Sud Machiegni gi Nyasaye

 ‘Pinyruodhi Nobed Mogurore’

2 Samuel 7:1-16

E HIGINI duto mag ngima dhano, joloch mang’eny osegol e telo. Moko osegol e yor ombulu, to moko ogol githuon. To nade Yesu Kristo, Ruoth mar Pinyruodh Nyasaye mochungi e polo? Be nitie gima nyalo geng’e mondo kik olochi kaka Ruoth ma Nyasaye oketo? Dwoko nyalo yudore e weche ma Jehova nonyiso Daudi Ruodh Israel machon, kaka ondiki e 2 Samuel sula mar 7.

E chakruok mar sulano, wayudo ni Daudi winjo malit nikech en mana ruoth ma dhano, odak e ot maber, kata kamano sandug singruok mar Nyasaye nie hema. * Daudi nyiso gombo ma en-go mar gerone Jehova ot mowinjore kata hekalu. (Kwan matindo 2) Kata kamano, Daudi ok ema ne dhi gero odno. Kokalo kuom janabi Nathan, Jehova nyiso Daudi ni wuode ema biro gero hekaluno.​​—⁠Kwan matindo 4, 5, 12, 13.

Jehova mor ahinya gi gombo ma Daudi nyiso kowuok e chunye. Konyiso ni omor gi chiwruok mar Daudi kendo kaluwore gi weche mokor, Nyasaye timo singruok gi Daudi ni obiro yiero ng’ato mawuok e anyuola Daudi mabiro locho nyaka chieng’. Nathan nyiso Daudi singo maok lokre mar Nyasaye: “Dhoodi kod pinyruodhi ginibed kogurgi ma ginibed nyaka chieng’ e nyimi: komduong’ mari nobedi ma nyaka chieng’.” (Kwan matindo 16) Ng’ano ma ne dhi bedo Jacham girkeni mosiko mar singoni, tiende ni Jal ma ne dhi locho nyaka chieng’?​​—⁠Zaburi 89:⁠20, 29, 34-​36.

Yesu ma Ja-Nazareth nowuok e anyuola mar Daudi. Malaika moro nowacho kama kane olando nyuol mar Yesu: “Ruoth Nyasaye nomiye kom Daudi kwar mare. En nolo od Jakobo nyaka chieng’; kendo pinyruodhe ok norum.” (Luka 1:⁠32, 33) Kuom mano singo ma Nyasaye notimo gi Daudi chopo kare kuom Yesu Kristo. Omiyo Yesu locho, ok nikech dhano ema oyiere, to nikech singo maok lokre mar Nyasaye mamiye ratiro mar locho nyaka chieng’. Onego wapar ni singo mag Nyasaye chopo kare kinde duto.​​—⁠Isaiah 55:⁠10, 11.

Nitie puonj ariyo madongo mwayudo e 2 Samuel sula mar 7. Mokwongo, wanyalo bedo gadier ni onge gimoro amora kata ng’ato ang’ata manyalo geng’o Yesu Kristo mondo kik lochi. Omiyo, wabedo gadier ni Yesu biro chopo kare dwaro maduong’ mar lochne, ma en miyo dwaro mar Nyasaye otimre e piny kaka e polo.​​—⁠Mathayo 6:⁠9, 10.

Mar ariyo, wayudo puonj majiwo chunywa kuom Jehova. Par ni Jehova noneno kendo ne mor gi paro ma ne Daudi nigo e chunye. En gima jiwowa ng’eyo ni Jehova neno kendo omor gi chiwruokwa e lamo mare. Seche moko, gik maok wanyal geng’o kaka tuoche kata bedo moti, nyalo monowa chopo gigo duto ma chunywa gombo timo e tij Nyasaye. Ka en kamano, mad wayud hoch kuom ng’eyo ni Jehova neno paro manie chuny mopong’ gi chiwruok e lamo mare.

[Weche moler piny]