“Kamachikusqaykiqa wiñaypaqmi takyanqa”
Diosta allinta reqsiy
“Kamachikusqaykiqa wiñaypaqmi takyanqa”
ASKHAN gobiernonkuta saqepurqanku. Wakinqa manañan wakmanta akllasqañachu kanku, wakintataq ratulla cambianku otaq qarqopunku. ¿Ima nisunmantaq Diospa akllasqan Jesucristomantari? ¿Imallapas hark’anmanchu kamachikunanpaq? Chaytaqa yachasunman rey Davidta Jehová Dios rimapayasqanpin, chayqa tarikun 2 Samuel 7 capitulopin.
Chay capituloq qallariyninpi nisqan hina, Davidqa manan allinchu sientekurqan Diospa arcan karpallapi kasqanwan, paytaq runalla kashaspa huk sumaq palaciopi tiyasqanwan. * Chayraykun Jehová Diospaq hina huk templota sayarichipuyta munarqan (versículo 2). Ichaqa qhepallamanmi Diosqa profeta Natanwan willachirqan Davidpa wawanña chay templota sayarichinanta (versículos 4, 5, 12, 13).
Davidpa huk templota sayarichipuyta munasqanqa Diospa sonqonmanpunin chayarqan. Chaymi Jehová Diosqa, munasqanman hina, huk pactota ruwarqan Davidpa mirayninmanta huk kamachikuqta wiñaypaq churananpaq. Profeta Natanwanmi Davidman willachirqan: “Aylluykipas suyuykipas ñawpaqeypiqa kashallanqapunin, kamachikusqaykiqa wiñaypaqmi takyanqa”, nispa (versículo 16). ¿Pitaq chay ayllunmanta lloqsiq wiñaypaq kamachikuqri? (Salmo 89:20, 29, 34-36.)
Nazaret llaqtayoq Jesusmi karqan. Huk angelmi Jesuspa nacenanmanta willashaspa nirqan: “Señor Diosmi ñawpa taytan Davidpa kamachikunanpi churanqa. Hinan Jacobpa mirayninta wiñaypaq kamachinqa, kamachikuynintaq mana tukukuq kanqa”, nispa (Lucas 1:32, 33). Jesucristotaqa manan runachu akllarqan kamachikunanpaqqa, aswanpas Jehová Diosmi akllarqan promesanta hunt’ananpaq. Payqa hunt’anpunin ima prometekusqantapas (Isaías 55:10, 11).
2 Samuel 7 capitulopi rikusqanchis hina, manan pipas ni imapas hark’ayta atinmanchu Jesuspa kamachikamunantaqa. Payqa kamachikuyninwanmi Diospa munayninta kay pachapi ruwachinqa, imaynan hanaq pachapipas ruwakun hinata (Mateo 6:9, 10).
Chay capitulopiqa yachallanchistaqmi Jehová Dios imayna kasqanmanta. Payqa allinpaqmi qhawarirqan Davidpa ruway munasqantaqa. Diosqa manan qonqanchu payrayku imakuna ruwasqanchistaqa. ¡Kusikunapaqmi chayqa! Mayninpiqa onqosqanchisrayku, machuyapusqanchisrayku, otaq imaraykupas manañan atinchisñachu munasqanchisman hina Diosta serviyta. Ichaqa payqa pisilla ruwasqanchistapas valoranmi tukuy sonqonchismanta serviqtinchisqa.
[Uranpi willakuy]
^ párr. 2 Chay arcaqa huk sagrado cajan karqan, Diospa imayna nisqanman hina ruwasqa. Representarqantaqmi Diosqa Israel runakunaq qayllanpi kasqanta (Éxodo 25:22).