Kọ Whọ Be Rọ Udu Ra Kpobi Lele Kristi?
Kọ Whọ Be Rọ Udu Ra Kpobi Lele Kristi?
“Nwanọ epanọ wha re ruo na, wha he dhei erueruo.”—1 TẸS. 4:1.
1, 2. (a) Eware igbunu vẹ ahwo buobu evaọ oke Jesu a ruẹ? (b) Fikieme oke mai nana o rọ rrọ oke obọdẹ re?
KỌ WHO roro no ẹdẹjọ epanọ o hai woma te o hae jọnọ whọ jọ uzuazọ evaọ okenọ Jesu ọ jọ otọakpọ? Whọ sai roro kpahe epanọ o hae jọ re Jesu o siwi ẹyao jọ nọ ọ jẹ lahiẹ owhẹ. Hayo whọ sai roro epanọ o hae te were owhẹ te re whọ ruẹ Jesu jẹ gaviezọ kẹe—re whọ sai wuhrẹ mi ei hayo re whọ ruẹ eware igbunu jọ nọ o je ru. (Mak 4:1, 2; Luk 5:3-9; 9:11) O hae jọ uvẹ-ọghọ ulogbo re whọ jariẹ nọ Jesu o je ru eware yena kpobi. (Luk 19:37) U te no ahwo oke yena no, amọfa a re ruẹ eware itieye na ha, yọ Jesu ọ te gbẹ wariẹ eware nọ ọ rọ ẹkwoma “idhe” riẹ rugba evaọ otọakpọ họ.—Hib. 9:26; Jọn 14:19.
2 Oke nọ ma be rria nẹnẹ na ọ rrọ oke obọdẹ re. Evaọ oghẹrẹ vẹ? Ma be rria etoke nọ Ikereakere na i dhesẹ wọhọ “oke urere” gbe “edẹ urere” na. (Dan. 12:1-4, 9; 2 Tim. 3:1) Evaọ oke mai na a ro le Setan no obọ odhiwu ze. Kẹle na, a te rọ ifi gbae gbolo fihọ “ọgọdọ” odidi na. (Evia. 12:7-9, 12; 20:1-3) Yọ evaọ oke mai na ma ro wo uvẹ-ọghọ ọrọ ewhowho “usiuwoma uvie na” evaọ akpọ na kpobi, be ta kẹ ahwo kpahe ẹruore Aparadase nọ ọ be tha—iruo nọ ma te wariẹ ru hu.—Mat. 24:14.
3. Taure Jesu o te ti muvrẹ kpobọ odhiwu, eme ọ ta kẹ ilele riẹ inọ a ru, kọ eme oyena o gwọlọ?
3 Taure Jesu o te ti muvrẹ kpobọ odhiwu, ọ ta kẹ ilele riẹ nọ: “Wha ti . . . se isẹri mẹ eva Jerusalem gbe Judia kpobi te Sameria je rite ọnyaba akpọ na.” (Iruẹru 1:8) Iruo na e gwọlọ inọ ma rẹ jọ akpọ soso wuhrẹ ahwo. Fikieme ma ti ro wuhrẹ ai? Re ma ru ai zihe ruọ ilele Jesu taure urere na o tẹ ze. (Mat. 28:19, 20) Eme ma re ru hrọ ma tẹ gwọlọ ru iruo nọ Jesu ọ kẹ omai na gba?
4. (a) Didi oware eme nọ Pita ọ ta eva 2 Pita 3:11, 12 o gwọlọ mi omai? (b) Eware vẹ ma rẹ yọroma kẹ?
