“Nkabela Cuuno Cabwami Bwakwe Njoociimikizya Akutamani”
Amube Acilongwe A Leza
“Nkabela Cuuno Cabwami Bwakwe Njoociimikizya Akutamani”
KUZWA kaindi, bantu banji bali kulela bagusyigwa acuuno. Bamwi bakagusyigwa kwiinda mukuvwoota, kakuli bamwi bakaatulwa buya. Ino mbuti kujatikizya Jesu Kristo, imwami wa Bwami bwa Leza? Sena kuli cintu cili coonse icikonzya kupa kuti Mwami ooyu wakasalwa a Leza ataleli? Tulakonzya kubujana bwiinguzi mumajwi Jehova ngakaambila Mwami Davida wa Israyeli yansiku, aalembedwe kulugwalo lwa 2 Samuele caandano 7.
Makani aali kumatalikilo aacaandano eeci atondezya kuti Davida uluuside kapati akaambo kakuti walo mbwali mwami buyo wamunyika ukkala muŋanda mbotu yabwami kakuli ibbokesi lya Leza lili mutente buyo. * Davida waamba makanze ngajisi aakuyaka ŋanda mbotu naa tempele ya Jehova. (Kapango 2) Pele Davida waambilwa kuti tali nguwe uuya kuyaka ŋanda. Kwiinda mumusinsimi Natani, Jehova waambila Davida kuti imwana wakwe nguuya kuyaka tempele.—Tupango 4, 5, 12, 13.
Jehova wakkomana akulisungula kwa Davida. Akaambo kakulyaaba kwa Davida amakani aali mubusinsimi, Leza waambila Davida kuti muntu uumwi wamumukwasyi wakwe uya kulela kukabe kutamani. Natani nguwatumwa kuya kwaambila Davida cisyomezyo ca Leza cakuti: “Nkabela iŋanda yako abwami bwako zilaima nji kukabe kutamani, acalo cuuno cako cilaimikwa kabotu mazuba oonse.” (Kapango 16) Ino nguni ooyu wakaambwa kuti nguya kulya zyina—walo iwakali kuya kulela kukabe kutamani?—Intembauzyo 89:20, 29, 34-36.
Jesu waku Nazareta wakali waluzubo lwa Davida. Naakali kwaambilizya kuzyalwa kwa Jesu, mungelo wakaamba kuti: “Jehova Leza uzoomupa cuuno cabwami cawisi Davida, uyooendelezya ŋanda ya-Jakobo mane kukabe kutamani, ubwami bwakwe tabukooyoomana.” (Luka 1:32, 33) Aboobo, cizuminano ca Davida cakazuzikizyigwa muli Jesu Kristo. Tanaakasalwa buya abantu kuti alele, pele Leza kwiinda mucisyomezyo cakwe nguwakapa kuti ayelele kulela kukabe kutamani. Tutalubi kuti zisyomezyo zya Leza lyoonse zilacitika.—Isaya 55:10, 11.
Kuli ziiyo zyobilo nzyotukonzya kwiiya kulugwalo lwa 2 Samuele caandano 7. Cakusaanguna ncakuti, tulijisi lusyomo lwakuti kunyina cintu alimwi amuntu uukonzya kukasya Jesu kulela. Aboobo, tulakonzya kuba masimpe kuti Jesu uya kuzuzikizya makanze oonse akaambilwa limwi aajatikizya bwami bwakwe, nkokuti kucitwa kwaluyando lwa Leza anyika mbubonya mbuli kujulu.—Matayo 6:9, 10.
Cabili ncakuti, cibalo eeci cituyiisya ciiyo cikkomanisya kujatikizya Jehova. Amuyeeye kuti Jehova wakabona kuti makanze ngaakajisi Davida akali kuyandika kapati. Cilakulwaizya ikuzyiba kuti Jehova ulalumba kulyaaba kwesu anotumukomba. Zimwi ziindi bukkale mbotutakonzyi kucinca, mbuli kuciswa-ciswa naa kucembaala, zilakonzya kupa kuti tutamubelekeli kabotu Leza. Ikuti naa mboobo, tweelede kukkomana ikuzyiba kuti Jehova ulabona naaba makanze aali mumoyo aatondezya kulyaaba kwesu kubukombi bwakwe.
Bupanduluzi buyungizidwe
^ munc. 5 Ibbokesi lyacizuminano lyakali setekene alimwi lyakapangwa kweelana ambwaakalailila Jehova. Lyakali kwiiminina kubako kwa Jehova muciinga cabana Israyeli bansiku.—Kulonga 25:22.