Xoossaakko Shiiqa

‘Ne Kawotettay Minni Eqqana’

2 SAMEELA 7:1-16

TAARIKE wode ubban asaa haarida daroti bantta maataappe wodhidosona. Issoti issoti dooruwan xoonettidosona; harati qassi wolqqan bantta maataappe wodhidosona. Saluwan deˈiya Xoossaa Kawotettaa Kawuwaa Yesuus Kiristtoosa xeelliyaagan shin? I Xoossan doorettida Kawo gididi haariyoogaa diggana danddayiyaabi deˈii? Beni Israaˈeela Kawuwaa Daawitayyo Yihooway yootido, 2 Sameela shemppo 7n deˈiya qaalaappe hegaa zaaruwaa demmana danddayoos.

He shemppuwaa doomettan, i kawo keettan deˈiyo wode, Xoossaa taabootay dunkkaaniyan deˈiyoogan Daawiti azzanidoogaa akeekoos. * Daawiti Yihoowayyo boncho keettaa woykko beetamaqidasiyaa keexxanau koyiyoogaa yootiis. (Paydo 2) SHin he keettaa keexxanay Daawita gidenna. Yihooway hananabaa yootiya Naataana baggaara a naˈay beetamaqidasiyaa keexxanaagaa Daawitayyo yootiis.—Paydo 4, 5, 12, 13.

Daawiti wozanappe koyidoban Yihooway ufayttiis. Daawiti Yihoowayyo aqidoogaappe denddidaagaaninne hiraagaa maaran, Daawita zariyaappe merinau a araatan haariya uraa denttanaagaa Xoossay Daawitayyo qaalaa geliis. Xoossay Daawitayyo minttidi qaalaa gelidoogaa Naataani: “Ne zaretinne ne kawotettai ta sinttan merinau gam77ana; ne kawotaa araataikka merinau minni eqqana” yaagidi yootiis. (Paydo 16) He qaalaa maaran Daawita araataa dolinau Laattanay, giishin merinau Haaranay oonee?—Mazamure 89:20, 29, 34-36.

Naazireeta Yesuusi Daawita zare. Yesuusi yelettanaagaa issi kiitanchay erissido wode: “Godai ayyo a aawaa Daawita kawotettaa immana; inne Yaaqoobantta zariyan merinau kawotana; a kawotettaassi wurssetti baawa” yaagiis. (Luqaasa 1:32, 33) Yaatiyo gishshau, Yihooway Daawitayyo gelido qaalay Yesuus Kiristtoosan polettiis. Hegaa gishshau, i haariyoy asi doorin gidennan, i merinau haaranaadan Xoossay mino qaalaa gelido gishshataassa. Xoossay gelido qaalay ubbatoo polettiyoogaa hassayana koshshees.—Isiyaasa 55:10, 11.

Naaˈˈantto Sameela shemppo 7⁠ppe tamaariyo naaˈˈubay deˈees. Koyruwan, Yesuus Kiristtoosi haarennaadan diggana danddayiya aybinne woykko ooninne baynnaagaa ammanettana danddayoos. Yaatiyo gishshau, a haaroy ay polanaakko odettidabaa, giishin Xoossaa shenee saluwan hanidoogaadan saˈankka muleera polettanaagaa ammanettana danddayoos.—Maatiyoosa 6:9, 10.

Naaˈˈanttuwan, ha taarikee Yihoowa xeelliyaagan nuna keehippe ufayssiyaabaa tamaarissees. Daawiti ba wozanan amottidobaa Yihooway akeekidoogaanne xoqqu oottidi xeellidoogaa hassaya. Nuuni ayyo wozanappe goynniyoogaa Yihooway akeekiyoogaanne xoqqu oottidi xeelliyoogaa eriyoogee minttettiyaaba. Issi issi hanotan, payyatettaa pacaa woy cimatettaa mala nu abbiyaappe bolla gididabati, nuuni Xoossaayyo oottanau wozanappe amottiyoobaa ubbaa polennaadan diggana danddayoosona. Hegaadaana gidikko, ayyo wozanappe goynnanau koyiyoogaakka Yihooway akeekiyoogaa eriyoogan minettiyaageeta gidoos.

[Tohossa qofata]