?Yu Yu Mekem Evri Samting We Yu Naf Blong Mekem, Blong Folem Kraes?

“Yufala i stap folem fasin ya . . . Be . . . yufala i [mas] gohed moa yet.”—1 TES. 4:1.

1, 2. ( a) ?Ol man we oli laef long taem blong Jisas oli luk wanem samting? (b) ?From wanem taem blong yumi tu i impoten?

?YU YU bin tingbaot samtaem se, bambae i olsem wanem sipos yu yu laef long taem ya we Jisas i stap long wol? Ating yu wantem harem gud tumas olsem ol man we Jisas i bin tekemaot sik long olgeta nao oli no moa safa. Ating yu wantem lukluk Jisas mo harem voes blong hem. Olsem nao, yu save lanem plante samting mo lukluk ol merikel we hem i mekem. (Mak 4:1, 2; Luk 5:3-9; 9:11) !Yes, bambae yu harem gud bitim mak sipos yu bin stap long taem ya we Jisas i mekem ol bigbigfala wok ya! (Luk 19:37) Ol man we oli bon i kam afta long taem ya,  oli no luk ol samting ya we Jisas i mekem. Mo sakrefaes we hem i mekem taem i “givim laef blong hem blong tekemaot sin blong ol man,” bambae i neva hapen bakegen samtaem.—Hib. 9:26; Jon 14:19.

² I tru se taem ya blong Jisas i gud tumas. Be taem blong yumi tu i impoten tumas. ?From wanem? Yumi stap laef long taem ya we Baebol i talem se i “klosap en blong wol ya,” hemia “ol las dei.” (Dan. 12:1-4, 9; 2 Tim. 3:1, NW) Long taem blong yumi, oli sakemaot Setan long heven i kamdaon. I no longtaem, bambae oli fasem hem mo sakem hem i go long “bigfala hol ya we i godaon we i godaon.” (Rev. 12:7-9, 12; 20:1-3) Long taem blong yumi, yumi gat blesing tu blong mekem wan spesel wok. Hemia wok blong talemaot “gud nius” blong kingdom blong God long olgeta ples long wol, mo tokbaot Paradaes we bambae ol man oli save laef long hem. Bambae yumi no moa gat janis blong mekem wok ya bakegen samtaem.—Mat. 24:14.

3. Jes bifo we Jisas i go antap long heven, ?hem i givim wanem wok long ol man blong hem? ?Wok ya i olsem wanem?

³ Jes bifo we Jisas i go antap long heven, hem i talem long ol man blong hem se: “Bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Wok 1:8) Wok ya i blong tijim ol man long olgeta ples blong wol. ?Blong wanem? Blong oli kam disaepol blong Kraes bifo we en i kam. (Mat. 28:19, 20) ?Yumi mas mekem wanem blong yumi save finisim gud wok ya we Kraes i givim long yumi?

4. (a) ?Ol tok we i stap long 2 Pita 3:11, 12 i mekem yumi tingbaot wanem? (b) ?Yumi mas blokem wanem samting?

⁴ Ridim gud ol tok we aposol Pita i talem blong wekemap tingting blong yumi, se: “Yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik.” (2 Pita 3:11, 12) Ol tok ya blong Pita oli mekem yumi tingbaot se long ol las dei ya, yumi mas lukaot gud se bigfala samting long laef blong yumi, hemia blong mekem ol samting we God i wantem. Wan long ol samting ya, hemia wok blong talemaot gud nius. !Taswe, yumi glad tumas blong luk strong tingting we ol Kristin brata sista blong yumi long fulwol oli soemaot, taem oli gohed blong mekem wok blong prij we Kraes i givim long yumi! Be yumi mas kasem save gud long wan samting. Ol trabol we wol blong Setan mo sin i mekem long yumi evri dei, oli save mekem tingting blong yumi i kam slak, nao yumi no moa gohed strong long wok blong God. Yumi no mas letem samting ya i hapen. Ale, bambae yumi tokbaot olsem wanem blong gohed strong blong folem Kraes.

Glad Blong Mekem Ol Wok We God i Givim

5, 6. (a) ?Pol i talem wanem gudfala tok long ol Kristin long Jerusalem? ?Hem i givim wanem woning long olgeta tu? (b) ?From wanem yumi mas tinghevi long wok we God i givim long yumi?

