Si Kẹle Ọghẹnẹ

‘Uvie Ra U Re Dikihẹ’

2 SAMUẸLE 7:1-16

EVAỌ ikuigbe ohwo-akpọ, a si isu buobu no ekwa no. Ejọ ẹkwoma ivotu a ro si ai no, efa ogaga a ro le ai no. Rekọ ẹvẹ kpahe Jesu Kristi, Ovie ọrọ Uvie Ọghẹnẹ nọ o rrọ obọ odhiwu na? Kọ oware jọ o sai si ei no ọkwa Ovie nọ Ọghẹnẹ ọ rehọ e riẹ mu na? Ma rẹ sae ruẹ uyo na evaọ eme nọ Jihova ọ ta kẹ Devidi, ovie Izrẹl oke anwae, wọhọ epanọ a kere fihọ 2 Samuẹle uzou avọ 7.

Eme nọ i mu uzou na họ i dhesẹ inọ o kẹ Devidi uye gaga nọ ọ ruẹ nọ ọyomariẹ, ovie ohwo-akpọ gheghe, ọ be rria emamọ uwou, rekọ okọ-ọvọ Ọghẹnẹ o rrọ uwou-udhu jọ gheghe. * O jọ isiuru Devidi inọ ọ rẹ bọ emamọ uwou, hayo etẹmpol kẹ Jihova. (Owọ avọ 2) Rekọ orọnọ Devidi ọ te bọ uwou na ha. Jihova ọ rọ ẹkwoma Netan ọruẹaro na ta kẹ Devidi inọ ọmọzae riẹ họ ọnọ ọ te bọ etẹmpol na.—Owọ avọ 4, 5, 12, 13.

Isiuru nọ Devidi o dhesẹ inọ ọ rẹ bọ etẹmpol na o were Jihova gaga. Ro lele eruẹaruẹ gbe ovuhumuo kẹ ajọwha Devidi, Ọghẹnẹ ọ tẹ re-ọvo kugbei, inọ ọ te rehọ ohwo jọ mu evaọ uyẹ Devidi nọ o ti su bẹdẹ bẹdẹ. Netan ọ vuẹ Devidi eyaa igbunu Ọghẹnẹ inọ: “Uwou ra jegbe uvie ra i re dikihẹ bẹdẹ evaọ aro mẹ; mẹ vẹ te rehọ agbara uvie ra mu bẹdẹ.” (Owọ avọ 16) Ono họ Ọreuku ibẹdẹ bẹdẹ ọvọ nana—Ọnọ uvie riẹ u ti wo oba ha na?—Olezi 89:20, 29, 34-36.

Uyẹ Devidi oye Jesu obọ Nazarẹt na o no ze. Nọ ukọ-odhiwu jọ o je whowho eyẹ Jesu, ọ ta nọ: “Ọnowo na Ọghẹnẹ ọ rẹ te kẹe akaba-uvie Devidi Ọsẹ riẹ. Ọ rẹ te ria uvie uviuwou Jekọp bẹdẹ bẹdẹ; uvie riẹ u re ti wo urere he.” (Luk 1:32, 33) Fikiere, oma Jesu Kristi ọvọ nọ a re kugbe Devidi na o je rugba. Orọnikọ ahwo-akpọ a rehọ Jesu mu ovie he, rekọ ẹkwoma eyaa Ọghẹnẹ o ro wo udu esuo ibẹdẹ bẹdẹ riẹ. Joma kareghẹhọ inọ eyaa Ọghẹnẹ e rẹ seba erugba ha.—Aizaya 55:10, 11.

Ma rẹ sai wuhrẹ eware ivẹ jọ nọ i wuzou no 2 Samuẹle uzou avọ 7 na ze. Orọ ọsosuọ, o rẹ sai mu omai ẹro inọ uvumọ oware hayo ohwo ọvo ọ sae whaha Jesu Kristi esuo riẹ hẹ. Fikiere, avro ọ riẹ hẹ inọ Jesu o ti gine ru oware nọ ọyomariẹ ọ ta kpahe ẹjiroro isuẹsu riẹ na, koyehọ, re a jọ otọakpọ na ru oreva Ọghẹnẹ vọvọ wọhọ epanọ o rrọ obọ odhiwu na.—Matiu 6:9, 10.

Orọ avivẹ, ikuigbe nana i wuhrẹ omai oware omosasọ jọ kpahe Jihova. Kareghẹhọ inọ Jihova o muẹrohọ iroro iwoma nọ Devidi o wo evaọ udu riẹ, yọ o rri rie ghaghae. O rẹ kẹ omai evawere re ma riẹ inọ Jihova o bi muẹrohọ je wo evawere kpahe omarọkẹ mai evaọ egagọ riẹ. Evaọ ẹsejọ, iyero nọ ma sae whaha ha, wọhọ ẹyao hayo owho, e sai ru nọ ma gbẹ sai ru te epanọ ma gwọlọ evaọ egagọ Ọghẹnẹ hẹ. O tẹ rrọ ere, joma wo omosasọ inọ Jihova ọ rẹ ruẹ ajọwha nọ ọ rrọ omai udu kẹ egagọ riẹ dede.

[Oruvẹ-obotọ]