“To oe ra basileia, e mau ïa”
E haafatata ˈtu i te Atua
“To oe ra basileia, e mau ïa”
I TE roaraa o te tuatapaparaa, ua tatarahia te tiaraa o te tia faatere e rave rahi. Aita vetahi i maiti-faahou-hia, area vetahi atu ua faahepohia ïa ia vaiiho i to ratou tiaraa. E o Iesu Mesia, te Arii o te Basileia i te raˈi o te Atua? E ohipa anei te haafifi ia ˈna ia faatere mai ei Arii faatoroahia e te Atua? To roto te pahonoraa i ta Iehova mau parau i te arii Davida i tahito ra, itehia i roto i te Samuela 2 pene 7.
I te mau irava matamua, te ite ra tatou e te huru ê ra Davida. No ˈna, te ora ra oia, ei arii taata noa hoi, i roto i te hoê aorai nehenehe mau, area te afata a te Atua tei roto ïa i te hoê sekene. * Te faaite ra Davida i to ˈna hinaaro e patu i te hoê fare, aore ra hiero, e au no Iehova. (Irava 2) E ere râ na Davida e patu i te reira. Na roto i te peropheta Natana, parau atura Iehova e na te hoê o ta ˈna huaai e faatia i te hiero.—Irava 4, 5, 12, 13.
Ua putapû roa Iehova i te hinaaro haavare ore o Davida. Ei pahonoraa i to Davida taiva ore e ia au i te parau tohu, e faaau te Atua i te hoê faufaa ia ˈna: e faatia mai Oia i te hoê taata o te opu hui arii o Davida no te faatere e a muri noa ˈtu. E faaite Natana i te parau fafau moˈa i te arii: “To oe na fare e to oe ra basileia, e mau ïa i mua ia oe ra: to oe ra terono, e mau ïa e a muri noa ˈtu.” (Irava 16) O vai te Tamaiti aiˈa tamau o teie faufaa, te Ihotaata o te faatere e a muri noa ˈtu?—Salamo 89:20, 29, 34-36.
No roto mai Iesu no Nazareta ia Davida. I te faaiteraahia to Iesu fanauraa, ua na ô te hoê melahi: “Na te Fatu ra na te Atua e horoa mai i te terono o to ˈna ra metua o Davida no ˈna: ei ia ˈna te hau i te fetii o Iakoba e a muri noa ˈtu; e e ore roa to ˈna basileia e mure.” (Luka 1:32, 33) Ua tupu taua faufaa ra na roto ia Iesu Mesia. E ere na te taata i maiti ia ˈna. Te faatere ra oia maoti te parau fafau moˈa a te Atua o te horoa ia ˈna i te tiaraa e faatere e a muri noa ˈtu. E haamanaˈo anaˈe ïa e e tupu noa iho â ta te Atua i fafau.—Isaia 55:10, 11.
E piti haapiiraa faufaa te huti mai i roto i te Samuela 2 pene 7. A tahi, e nehenehe tatou e tiaturi e aita hoê aˈe mea aore ra taata e haafifi ia Iesu Mesia ia faatere mai. E papu ïa ia tatou e e faatupu oia i te tumu e faatere mai ai oia, oia hoi ia rave-roa-hia to te Atua hinaaro i te fenua mai tei te ao atoa na.—Mataio 6:9, 10.
Te piti, e haapiiraa tamahanahana ta tatou e huti mai no nia ia Iehova. A haamanaˈo e ua ite e ua haafaufaa Iehova i te manaˈo o te aau o Davida. E mea mahanahana ia ite e te haafaufaa ra Iehova i to tatou taiva ore i ta ˈna haamoriraa. E nehenehe te tahi mau tupuraa, aita hoi ta tatou e parau i te reira, mai te ea e ino noa ˈtura aore ra te matahiti rahi, e haafifi ia tatou ia rave i te mau mea atoa ta to tatou aau e hiaai ra no te tavini i te Atua. E nehenehe râ tatou e tamahanahanahia i te mea e te ite ra Iehova i te mau hinaaro o te hoê aau tei taiva ore i ta ˈna haamoriraa.
[Nota i raro i te api]
^ Mea moˈa te afata faufaa tei hamanihia hoi i raro aˈe i te aratairaa a Iehova e ia au i ta ˈna faanahoraa. Te faahohoˈa ra te reira i te vairaa mai o Iehova i Iseraela i tahito.—Exodo 25:22.