⁵ Long leta we aposol Pol i raetem long ol Kristin long Jerusalem, hem i talem ol gudfala tok from fasin blong olgeta blong stanap strong longtaem, nating se ol man oli mekem i nogud long olgeta. Hem i se: “I gud yufala i stap tingbaot ol samting ya we yufala i kasem bifo. Taem we laet blong God i kamtru long yufala, i gat plante samting we i stap mekem yufala i harem nogud, be ol samting ya oli no winim yufala.” Yes, Jeova i no fogetem gudfala fasin ya blong olgeta blong stanap strong. (Hib. 6:10; 10:32-34) I klia se ol gudfala tok ya blong Pol i mas leftemap tingting blong ol Hibru Kristin ya bigwan. Be long semfala leta, Pol i givim woning long saed blong wan fasin blong ol sinman we ol Kristin ya oli mas blokem. Sipos no, fasin ya i save slakem strong tingting we oli gat blong mekem wok blong God. Hem i talem se oli mas lukaotgud blong no mekem eskius, nao bambae oli “tanem baksaed long God” mo ol tok blong hem.—Hib. 12:25.

⁶ I isi long ol Kristin tede tu blong mekem eskius mo kam slak long ol wok we God i givim. Taswe woning we Pol i givim i stret long yumi tu. Yumi neva mas kam olsem we yumi ting nating long ol Kristin wok blong yumi. Yumi mas tinghevi long wok ya mo mekem wetem strong tingting. (Hib. 10:39) Yumi no mas fogetem se, laef blong yumi mo ol narafala tu i dipen long tabu wok ya blong God.—1 Tim. 4:16.

7, 8. (a) ?Wanem bambae i givhan long yumi blong holem strong tingting blong mekem wok blong God? (b) ?Sipos yumi no moa gat strong tingting olsem fastaem, yumi mas tingbaot wanem long saed blong Jeova mo Jisas?

⁷ ?Wanem bambae i givhan long yumi blong blokem ol eskius blong no mekem wok we God i givim  long yumi? Yumi save blokem ol eskius, sipos yumi tingting dip oltaem long promes we yumi mekem blong givim laef blong yumi i go long Jeova. Long taem ya, yumi mekem promes se bambae yumi putum samting we Jeova i wantem i stap fastaem long ol narafala samting long laef blong yumi. Mo yumi wantem holem promes ya. (Ridim Matiu 16:24.) Taswe, i gud yumi tekem taem blong tingbaot se: ‘?Mi mi gat strong tingting naoia olsem we mi gat taem mi tekem baptaes, blong holem promes ya we mi mi mekem long God? ?Taem ol yia oli stap pas, mi mi stap lusum strong tingting we mi gat fastaem?’

⁸ Sipos yumi lukluk gud long laef blong yumi, nao yumi luksave se yumi no moa wok strong olsem fastaem, i gud blong tingbaot ol tok blong profet Sefanaea. Tok ya i save givim paoa long yumi bakegen, i se: “Yufala i no letem han blong yufala i stap hang blong soemaot se yufala i stap harem nogud. Hae God i God blong yufala, mo hem i stap wetem yufala. Paoa blong hem i stap mekem yufala i win. Hem bambae i glad long yufala.” (Sef. 3:16, 17) Ol tok ya blong leftemap tingting i go fastaem long ol man Isrel bifo, we oli aot long kalabus long Babilon blong gobak long Jerusalem. Be promes ya i stret tu long ol man blong God tede. Wok we yumi mekem, hem i wok blong Jeova nomo. Taswe yumi no mas fogetem se Jeova mo Pikinini blong hem, tufala i stap givhan long yumi. Tufala i stap mekem yumi strong, blong yumi naf blong mekem gud ol wok we God i givim long yumi. (Mat. 28:20; Fil. 4:13) Sipos yumi traehad oltaem blong mekem wok blong God wetem strong tingting, bambae hem i blesem yumi mo halpem yumi blong gohed gud.

Wok Wetem Strong Tingting Blong ‘Lukaot Kingdom Fastaem’

9, 10. ?Wanem bigfala tingting long parabol blong Jisas long saed blong wan man we i mekem bigfala kakae? ?Parabol ya i tijim yumi long wanem samting?

