Bushe Mulakonka Sana Kristu?
Bushe Mulakonka Sana Kristu?
“Nge fyo mule-enda na pali nomba, . . . mulecita ifyo fine sana.”—1 TES. 4:1.
1, 2. (a) Fintu nshi ifya lulumbi abantu baikeleko ilyo Yesu ali pano isonde bamwene? (b) Mulandu nshi ne nshita tuleikalamo nayo yabela iya lulumbi?
BUSHE mwalibala amutontonkanyapo ifyo cali no kuwama sana nga ca kutila na imwe e ko mwali ilyo Yesu ali pano isonde? Nalimo mulelenganya ifyo Yesu aali no kumundapa ku bulwele ubumucusha. Nangu mutontonkanya pa fyo cali no kuwama ukumona Yesu e lyo no kumfwako uko alelanda, ukusambilila kuli ena nangu ukumona uko alecita ifipesha mano fimo. (Marko 4:1, 2; Luka 5:3-9; 9:11) Ala nga lyali lishuko ilikalamba sana ukumona uko Yesu alebomba imilimo yonse iyi! (Luka 19:37) Takwaba inkulo na imbi iyamonapo filya Yesu alecita ilyo ali pe sonde, kabili ifyo acitile pano isonde “ukupitila mwi lambo lyakwe,” tafyakacitike na kabili.—Heb. 9:26; Yoh. 14:19.
2 Lelo nangu cibe fyo, inshita yesu nayo ine ni nshita ya lulumbi. Mulandu nshi? Pantu twikala mu nshita Amalembo yasobele ukutila “inshita ya ku mpela” nangu “inshiku sha kulekelesha.” (Dan. 12:1-4, 9; 2 Tim. 3:1) Muli iyi ine nshita, e mo batamfishe Satana ku muulu. Nomba line bali no kumukaka no kumupoosa ‘mu cilindi icabula impela.’ (Ukus. 12:7-9, 12; 20:1-3) Kabili ni muli iyi ine nshita e mo twapeelwa ishuko likalamba ilya kubila “imbila nsuma iyi iya bufumu” mu calo conse, ukweba abantu pali Paradaise iileisa, no yu, mulimo uushakatale aubombwa na kabili.—Mat. 24:14.
3. Ilyo ali mupepi no kuya ku muulu, cinshi Yesu aebele abasambi bakwe ukulacita, kabili ico cali no kusanshamo finshi?
3 Ilyo Yesu ali mupepi no kuya ku muulu, aebele abasambi bakwe ukuti: “Mukapokelela amaka ilyo umupashi wa mushilo ukesa pali imwe, kabili mukaba inte shandi mu Yerusalemu na mu Yudea monse na mu Samaria, na ku mpela ya pano isonde.” (Imil. 1:8) Uyo mulimo wali no kusanshamo ukusambilisha abantu mwi sonde lyonse. Buyo nshi ubwa uyu mulimo? Bwa kupanga abasambi na bambi aba kwa Kristu, ilyo impela tailaisa. (Mat. 28:19, 20) Finshi tufwile ukucita nga tulefwaya ukubomba bwino umulimo Kristu atupeela?
4. (a) Amashiwi Petro alandile ayaba pali 2 Petro 3:11, 12 yakomaila pa cintu nshi icacindama? (b) Finshi ifyo tufwile ukucenjelako?
4 Moneni ifyo umutumwa Petro alandile: “Imwe mufwile ukuba ne mibele ya mushilo ne milimo ya bukapepa, abalolela kabili abafulukisha ukubapo kwa bushiku bwa kwa Yehova!” (2 Pet. 3:11, 12) Amashiwi ya kwa Petro yakomaila pa fyo cacindama ukuba abalola muli shino nshiku sha kulekelesha pa kuti tutwalilile ukubika amano ku milimo ya bukapepa. Pali iyi milimo paba no kushimikila imbila nsuma. Mwandini tulaba ne nsansa nga tulemona ifyo bamunyinefwe mwi sonde lyonse bali abacincila ilyo balebomba umulimo wa kushimikila uo Kristu atupeela! Lelo pa nshita imo ine, twalishiba ukuti tulingile ukuba abacenjela pa kuti amafya ya cila bushiku ayaba mu calo ico Satana ateka e lyo ne fyo umubili wa lubembu ulo twapyana ufwaisha tafitunenwine ica kuti twaleka ukuba abacincila pa kubomba umulimo wa kwa Lesa. Kanshi nomba natumone ifyo twingatwalilila ukulakonka Kristu.
