Lelo Ulondanga Kidishitu ne pa Mfulo?

“Monka mo munangila, ne pano ino ningijaimo.”—1 TES. 4:1.

1, 2. (a) I bintu’ka bikatampe byēmwenine bantu mu mafuku a Yesu? (b) Mwanda waka kino kyetu kitatyi nakyo i kya kasekuseku?

 LELO kodi mulange mobyadi bya kunengelela shi waikele’ko kitatyi kyādi Yesu pano pa ntanda? Padi wadi wa kulanga dyese dya kundapwa na Yesu ne kukingwa ku misanshi itamba ku misongo imo. Nansha padi wadi wa kulanga nsangaji ya kumona Yesu ne kumuteja—kuboila ñeni kwadi nansha kumona mwalongela kingelengele kampanda. (Mako 4:1, 2; Luka 5:3-9; 9:11) Bine i dyese dikatampe shi twadi’ko pādi palonga Yesu bino bintu byonso! (Luka 19:37) Tamba papo, kekwaikele’po lukongo lukwabo lwemwenine bino bintu, kadi byobya byālongele Yesu pano panshi kupityila “ku kitapwa kya bu-aye mwine” kebikalongekapo monka dikwabo.—Bah. 9:26; Yoa. 14:19.

² Ino kino kyetu kitatyi nakyo i kya kasekuseku. Mwanda waka? Tudi mu kitatyi kitelelwe na Bible bu “kyaba kya kumfulo’kwa” ne bu “mafuku a kumfulo’a.” (Dan. 12:1-4, 9; 2 Tem. 3:1) I mu kino kitatyi kyafundwilwe Satana mūlu. Panopano ponka usa kukutwa ne kwelwa mu “lupongo.” (Kus. 12:7-9, 12; 20:1-3) Kadi i mu kino kitatyi motupelwe dyese dikatampe dya kusapula “myanda-miyampe ya buno bulopwe” pa ntanda yonso, kulombola bantu lukulupilo lwa Paladisa isa kwiya—mwingilo keukengilwapo monka dikwabo.—Mat. 24:14.

3. Kumeso kwa Yesu kukanda mūlu, le i mwingilo’ka waāpele bandi bana ba bwanga, ne wādi ulomba kulonga bika le?

 ³ Kumeso’tu kwa Yesu kukanda mūlu, wānene bandi bana ba bwanga amba: “Mukēkale basapudi bami bakusapula mu Yelusalema, ne monso mu Yudea, ne mu Samadia, ne kulampe kwine kumfulo kwa ntanda.” (Bil. 1:8) Uno mwingilo ubadilwa’mo ne kaji ka kufundija bantu ba ntanda yonso. Na kitungo’ka? Kya kulonga bana ba bwanga—ba kwibweja ku balondi ba Kidishitu—pano kepafikile mfulo. (Mat. 28:19, 20) Le i bika byotufwaninwe kulonga pa kusaka’mba tuvuye senene mwingilo witupele Kidishitu?

4. (a) Binenwa bya Petelo bidi mu 2 Petelo 3:11, 12 bikomeneja mvubu ya kulonga bika? (b) I bika byotufwaninwe kudyumuka?

⁴ Tala byānene mutumibwa Petelo amba: “Lelo kitufwaninwa kwikala muswelo wa bu-bantu ka? wakwikalamo bu-bakola ba bwine-Leza. Bakutengela ne kusakidila byamalwa kwiya kwa difuku dya Leza.” (2 Pet. 3:11, 12) Binenwa bya Petelo bikomeneja mvubu ya kwikala nyeke badyumuke mu ano mafuku a mfulo ne kumona shi būmi bwetu bwimanine pa bilongwa bya bwine Leza. Mu bino bilongwa mubadilwa busapudi bwa myanda miyampe. Nanshi i mwanda usangaja kotudi wa kumona bupyasakane bwa kisaka kya banabetu ba ntanda yonso mu kuvuija mwingilo wa kusapula witupele Kidishitu! Ino kadi tuyukile amba, tufwaninwe kudyumuka kutyina amba mitabakano ya bukile-bukya ya mu ino ntanda ya Satana ne bilokoloko bya ngitu yetu byotupyene byakatyepeja bupyasakane botwingila nabo mwingilo wa Leza. Pano nanshi, tubandaulei muswelo otukokeja kutala shi twendelelanga na kulonda Kidishitu.

