Mu Sutelele ku Mulimu

‘Mubuso wa Hao, U ka na U Tiya Fapilaa Hao’

2 SAMUELE 7:1-16

MWAHALAA litaba ze ezahezi, babusi ba butu ba bañata ba tuluzwi fa litulo za bona. Ba bañwi ba zwisizwe fa litulo za bona ka ku sa votelwa, mi ba bañwi ba tuluzwi ka ku hapelezwa. Ku cwañi ka za Jesu Kreste, yena Mulena wa Mubuso wa Mulimu wa kwa lihalimu? Kana ku na ni nto ye ñwi ye kona ku mu palelwisa ku busa sina Mulena ya ketilwe ki Mulimu? Kalabo lu kona ku i fumana kwa manzwi a na bulezi Jehova ku Mulena Davida wa mwa Isilaele wa kwaikale, sina mo ku ñolezwi kwa 2 Samuele Kauhanyo 7.

Isali feela kwa makalelo a kauhanyo, lu lemuha kuli Davida u swabile, kakuli yena mulena ya li mutu feela, u pila mwa ndu ye nde ya silena, haili aleka ya Mulimu yona i pila mwa tende. * Davida u bonisa kuli u lakaza ku yahela Jehova ndu ye swanela, kamba tempele. (Timana 2) Kono Davida haki yena ya ka yaha ndu yeo. Ka ku itusisa mupolofita Natani, Jehova u bulelela Davida kuli mwanaa hae ki yena ya ka yaha tempele yeo.—Litimana 4, 5, 12, 13.

Jehova u tabisizwe ki takazo ya Davida ye zwelela kwa pilu. Ka ku bonisa buitebuho kwa takazo ya Davida ni ka ku lumelelana ni bupolofita, Mulimu u itama bulikani ni Davida kuli U ka tahisa yo muñwi mwa lusika lwa Davida lwa silena ili ya ka busa ku ya ku ile. Natani u taluseza Davida sepiso ya niti ya Mulimu ye li: “Lusika lwa hao, ni mubuso wa hao, li ka na li tiya fapilaa hao ku ya ku ile, ni lubona lwa hao lu ka tiya ku ya ku ile.” (Timana 16) Ki mañi Mucasanda ya inelezi wa bulikani bo—Yena ya ka busa ku ya ku ile?—Samu 89:20, 29, 34-36.

Jesu wa Nazareta na simuluha ku Davida. Lingeloi ha ne li zibahaza za ku pepiwa kwa Jesu, ne li bulezi kuli: “Mulena u ka mu fa situlo sa bulena sa Davida, ndataahe. U ka busa ba ndu ya Jakobo ku ya ku ile; mi bulena bwa hae ha bu na ku fela.” (Luka 1:32, 33) Kacwalo bulikani bwa na itamile Mulimu ni Davida bu talelezwa ki Jesu Kreste. Kacwalo, Jesu ha busi ka ku ketiwa ki batu, kono u busa ka sepiso ya niti ya Mulimu ye mu fa tukelo ya ku busa ku ya ku ile. Lu hupule kuli lisepiso za Mulimu kamita za talelezwanga.—Isaya 55:10, 11.

Kwa 2 Samuele kauhanyo 7, ku na ni lituto ze peli za butokwa ze lu kona ku ituta. Sapili, lwa kona ku kolwa kuli ha ku na nto ni ye kana mi ha ku na mutu ya kona ku palelwisa Jesu ku busa. Kacwalo, lwa kona ku kolwa kuli u ka taleleza za na bulezi ka za mulelo wa puso ya hae, ili ku peta tato ya Mulimu ka ku tala mwa lifasi sina mo i ezezwa kwa lihalimu.—Mateu 6:9, 10.

Sa bubeli, taba ye i lu luta tuto ye tabisa ka za Jehova. Mu hupule kuli Jehova na boni mi na itebuhile mulelo wa na na ni wona Davida mwa pilu. Ki nto ye omba-omba ku ziba kuli Jehova wa itebuha kemelo ye lu fa kwa bulapeli bwa hae. Ka linako ze ñwi, miinelo ye taata ye cwale ka mapongo kamba busupali, ya kona ku lu palelwisa ku peta lika kaufela ze i tabela ku eza pilu ya luna ha lu nze lu sebeleza Mulimu. Haiba ki cwalo, haike lu tiiswe ki ku ziba kuli Jehova wa bonanga nihaiba milelo ye mwa pilu ye tezi takazo ya ku yemela bulapeli bwa hae.

[Litaluso za kwatasi]