Ndi ke Etiene Christ ke Ofụri Esịt?
Ndi ke Etiene Christ ke Ofụri Esịt?
“Kpa nte mbufo ke akpanikọ ẹsụk ẹsan̄ade, . . . ẹka iso ẹnam ntre ata ọyọhọ ọyọhọ.”—1 THESS. 4:1.
1, 2. (a) Nso utịben̄kpọ ke mbon eyo Jesus ẹkekụt? (b) Nso inam ini nnyịn emi edi akpan ini n̄ko?
NDI akanam emetie ntem ekere nte ekpekenemde fi nditiene ndu uwem ini emi Jesus okodude ke isọn̄? Ekeme ndidi emesikere ke Jesus akpakanam udọn̄ọ fo okụre onyụn̄ anam ọbọhọ kpukpru afanikọn̄ oro unana nsọn̄idem anamde osobo. Mîdịghe ekeme ndidi ekere nte ekpekenemde fi nditiene n̄kụt Jesus iso ye iso nnyụn̄ n̄kop nte enye esitịn̄de ikọ—n̄kop ukpepn̄kpọ esie nnyụn̄ n̄kụt nte enye anamde utịben̄kpọ. (Mark 4:1, 2; Luke 5:3-9; 9:11) Nso akwa ifet ke ekpedi ntem nditiene ndu uwem ini emi Jesus okodude ke isọn̄ nnyụn̄ n̄kụt nte enye anamde kpukpru emi! (Luke 19:37) Ke ẹsiode mbon eyo oro ẹfep, idụhe mbon en̄wen emi ẹkụtde utọ n̄kpọ oro, owo idinyụn̄ ifiakke inam se Jesus ‘akawade idemesie’ anam ke isọn̄ emi tutu amama.—Heb. 9:26; John 14:19.
2 Edi ini nnyịn emi onyụn̄ edi akpan ini n̄ko. Ntak idọhọde ntre? Nnyịn idu ke “utịt ini” ye ke “mme akpatre usen” emi Bible eketịn̄de aban̄a. (Dan. 12:1-4, 9; 2 Tim. 3:1) Ini nnyịn emi ke ẹkesio Satan ke heaven ẹduọk. Ibịghike ẹyekọbi enye ẹnyụn̄ ẹtop enye ẹsịn “ke editụn̄ọ ukpe.” (Edi. 12:7-9, 12; 20:1-3) Ini nnyịn emi n̄ko ke ẹnọ nnyịn akpan utom—ndikwọrọ “eti mbụk obio ubọn̄” ke ofụri ererimbot, ntịn̄ nnọ mme owo mban̄a Paradise oro edide ke iso, ndien akpatre ini oro ẹnamde utom emi edi emi.—Matt. 24:14.
3. Jesus ọkọdọhọ mme anditiene enye ẹnam nso mbemiso enye ọnyọn̄de heaven, ndien didie ke ẹnam emi?
3 Jesus ọkọdọhọ mme anditiene enye mbemiso enye ọnyọn̄de heaven ete: “Mbufo ẹyedi mme ntiense mi ke Jerusalem ye ke ofụri Judea ye Samaria tutu esịm ke ata utịt ikpehe isọn̄.” (Utom 1:8) Utom emi ama esịne ndikpep mme owo n̄kpọ ke ofụri ererimbot. Ntak-a? Man ẹnam mmọ ẹkabade ẹtiene Christ mbemiso utịt edi. (Matt. 28:19, 20) Nso ke ikpanam man ikeme ndinam utom ukwọrọikọ emi Christ ọkọdọn̄de nnyịn mi?
4. (a) Nso ke Peter ọdọhọ inam ke 2 Peter 3:11, 12? (b) Nso ke ana ikpeme?
4 Apostle Peter ọkọdọhọ ete: “Nso orụk owo ke mbufo ẹkpedi ke edisana ido uwem ye ke mme edinam uten̄e Abasi, nte ẹtiede ẹbet ẹnyụn̄ ẹsọn̄ọde ẹnyene edidu usen Jehovah ke ekikere.” (2 Pet. 3:11, 12) Peter ọkọdọhọ inen̄ede ifiọk nte idude uwem ke mme akpatre usen emi mbak n̄kpọ ndomokiet edibiọn̄ọ nnyịn ndinam n̄kpọ Abasi, utọ nte edikwọrọ eti mbụk. Esinen̄ede enem nnyịn ndikụt nte nditọete nnyịn ke ofụri ererimbot ẹsịnde ifịk ẹnam utom ukwọrọikọ emi Christ ọkọdọhọde ẹnam. Ana nnyịn n̄ko ikpeme mbak idiọk ererimbot Satan emi ye idiọkn̄kpọ oro ikadade-da imana idinam itek ifịk ke n̄kpọ Abasi. Ẹyak ineme se ikpanamde man iwụt ke imaka iso itiene Christ.
