Komana Munakumwimbujola Kristu Chikupu?

‘Ninichi dimu mwendelaña, muswejeshumu.’—1 TESA. 4:1.

1, 2. (a) Yumanyi yayiwahi yamwenuwu antu hampinji yadiñayi Yesu hanu hamaseki? (b) Muloñadi ikiñu detu nidena chidalemena?

 KOMANA mwatoñojokahu dehi chichadi kuwaha kwikala amomi hampinji yadiñayi Yesu hanu hamaseki? Munateli kutoñojoka hakuchiñeja kwakukeña kuyuuka kudi Yesu kulonda kubula kukabakana kumujimba. Hela munateli kutoñojoka hakukooleka kweneni kwakutiya nikumumona Yesu, nikudizila kudi yena hela kumumona nakukoña yihayamisha. (Maku 4:1, 2; Luka 5:3-9; 9:11) Chadi kuwaha kwikalahu hampinji yakoñeleñayi Yesu yuma yejimiyi. (Luka 19:37) Kufuma hayina mpinji, kwosi ikiñu damonahu dehi yuma yamuchidiwu, nawa yuma yakoñeliyi Yesu hanu hamaseki ‘kuhitila mukudilambula yomweni neyi chimuna chakuketula’ hiyakayifuntishahu cheñuku.—Heb. 9:26; Yow. 14:19.

² Dinu ikiñu detu, nidena dalema. Muloñadi? Ichi tunakushakama mumpinji yashimwineñahu dehi Nsona nawu ‘mpinji yakukuminina’ nawa ‘mafuku akukuminina.’ (Dan. 12:1-4, 9; 2 Tim. 3:1) Kutachika haniyi mpinji, Satana amuumbili kufuma mwiwulu. Katataka keña amukasi nakumuumbila “mwikela.” (Chim. 12:7-9, 12; 20:1-3) Cheñi, mumpinji yeniyi tukweti kukooleka kwakushimwina ‘nsañu yawanta yayiwahi’ mukaayi kejima, nakuleja antu kutalisha hakuchiñeja kwaParadisa yidi kumbidi, mudimu wakabula kufuntishahu cheñi.—Mat. 24:14.

3. Chumanyi Yesu chalejeliyi atumbanji twindi kwila henohu kanda yayi mwiwulu, nawa chumichi chabombelamu yumanyi?

 ³ Henohu kanda yayi mwiwulu, Yesu walejeli atumbanji twindi nindi: “Mwake[ka]la ayinsahu jami nimuYerusalema, nimwahita Yudeya mwejima, nimuSamariya, nikwakumina maseki.” (Yil. 1:8) Mudimu weniwu wukabombelamu kutañisha antu mukaayi kejima. Indi mudimu weniwu wakekala nachikonkwanyinyi? Hichikonkwanyi chakwilisha atumbanji twaKristu amakwawu, henohu kukuma kanda kushiki. (Mat. 28:19, 20) Chumanyi chitwatela kwila neyi tunakukeña kukalakala chiwahi mudimu watwinkayi Kristu?

4. (a) Indi mazu aPetulu ekala ha 2 Petulu 3:11, 12 akonkomwenaña hachumanyi? (b) Yumanyi yitwatela kubabala nayu?

⁴ Kapostolu Petulu wahosheli nindi: “Shakamenu nakujila nakwakama Nzambi, nakutalila nakukeña nankashi chakenza ifuku daNzambi.” (2 Pet. 3:11, 12) Mazu aPetulu anakukonkomwena hachitwatela kwikalila atona munanu mafuku akukuminina kulonda kwiluka chikupu netu tunakushakama nakujila nakwakama Nzambi. Nyidimu yeniyi yabombelamu kushimwina nsañu yayiwahi. Dichi, tukweti muzañalu hama hakumona amana kwetu amukaayi kejima anakukalakala mudimu wakushimwina waKristu. Hampinji yoyimu, tweluka netu twatela kubabala nekakeja damukaayi kaSatana nikuzeyazeya kwetu kulonda yumiyi yibuli kumanisha mpwila yetu yakumukalakela Nzambi. Dichi, tushinshikenu hachitwatela kutwalekahu kumwimbujola Kristu chikupu.

Itejenu Nyidimu Yayinkayi Nzambi

5, 6. (a) Pawulu wayihamekeli akwawu akakwitiya amuYerusalema hayumanyi, nawa wayisoñamishili hachumanyi? (b) Muloñadi wutwatela kutwalekelahu kukalakala chikupu nyidimu yatwinkayi Nzambi?

