Druaklok ñõn Anij

‘Am Ailiñ Naj Kabine ñõn Indrio’

2 Samuel 7:​1-​16

JEN jinoin bwebwenato ko an armij, kar kamakõt elõñ dri tel ro an kien jen jerbal ko air. Jet rar to jen jerbal ko, ak jet kar iuni ir bwe ren jijõtlok jen jea ko air. Ak ta kin Jisõs Kraist, eo ej Kiñ in Ailiñ eo an Anij ilõñ? Eor ke jabrewõt emaroñ bõprae Jisõs jen an iroij einwõt Kiñ eo Anij ear kãlete? Jemaroñ lo uak eo ilo nan ko an Jeova ñõn Kiñ Devid, einwõt ej walok ilo 2 Samuel jebta 7.

Ilo jinoin japter in, jej lo bwe Devid ear ebet in jokwe ilo mweo imõn kiñ, ak dipdip eo an Anij ej ber ilo juõn im nuknuk. * Devid ear kõnan kalek juõn im elap, ak tempel ñõn Jeova. (Eon 2) Bõtab, ejjab Devid eo enaj kalek tempel eo. Jeova ear kajerbal dri kanan Netan ñõn jiroñ Devid bwe leo nejin enaj kalek tempel eo.​—Eon 4, 5, 12, 13

Jeova ear lukkun mõnõnõ kin kajitõk eo an Devid. Ñõn nawõnãn tiljek eo an Devid im bareinwõt ñõn kajejit kitien kanan ko, Jeova ej kõmõne juõn bujen iben bwe enaj kajutõk juõn jen bwijin Devid im enaj iroij ñõn indrio. Netan ej kwalok ñõn Devid kin kalimur eo an Anij: “Mweo imõm, im am ailiñ naj kabine ñõn in drio imam: naj kabin tron eo am ñõn in drio.” (Eon 16) Wõn eo ej dri Jolit eo an kalimur in, eo im enaj iroij ñõn indrio?​—Sam 89:20, 29, 34-​36.

Jisõs jen Nazeret ear itok jen bwij eo an Devid. Enjel eo im ear kajela kin lotak eo an Jisõs ear ba: “Iroij Anij e naj lelok ñõn E tron eo an Devid jemen: Im E naj iroij ion imõn Jekõb in drio: im ailiñ eo An e jamin jemlok in drio.” (Luk 1:​32, 33) Inem, bujen eo kar kõmõne iben Devid ear jejit iben Jisõs Kraist. Kin men in, ej iroij, jab kinke armij ear kãlete, ak ñõn kajejit kitien kalimur eo an Anij bwe enaj lelok ñõne maroñ eo ñõn iroij indrio. Jen kememej bwe kalimur ko an Anij rej ien otemjej jejit im mol.​—Aiseia 55:10, 11.

Eor ruo katak ko raurõk jej katak jen 2 Samuel jebta 7. Ken kajuõn, jemaroñ liki bwe ejelok jabrewõt men ak jabrewõt armij emaroñ bõprae Jisõs Kraist jen an iroij. Inem, eor ar liki bwe ilo an naj iroij, enaj kajejit karõk eo ñõn kõmõnmõn ankilan Anij ion lõl einwõt ilo lõñ.​—Matu 6:​9, 10.

Ken karuo, bwebwenato in ej katakin kij kin Jeova. Kememej bwe Jeova ear lo im ear lukkun kaurõk ta eo ear ber ilo buruen Devid. Ej juõn men in kainemõn kij ilo ar jela bwe Jeova ej lukkun kamolol kin ar kabuñ ñõn e ilo tiljek. Jet ien jemaroñ ion jet wãwen ko im ejelok ar maroñ ioir, einwõt nañinmij ak kin ar ridtolok, im men kein remaroñ bõprae kij jen ar kalaplok ijo kwonad ilo jerbal eo an Anij. Elañe ej eindrein, jemaroñ mõnõnõ wõt ilo ar jela bwe Jeova ej lo im ejela bwe jej kõnan kabuñ ñõne kin aolepen buruer.

[Kamelele ko itulal]