Itabija Mingilo Ikupele Leza

5, 6. (a) Le Polo wāfwijije’ko banababo mu lwitabijo ba mu Yelusalema pa mwanda’ka, ne wēbadyumwine ku bika? (b) Mwanda waka ketufwaninwe kukwata ku nzeinzei mingilo itupele Leza?

⁵ Mutumibwa Polo, mu mukanda waātumine Bene Kidishitu ba mu Yelusalema, wāfwijije’ko banababo mu lwitabijo pa būmi bwabo bwa kūminina na kikōkeji nansha ke mu kupangwapangwa. Wānena amba: “Vulukaipo bidi ku yoya myaka yoya, mo mwakankamene mu bulwi bukatampe bwa misongo ne misongo, po mwadi ke mudi kala batōkejibwe.” Bine Yehova wāvulukile būmi bwabo bwa kikōkeji. (Bah. 6:10; 10:32-34) Binenwa bya Polo bya kutendela na kininga Bene Kidishitu Bahebelu, byēbakankamikile mpata. Inoko, enka mu mukanda umo onka, Polo wēbadyumwine ku milangwe ya bu muntu amba shi kebatadijepo biyampe, ibwanya kutyepeja bupyasakane bwabo mu mwingilo wa Leza. Wānene amba Bene Kidishitu bafwaninwe kudyumuka kutyina ‘bakapela’ nansha kwikañanya baleke kulonda mbila ya Leza.—Bah. 12:25.

⁶ Kino kidyumu kya mutyima wa ‘kupela’ kwitabija mingilo itupele Leza kitalanga ne Bene Kidishitu ba dyalelo. Tuyukile amba tufwaninwe kusumininwa kuleka kukwata mingilo yetu ya Bwine Kidishitu ku nzeinzei nansha kutyepeja bupyasakane bwetu mu mwingilo wa Leza. (Bah. 10:39) Ne kadi bidi, kwingila mwingilo ukola i mwanda wa būmi nansha lufu.—1 Tem. 4:16.

7, 8. (a) I bika biketukwasha tulame bupyasakane bwetu mu mwingilo wa Leza? (b) Shi ke tudi bajimije bupyasakane bwetu bubajinji, i bika byotunenwe kuvuluka padi Yehova ne Yesu?

⁷ Lelo i bika biketukwasha tuleke kwikañanya ku kufikidija mingilo ya Leza? Muswelo umo mukatampe wa kulwa na kino kilokoloko i wa kulangulukila kitatyi ne kitatyi pa buluji bwa mpiko ya kwipāna kwetu. Twalaile Yehova amba tukatūla pa kifuko kibajinji kulonga kiswa-mutyima kyandi mu būmi bwetu, ne tusakanga kulama ino mpiko. (Tanga Mateo 16:24.) Nanshi, i biyampe twimane’po bidi ne kwiipangula amba: ‘Nakidi musumininwe kwikala na būmi bukwatañene na kwipāna kwami kudi Leza pamo na monadi ngikadile ponabatyijibwe? Nansha le kendi  mujimije bupyasakane bubajinji bonadi nabo myaka kunyuma?’

⁸ Shi tubebandaula pampikwa budimbidimbi ne bibamweka’mba kudi mu mwanda kampanda motuzozele, i biyampe tuvuluke binenwa bikankamika byānene mupolofeto Zefenia. Wānene amba: “Kokaleka maboko obe kukōka. Yehova Leza obe udi umbukata mobe, i mukomokomo ukapandija; ukakusepelela ne tusepo.” (Zef. 3:16, 17) Bino binenwa bikulupija byādi bitala dibajinji Bene Isalela ba kala bājokēle mu Yelusalema kutamba mu bupika mu Babiloni. Inoko, kino kikulupiji kikidi kya bine ne ku bantu ba Leza dyalelo. Mwingilo otwingila byoudi wa Yehova, tunenwe kuvuluka amba Yehova ne wandi Mwana betukwatakanyanga ne kwitukankamika amba tuvuije ne pa mfulo mingilo itupele Leza. (Mat. 28:20; Fid. 4:13) Shi tulonge bukomo bwa kwendelela kwingila na bupyasakane mwingilo wa Leza, uketwesela ne kwitukwasha twendelele ku mushipiditu.

