Onapit ed Dios

“Say Nanarian Mo Mansiansia Lawas”

2 Samuel 7:1-16

DIAD inlabas na panaon, dakel lan manuley so pinaekal ed saray posisyon da. Walaray manuley a nankakasakeyan a pinaekal na totoo, tan saray arum et puersaan ni ingen ya inekal. Komusta balet ed si Jesu-Kristo, say Ari na mangatatawen a Panarian na Dios? Wala kasi makaamper ed panuley to bilang Ari a tinuro na Dios? Naromog so ebat ed saray salita nen Jehova ed si David ya Ari ed Israel nensaman, ya akasulat ed 2 Samuel kapitulo 7.

Diad gapo na kapitulo, naamtaan tayo ditan a nababaingan si Arin David lapud sikato bilang sakey labat a too et manaayam ed marakdakep a palasyo, balet ta say kaban na Dios et walad tolda labat. * Imbalikas nen David so pilalek to a mangipaalagey na abung, odino templo, a manepeg parad si Jehova. (Bersikulo 2) Balet diad panamegley nen propeta Natan et imbaga nen Jehova ed si David ya aliwan sikato so mangipaalagey ed templo noagta say anak to.​—Bersikulo 4, 5, 12, 13.

Inapresya nen Jehova so impapuson pilalek nen David. Lapud anengneng to so debosyon nen David tan kaukolan a nasumpal so propesiya, akisipanan so Dios ed si David a diad kapolian to so panlapuan na samay manari ed andi-anggaan. Impasabi nen Natan ed si David so importantin sipan na Dios: “Say abung mo tan say nanarian mo mansiansia lawas ed arap mo. Say yurongan mo [odino tronom] niletneg lawas.” (Bersikulo 16) Siopa so permanentin Mananawir ed sayan sipanan​—samay Sakey a manari ed andi-anggaan?​—Salmo 89:20, 29, 34-36.

Si Jesus a taga Nazaret et nanlapud kapolian nen David. Oniay inkuan na sakey ya anghel sanen impakabat toy kianak nen Jesus: “Iter nen Jehova a Dios ed sikato so trono nen David ya ama to, tan sikato so manuley ya andi-anggaan bilang ari ed abung nen Jacob, tan anggapo so anggaan na panarian to.” (Lucas 1:32, 33) Kanian say sipan ed si David et asumpal ed si Jesu-Kristo. Sikatoy manari, aliwan lapud sikatoy pinili na totoo, noagta lapud samay sipan na Dios ya angiter ed sikato na kanepegan a manuley diad andi-anggaan. Tandaan tayo sirin a talagan nasumpal so amin a sipan na Dios.​—Isaias 55:10, 11.

Walay duaran makanan leksion a naaralan tayo ed 2 Samuel kapitulo 7. Unona, makapanmatalek itayo ya anggapo so makaamper ed panuley nen Jesu-Kristo. Makaseguro itayo sirin a sumpalen to so peteg a gagala na uley to, salanti, pian sigpot a nagawa so linawa na Dios diad dalin a singa met ed tawen.​—Mateo 6:9, 10.

Komadua, naaralan tayo’d sayan salaysay so makapaligsay-puson leksion nipaakar ed si Jehova. Naimano nen Jehova so pilalek nen David tan inapresya To itan. Makapanmatalek itayo met sirin ya aapresyaen nen Jehova so debosyon tayo diad panagdayew ed sikato. Walaray kipapasen ya agtayo kontrolado, a singa say ikakapuy na laman odino itatatken. Lapud saraya, nayarin agtayo nagawaan so amin a pilalek tayo diad panaglingkor ed sikato. Kanian, naligliwa itayo komon ed pakaamtan iimanoen nen Jehova iray pilalek tan debosyon tayo diad panagdayew ed sikato.

[Paimano ed leksab]