4 Muẹrohọ eme nana nọ Pita ukọ na ọ ta na: “Didi oghẹrẹ ahwo wha hẹ jọ eva uzuazọ ẹfuọ gbe orọ Ọghẹnẹ, nọ owha be hẹrẹ je bi rẹro ẹtha ẹdẹ Ọghẹnẹ vẹrẹ vẹrẹ!” (2 Pita 3:11, 12) Eme ọ Pita na i dhesẹ epanọ u wuzou te re ma muẹrohọ otọ ziezi evaọ edẹ urere nana re ma ruẹ nnọ ma be rọ iruo Ọghẹnẹ karo evaọ uzuazọ mai. Iruo yena i kugbe ewhowho emamọ usi na. Fikiere, o rrọ oware evawere nọ ma be rọ ruẹ inievo mai nọ e be jọ akpọ na soso rọ ọwhọ ru iruo nọ Jesu ọ kẹ omai na gba. Eva oke ovona, o gwọlọ inọ ma yọroma re ebẹbẹ akpọ Setan gbe ekpehre isiuru mai e siọ ọwhọ nọ ma be rọ ta usiuwoma na ba ekpe no. Fikiere, joma ta ẹme kpahe epanọ ma rẹ rọ ruẹ nnọ ma bi lele Kristi.
Jẹ Ewha-Iruo nọ Ọghẹnẹ Ọ Kẹ Omai Rehọ
5, 6. (a) Fikieme Pọl o ro jiri inievo obọ Jerusalẹm, kọ eme ọ vẹvẹ e rai unu kpahe? (b) Fikieme ma gbẹ rọ rehọ owha-iruo nọ Ọghẹnẹ ọ kẹ omai jevejeve he?
5 Evaọ ileta riẹ se Ileleikristi obọ Jerusalẹm, Pọl ukọ na o jiri inievo na fiki ithihakọ rai ghelọ ukpokpoma. Ọ ta nọ: “Wha kareghẹ họ edẹ nọ e vrẹ no, okenọ elo o te owhai obọ no, nọ wha ro wo odiri eva uye obẹbẹ.” Ẹhẹ, Jihova ọ kareghẹhọ iruo ezi rai. (Hib. 6:10; 10:32-34) Ababọ avro, eme ọ ujiro nọ Pọl o kere se Ileleikristi obọ Hibru na e tuduhọ ae awọ gaga. Rekọ, evaọ ileta ọvo yena, Pọl ọ fodẹ uruemu jọ nọ ahwo-akpọ a wo nọ o rẹ sae raha ọwhọ nọ a wo evaọ egagọ Ọghẹnẹ otẹrọnọ a gbẹ yọroma ha. Ọ ta inọ Ileleikristi a rẹ yọroma re a siọ abọ ba egbe kẹ ijaje Ọghẹnẹ.—Hib. 12:25.
6 Unuovẹvẹ yena re ohwo ọ siọ abọ ba egbe kẹ ewha-iruo nọ Ọghẹnẹ ọ kẹ riẹ na u kpomahọ Ileleikristi nẹnẹ re. Ma rẹ rehọ ewha-iruo nọ Ọghẹnẹ ọ kẹ omai jevejeve he, hayo kuvẹ re ọwhọ mai kẹ iruo Ọghẹnẹ i whrehe he. (Hib. 10:39) O rrọ ere keme usiuwoma ota mai o rẹ kẹ enọ i yo riẹ uzuazọ.—1 Tim. 4:16.
7, 8. (a) Eme o ti fi obọ họ kẹ omai yọrọ ọwhọ mai evaọ egagọ Ọghẹnẹ? (b) Otẹrọnọ ọwhọ mai o bi kie kpo, eme ma rẹ kareghẹhọ kpahe Jihova avọ Jesu?
7 Eme o ti fi obọ họ kẹ omai siọ abọ ba egbe kẹ ewha-iruo nọ Ọghẹnẹ ọ kẹ omai? Oware jọ nọ u ti fi obọ họ kẹ omai họ eyaa omauromudhe nọ ma re roro kpahe didi ẹsikpobi. Koyehọ, ma ya eyaa kẹ Jihova inọ ma te rehọ eruo oreva riẹ rọ karo evaọ uzuazọ mai, yọ ma gwọlọ koko eyaa yena. (Se Matiu 16:24.) Fikiere, u re woma re ma dhizu ẹsejọ jẹ nọ oma mai nọ: ‘Kọ epanọ mẹ gba riẹ mu inọ me re ru oreva Ọghẹnẹ evaọ oke ame-ọhọ mẹ na, ere o gbẹ rrọ enẹna? Hayo kọ ọwhọ nọ me wo evaọ oke yena o whrehe no?’