“Badikilai Bidi Kusaka Bulopwe” na Bupyasakane

9, 10. Lelo i myanda’ka mikatampe idi mu lukindi lwa Yesu lwa bidibwa bingi bya kyolwa, ne i ñeni’ka yotuboila’mo?

⁹ Yesu pa kudya bidibwa mu njibo ya mukulumpe wa Bafadiseo, wāelele lukindi lwa bidibwa bingi bya ku kyolwa. Mu luno lukindi, wālombwele’mo dyese dyāpelwe bantu palapala dya kutwela mu Bulopwe bwa mūlu. Wānena ne mushintulwila ‘kwikañanya.’ (Tanga Luka 14:16-21.) Betwa ba mu lukindi lwa Yesu bāletele bubinga bwēbakankeje kutanwa ku masobo. Umo wānena amba usaka kukatala budimi bwaapotele. Mukwabo amba wapotele bañombe ne usaka kukebatompa. Mukwabo nandi amba: ‘Nkidi mwa kwiila. Natundaile mukaji’nka panō.’ Kuno kwādi kwikañanya kwa bubela. Muntu upota budimi nansha bimunanwa utompanga’byo kumeso kwa kupota, nanshi kepadipo mwanda wa bukidibukidi wa kukebitompela monka. Kadi i namani muntu utundaile panopano akankalwe kuketaba ku lwito lwa kamweno kakatampe? Nanshi ke kya kutulumukapo shi mwinē bidibwa wāfityilwe bininge!

¹⁰ Bantu bonso ba Leza bakokeja kuboila ñeni ku lukindi lwa Yesu. Ñeni’ka le? Ketwakilekai bintu byetu, pamo na bitelelwe mu lukindi lwa Yesu, bikale na mvubu mikatampe kebitonwena mwingilo wa Leza kufula. Shi Mwine Kidishitu kakilaminepo bintu byandi pa kifuko kyobifwaninwe, nabya bupyasakane bwandi mu mwingilo bukanza kutyepa. (Tanga Luka 8:14.) Kutyina kyaketufikila, tulondei kidyumu kya Yesu kya amba: “Nanshi badikilai bidi kusaka bulopwe bwa Leza, ne boloke bwandi kumo.” (Mat. 6:33) Buya’byopo kumona bengidi ba Leza—banuke ne batame—balonda ano madingi a kamweno! Na bubine, bavule i balonge bintu kampanda mwanda wa kupēleja būmi bwabo amba bapityije kitatyi kivule mu mwingilo. I bemwene amba kubadikila bidi kusaka Bulopwe na bupyasakane kuletanga nsangaji ne kuloelelwa kukatampe.

11. I nsekununi’ka ya Bible ilombola mvubu ya kwingidila Leza na bupyasakane ne mutyima onso?

¹¹ Pa kuyuka mvubu ya kupyasakena mu mwingilo wa Leza, tala mwanda wālongekele mu būmi bwa Yoashe, Mulopwe wa Isalela. Pa kukambakanibwa na kupona kusa kupona Isalela mu maboko a Shidea, waiya udila kudi Edisha. Mupolofeto wamunena asobole muketo pa dilolo dya ku Shidea, mwanda wa kulombola bushindañani bwa kuboko kwa Yehova pa muzo’wa. Kino kekyābudilwepo kukomeja mulopwe. Kupwa Edisha wanena Yoashe ayate miketo yandi akupile’yo panshi. Yoashe wākupila’tu misungu isatu. Edisha wākalabala, mwanda kukupila panshi misungu itano nansha isamba, kwādi kwa kulombola’mba wādi ‘wa kutapa Shidea poso’nka ne byamukubija.’ Ino pano Yoashe wadi wa kunekenya’tu misungu isatu kete. Yoashe pa  kulonga bintu kwampikwa bupyasakane, wānekenye’tu bityetye. (2 Bal. 13:14-19) Le i bika byotwifunda mu ino nsekununi? Yehova uketwesela madyese a ntanda ne miseke shi tumwingidila na mutyima onso ne na bupyasakane.