Kop Inemesịt Ndinam Se Abasi Ọdọhọde
5, 6. (a) Ntak emi Paul okotorode ekemmọ nditọete ke Jerusalem, ndien nso ke enye ọkọdọhọ mmọ ẹkpeme? (b) Ntak emi nnyịn mîkpadaha mbre isịn ke utom Abasi-e?
5 Apostle Paul ama ewet mme Christian ke Jerusalem leta onyụn̄ otoro mmọ ke ndikọsọn̄ọ nda nnam n̄kpọ Abasi idem ke ini ẹkekọbọde mmọ. Enye ọkọdọhọ ete: “Ẹka iso ẹti mme usen eyo oko, emi, ke ẹma ẹkenam enyịn an̄wan̄a mbufo, mbufo ẹma ẹyọ akwa en̄wan ke idak ndutụhọ.” Ke akpanikọ, Jehovah ikefreke mmọ. (Heb. 6:10; 10:32-34) Anaedi esịt ama enen̄ede enem mmọ ndikop nte Paul okotorode mmọ. Edi kpa ke leta oro, Paul ama ọdọhọ mmọ ẹkpeme mbak ifịk mmọ editek nte esidide ye ediwak owo. Enye ama ọdọhọ mme Christian ẹkpeme mbak mmọ ẹditre ndinam ewụhọ Abasi.—Heb. 12:25.
6 Item emi ebehe mme Christian mfịn n̄ko. Imọfiọk ke ana ibiere ke nnyịn ididaha mbre isịn ke utom Abasi, m̀mê ndiyak n̄kpọ ndomokiet anam itek ke ifịk. (Heb. 10:39) Abasi edinyan̄a nnyịn edieke isịnde ifịk inam n̄kpọ esie.—1 Tim. 4:16.
7, 8. (a) Nso idinam nnyịn ika iso isịn ifịk inam n̄kpọ Abasi? (b) Edieke idem ọtọn̄ọde ndimem nnyịn, nso ke ikpeti iban̄a Jehovah ye Eyen esie?
7 Nso ke ikpanam mbak nnyịn ididọhọ ke enyene n̄kpọ emi mîyakke inam n̄kpọ Abasi? N̄kpọ kiet emi ikpanamde edi ndisitie n̄kere se ikọdọhọde Abasi ke iyanam ke ini ikayakde idem inọ enye, nnyụn̄ nti se un̄wọn̄ọ oro ọwọrọde. Ima idọhọ Jehovah ke uduak esie edidi ebeiso n̄kpọ ke uwem nnyịn, ndien se inyụn̄ iyomde ndinam edi oro. (Kot Matthew 16:24.) Mmọdo, oyom isibụp idem nnyịn ite: ‘Ndi enen̄ede ọdọn̄ mi ndinam se n̄kọn̄wọn̄ọde nnọ Abasi ke ini n̄kayakde idem nnọ enye nte ọkọdọn̄de ke ini n̄kanade baptism? Mîdịghe ndi idem ọtọn̄ọ ndimem mi?’
8 Edieke etiede nte idem ọtọn̄ọ ndimem nnyịn, ọkpọfọn iti ikọ prọfet Zephaniah emi: “Kûyak ubọk emem fi. Jehovah Abasi fo odu ke ufọt fo, . . . enye ayanyan̄a, ayadat esịt aban̄a fi ke idara.” (Zeph. 3:16, 17) Ẹketịn̄ ikọ emi man ẹsọn̄ọ nditọ Israel oro ẹketode ntan̄mfep ke Babylon ẹnyọn̄ọ Jerusalem, idem. Edi ikọ emi osụk esesịn udọn̄ ọnọ ikọt Abasi mfịn. Sia inamde n̄kpọ Jehovah, ana iti ke Jehovah ye Eyen esie ẹdu ye nnyịn, ẹnyụn̄ ẹsọn̄ọ nnyịn idem man ikeme ndinen̄ede nnam utom Abasi. (Matt. 28:20; Phil. 4:13) Edieke ikade iso isịn ifịk inam utom Abasi, enye ọyọdiọn̄ nnyịn onyụn̄ anam ika iso inam n̄kpọ esie.
“Ndibem Iso Nyom Obio Ubọn̄” Ifịk Ifịk
9, 10. Ntak emi Jesus ọkọnọde uwụtn̄kpọ akamba udia mbubreyo, ndien nso ke uwụtn̄kpọ emi ekpep nnyịn?
