Ilawil a natsʼkaba tiʼ Dios

Upʼéel reino mix bikʼin kun xuʼulul

2 SAMUEL 7:1-16

YAʼAB tiʼ le máaxoʼob ku gobernaroʼoboʼ ku yantal u pʼatkoʼob. Yaan jujuntúuloʼobeʼ maʼ kaʼa yéeyaʼakoʼob utiaʼal ka u beet u gobernadoriloʼobiʼ: yéetel uláakʼoʼobeʼ ku luʼsaʼal le meyaj tiʼobaʼ. ¿Kux túun Jesucristo, le Rey yéeyaʼan tumen Dios utiaʼal gobernar teʼ kaʼanoʼ? ¿Yaan wa baʼax jeʼel u beetik u xuʼulul u gobernareʼ? U núukil le kʼáatchiʼaʼ jeʼel u páajtal k-ilik tiʼ le baʼax tu yaʼalaj Jéeoba Dios tiʼ David, u reyil Israeloʼ, lelaʼ ku chíikpajal teʼ capítulo 7 tiʼ 2 Samuel.

Tu káajbal le capituloaʼ, ku yaʼalikeʼ Davideʼ maʼ jach maʼalob u yuʼubikubaiʼ tumen u palacioeʼ jach jatsʼuts, baʼaleʼ u arca Dioseʼ chéen tiʼ upʼéel chan pasel tsʼaʼan. * Le oʼolal tu yaʼalaj taak u beetik upʼéel templo jach jatsʼuts utiaʼal Jéeoba (versículo 2). Baʼaleʼ maʼ David kun beetik le temploaʼ. Yéetel le profeta Natanoʼ, Jéeobaeʼ tu yaʼalaj tiʼ Davideʼ utúul tiʼ u hijoʼob kun beetik (versiculoʼob 4, 5, 12 yéetel 13).

Jéeobaeʼ jach maʼalob u yilik le baʼax taak u beetik kaʼach Davidoʼ. Le oʼolaleʼ tumen ku yilik jach yaabiltaʼan tumen David yéetel utiaʼal u béeykunsik le baʼax u tukulmaj u beetkoʼ, tu yaʼalajtiʼeʼ: tiʼ u chʼiʼibal kun taal utúul máax ken u beet u reyil utiaʼal minaʼan u xuul. Nataneʼ tu yaʼalaj tiʼ David le baʼax tu yaʼalaj Diosaʼ: «A chʼiʼibal yéetel a [reinoeʼ], bíin pʼáatak jetsʼeknak yanil yáanal in kʼab, a [reino] xaneʼ, bíin pʼáatak utiaʼal tuláakal jaʼaboʼob» (versículo 16). ¿Máax le tu yaʼalaj le pacto kun gobernar utiaʼal minaʼan u xuuloʼ? (Salmo 89:20, 29, 34-36.)

Jesús le Nazaretiloʼ tiʼ u chʼiʼibal David taali. Tak le ángel aʼal yaan u síijil Jesusoʼ tu yaʼalaj: «Bin tsʼaʼabak tiʼ tumen Yuumtsil Jajal Dios u jalaʼach kʼáancheʼ David u taata, bin [reinarnak] mantatsʼ tu yotoch Jacob, u [reinoeʼ] maʼ bin yanak u xuul[iʼ]» (Lucas 1:32, 33). Le baʼax aʼalaʼab tiʼ Davidaʼ béeychaj ka taal Jesucristo. Letiʼeʼ maʼ yéeyaʼab yéetel upʼéel votación jeʼex suuk u beetaʼaloʼ, baʼaxeʼ Dios yéeye, le oʼolal tsʼaʼab u páajtalil u gobernar utiaʼal minaʼan u xuul. Maʼ unaj u tuʼubultoʼoneʼ tuláakal le baʼax ku yaʼalik Diosoʼ ku láaj béeychajal (Isaías 55:10, 11).

Baʼaleʼ yaan kaʼapʼéel baʼax jeʼel k-kanik teʼ versiculoʼob tsʼoʼok k-ilkoʼ. Yáaxeʼ ku kaʼansiktoʼoneʼ mix máak jeʼel u beetik maʼ u gobernar Jesuseʼ. Lelaʼ ku kaʼansiktoʼon xaneʼ tuláakal le baʼax u tukulmaj u beetikoʼ yaan u láaj béeychajal, ichil lelaʼ táakaʼan u béeychajal baʼax u tukulmaj Dios utiaʼal le Luʼumaʼ bey xan utiaʼal le kaʼanoʼ (Mateo 6:9, 10).

U kaʼapʼéeleʼ ku kaʼansiktoʼon bix Jéeoba. Kʼaʼajaktoʼoneʼ letiʼeʼ tu yilaj le baʼaloʼob maʼalobtak taak u beetik kaʼach Davidoʼ. ¿Máasaʼ jach ku kiʼimakkúuntik k-óol ojéeltikeʼ Jéeobaeʼ jach u yaabiltmaj le baʼaxoʼob k-beetik utiaʼal k-adorartikoʼ? Yaan kʼiineʼ yoʼolal kʼojaʼanil wa yoʼolal le chʼíijiloʼ maʼ tu páajtal k-beetik le bukaʼaj k-kʼáat utiaʼal k-meyajtik Diosoʼ. Le oʼolal jach ku kiʼimakkúuntik k-óol k-ojéeltikeʼ Jéeobaeʼ ku yilik le baʼaloʼob maʼalobtak yaan t-puksiʼikʼaloʼ.

[Tsolajiloʼob]