12. (a) I bika biketukwasha tulame bupyasakane bwetu mu mwingilo wa Leza potulwa na makambakano a mu būmi? (b) Lombola kamweno komwenine pa kuvudilwa bya kulonga mu mwingilo.

¹² Makambakano a mu būmi atompanga bupyasakane ne kwipāna kwetu mu mwingilo wa Leza. Batutu ne bakaka bavule balwanga na makambakano a misokwe. Bakwabo bakolejibwanga mwanda wa misongo mikomo yatyepeja byobadi bakokeja kulonga mu mwingilo wa Yehova. Inoko, batwe bonso tukokeja kulonga kintu kampanda pa kusaka amba tulame bupyasakane bwetu ne kulonda Kidishitu ne pa mfulo. Tala madingi amoamo ne bisonekwa bitelelwe mu kapango “I Bika Bikakukwasha Wendelele Kulonda Kidishitu?” Bandaula muswelo okokeja kwiengidija ne pa mfulo. Shi wingidije’o, ukamwena’mo bya binebine. Kuvudilwa bya kulonga mu mwingilo kwitupanga bujalale, kwitupeteja mu būmi, ne kwitupa ndoe ne nsangaji ya binebine. (1 Kod. 15:58) Kadi, kwingidila Leza na muya onso kwitukwashanga twendelele kwikala “Bakutengela ne kusakidila byamalwa kwiya kwa difuku dya Leza.”—2 Pet. 3:12.

Wibandaule Kwampikwa Budimbidimbi

13. Lelo tukayuka namani wa pandi wa pandi amba twingilanga na muya onso?

¹³ I biyampe kuvuluka’mba kwingila na muya onso ke kulondangapo kitatyi kyotupityija mu mwingilo. Bantu badi mu ngikadila mishileshile. Muntu upityija nsaa umo nansha abidi mu busapudi kweji ne kweji ukokeja kusangaja Leza bininge shi binebine ye pakadikile bukomo bwa ngitu yandi. (Dingakanya na Mako 12:41-44.) Nanshi, muntu pa kuyuka shi wingidilanga Leza na muya onso, i biyampe abandaule bukomo bwandi ne ngikadilo yadi’mo kwampikwa budimbidimbi. Byotudi balondi ba Kidishitu, tusakanga kumona bintu mwaebimwena. (Tanga Loma 15:5; 1 Kod. 2:16) Lelo i bika byādi bitangidije Yesu mu būmi? Wāsapwidile bantu batambile ku Kapanama amba: “I kiñendelemo nsapwile myanda-miyampe ya bulopwe bwa Leza mu bibundi bikwabo namo, ke-kintu i akyo kyonka kyo natalwilwa.” (Luka 4:43;  Yoa. 18:37) Pampikwa kwilwa bupyasakane bwa Yesu mu mwingilo, bandaula ngikadilo yodi’mo umone shi bikulomba kutandabula mwingilo obe.—1 Kod. 11:1.

14. Le i miswelo’ka mikwabo yotukokeja kutandabwila’mo mwingilo wetu?

¹⁴ Kubandaula ngikadilo yetu kwampikwa budimbidimbi kuketufikija ku kumona amba tubwanya kubweja’ko kitatyi kya kupityija mu mwingilo. (Mat. 9:37, 38) Kimfwa, bankasampe bavule bapwile masomo panopano i batandabule mwingilo wabo kadi bemwenanga nsangaji itamba mu kwingila na bupyasakane bupania. Lelo usaka nobe kutompa ino nsangaji? Batutu ne bakaka bamo babandawile ngikadilo yabo ne kukwata butyibi amba bende mu kibundi kikwabo kya mu yabo ntanda, nansha ke mu ntanda mikwabo, musakilwa basapudi bavule ba Bulopwe. Bangi nabo i befunde ludimi lweni mwanda wa kukwasha bantu besamba ludimi’lwa. Nansha kutandabula mwingilo byokukokeja kwikala kukomo, inoko kuletanga madyese mangi, ne tukokeja kukwasha bakwabo “bafike ne pa kuyūkidija kwa binebine.”—1 Tem. 2:3, 4; 2 Kod. 9:6.