Mulebomba Imilimo Lesa Amupeela
5, 6. (a) Ni pali cinshi Paulo atashishe Abena Kristu banankwe abali mu Yerusalemu, kabili ni pali finshi abasokele? (b) Mulandu nshi tushifwile ukubombela imilimo ya Bwina Kristu buyefya buyefya?
5 Muli kalata umutumwa Paulo alembeele Abena Kristu mu Yerusalemu, alibatashishe pa fyo bashipikishe pa nshita imo ilyo balebacusha. Abebele ukuti: “Muleibukisha inshiku sha kale, ilyo mwashipikishe ukushomboka ukukalamba mu macushi pa numa ya kupokelela ulubuuto.” Kanshi Yehova alibukishe imilimo yabo iya cishinka. (Heb. 6:10; 10:32-34) Amashiwi ya kutasha aya kwa Paulo yafwile yalikoselesha sana balya Abena Kristu abaHebere. Nangu cibe fyo, muli kalata imo ine, Paulo alibasokele na pa bunake bumo ubo fwe bantunse twakwata, ica kuti nga tatuilamine, kuti bwalenga twaleka ukuba abacincila mu mulimo wa kwa Lesa. Alandile ukuti Abena Kristu bafwile ukucenjela pa kuti ‘tabakeene’ nelyo ukufwaya umwa kubepekesha pa kuti beumfwila amafunde ya kwa Lesa.—Heb. 12:25.
6 Kulya kusoka kwa kwa Paulo pa lwa kufwaya ‘ukulakaana’ ukubomba imilimo iyo Lesa atupeela, kwalikuma Abena Kristu na pali lelo. Twalishiba ukuti tatufwile ukubomba imilimo wa Bwina Kristu buyefya buyefya, kabili tufwile ukutwalilila ukuba abacincila mu kubombela Lesa. (Heb. 10:39) Pantu na kuba ukubombela Lesa kuti kwalenga twaisaba no mweo nelyo ukwisafwilapo.—1 Tim. 4:16.
7, 8. (a) Cinshi cikatwafwa ukutwalilila abacincila mu mulimo wa kwa Lesa? (b) Nga ca kuti pali ino nshita tatuli abacincila nge fyo twali kale, finshi tulingile ukwibukisha pali Yehova na Yesu?
7 Cinshi cingatwafwa ukukanafwaya utumilandu twa kukaaninapo ukubomba imilimo Lesa atupeela? Icacindama cimo icingatwafwa ukupwisha ubo bwafya kulatontonkanya lyonse umwalola umulapo twalapile pa kuipeela. Ilyo twaipeele, twalilaile kuli Yehova ukuti ico tukalabikako sana amano, kucita ukufwaya kwakwe, kabili tulingile ukulacita ifyo twalaile. (Belengeni Mateo 16:24.) E ico, limo limo tufwile twabala twaipusha fwe bene ukuti: ‘Bushe na pali ino nshita ndafwaisha ukulacita ififwaikwa ku baipeela kuli Lesa nga filya nalecita ilyo nabatishiwe fye? Nelyo bushe pa myaka yapitapo nalileka ukucincila nga filya nali kale?’
8 Lelo pa numa ya kuibebeta mu bufumacumi nga twasanga ukuti kwena tatuli abacincila, lekeni tutontonkanye pa amashiwi ya kukoselesha ayalandile kasesema Sefania. Atile: “Amaboko yobe yetompoka. Yehova Lesa obe ali mu kati kobe. Apo wa maka, akapususha. Akaanga pali iwe no kusekelela.” (Sefa. 3:16, 17) Aya mashiwi ya nkosho mu kubalilapo yakoselesha abena Israele ababwelelemo ku Yerusalemu ukufuma mu busha mu Babiloni. Lelo aya mashiwi yalakoselesha na bantu ba kwa Lesa muno nshiku. Apo umulimo tubomba mulimo wa kwa Yehova, tufwile ukulaibukisha ukuti Yehova no Mwana wakwe balatutungilila no kutukosha ilyo tulebomba no mutima onse imilimo Lesa atupeela. (Mat. 28:20; Fil. 4:13) Nga twaesha na maka yesu ukutwalilila ukuba abacincila mu mulimo Lesa atupeela, akatupaala no kutwafwa ukulunduluka.
