Diosar jakʼachasipxam

“Reinomasti wiñayatakirakïniwa”

2 Samuel 7:1-16

QALLTAT jichhürkamax walja apnaqirinakaw apnaqäwinakap jaytawayxapxi. Yaqhipanakarux janiw wasitat apnaqapxañapatak ajllisxiti; yaqhipasti jaqsutaw uñjasxapxaraki. Alaxpachan apnaqañapataki Diosan ajllit rey Jesucristotxa, ¿kamsnasa? ¿Reyjam apnaqañapatakix kuna jarktʼiris utjpachati? Jehová Diosax nayra Israel markan David sat reyipar siskäna uka arunakaw uka jisktʼanakar qhanañchi, ukax 2 Samuel 7 jaljapanwa jikxatasi.

Uka jaljan qalltapanxa akaw amuyasiraki, Davitax mä jaqikïkasas mä suma palacionwa qamasïna, ukampis Diosamp arustʼäwir mantat arcax mä carpanaki jikxatasitap amuyasax mayjtʼasïnwa. * Ukatwa mä suma templo Jehová Diosatak lurañ amti (2 jiskʼa tʼaqa). Ukampisa, janiw uka templo lurañapäkänti. Yuqamaw mä templo utacharapitani sasaw Jehová Diosax Natán profet tuqnämax Davitar säna (4, 5, 12, 13 jiskʼa tʼaqanaka).

Jehová Diosatakix Davitan taqi chuyma templo lurañ amtatapax wali askïnwa. Ukatwa, taqi chuyma luqtañ munir luqtiripar uñjasasa ukat profecía aruparjamas mä arustʼäwir jupampi mantäna: Jehová Diosax Davitan wawanakapatwa mä apnaqiri wiñay apnaqañapataki uttʼayani. Natán profetax kuntï Diosax amtkäna ukwa Davitar akham sas yatiyi: “Juman wawanakamax wiñayaw apnaqapxani, ukhamaraki reinomasti wiñayatakirakïniwa nayan uñjatäskarakiniwa, ukhamaraki juman tronomasa wiñayataki uttʼatapunirakïniwa” sasa (16 jiskʼa tʼaqa). Uka arustʼäwirjamaxa, ¿khitisa wiñayatak apnaqani? (Salmo 89:20, 29, 34-36.)

Davitan wawanakapatwa Nazaretankir Jesusax jutäna. Ukat yurïwipat yatiykäna uka angelax akham sasaw säna: “[Jehová Diosaw] juparux reyit uttʼayani nayra Davidarjama, Israel markar wiñay apnaqañapataki. Jupan uka markar apnaqañapax janipuniw tukuskaniti” sasa (Lucas 1:32, 33). Chiqansa, Davitampi arustʼäwir mantkäna ukax Jesucristoruw phuqasi. Janiw jaqinakan ajllitaki apnaqirjam uttʼayatäkänti, jan ukasti Diosan arsutaparjamaw wiñay apnaqañapataki uttʼayata. Diosan amtanakapax phuqasipuniniwa, ukxa janiw armañasäkiti (Isaías 55:10, 11).

Ukhamasti, 2 Samuel 7 jaljapatxa pä yatichäwinakwa yatiqsna. Nayrïrix akäspawa, janiw khitisa ni kunasa Jesusan apnaqirjam apnaqañapatak jarktʼkaspati. Ukatwa Diosan uttʼayat apnaqiripjamax Diosan munañap aka Uraqinsa alaxpachansa phuqasiyapuniniw sasax saraksna (Mateo 6:9, 10).

Ukxarusti Jehová Diosax kunjam Diosasa ukwa yaticharakistu. Davitax taqi chuyma mä templo lurañ amtkäna ukxa Diosax wali askitwa uñjäna, uk janiw armañasäkiti. Taqi chuyma Jupar yupaychañ munatasasti Diosatakix wali askipuniwa, uk yatiñaw wal chʼamañchtʼistu. Awisax usutäsinsa chuymankipstäsinsa janiw kunjamtï Diosar luqtañ munktan ukham luqtirjamäktanti. Jehová Diosax maynin taqi chuyma Jupar luqtañ munatapar wali askirjam uñjatap yatiñax ¡kunja chuymachtʼkirisa!

[Qhanañchäwinaka]