Bimfwa bya mu Bible bya Kulonda

15, 16. I bimfwa bya bāni byotubwanya kwiula mu kwikala balondi bapyasakane ba Kidishitu?

¹⁵ Lelo bantu bamo bāikele ke batumibwa bālondolwele namani pēbetyile Yesu kwikala balondi bandi? Nsekununi inena padi Mateo amba: “Aye kulekelela byonso wataluka kamulonda.” (Luka 5:27, 28) Tutanga pa mwanda utala Petelo ne Andele, bādi babiluwe amba: “Nabo ponkapo baleka ne ku makonde abo, ke bamulonda.” Kadi Yesu kufunduka papo, wātana ba Yakoba ne Yoano babanga makonde na shabo. Le bālongele namani pēbetyile Yesu? “Penepo kala nabo bashīle ne bwato ne shabo monka, ke bamulonda.”—Mat. 4:18-22.

¹⁶ Kimfwa kikwabo kiyampe i kya Solo, wāikele ke mutumibwa Polo. Nansha byaādi mutumbe kupangapanga balondi ba Kidishitu, wāshintyile būmi bwandi wāikala ke ‘kintu kitongelwe’ kya kusela’mo dijina dya Kidishitu. “Penepo kala [Polo] kasapula Yesu mu mashinakoka’mba: I Mwana Leza.” (Bil. 9:3-22) Polo, nansha byaāūminine masusu ne kupangwapangwa, kājimijepo nansha dimo bupyasakane bwandi.—2 Kod. 11:23-29; 12:15.

17. (a) Le mu mwanda utala kulonda Kidishitu, unena’po namani? (b) I madyese’ka otumona pa mwanda wa kulonga kotulonga kiswa-mutyima kya Yehova na mutyima ne bukomo bwetu bonso?

¹⁷ I bine tusakanga kwiula bimfwa bilumbuluke bya bano bana ba bwanga ne kulondolola na kampeja-bukidi ne kwikaka mpika. (Bah. 6:11, 12) Lelo i madyese’ka otukamona shi twendelele kulonda Kidishitu na bupyasakane ne pa mfulo? Tuloelelwanga bya binebine mu kulonga kiswa-mutyima kya Leza ne kwimwena nsangaji ya kwitabija madyese makwabo a mwingilo ne biselwa mu kipwilo. (Mit. 40:8; tanga 1 Tesalonika 4:1.) Eyo, potwielela’ko bininge kulonda Kidishitu, twimwenanga ano madyese mavule kadi a nyeke, kimfwa ndoe ya mutyima, nsangaji, kuloelelwa, kwitabijibwa na Leza, ne lukulupilo lwa kwikala na būmi bwa nyeke.—1 Tem. 4:10.

Lelo Ukivulukile?

• I mwingilo’ka wa kamweno otupelwe ne tufwaninwe kwiumona muswelo’ka?

• Lelo i milangwe’ka ya bu muntu yotufwaninwe kwepuka, ne mwanda waka?

• I kwibandaula’ka kwampikwa budimbidimbi kotufwaninwe kwibandaula?

• I bika biketukwasha twendelele kulonda Kidishitu?

[Bipangujo bya Bifundwa]

[Kapango/Kifwatulo pa paje 31]

I Bika Bikakukwasha Wendelele Kulonda Kidishitu?

▪ Tanga Kinenwa kya Leza difuku ne difuku, ne kulangulukila pa byotanga.—Mit. 1:1-3; 1 Tem. 4:15.

▪ Lombela kyaba ne kyaba amba mushipiditu wa Leza ukukwashe ne kukuludika.—Zek. 4:6; Luka 11:9, 13.

▪ Pwana na boba badi na bupyasakane butamba ku mutyima mu mwingilo.—Nk. 13:20; Bah. 10:24, 25.

▪ Jingulula kampeja-bukidi ka kino kitatyi kyotudi’mo.—Ef. 5:15, 16.

▪ Yuka’mba ‘kwikañanya’ kulupulanga bipa bibi.—Luka 9:59-62.

▪ Langulukila kyaba kyonso pa mpiko ya kwipāna ne pa madyese mavule atamba mu kwingidila Yehova ne mu kulonda Kidishitu na mutyima onso.—Mit. 116:12-14; 133:3; Nk. 10:22.