Beni Abacincila ‘Ilyo Mulefwaya Ubufumu Intanshi’
9, 10. Cishinka nshi Yesu alesambilisha ilyo alandile umulumbe wa mulaalilo ukalamba, kabili cinshi twingasambililako?
9 Ilyo Yesu alelya ifya kulya mu ng’anda ya ntungulushi ya baFarise, alandile pa cilangililo ca mulaalilo uukalamba. Muli cilya cilangililo, alondolwele ishuko lya kuba mu Bufumu ubwa mu muulu ilyapeelwe ku bantu balekanalekana. Kabili alondolwele no mo calola ukukaana. (Belengeni Luka 14:16-21.) Mu cilangililo ca kwa Yesu, bonse abo baitile balifwaile umwa kubepekesha pa kuti besangwa ku mutebeto. Umo atile alishitile impanga iyo alefwaya ukuyamona. Umbi na o atile alishitile ing’ombe isho alefwaya ukuyaceeceeta. Na umbi na o atile: ‘Te kuti njise ku mutebeto. Pantu e lyo ngupile.’ Imilandu bakaanine ukusangwako yali ya cabe cabe fye. Umuntu nga alefwaya ukushita impanga nelyo icitekwa ilingi line aceeceeta ico cintu ilyo talashita, kanshi te kuti afwaye sana ukuya mu kuciceeceeta ninshi nashita kale. Inga mulandu nshi umuntu uwa kuti e lyo fye opile nelyo ukuupwa engakaanina ubwite bwacindama nge fi? E mulandu wine kanshi ulya muntu wapekenye umulaalilo afuliilwe sana pa fyacitile balya bantu!
10 Abantu ba kwa Lesa bonse kuti basambililako cimo ku mulumbe wa kwa Yesu. Cinshi bengasambililako? Tatufwile ukuleka ifintu fya pa lwesu, pamo nga filya fyalumbulwa mu cilangililo ca kwa Yesu ukuba ifyacindama sana ica kuti fyalenga twalekelesha no mulimo wa kwa Lesa. Umwina Kristu nga afilwa ukwishiba ilyo afwile ukucita ifintu fya pa lwakwe, panono panono kuti aleka ukucincila mu mulimo wa kushimikila. (Belengeni Luka 8:14.) Nga tatulefwaya ifya musango yo ukutucitikila, tufwile ukukonka ukufunda kwa kwa Yesu ukutila: “Intanshi mulefwaya ubufumu no bulungami bwakwe.” (Mat. 6:33) Ala cisuma sana ukumona ukuti abantu ba kwa Lesa, abaice na bakalamba, balekonka uko kufunda! Na kuba abengi balyangushako imikalile yabo pa kuti bakwate inshita iikalamba iya kushimikila. Balaimwena abene ukuti ukucincila mu kufwaya Ubufumu intanshi kulaleta insansa na mapaalo ayengi.
11. Lyashi nshi ilya mu Baibolo ililanga umulandu cacindamina ukubombela Lesa no mutima onse kabili abacincila?
11 Pa kuti tumone umulandu cacindamina ukuba abacincila mu mulimo wa kwa Lesa, lekeni tumone ifyacitikile Imfumu Yehoashi iya bena Israele. Ilyo asakamene ukuti nalimo icalo ca Siria cali no kusansa Israele, Yehoashi aile kuli Elisha alelila. Kasesema Elisha amwebele ukuti akane ubuta pa windo ukulosha ku Siria, pa kulangilila ukuti ukuboko kwa kwa Yehova kukacimfya cilya calo. Imfumu yalingile ukumfwa bwino pa fyo bayebele. Lyena Elisha aebele Yehoashi ukubuula imifwi no kuilasa pa nshi. Yehoashi alashile pa nshi imiku fye itatu. Elisha alifulilwe sana pa co imfumu yacitile, pantu aikonkanyapo fye ukulasa imifwi pa nshi imiku 5 nangu 6 nga calolele mu kuti ‘nga yaumine Siria no kumupwishishisha.’ Nomba apo imfumu Yehoashi yalashile fye imiku iinono, yali no kucimfya fye imiku itatu. Apo tali uwacincila, Yehoashi acimfishe fye panono. (2 Isha. 13:14-19) Cinshi twingasambilila kuli ili lyashi? Yehova akatupaala sana nga ca kuti fye tulemubombela no mutima onse kabili abacincila.
