy Katawan to “nen saraya,” salanti, samay dakerakel a sira. Dinan kasi mas papablien nen Pedro​—say panagsigay odino si Jesus? No amitlon imburi nen Pedro so Katawan to, sikatoy amitlo met ya inikdan nen Jesus na pankanawnawan ipaseguroy panangaro to diad arap na kakaaro to. Kayari ton impaseguroy panangaro to, imbaga ed sikato nen Jesus no panon ton ipanengneng itan a panangaro: diad pangiyuna ed sagradon serbisyo, salanti, say pamakan tan pampastol ed pulok na matoor a papatumbok nen Kristo.​—Juan 21:4-17.

Impaseguro sirin nen Jesus a siansia nin usaren toy Pedro ed panggaway linawa na Ama to. Walay importantin betang nen Pedro ed kongregasyon diad panangidirehi nen Kristo. Mabiskeg iyan paneknek a sikatoy sigpot a pinerdona nen Jesus! Seguradon atenyeg so liknaan  nen Pedro ed satan a panangasi, tan impapuso to itan.

Matoor a sinumpal nen Pedro so kimey to ed loob na dakel a taon. Pinabiskeg to ray agagi to, unong ya ingganggan nen Jesus diad samay labi antis na ipatey To. Maaro tan maanos a pinastolan tan pinakan nen Pedro iray kinmarneron papatumbok nen Kristo. Sayan too a tinawag a Simon et kinmiwas unong ed ngaran ya inter nen Jesus ed sikato​—Pedro, odino Bato​—diad impagmaliw ton agmanguman-uman, mabiskeg, tan napanmatalkan a lapuay maabig ya impluensya ed kongregasyon. Nabasa tayo iratan diad duaran maaron sulat nen Pedro a nagmaliw ya importantin kabiangan na Biblia. Ipapatnag met na sarayan sulat to ya agbalot alingwanan nen Pedro so naaralan to’d si Jesus nipaakar ed panamerdona.​—1 Pedro 3:8, 9; 4:8.

Komon ta makaaral itayo met ed sayan leksion. Kasin inagew-agew itayon onkekerew na panamerdona ed Dios lapud naynay itayon nalilingo? Kasin panisiaan tayo a peperdonaen itayo na Dios tan nalilinisan itayo lapud satan? Tan peperdonaen tayo met kasi so arum? No ontan so gagawaen tayo, aaligen tayoy pananisia nen Pedro​—tan say inkamapangasi na Katawan to.

[Blurb ed pahina 22]

Dakel so agawa nen Pedro a mankaukolay panamerdona na Katawan to, balet wala ta’d sikatayo so agmankaukolay panamerdona ed inagew-agew?

[Litrato ed pahina 23]

“Linmingaw so Katawan tan ninengneng toy Pedro”

[Litrato ed pahina 24]

‘Say Katawan so nampanengneng ed si Simon!’