⁹ Wan dei, Jisas i stap kakae long haos blong wan lida blong ol Farisi. Nao hem i talem wan parabol long saed blong wan man we i mekem wan bigfala kakae. Parabol ya i blong soemaot se God i singaot sam man blong oli go long Kingdom blong heven. Mo i soemaot tu olsem wanem man i save mekem eskius mo kam slak long ol Kristin wok. (Ridim Luk 14:16-21.) Long parabol ya, samfala we man ya i singaot olgeta blong oli kam long kakae blong hem, oli mekem eskius. Wan long olgeta i talem se hem i mas go lukluk wan graon we hem i jes pem. Narawan i talem se hem i jes pem sam buluk, ale hem i mas go luk olgeta. Wan narafala bakegen i talem se: “Mi mi jes mared ya, mi no save kam.” Ol man ya oli stap mekem eskius nomo. Man we i pem graon mo buluk, hem i lukluk olgeta bifo we hem i pem. ?From wanem hem i mas hareap blong go luk olgeta bakegen? ?Mo from wanem mared i mas blokem narafala man ya blong i no save kam long impoten kakae ya? !Yumi luksave from wanem man ya we i singaot olgeta i kam kros tumas!

¹⁰ Parabol ya blong Jisas i tijim yumi, ol man blong God, long wan bigfala samting. ?Wanem samting? Yumi neva mas letem ol prapa bisnes blong yumi, olsem ol samting we Jisas i talem long parabol ya, oli kam moa impoten i bitim wok blong God. Sipos wan Kristin i no moa putum wok blong God long fas ples long laef blong hem be i putum ol prapa bisnes blong hem long fasples, sloslo strong tingting we hem i gat blong prij bambae i lus. (Ridim Luk 8:14.) Blong blokem samting ya, yumi mas folem advaes ya blong Jisas: “Yufala i mas gohed blong lukaot kingdom mo stret fasin blong hem fastaem.” (Mat. 6:33, NW) !I gud tumas blong luk se ol man blong God, nomata se oli yangfala no olfala, oli stap folem impoten advaes ya! Yes, plante long olgeta oli jenisim sam samting finis long laef blong olgeta blong mekem i no moa fasfas, nao oli gat moa taem blong mekem wok blong prij. Oli luksave long prapa laef blong olgeta se taem oli wok wetem strong tingting blong lukaot Kingdom fastaem, oli rili hapi, mo oli harem gud long laef blong olgeta.

11. ?Wanem stori blong Baebol i soemaot se i impoten blong mekem wok blong God wetem olgeta hat blong yumi mo wetem strong tingting?

¹¹ Blong soemaot se i impoten blong mekem wok blong God wetem strong tingting, tingbaot wan samting we i hapen long laef blong King Joas long Isrel. Joas i stap wari se ol man Siria bambae oli winim Isrel long faet, ale hem i go krae long Elisa. Profet Elisa i talem long hem blong openem windo long saed i go long Siria mo sutum wan ara i go. Hemia i blong soemaot se Jeova bambae i givhan long ami blong Isrel blong winim ol man Siria. Tok ya i mas mekem se tingting blong king ya i kam strong.  Nao Elisa i talem bakegen long Joas blong karem ol ara blong hem mo kilim graon wetem olgeta. Be Joas i kilim graon tri taem nomo. Elisa i kros long hem, i talem se sipos hem i kilim graon faef no sikis taem, bambae hem i save “winimgud” ol man Siria. Be from we hem i kilim smol nomo, bambae hem i winim olgeta tri taem nomo. Joas i no mekem wok ya wetem strong tingting, taswe hem i win smol nomo. (2 King 13:14-19) ?Yumi lanem wanem long stori ya? Yumi lanem se, sipos yumi wantem we Jeova i blesem yumi bigwan, yumi mas wok wetem olgeta hat blong yumi mo wetem strong tingting.

12. (a) ?Wanem bambae i halpem yumi blong holemtaet strong tingting blong mekem wok blong God, taem yumi stap kasem ol trabol long laef? (b) Tokbaot olsem wanem fasin ya blong bisi long wok blong prij i givhan long yu.