12. (a) Cinshi cikatwafwa ukutwalilila ukuba abacincila mu mulimo wa kwa Lesa ilyo tuli na mafya? (b) Landeni ifyo mulenonkelamo pa mulandu wa kuti mwaliba abacincila mu kushimikila.
12 Amafya ya mikalile yalenga ciletukosela ukuba abacincila no kuipeelesha mu kubombela Lesa. Bamunyina na bankashi abengi baliba na mafya ya fya ndalama. Bambi cilabakalipa pantu balilwala kabili balafilwa no kubombela Yehova ukulingana ne fyo bengafwaya. Kwena, bonse umo umo kuti twacitapo fimo pa kuti tutwalilile ukuba abacincila no kutwalilila ukulakonka Kristu sana. Moneni ifyebo fimo na malembo ifingatwafwa mu kabokoshi kaleti “Finshi Fikamwafwa Ukutwalilila Ukulakonka Kristu?” Tontonkanyeni ifyo mwingesha na maka yenu ukubomfya ifi fyebo. Nga ca kutila mwafibomfya, fikamwafwa sana. Ukulabombesha sana mu mulimo wa kushimikila kulalenga twaba abashangila, twalaikala bwino, e lyo tulakwata umutende uwingi no kuba ne nsansa sana. (1 Kor. 15:58) Na kabili, ukubombela Lesa no mutima onse kulalenga ‘tulefulukisha ukubapo kwa bushiku bwa kwa Yehova.’—2 Pet. 3:12.
Ibebeteni mu Bufumacumi
13. Kuti twaishiba shani ukuti pa lwesu tulebomba no mweo onse?
13 Kwena, tufwile ukulaibukisha ukuti inshita tupoosa mu kushimikila te ilanga ukuti tulebomba no mutima onse. Ifitucitikila fiba ifyalekanalekana. Umuntu uulebomba fye iawala limo nelyo yabili cila mweshi mu mulimo wa kushimikila nalimo kuti aletemuna sana Yehova nga ca kutila e po engapela ukulingana no bumi bwakwe. (Linganyeniko Marko 12:41-44.) Kanshi pa kuti twishibe nga ifwe umo umo tulabombela Lesa no mutima onse, tufwile ukubebeta mu bufumacumi amaka yesu ne mikalile yesu. Fwe basambi ba kwa Kristu, tulafwaya no kulamona ifintu ukulingana na fintu ena afimona. (Belengeni Abena Roma 15:5; 1 Kor. 2:16) Bushe cinshi Yesu acindamike sana mu bumi bwakwe? Aebele amabumba ya bantu ba ku Kapernahumu ukutila: “Ndi no kubila imbila nsuma iya bufumu bwa kwa Lesa, pantu e co natumiinwe.” (Luka 4:43; Yoh. 18:37) Nga mwatontonkanya pa fyo Yesu aali uwacincila mu kushimikila, ibebeteni ukumona ifyo mwingacita pa kuti mulebombesha mu kushimikila.—1 Kor. 11:1.
14. Finshi twingacita pa kuti tuleshimikila sana?
14 Nga ca kutila twabebeta bwino bwino imikalile yesu, nalimo kuti twasanga ukuti tulingile ukulundako inshita tupoosa mu mulimo wa kushimikila. (Mat. 9:37, 38) Ku ca kumwenako, abacaice besu abengi abapwishishe amasukulu balebombesha sana mu kushimikila kabili balekwatako insansa bapainiya bacincila bakwata. Bushe na imwe te kuti mutemwe ukukwatako isho nsansa? Bamo bamunyina na bankashi balibebeta imikalile yabo kabili basalapo ukukuukila ku cifulo cimbi mu calo cabo, nelyo ku fyalo fimbi, ukushafula bakasabankanya ba mbila nsuma ya Bufumu. Bambi nabo balisambilila ululimi lwa ku calo cimbi pa kutila baleshimikila ku bafuma kuli ico calo. Nangu ca kutila limo cilafya ukulashimikila sana, ukushimikila kulaleta amapaalo ayasuma nga nshi, kabili kuti twayafwa na bambi abengi “ukwishiba bwino bwino icine.”—1 Tim. 2:3, 4; 2 Kor. 9:6.
