“Wanta Weyi Wakakola Ngu Chikupu”
Kundamenu Kwakwihi Nanzambi
“Wanta Weyi Wakakola Ngu Chikupu”
MUYAAKA yinahituhu, anyuli amavulu ayifumishaña hachitwamu chawanta. Amakwawu ayivotelaña nakuyifumishahu, amakwawu niwena ayihañañahu. Indi Yesu Kristu, Mwanta waWanta waNzambi wamwiwulu? Kudihu chuma chinateli kumukañesha kuyula neyi Mwanta atondawu kudi Nzambi? Tukuwana ñakwilu mumazu ahosheliyi Yehova kudi Mwanta Davidi wamuIsarela wakushankulu, asonekawu ha 2 Samweli kapetulu 7.
Kukutachika kwakapetulu, twadizaña netu Davidi watiyili nsonyi, hakwikala mwanta, washakamineña muchipañu chalubanji, ilaña chimbañu chaNzambi chadiña mwitenti dabula kushikilamu. * Davidi wamwekesheli kukeña kwindi kwakutuña itala dadiwahi, hela tembeli, yaYehova. (Vasi 2) Ilaña Davidi welukili nindi hidiyi wakatuña italaku. Yehova wamulejeli Davidi kuhitila mudi kaprofwetu Natani nindi, mwanindi diyi wakatuña tembeli.—Vasi 4, 5, 12, 13.
Yehova watiyili kuwaha hakudihana kwaDavidi kwakufuma hamuchima. Hakwakula kudihana kwaDavidi nawa kwesekeja nawuprofwetu, Nzambi watiyañeni chitiyañenu naDavidi nindi wakatonda muntu wamuchisaka chawanta waDavidi wakayula haya nyaka. Natani washimwini kudi Davidi chamukaninuwu kudi Nzambi nawu: “Nimutaña weyi niwanta weyi wakakola ngu chikupu kumesu eyi haya nyaka; itanda deyi dakakola ngu haya nyaka.” (Vasi 16) Indi Nswana wahaya nyaka wamunichi chitiyañenu, Wamba kayula haya nyaka hinyi?—Kutachika 49:10; Masamu 89:20, 29, 34-36.
Yesu wakuNazareta diwadiña mwana kaDavidi. Hakushimuna kuvwalika kwaYesu, kañelu wahosheli nindi: “Yehova Nzambi wakamwinka itanda datata yindi Davidi dawanta; wakekala mwanta wakumutaña waYakoba haya nyaka; wanta windi hiwamba kakumaku.” (Luka 1:32, 33) Dichi chitiyañenu chatiyañeniyi naDavidi chashikijeweli hadi Yesu Kristu. Komana nakuyula, bayi kuhitila mukukeña kwawantuku, ilaña kuhitila muchikaninu chaNzambi chamwinkaña ñovu yakuyula haya nyaka. Twatela kwiluka netu kukana kwaNzambi mpinji yejima kwashikijewaña.—Isaya 55:10, 11.
Hamukanda wa 2 Samweli kapetulu 7 hadi yuma yiyedi yalema chikupu yitwatela kudiza. Chatachi, twatela kukuhwelela netu kwosi chuma hela muntu watela kumukañesha Yesu Kristu kuyula. Dichi, tunateli kukuhwelela netu wakashikija chuma chateneniyi nindi dichakakoña chiyulu chindi, chakwila mwaya muchima waNzambi hamaseki neyi chawilañawu mwiwulu.—Matewu 6:9, 10.
Chamuchiyedi, iyi nsañu yatudizishaña chuma chatuzañaleshaña kutalisha hadi Yehova. Anukenu nenu Yehova wamweni nawa walemesheli mwafukwili muchima waDavidi. Chatukoleshaña hakwiluka netu Yehova wahamekaña chitwadifukulaña kudi yena namuchima wumu. Mpinji yikwawu, yuma yakala yatumwekenaña yabadika hañovu jetu, yidi neyi yikatu hela kushinakaja, yinateli kutukañesha kuzata yuma yejima yitwafwilaña kukoña hakumukalakela Nzambi. Neyi diyi yuma yinakutumwekena, kwiluka netu Yehova wamonaña kufwila kwamuchima wamuntu wenzala nakwakama kudifukula kwindi, kwatela kutukundeja.
[Tumazu twaheshina]
^ Chimbañu chachitiyañenu chadiña chikasha chajila chatuñiluwu kwesekeja nachayilejeluwu kudi Yehova nimwafukwiliyi. Chamwekesheleña nawu Yehova wadiña mukachi kawaIsarela akushankulu.—Kwidika 25:22.