¹² Ol trabol long laef oli save traem strong tingting we yumi gat blong mekem wok blong God mo givim ona long hem. Plante Kristin brata sista oli gat problem long saed blong mane. Sam narafala oli harem nogud from we oli gat wan bigfala sik, nao oli no save mekem plante long wok blong Jeova. Nating se i olsem wanem, i gat sam samting we yumi wanwan i save mekem blong holemtaet strong tingting, mo blong gohed blong mekem evri samting we yumi naf blong mekem blong folem Kraes. Plis ridim advaes mo ol vas long bokis ya “?Wanem Bambae i Givhan Long Yu Blong Gohed Blong Folem Kraes?” Traem tingbaot olsem wanem yu yu save mekem evri samting we yu naf blong mekem, blong folem advaes ya. Sipos yu mekem olsem, bambae advaes ya i givhan bigwan long yu. Taem yumi bisi long wok blong prij, tingting blong yumi i no olbaot, laef blong yumi i gat mining, yumi gat pis mo glad. (1 Kor. 15:58) Mo tu, taem yumi mekem wok blong God wetem olgeta hat mo paoa blong yumi, i isi moa blong tingbaot se ‘Dei blong God bambae i kamtru.’—2 Pita 3:12.

Lukluk Gud Long Laef Blong Yu

13. ?Olsem wanem blong save sipos yu yu stap mekem wok blong God wetem olgeta hat mo paoa blong yu?

¹³ Be i gat wan samting we yumi no mas fogetem. Yumi no makem se yumi mekem wok blong Jeova wetem olgeta hat mo paoa blong yumi from hamas aoa we yumi spenem long wok blong prij. Laef blong yumi wanwan i defdefren. Maet wan long yumi i sik mo i save spenem wan no tu aoa nomo evri manis long wok blong prij. Be sipos hem i naf blong mekem hemia nomo, Jeova bambae i glad long wok blong hem. (Skelem wetem Mak 12:41-44.) Taswe, blong save sipos yu wan yu stap mekem wok blong God wetem olgeta hat mo paoa blong yu, yu mas lukluk gud long laef blong yu mo ol samting we yu yu naf blong mekem. Mo tu, from we yumi ya, yumi man blong Kraes, yumi wantem mekem  tingting blong yumi i laenap wetem tingting blong hem. (Ridim 1 Korin 2:16.) ?Jisas i putum wanem samting long fas ples long laef blong hem? Hem i talem long ol man Kapaneam we oli hivap blong lesin long hem, se: ‘Mi mas talemaot gud nius blong kingdom blong God, from we God i sanem mi blong mi mekem olsem.’ (Luk 4:43, NW; Jon 18:37) I gud yu traem tingbaot strong tingting we Jisas i soemaot long wok blong God, nao yu skelem laef blong yu blong luk sipos yu yu naf blong mekem moa long wok blong prij.—1 Kor. 11:1.

14. Talem sam rod blong mekem moa long wok blong prij.

¹⁴ Taem yumi lukluk gud long laef blong yumi, maet yumi luksave se yumi naf blong spenem moa taem long wok blong prij. (Mat. 9:37, 38) Olsem nao, plante taosen yangfala we oli jes finis long skul, oli spenem moa taem long wok blong prij, nao oli harem gud blong wok wetem strong tingting olsem ol paenia. ?Olsem wanem? ?Yu tu yu laekem blong kasem semfala glad ya? Sam brata mo sista oli lukluk gud long laef blong olgeta, nao oli luksave se oli naf blong muv i go long wan narafala ples long kantri blong olgeta, no long wan narafala kantri we i nidim sam moa man blong talemaot Kingdom. Samfala oli lanem wan narafala lanwis, blong givhan long ol man long ples blong olgeta, we oli toktok lanwis ya. Maet i no isi blong yumi mekem moa long wok blong prij, be bambae i karem bigfala blesing long yumi. Mo tu, maet yumi halpem plante moa man blong ‘oli save trutok blong God.’—1 Tim. 2:3, 4; 2 Kor. 9:6.

Folem Eksampol Blong Samfala Long Baebol

15, 16. Tokbaot sam man blong Kraes we yumi save folem fasin blong olgeta blong wok wetem strong tingting.