8 Ma tẹ ruẹ inọ ọwhọ mai ọ dina kie kpo no, u re woma re ma kareghẹhọ eme ajọwha nọ Zefanaya ọruẹaro na ọ ta. Ọ ta nọ: “Jọ abọ ọ lọhọ owhẹ hẹ. ỌNOWO na Ọghẹnẹ rai ọ rọ udevie rai, Ogbaẹmo nọ ọ rẹ kẹ obọokparọ; ọ rẹ te rehọ evawere ghọghọ kẹ owhẹ.” (Zef. 3:16, 17) Eme uduotahawọ nana e kaki kie kpahe emọ Izrẹl erọ oke anwae, enọ i zihe no igbo Babilọn kpohọ Jerusalẹm. Rekọ, eme nana i kie kpahe idibo Ọghẹnẹ nẹnẹ re. Nọ orọnọ Jihova họ ọnọ o wo iruo nọ ma bi ru na, ma rẹ kareghẹhọ inọ tei te Ọmọ riẹ a be tha omai uke be jẹ bọ omai ga re ma sai ru iruo nọ a kẹ omai na gba. (Mat. 28:20; Fil. 4:13) Ma tẹ be rọ ọwhọ ruabọhọ iruo Ọghẹnẹ, ọ te ghale omai je fi obọ họ kẹ omai nyaharo evaọ abọ-ẹzi.
Rọ Ọwhọ “Kake Guọlọ Uvie” Na
9, 10. Eme họ otofa ohare Jesu na ọrọ ehaa ilogbo na, kọ eme ma rẹ sai wuhrẹ noi ze?
9 Okenọ Jesu ọ jẹ re emu evaọ uwou osu ahwo Farisi jọ, ọ kẹ ọtadhesẹ jọ kpahe ehaa ilogbo jọ. Evaọ ọtadhesẹ yena, o dhesẹ uvẹ nọ u rovie fihọ kẹ ahwo sa-sa nọ a rẹ rọ reuku Uvie obọ odhiwu. Ọ tẹ jẹ fodẹ oware nọ u dhesẹ re a gu “unoma.” (Se Luk 14:16-21.) Erara nọ a zizie evaọ ọtadhesẹ Jesu na a gu unoma sa-sa nọ a gbe ro kpohọ ehaa na ha. Ọjọ ọ ta nnọ ọ gwọlọ nya i rri udhu jọ nọ ọ dẹ obọ. Ọfa ọ ta nnọ ọ gwọlọ nya e ruẹ iruẹ jọ nọ ọ dẹ. Ọfa ọ tẹ ta nọ: ‘Mẹ sae nyaze he keme mẹ rọo obọ.’ Enana nọ inoma nọ i fioka ha. Taure ohwo ọ tẹ te dẹ udhu hayo iruẹ o re rri rai no tao, fikiere u du gwọlọ nnọ a re bru okpakpa nọ a rẹ rọ wariẹ rri rai hi. Kọ fikieme ohwo ọ rẹ rọ siọ obọdẹ uzizie utioye fikinọ ọ rọo obọ? Agbẹta nọ eva e rọ dha ọnọ o se ehaa na!
