E Akavaitata Atu ki te Atua

“Toou Basileia, ka Mou Ïa”

2 SAMUELA 7:​1-16

I ROTO i te tuatua enua i aereia mai, e maata ua atu rai te au tutara tangata tei akaateaia mei to ratou au taoonga. Tetai aronga kua akaateaia i muri ake i tetai ikianga, e tetai pae kua maroia kia akaatea. Akapeea a Iesu Karaiti, te Ariki o te Patireia o te Atua i te rangi? Ka rauka ainei i tetai ua atu apinga i te arai iaia mei te tutara anga ei Ariki akamanaia e te Atua? Ka kitea te pauanga i roto i te au tuatua ta Iehova i tuatua ki te Ariki ko Davida o Iseraela i taito, tei rekotiia i roto ia 2 Samuela pene 7.

I te akamataanga o te pene, ka kite tatou e kua akama a Davida, no te mea koia, e ariki tangata ua nei, te noo ra i roto i tetai are ariki manea, e oti te vai ua ra te aruna a te Atua i roto i tetai are puakapa kare e tau no taua apinga puapinga ra. * Kua akakite a Davida i tona inangaro i te akatu i tetai are tau meitaki tikai, me kore iero kia Iehova. (Irava 2) Inara kare na Davida e akatu i te are. Na roto i te peroveta ko Natana, kua akakite a Iehova kia Davida e, na tetai o tana tamaiti e akatu i te iero.​—Irava 4, 5, 12, 13.

Kua mareka tikai a Iehova i te inangaro ngakau tae o Davida. I te ariu anga ki te inangaro o Davida e kia tau ki te totouanga, kua papau te Atua i tetai koreromotu kia Davida e Nana e tuku mai i tetai tangata no roto i te uanga ariki o Davida, te ka tutara e mutu kore ua atu. Na Natana i akakite i te taputou puapinga mou a te Atua kia Davida e: “Toou are e toou basileia, ka mou ïa ki mua ia koe ra e tuatau ua atu: toou terono, ka mou ïa e tuatau ua atu.” (Irava 16) Koai te Uanga tinamou o teia koreromotu​—Koia ko te ka tutara e mutu kore ua atu?​—Salamo 89:20, 29, 34-36.

E uanga a Iesu o Nazareta no Davida. I te akakiteanga i te anauanga o Iesu, kua tuatua tetai angera e: “Na te Atua e oronga mai i te terono o tona metua o Davida nona: Ei iaia te au i te kopu-tangata o Iakoba e tuatau ua atu, kare rava ïa e kore tona basileia.” (Luka 1:32, 33) No reira kua akatupuia te koreromotu kia Davida i roto ia Iesu Karaiti. No reira, te tutara ra aia, kare e no te ikianga a te tangata mari ra na roto i te taputou puapinga mou a te Atua tei oronga i te tikaanga kiaia kia tutara e mutu kore ua atu. Kia akamaara ua rai tatou e e tupu ua ana te au taputou a te Atua.​—Isaia 55:10, 11.

E rua apiianga puapinga ka rauka mai mei ia 2 Samuela pene 7. Te mea mua, ka papu ia tatou e kare e apinga, e kare e tangata e rauka i te arai ia Iesu Karaiti mei te tutaraanga. No reira, ka papu ia tatou e ka akatupu aia i tana i akakite e ko te akakoroanga o tana tutaraanga, koia oki, kia akatupu pu tikai i to te Atua anoano i runga nei i te enua mei to te rangi katoa ra.​—Mataio 6:9, 10.

Te rua, te apii maira teia tataanga ia tatou i tetai apiianga pumaana tikai no runga ia Iehova. E akamaara ana e kua kite a Iehova e kua akaperepere i te manako ngakau o Davida. E akapapuanga tikai i te kite e, te mareka maira a Iehova i to tatou inangaro i tana akamorianga. I roto i tetai au tu, te au turanga kare e rauka ia tatou te akaaere, mei te apikepike o te kopapa me kore te ruaine anga, penei ka arai ia tatou i te akatupu i te au mea pouroa e nakunakuia ra e to tatou ngakau kia rave i te tavini anga i te Atua. Me koia ia, kia rauka ia tatou te pumaana mei te tika e, te kite ua maira a Iehova i te au akakoroanga o te ngakau ki pu tikai i te inangaro i tana akamorianga.

[Tataanga Rikiriki i Raro]