¹⁵ ?Sam long olgeta we oli kam ol aposol blong Kraes, oli mekem wanem taem Kraes i singaot olgeta blong oli folem hem? Long saed blong Matiu, Baebol i talem se: “Hem i livim olgeta samting blong hem, i girap, i biaen long hem.” (Luk 5:27, 28) Long saed blong Pita mo Andru we tufala i stap sakem net, yumi ridim se: “Wantaem nomo, tufala i livim ol net blong tufala, tufala i biaen long hem.” Afta, Jisas i luk Jemes mo Jon, we tufala i stap wok wetem papa blong tufala blong somap gud ol net. ?Tufala i mekem wanem, taem Jisas i singaot tufala? “Wantaem nomo, tufala i girap, tufala i livim papa blong tufala i stap long bot, nao tufala i biaen long Jisas.”—Mat. 4:18-22.

¹⁶ Wan narafala man we yumi save folem eksampol blong hem, hemia Sol, we biaen i kam aposol Pol. Fastaem Sol i ronem mo kilim nogud ol man blong Kraes. Be hem i jenisim fasin blong hem, nao Kraes i ‘jusumaot hem, blong hem i man’ blong talemaot nem blong Hem. Ale, “wantaem nomo, [Pol] i stat go insaed long ol haos blong prea blong ol laen blong Isrel, i stap talemaot se Jisas ya, hem i Pikinini blong God.” (Wok 9:3-22) Nating se Pol i kasem hadtaem mo ol man oli mekem i nogud tumas long hem, be hem i neva lusum strong tingting we hem i gat blong mekem wok blong God.—2 Kor. 11:23-29; 12:15.

17. (a) ?Wanem samting we yu yu wantem mekem blong folem gud Kraes? (b) ?Wanem ol blesing we yumi kasem taem yumi mekem samting we Jeova i wantem wetem olgeta hat mo paoa blong yumi?

¹⁷ Yumi mas folem gudfala eksampol blong ol disaepol ya, we wantaem nomo oli glad blong mekem evri samting we Kraes i talem. (Hib. 6:11, 12) ?Wanem ol blesing we yumi kasem taem yumi traehad blong mekem evri samting we yumi naf blong mekem blong folem Kraes wetem strong tingting? Yumi kasem trufala glad taem yumi mekem samting we God i wantem. Mo yumi harem gud long blesing blong kasem ol spesel wok, long wok blong prij mo long kongregesen. (Sam 40:8; ridim 1 Tesalonaeka 4:1.) Yes, taem yumi wok wetem olgeta paoa blong yumi blong folem Kraes, yumi harem gud long plante bigfala blesing we oli stap longtaem. Sam long olgeta, i gat pis long tingting, glad, harem gud long laef blong yumi, God i glad long yumi, mo janis blong kasem laef we i no save finis.—1 Tim. 4:10.

?Yu Yu Rimemba?

• ?Wanem impoten wok we Jisas i givim long yumi? ?Yumi mas gat wanem tingting long saed blong wok ya?

• ?Wanem fasin blong ol sinman we yumi mas blokem? ?From wanem?

• ?Yumi mas lukluk gud long wanem samting?

• ?Wanem bambae i givhan long yumi blong gohed blong folem Kraes?

[Kwestin]

[Bokis blong pija long pej 29]

?Wanem Bambae i Givhan Long Yu Blong Gohed Blong Folem Kraes?

▪ Ridim Tok blong God evri dei, mo tingting dip long ol save we yu ridim.—Sam 1:1-3; 1 Tim. 4:15.

▪ Prea oltaem mo askem long God blong i givim tabu spirit blong halpem mo lidim yu.—Sek. 4:6; Luk 11:9, 13.

▪ Joen wetem olgeta we oli soemaot strong tingting long wok blong prij, mo we oli wok wetem fulhat blong olgeta.—Prov. 13:20; Hib. 10:24, 25.

▪ Luksave se smol taem nomo i stap.—Efes. 5:15, 16.

▪ Kasem save gud long rabis frut we bambae i kamaot sipos yu mekem eskius, nao yu kam slak long ol Kristin wok blong yu.—Luk 9:59-62.

▪ Tingting oltaem long promes we yu mekem finis blong givim laef blong yu i go long Jeova. Tingbaot ol bigfala blesing we man i kasem taem hem i mekem wok blong Jeova, mo i folem Kraes wetem olgeta hat blong hem.—Sam 116:12-14; 133:3; Prov. 10:22.