10 Idibo Ọghẹnẹ kpobi a rẹ sai wuhrẹ oware jọ no ohare Jesu na ze. Didi oware? Ma rẹ kuvẹ hẹ re otiọ eware nọ Jesu ọ fodẹ evaọ ọtadhesẹ riẹ na e jọ omai oja te epanọ e rẹ rọ rehọ ẹta egagọ mai kẹ Ọghẹnẹ. Oleleikristi ọ gbẹ yọroma kẹ eware itieye na ha, ajọwha riẹ kẹ odibọgba na ọ te rọ ẹmẹrera whrehe no. (Se Luk 8:14.) Re oyena o seba ẹvia, ma re se uthubro Jesu na gboja: “Kake guọlọ uvie riẹ gbe [ẹrẹreokie] riẹ.” (Mat. 6:33) O rrọ uduotahawọ gaga nọ ma be rọ ruẹ inọ idibo Ọghẹnẹ kpobi a bi lele emamọ ohrẹ yena. Ibuobu a ru uzuazọ rai lọhọ no re a sae raha oke ziezi evaọ odibọgba na. A ruẹ no inọ ọwhọ nọ a rẹ rọ kake gwọlọ uvie na o rẹ wha uvi evawere gbe evevọwẹ ze.
11. Ikuigbe Ebaibol vẹ i dhesẹ epanọ u wuzou te re ma rọ ọwhọ ru iruo Ọghẹnẹ no udu mai ze?
11 Re ma dhesẹ epanọ o roja te re ohwo o wo ajọwha evaọ egagọ Ọghẹnẹ, muẹrohọ oware jọ nọ o via evaọ uzuazọ Jẹhoash, ovie Izrẹl. Fiki ozọ inọ ahwo Siria a ti fi emọ Izrẹl kparobọ, Jẹhoash ọ tẹ viẹ bru Elaesha. Elaesha ọ tẹ ta kẹe inọ ọ tọlọ ose re ọ sa ose na ri ofẹ Siria, onọ u dhesẹ epanọ Jihova o ti ro fi obọ họ kẹ ae fi Siria kparobọ. Onana o hae kẹ ovie na ọwhọ ọgaga. Elaesha ọ tẹ ta kẹ Jẹhoash inọ ọ rehọ ese riẹ rọ sa otọ. Jẹhoash ọ tẹ sa otọ isiasa. Eva e tẹ dha Elaesha, keme o hae jọnọ ọ rehọ ese na sa otọ isiasoi hayo isiazeza, o hai dhesẹ inọ ọ te ‘sa ahwo Siria bẹsenọ ọ hai ro kpe ai no.’ Whaọ, isiasa ọvo Jẹhoash o ti fi ahwo Siria kparobọ. Fikinọ Jẹhoash ọ kare ọwhọ, ọ kparobọ ziezi hi. (2 Iv. 13:14-19) Eme ma rẹ jọ ikuigbe yena wuhrẹ? Jihova ọ te ghale omai ziezi otẹrọnọ ma rọ ọwhọ ru iruo riẹ no udu ze.
12. (a) Eme o ti fi obọ họ kẹ omai yọrọ ọwhọ evaọ egagọ Ọghẹnẹ nọ ma bi thihakọ ebẹbẹ na? (b) Fodẹ irere nọ who bi wo fikinọ whọ be jọ odibọgba na wo obọ ziezi.
12 Ebẹbẹ uzuazọ e be dawo ajọwha gbe oma nọ ma rọ kẹ iruo Ọghẹnẹ. Akpọ ọ rrọ gaga kẹ inievo mai buobu. Uzou u bi dhe inievo mai efa fikinọ ẹyao o ru rai nọ a gbẹ be jọ egagọ Jihova ru te ẹgwọlọ rai hi. Ghele na, ma rẹ sae yọrọ ọwhọ mai re ma hai gbe lele Kristi vọvọ. Ivie muẹrohọ iroro-ejẹ gbe ikere jọ nọ e rrọ ẹkpẹti na “Eme O Ti Fi Obọ Họ Kẹ Owhẹ Gbe Lele Kristi?” Roro epanọ whọ sai ro fi ai họ iruo ziezi. Who te ru ere, who ti wo irere buobu. Ma te bi wo obọ ziezi evaọ odibọgba na o rẹ lẹliẹ omai kpairoro vrẹ ebẹbẹ mai jọ, o vẹ jẹ wha udhedhẹ gbe evawere se omai. (1 Kọr. 15:58) Ofariẹ, udu kpobi nọ ma re ro dhe iruo Ọghẹnẹ u re fi obọ họ kẹ omai “rẹro ẹtha ẹdẹ Ọghẹnẹ vẹrẹ vẹrẹ!”—2 Pita 3:12.