9 Ke ini Jesus akadiade udia ke ufọk andikara mme Pharisee kiet, enye ama ọnọ uwụtn̄kpọ aban̄a akamba udia mbubreyo emi owo kiet akanamde. Enye ama etịn̄ nte ẹkebererede akwa ifet ẹnọ ndusụk owo nditiene n̄kakara ke Obio Ubọn̄ heaven. Enye ama etịn̄ n̄ko nte ndusụk owo ẹkesịnde ifet emi. (Kot Luke 14:16-21.) Jesus ọkọdọhọ ke mbon oro ẹkekotde usọrọ oro ẹma ẹnọ nsio nsio ntak mbak ẹdika usọrọ oro. Akpa owo ọkọdọhọ ke iyom ndikese in̄wan̄ oro ikedepde. Ọyọhọ iba ọdọhọ ke iyom ndika n̄kese enan̄ oro ikedepde. Enye eken ọdọhọ ke ‘imọ ndisụk ndọ n̄wan edi oro, ke imọ idikemeke ndidi.’ Omokụt do ke idụhe eke ekenyenede ata ntak ndinọ. Owo emi edepde in̄wan̄ m̀mê enan̄ esisese mmọ kan̄a mbemiso ekpe okụk, ntre inyeneke se iditịbede edieke owo mîfiakke ikese idaha idahaoro. N̄ko-n̄ko, ndidọ n̄wan obufa ikpakpanke owo ndika utọ akpan usọrọ oro. Omokụt do ntak emi owo oro okokotde mmọ usọrọ ekenen̄erede ayat esịt ye mmọ!
10 Kpukpru ikọt Abasi ẹkeme ndikpep n̄kpọ nto uwụtn̄kpọ emi. Nso idi oro? Se ikpepde edi nte ke ikpanaha iyak se inamde, utọ nte se ẹkesiakde ke uwụtn̄kpọ oro, akpan nnyịn ndinam n̄kpọ Abasi. Edieke Christian mîdiọn̄ọke ini emi enye akpanamde mbubehe idemesie, enye idinen̄ekede inyene aba ifịk ke n̄kpọ Abasi. (Kot Luke 8:14.) Man emi okûtịbe unọ nnyịn, oyom “[ika] iso, ndien, ndibem iso nyom obio ubọn̄ ye edinen ido esie,” nte Jesus ọkọdọhọde. (Matt. 6:33) Esinen̄ede enem ndikụt ikọt Abasi, n̄kpri ye ikpọ, ẹnamde emi. Ediwak mmọ ẹbiere ndidu mfefere uwem man ẹkeme ndinyene ekese ini n̄kwọrọ ikọ. Mmọ ẹfiọk ke idụhe se inọde owo inemesịt ye uyụhọ nte edisịn ifịk mbem iso nyom Obio Ubọn̄.
11. Ewe mbụk Bible iwụt ke enen̄ede ọfọn isịn ifịk inam n̄kpọ Abasi ke ofụri esịt?
11 Man iwụt ke enen̄ede ọfọn ndisịn ifịk nnam n̄kpọ Abasi, kop se iketịbede mi inọ Joash ke ini enye akakarade Israel. Joash ama ekeseme ọnọ Elisha ke ntak emi mbon Syria ẹkeyomde ndidi ndisobo Israel. Prọfet Elisha ama ọdọhọ enye ada ke window otop idan̄ esịn ke n̄kan̄ Syria man owụt ke Jehovah ayanam mmọ ẹkan Syria. Anaedi emi ama ọsọn̄ọ Edidem Joash idem. Ekem Elisha ọdọhọ enye atịgha isọn̄. Joash atịgha utịm ikata kpọt. Elisha ayat esịt etieti ye enye, sia ekpedi enye ama esịn ifịk atịgha esịm ikotion m̀mê ikotiokiet, oro ọkpọwọrọ ke enye “akpasuan Syria tutu ama mmọ.” Edi nditịgha utịm ikata emi kpọt ọwọrọ ke enye edinyụn̄ ikan Syria utịm ikata kpọt n̄ko. Omokụt do nte unana ifịk ọkọbọde Joash n̄kpọ abiat. (2 Ndi. 13:14-19) Nso ke emi ekpep nnyịn? Jehovah edinen̄ede idiọn̄ nnyịn n̄kukụre edieke isịnde ifịk inam n̄kpọ esie ke ofụri esịt.
