Bidxiña Dios

Maca bieeteʼ de ti reinu ni qué zanitilú

2 Samuel 7:1-16

BIAʼ tiempu huabani binni ndaaniʼ Guidxilayú riʼ stale gobiernu maʼ huasaana puestu stiʼ. Caadxi de laacabe qué ribí diʼ binni laacabe sti biaje para guni mandárcabe; xcaadxi la? neca qué racaláʼdxicaʼ, peru ribee binni laacaʼ de gácacaʼ xaíque stiʼ guidxi. Xi zanda guininu de Jesucristu, Rey ni gulí Dios para guni gobernar dede guibáʼ yaʼ. Ñee nuu xiixa ni gucueeza laabe de guni mandarbe la? Zánnanu ni ora guidúʼndanu Guiropa libru stiʼ Samuel capítulo 7, racá zeeda ca diidxaʼ ni gudxi Jiobá David, hombre ni guca rey stiʼ Israel.

Ra bizulú capítulo riʼ cayeeteʼ nabé guyuu David triste. Xiñee yaʼ. Purtiʼ neca rey si nga laabe la? nabézabe ndaaniʼ ti palaciu guizáʼ sicarú, peru guiña stiʼ Dios que nuu ndaaniʼ ti yoo huiiniʼ de lari. a Ngue runi guniʼbe racaláʼdxibe gucuibe ti yuʼduʼ sicarú para Jiobá, ra chuʼ guiña que (versículo 2). Peru cadi David diʼ chigucuí yoo que. Biquiiñeʼ Jiobá profeta Natán para gabi David, ti xiiñibe nga chigucuí yuʼduʼ que (versículo 4, 5, 12 ne 13).

Nabé guyuulaʼdxiʼ Jiobá ni cá ique David guni. Cumu runi adorarbe Dios jneza ne para gaca ni maca guníʼ Dios la? biʼniʼ ti pactu ne laabe, pactu que na zaquiiñeʼ Jiobá tuuxa ni za de lade ca xiiñiʼ David para gaca rey ne qué ziuu dxi gusaana binni ca de guni mandar. Guyé Natán ra nuu David ne gudxi laabe xi guníʼ Dios: «Lídxiluʼ ne reinu stiluʼ dxandipeʼ qué ziuu dxi guinitilú cani; zuzuhuaa dxiichiʼ trono stiluʼ ne qué ziuu dxi guinitilú ni» (versículo 16). Tuu nga guicaa Reinu ni qué zanitilú riʼ ne qué ziuu dxi gusaana de guni mandar casi na pactu que yaʼ (Salmo 89:20, 29, 34-36).

Jesús de Nazaret nga ni za de David. Ne sicaríʼ guníʼ ángel bizeeteʼ chigálebe que: «Zucuí [Jiobá] laabe de rey ra gurí bixhoze gola be David. Zaca be rey sti irá cani za de Israel, ne qué ziuu dxi guiasa be» (Lucas 1:32, 33). Biaʼsi luguiáʼ Jesucristu nga guca guiráʼ ni bieeteʼ lu pactu biʼniʼ Dios ne David que. Cadi binni diʼ gulí laabe para guicaabe puestu ca, sínuque Dios nga maca guníʼ zápabe derechu para gácabe Rey ne qué ziuu dxi gusaana de guni gobernarbe. Ne cadi guiaandaʼ laanu, raca guiráʼ ni maʼ guníʼ Dios (Isaías 55:10, 11).

Xi chupa cosa risaca rizíʼdinu de ca versículo maʼ bidúʼndanu ca yaʼ. Primé la? naquiiñeʼ guni crenu qué zanda diʼ chuʼ tuuxa ni guni xiixa para gucueeza Jesús de guni gobernar. Nga cusihuinni dxandíʼ zúnibe ni na Dios ndaaniʼ Guidxilayú riʼ cásica rácani guibáʼ, purtiʼ para nga biʼniʼ Dios laabe Rey (Mateo 6:9, 10).

Guiropa la? rusiidini laanu ximódopeʼ nga Jiobá. Bietenalaʼdxiʼ, guyuuláʼdxibe ni gupa David gana ñuni que. Cadi dxandíʼ ratadxí ladxidoʼno gánnanu rusisaca Jiobá stipa rúninu pur guni adorarnu laa la? Ne jneza nga rúnibe zacá, purtiʼ nuu biaje qué randa rúninu biaʼ ñuuláʼdxinu lu xhiiñaʼ Dios, pur huaranu o pur maʼ nagólanu. ¡Guizáʼ riéchenu nga gánnanu rusisaca Jiobá ca cosa ni rúninu para guni adorarnu laa, dede cani ñuuláʼdxinu ñúninu peru qué zanda pur xiixa ni rucueeza laanu!

[Cani cá ñee yaza]