Roma Totọ Kiẹ Omobọ Ra Riwi
13. Ẹvẹ ma rẹ rọ riẹ sọ ma be dawo ẹgba mai kpobi evaọ odibọgba na?
13 U fo re ma kareghẹhọ inọ orọnikọ oke nọ ohwo ọ raha evaọ odibọgba na a rẹ rọ riẹ nọ ọ be rọ udu riẹ kpobi ru iruo Ọghẹnẹ hẹ. Iyero mai e rrọ epọvo na ha. Jihova ọ rẹ sae jẹ ohwo nọ ọ be rehọ auwa ọvo hayo ivẹ ta usiuwoma kamara kamara rehọ otẹrọnọ ere ẹgba riẹ o gine te. (Wawo Mak 12:41-44.) Fikiere, re ma riẹ sọ ma bi ru utho ẹgba mai kẹ Ọghẹnẹ, ma rẹ kiẹ ẹgba gbe iyero mai riwi ziezi. Wọhọ enọ i bi lele Kristi, ma gwọlọ wo ọkpọ eriwo riẹ. (Se Ahwo Rom 15:5; 1 Kọr. 2:16) Eme Jesu ọ rọ karo evaọ uzuazọ riẹ? Ọ ta kẹ ogbotu jọ nọ i no obọ Kapaniọm ze inọ: “Mẹ rẹ vuẹovuẹ usiuwoma uvie Ọghẹnẹ [kẹ] ewho efa re; keme fiki onana a je vi omẹ ze.” (Luk 4:43; Jọn 18:37) Roro kpahe ọwhọ nọ Jesu o ro ru iruo odibọgba riẹ re whọ kiẹ oma ra riwi sọ whọ sai ru odibọgba ra kẹre.—1 Kọr. 11:1.
14. Idhere jọ vẹ ma sai ro ru odibọgba mai kẹre?
14 Ma tẹ kiẹ oma mai riwi ziezi, ẹsejọhọ ma te ruẹ inọ ma sai fiba oke nọ ma be raha evaọ odibọgba na. (Mat. 9:37, 38) Wọhọ oriruo, izoge mai buobu nọ i no isukulu no obọ a mu iruo ọkobaro họ no, yọ a bi wo oghọghọ no onana ze. Kọ whọ gwọlọ wo oghọghọ utioye na? Inievo jọ a kiẹ uyero rai riwi no a tẹ jiroro inọ a rẹ sae kwa kpohọ oria jọ evaọ orẹwho rai na, hayo kwa kpohọ orẹwho ọfa nọ a mae jọ gwọlọ etausiuwoma. Amọfa a wuhrẹ ẹvẹrẹ ọfa no re a sai fi obọ họ kẹ ahwo ẹvẹrẹ yena. Dede nọ odibọgba mai nọ ma re ru kẹre o rẹ sae wha use-abọ jọ ze, o rẹ wha eghale buobu ze, yọ ma sae rọ ere fi obọ họ kẹ amọfa buobu “te riẹ uzẹme na.”—1 Tim. 2:3, 4; 2 Kọr. 9:6.
Iriruo Ebaibol nọ Ma Re Lele
15, 16. Ma tẹ gwọlọ jọ ilele Jesu, oriruo ajọwha amono ma rẹ raro kele?