12. (a) Nso idinam ika iso isịn ifịk inam n̄kpọ Abasi kpa ye oro isobode afanikọn̄? (b) Tịn̄ nte ndika ukwọrọikọ kpukpru ini enen̄erede enyene ufọn ọnọ fi?
12 Afanikọn̄ oro isobode ekeme ndinam nnyịn inen̄ekede isịn ifịk aba ke n̄kpọ Abasi. Ediwak nditọete nnyịn iren ye iban ke ẹyọ nsọn̄ọn̄kpọ. Mbon eken ẹnen̄ede ẹseme nte idiọk udọn̄ọ mîyakke isịn ifịk inam n̄kpọ Jehovah. Edi odu se kpukpru nnyịn ikemede ndinam man ika iso inyene ifịk inyụn̄ ika iso itiene Christ ke ofụri esịt. Mbọk se se akpanamde ye mme itie Bible oro ẹdude ke ekebe oro, “Nso Idinam Aka Iso Etiene Christ?” Kere nte edinamde se ẹwetde do. Edieke anamde se ẹwetde do, eyenen̄ede ọfọn ye afo. Ndika ukwọrọikọ kpukpru ini ọyọnọ nnyịn odudu, anam uwem nnyịn enyene se ọwọrọde, onyụn̄ anam inen̄ede inyene ifụre inyụn̄ ikop inemesịt. (1 Cor. 15:58) N̄ko-n̄ko, ndinam n̄kpọ Abasi ke ofụri esịt anam ‘isọn̄ọ inyene edidu usen Jehovah ke ekikere.’—2 Pet. 3:12.
Nen̄ede Dụn̄ọde Idem Fo
13. Didie ke ikeme ndifiọk m̀mê inam n̄kpọ Abasi ke ofụri esịt?
13 Edi ọfọn idiọn̄ọ ke idịghe ibat hour emi owo ọkwọrọde ke ẹda ẹdiọn̄ọ owo emi ọkwọrọde ikọ ke ofụri esịt. Sia owo idịghe ukem. Owo emi akade ukwọrọiko hour kiet m̀mê iba kpọt ke ọfiọn̄, ekeme ndinen̄ede nnem Jehovah esịt edieke edide ofụri se enye ekemede ndinam edi oro ke ntak emi idem mîsọn̄ke enye. (Men Mark 12:41-44 domo.) Mmọdo, man ifiọk m̀mê inam n̄kpọ Abasi ke ofụri esịt, ana inen̄ede idụn̄ọde ukeme ye mme idaha nnyịn. Ndien sia idide mme anditiene Christ, iyom ndikere n̄kpọ nte Christ. (Kot Rome 15:5; 1 Cor. 2:16) Nso ikenen̄ede idi akpan n̄kpọ inọ Jesus? Jesus ọkọdọhọ otuowo ke Capernaum ete: “Ana ntan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:43; John 18:37) Kere nte Jesus ekesisịnde ifịk ọkwọrọ ikọ, ekem da oro dụn̄ọde idemfo se m̀mê emekeme ndisịn ifịk n̄kwọrọ ikọ n̄kan nte ekesikwọrọde.—1 Cor. 11:1.
14. Nso ke akpanam man ọkwọrọ ikọ akan nte ekesikwọrọde?
14 Ndinen̄ede ndụn̄ọde idaha nnyịn ekeme ndinam inen̄ede ika ukwọrọikọ ikan nte ikesikade. (Matt. 9:37, 38) Ke uwụtn̄kpọ, ediwak uyen emi ẹkụrede ufọkn̄wed ndondo emi ẹdụk utom usiakusụn̄, ndien emi ọnọ mmọ ata inemesịt. Ndi akpama nditiene n̄kop utọ inemesịt emi? Ke ndusụk nditọete iren ye iban ẹma ẹkedụn̄ọde idaha mmọ, mmọ ẹbiere ndiwọrọ n̄ka n̄kan̄wam ke ebiet emi ẹnen̄erede ẹyom mme ọkwọrọ etop Obio Ubọn̄, edide ke idụt mmọ m̀mê ke idụt en̄wen. Mbon eken ẹkpep usem en̄wen man ẹkeme ndikwọrọ ikọ nnọ mbon oro mîkopke usem mmọ. Kpa ye kpukpru emi mîmemke utom, enye enen̄ede enyene ufọn sia enye ekeme ndinam in̄wam ediwak owo “ẹsịm nnennen ifiọk akpanikọ.”—1 Tim. 2:3, 4; 2 Cor. 9:6.
Mbon Oro Ikpekpebede ke Bible
15, 16. Mmanie ke ikpekpebe edieke iyomde ndisịn ifịk ntiene Christ?