Abo Baibolo Yalandapo Abo Twingapashanya
15, 16. Pa kuba abasambi bacincila aba kwa Kristu, ni bani abo tulingile ukupashanya?
15 Bushe bamo abaishileba abatumwa bacitile shani ilyo Kristu abebele ukuti balemukonka? Baibolo ilanda pali Mateo aiti: “Alishile fyonse, kabili aliimine alamukonka.” (Luka 5:27, 28) Pali Petro na Andrea, abaleipaya isabi, itila: “Apo pene bashile amasumbu, no kumukonka.” Kabili Yesu amwene Yakobo na Yohane bali na shibo, balelunda amasumbu. Bushe bacitile shani ilyo abetile? “Apo pene bashile ubwato na shibo, no kumukonka.”—Mat. 4:18-22.
16 Umbi uo twingasambililako ni Sauli, uwaishileba umutumwa Paulo. Nangu ca kuti alecusha abasambi ba kwa Kristu bunkalwe bunkalwe, alyalwike kabili aishileba ‘icipe icasalwa’ ku kushimikila pe shina lya kwa Kristu. “Ilyo line fye [Paulo] atendeke ukushimika pali Yesu mu masunagoge, ukuti Mwana wa kwa Lesa.” (Imil. 9:3-22) Nangu ca kuti Paulo alikwete amafya ayengi e lyo balemucusha no kumucusha, alitwalilile ukuba uwacincila.—2 Kor. 11:23-29; 12:15.
17. (a) Bushe finshi mulefwaya ukucita ukukuma ku kulakonka Kristu? (b) Mapaalo nshi tuipakisha nga tulecita ukufwaya kwa kwa Yehova no mutima onse na maka yesu yonse?
17 Kuti twatemwa ukupashanya balya batumwa no kukonka Kristu bwangu bwangu ukwabula ukuwayawaya. (Heb. 6:11, 12) Mapaalo nshi tuipakisha nga twatwalilila ukwesha na maka ukuba abacincila mu kukonka Kristu no kulamukonka sana? Tulaba ne nsansa sha cine cine ilyo tulecita ukufwaya kwa kwa Lesa kabili tulatemwa sana ukupeelwa imilimo na imbi e lyo ne ya mu cilonganino. (Amalu. 40:8; belengeni 1 Abena Tesalonika 4:1.) Kanshi nga twaesha na maka yesu yonse ukulakonka Kristu, tukaipakisha ayo mapaalo kabili tukaba no mutende mu matontonkanyo, tukaba ne nsansa, Lesa akatupaala, kabili tukaba no bumi bwa muyayaya.—1 Tim. 4:10.
Bushe Muleibukisha?
• Mulimo nshi uwacindama uo twapeelwa, kabili tufwile ukulaumona shani?
• Cinshi ico abantu batemwa ukucita nga babapeele imilimo ico tushifwile ukulacita, kabili mulandu nshi?
• Bushe kuibebeta nshi ukwa mu bufumacumi uko tufwile ukucita?
• Cinshi cikatwafwa ukutwalilila ukulakonka Kristu?
[Amepusho]
[Akabokoshi ne Cikope pe bula 27]
Finshi Fikamwafwa Ukutwalilila Ukukonka Kristu?
▪ Mulebelenga Icebo ca kwa Lesa cila bushiku, no kulatontonkanya pa fyo mwabelenga.—Amalu. 1:1-3; 1 Tim. 4:15.
▪ Mulepepa lyonse pa kuti umupashi wa kwa Lesa ulemwafwa no kumucingilila.—Seka. 4:6; Luka 11:9, 13.
▪ Muleba ifibusa na bantu abacincila mu mulimo wa kushimikila.—Amapi. 13:20; Heb. 10:24, 25.
▪ Mwilalaba ukuti shino nshiku tulimo sha mpela.—Efes. 5:15, 16.
▪ Muleibukisha ifyabipa ififuma mu ‘kukaana’ imilimo.—Luka 9:59-62.
▪ Lyonse muletontonkanya pa mulapo mwalapile pa kuipeela e lyo na pa mapaalo ayengi ayafuma mu kubombela Yehova no kulakonka Kristu no mutima onse.—Amalu. 116:12-14; 133:3; Amapi. 10:22.