Kporom Hen Aôndo

‘Tartor Wou Ua Tile Dông’

2 SAMUEL 7:1-16

I NDERA dughun utor kpishi sha ian i tor ve kera hii sha ayange a ngise la je zan zan nyian. Mbagenev ior kera lumun u haan ve vota ga, shin i dugh ve sha ian i utaha kera sha agee. Hide Yesu Kristu u a lu Tor u Tartor u Aôndo u sha la di ye? Er a lu or u Aôndo a ver un Tor yô, ma kwagh ngu u una fatyô u yangen un u hemen yôô? Mkaanem ma Yehova ôr a Tor Davidi u hemen Iserael u tsuaa, ma i nger ken Samuel u sha Uhar ityough 7 la, maa na mlumun sha mpin ne.

Ken mhii u ityough kira, kunya kôr Davidi kpishi er wen u un lu tor sha uumace tseegh tsô ne kpa, un tem ken iyou i tor i doonashe, kpa areki u Aôndo yô, a gem a lu ken tenti yô. * Davidi pase isharen na i maan iyou shin tempel u doonashe sha ci u Yehova. (Ivur 2) Kpa lu Davidi gba u una maa iyou la ga. Yehova pase Davidi sha ikyev i profeti Natan ér ka wan u Davidi una maa tempel la ye.—Ivur i sha 4, 5, 12, man 13.

Kwagh u sar Davidi tsung u eren ne kôr Yehova ken ishima. Aôndo ya ikyur a Davidi ér Una tsua or ken utor mba ken tsombor u Davidi u nana hemen gbem sha won yô. Una er kwagh ne sha ci u mcivir u Davidi civir un la man sha ci u kwaghôron u profeti a iv yô. Natan ôr Davidi ityendezwa i Aôndo er a na gbang gbang ne, kaa ér: “Ya wou kua tartor wou vea tile dông sha ishigh yough gbem; ikyônough yough ki torough kia lu her gbem sha won.” (Ivur 16) Ka an nana ya Dyako u tsôron, nana hemen gbem sha won ken ikyuryan nee?—Pasalmi 89:20, 29, 34-36.

Yange i mar Yesu u Nasareti ken tsombor u Davidi. Shighe u ortyom lu yôôn mmar u Yesu la, a kaa ér: “Ter Aôndo kpaa Una na Un ikyônough ki torough ki Ter Na Davidi. Una lu tor ken ya u Yakob gbem sha won; tartor Na kpaa ua bee mayange ga.” (Luka 1:32, 33) Nahan ikyuryan i í ya a Davidi la i kure sha Yesu Kristu. Sha nahan yô, ngu hemen sha ci u uumace ve ver un tor ga, kpa ka icôron ityendezwa i Aôndo er a Davidi la i ne un ian i hemen gbem sha won ye. I de hungur se er uityendezwa mba Aôndo ve bundu ga yô ga.—Yesaia 55:10, 11.

Se hen akaa ahar a lun se a inja ken Samuel u sha Uhar ityough 7. Kwagh u hiihii yô, se fatyô u lun a vangertiôr ser or shin ma kwagh môm una kôrcio u yangen Yesu Kristu u hemen ga. Sha nahan yô, se fa ser una kure kwagh u yange pase ér ka awashima u hemen na la, inja na yô, una nenge ér i er ishima i Aôndo shin tar vough er i eren i sha nahan.—Mateu 6:9, 10.

Kwagh u sha uhar yô, ityough ki Bibilo kira ôr se kwagh u kundunyol sha kwagh u Yehova. Umbur wer, Yehova yange nenge a awashima u Davidi la, shi doo un kpaa. Doo se kpishi u fan ser ka sea civir Yehova yô, un kpa a wuese. Ashighe agen yô, alaghga mbamlu asev, er angev shin iyolbeen nahan, vea yange se u civir Aôndo er se soo ser ma se civir un la. Aluer kwagh ngu nahan yô, se fatyô u zuan a ishimasurun ser Yehova fa mbaawashima asev mba ve tese ér sar se tsung u lu ken mcivir na la.

[Ngeren u shin kpe]