15 Didi owọ otujọ nọ i zihe ruọ ikọ Jesu a jẹ okenọ Kristi o zizie ai re a jọ ilele riẹ? Ebaibol e ta kpahe Matiu nọ: ‘Ọ tẹ nya siọ eware kpobi ba, o te lele iei.’ (Luk 5:27, 28) Kpahe Pita avọ Andru nọ a je kpe iyei, ma se nọ: “A tẹ nwane se iwe na ba a te lele iei.” Jesu ọ tẹ ruẹ Jemis avọ Jọn, enọ i je lele ọsẹ rai ruẹrẹ ide rai. Eme a ru nọ Jesu o zizie ai? “A tẹ nwane siọ okọ gbe ọsẹ rai ba a te lele ie.”—Mat. 4:18-22.
16 Emamọ oriruo ọfa họ Sọl, ọnọ o zihe ruọ Pọl ukọ na. Dede nọ o je kpokpo ilele Jesu gaga, o kurẹriẹ je zihe ruọ ọnọ a salọ re o whowho odẹ Kristi. “Ọ tẹ nwane no umuo oke oyena mu odẹ Jesu họ eworo via evaọ uwou-egagọ, nnọ, ‘Ọ yehọ Ọmọ Ọghẹnẹ na.’” (Iruẹru 9:3-22) Yọ dede nọ o thihakọ ọbẹwẹ gbe ukpokpoma buobu, ọwhọ Pọl o whrehe he.—2 Kọr. 11:23-29; 12:15.
17. (a) Eme họ ọtamuo ra evaọ elele Jesu? (b) Didi eghale ma re wo nọ ma be rọ udu gbe ẹgba mai kpobi ru oreva Jihova na?
17 Evaọ aruorokele emamọ oriruo ilele yena, ma ginẹ gwọlọ rọ ajọwha jẹ uzizie Jesu na rehọ re ma jọ ilele riẹ. (Hib. 6:11, 12) Didi irere i re te omai nọ ma be daoma rọ ajọwha lele Kristi na? Oma o te were omai evaọ eruo oreva Ọghẹnẹ je wo evevọwẹ fikinọ ma be jẹ ewha-iruo rehọ evaọ ukoko na. (Ol. 40:8; se 1 Ahwo Tẹsalonika 4:1.) Ẹhẹ, nọ ma be rọ ajọwha lele Jesu na, ma ti wo udhedhẹ iroro, evevọwẹ, edẹro, ọjẹrehọ Ọghẹnẹ, gbe uzuazọ ebẹdẹ bẹdẹ evaọ obaro.—1 Tim. 4:10.
Kọ Whọ Kareghẹhọ?
• Obọdẹ iruo vẹ a kẹ omai no, kọ ẹvẹ ma rẹ rehọ iruo na?
• Uruemu vẹ ma rẹ whaha, kọ fikieme?
• Abọ vẹ o jọ gwọlọ nnọ ma kiẹ oma mai riwi?
• Eme o ti fi obọ họ kẹ omai ruabọhọ lele Kristi?
[Enọ Uwuhrẹ]
[Ẹkpẹti/Uwoho nọ e rrọ ẹwẹ-obe avọ 27]
Eme O Ti Fi Obọ Họ Kẹ Owhẹ Gbe Lele Kristi?
▪ Se Ebaibol na kẹdẹ kẹdẹ, je roro didi kpahe eware nọ who se.—Ol. 1:1-3; 1 Tim. 4:15.
▪ Lẹ ẹsikpobi kẹ uketha gbe ọkpọvio ẹzi Ọghẹnẹ.—Zek. 4:6; Luk 11:9, 13.
▪ Hae nyusu kugbe enọ i wo ọwhọ evaọ odibọgba na.—Itẹ 13:20; Hib. 10:24, 25.
▪ Riẹ epanọ etoke nọ ma rrọ na o kpata te.—Ẹf. 5:15, 16.
▪ Riẹ enwoma nọ e rẹ jariẹ re ohwo o gu “unoma.”—Luk 9:59-62.
▪ Roro ẹsikpobi kpahe eyaa omauromudhe ra gbe eghale buobu nọ i re noi ze re a gọ Jihova jẹ rọ udu kpobi lele Kristi.—Ol. 116:12-14; 133:3; Itẹ 10:22.