15 Didie ke ndusụk mbon oro ẹkekabarede ẹdi apostle ẹkenam n̄kpọ ke ini Jesus ọkọdọhọde mmọ ẹtiene imọ? Bible ọdọhọ ke “[Matthew ama] ọkpọn̄ kpukpru n̄kpọ adaha etiene enye.” (Luke 5:27, 28) Nso kaban̄a Peter ye Andrew emi ẹkesụk ẹkọde iyak? Bible ọdọhọ ete: “Kpa idaha oro, mmọ ẹdaha ẹkpọn̄ iyịre mmọ ẹnyụn̄ ẹtiene enye.” Jesus ama okụt n̄ko James ye John nte ẹtiede ye ete mmọ ẹdiọn̄ iyịre. Didie ke mmọ ẹkenam n̄kpọ ke ini enye ọkọdọhọde mmọ ẹtiene imọ? “Kpa idaha oro, mmọ [ẹma] ẹkpọn̄ ubom ye ete mmọ ẹnyụn̄ ẹtiene enye.”—Matt. 4:18-22.
16 Saul emi akakabarede edi apostle Paul ama etiene enịm eti uwụtn̄kpọ ọnọ nnyịn ndikpebe. Kpa ye oro enye ekesinen̄erede asua mme anditiene Christ, enye ama akabade esịt, Christ onyụn̄ emek enye ete ọkwọrọ enyịn̄ imọ ọnọ mme idụt. Ndien “kpa idaha oro ke synagogue enye ọtọn̄ọ ndikwọrọ Jesus, ete ke Enye edi Eyen Abasi.” (Utom 9:3-22) N̄ko, kpa ye oro n̄kpọ ọkọsọn̄de ye enye, ẹkenyụn̄ ẹkọbọde enye, Paul iketreke ndisịn ifịk n̄kwọrọ ikọ.—2 Cor. 11:23-29; 12:15.
17. (a) Didie ke ebiere nditiene Christ? (b) Nso ufọn ke idia ke ndida ofụri esịt ye ofụri odudu nnam n̄kpọ Jehovah?
17 Nnyịn iyom ndikpebe nti uwụtn̄kpọ mme mbet oro, nnyụn̄ nnam n̄kpọ Abasi usọp usọp ke ofụri esịt. (Heb. 6:11, 12) Nso ufọn ke idia nte isụk ikade iso isịn ifịk itiene Christ ke ofụri esịt? Imenen̄ede ikop inemesịt ndinam se Abasi amade inyụn̄ inem esịt iban̄a nsio nsio ifetutom oro Enye ọnọde nnyịn ke esop esie. (Ps. 40:8; kot 1 Thessalonica 4:1.) Nte isụk isịnde ifịk itiene Christ, imenen̄ede inyene emem ye ifụre, ikop idatesịt, iyụhọ ye se inyenede, ifiọk ke Abasi ama nnyịn, inyụn̄ idori enyịn ndinyene nsinsi uwem.—1 Tim. 4:10.
Nte Afo Emeti?
• Nso akpan utom ke ẹnọ nnyịn, ndien didie ke ikpanam utom emi?
• Nso orụk edu ke ikpefep, ndien ntak-a?
• Didie ke ikpodụn̄ọde idem?
• Nso idinam ika iso itiene Christ?
[Mme Mbụme Ukpepn̄kpọ]
[Ekebe/Ndise ke page 27]
Nso Idinam Aka Iso Etiene Christ?
▪ Kot Bible ke usen ke usen nyụn̄ tie kere se okotde.—Ps. 1:1-3; 1 Tim. 4:15.
▪ Siben̄e Abasi anam spirit esie an̄wam fi onyụn̄ ada fi usụn̄.—Zech. 4:6; Luke 11:9, 13.
▪ Dụk nsan̄a ye mbon oro ẹnen̄erede ẹma utom ukwọrọikọ.—N̄ke 13:20; Heb. 10:24, 25.
▪ Fiọk ete ke utịt enen̄ede ekpere.—Eph. 5:15, 16.
▪ Fiọk ke enen̄ede ọdiọk ndiyom ikọ ntịn̄ man etre ndinam n̄kpọ Abasi.—Luke 9:59-62.
▪ Sitie kpukpru ini kere se ọkọdọhọde Jehovah ini akayakde idem ọnọ enye nyụn̄ bat kpukpru ufọn emi ọbọde ke ndinam n̄kpọ esie nnyụn̄ ntiene Christ ke ofụri esịt.—Ps. 116:12-14; 133:3; N̄ke 10:22.