⁵ Mumukanda windi wasonekeleliyi akwaKristu muYerusalema, kapostolu Pawulu wahamekeli akwawu akakwitiya hakwikala nejina dadiwahi dakwikala ashinshika nihampinji yamakabi. Wahosheli nindi: “Anukenu mafuku akusambila, himwelili munamoni dehi chejeji, chimwatatakeneni mukulwisha nankashi namakabi.” Chakadi nikujina, Yehova waanukili nyidimu yawu yamukalakeleluwu nakashinshi. (Heb. 6:10; 10:32-34) Mazu aPawulu akuhameka atela akolesheli hama akwaKristu Aheberu. Hela chochu, mumukanda wowumu, Pawulu wayibabesheli cheñi hachaaku chawantu chakwila neyi abulili kuchiyuula, chadi kuyimanishila mpwila yakumukalakela Nzambi. Wahosheli nindi akwaKristu atela kubabala kulonda kubula ‘kuleka,’ hela kukaana kulondela nshimbi jaNzambi.—Heb. 12:25.

⁶ Iku kusoñamisha kwachaaku ‘chakuleka’ kwiteja nyidimu yatwinkayi Nzambi kwazatikaña nikudi akwaKristu makonu. Tweluka netu twatela kutwalekahu kukalakala nañovu nyidimu yetu yawakwaKristu nikumukalakela Nzambi neyena. (Heb. 10:39) Kafwampi, kukalakala mudimu wajila kwabombelamu kupulwisha mawumi awantu hela antu kufwa.—1 Tim. 4:16.

7, 8. (a) Chumanyi chatela kutukwasha kutwalekahu kukalakala mudimu waNzambi neyena? (b) Chumanyi chitwatela kwanuka hadi Yehova niYesu neyi chakwila tunafunti hanyima kubadika chitwakalakeleña hakusambila?

⁷ Chumanyi chatela kutukwasha kubula kukaana kukalakala nyidimu yatwinkayi Nzambi? Njila yimu yalema yakumanishilamu chaaku chenichi, hikutoñojokaña mafuku ejima hachalumbuluka kukana kwetu kwakudihana. Twamukanini Yehova netu muchihandilu chetu chejima twakatwamijañaku yuma yakeñañayi, nawa tunakukeña kuhemba chikaninu chenichi. (Tañenu Matewu 16:24.) Dichi, mpinji jikwawu twatela kuhulumana nikudihula netu: ‘Komana, nichidi nampwila yakutwalekahu kumukalakela Nzambi neyi chinadihanini hampinji inapapatisheweleña? Tahindi nafunti hanyima kubadika chinakalakeleña hakusambila?’

⁸ Neyi twiluka netu tunafunti hanyima, chikuwaha kwanuka mazu akukolesha ahosheli kaprofwetu Zefwaniya. Wahosheli nindi:  “Makaseyi bayi azeyaku. Yehova Nzambi yeyi wudi mukachi keyi, hichilobu wemikaña mushindu. Wakakuzañalela eyi nakutiya kuwaha.” (Zef. 3:16, 17) Awa mazu akukolesha, chatachi ahosheleña hadi aIsarela afuntili kuYerusalema kufuma muwunkoli muBabiloni. Hela chochu, awa mazu akukolesha ahoshaña cheñi hadi antu jaNzambi makonu. Chineli mudimu wutwakalakalaña wambala waYehova, twatela kwiluka netu Yehova niMwanindi atukwashaña nikutukolesha kulonda kukalakalaña chikupu nyidimu yatwinkayi Nzambi. (Mat. 28:20; Fwi. 4:13) Neyi tutwalekahu kukalakala mudimu waNzambi neyena, Nzambi wakatukiswila nikutukwasha kutwalekahu kuyilaku hambidi kuspiritu.

“Sambilenu Kukeña Wanta” Chikupu

9, 10. Muloñadi Yesu chahanininiyi chishimu chachawija cheneni, nawa chumanyi chitunateli kudizila kuchishimu chenichi?

⁹ Hampinji yadyileñawu mwitala danyuuli kaFwarisi, Yesu waheni chishimu chahosheleña hachawija cheneni. Muchishimu chenichi, wateneni hakukooleka kwadiñawu naku antu ashiyashana kutalisha haWanta wamwiwulu. Cheñi walumbulwili chichalumbuluka “kuleyaleya.” (Tañenu Luka 14:16-21.) Antu iyatambikiluwu amuchishimu chaYesu aleyeleña kulonda abuli kuya kuchawija. Muntu watachi wahosheli nindi wakeñeleña kuya nakutala iha dalandiliyi. Mukwawu nawa wahosheli nindi, walandili ñombi nawa wakeñeleña kuya nakujeseka. Mukwawu cheñi wahosheli nindi: ‘hinukutwesha kuyaku. Nafumi tuhu hakusumbula.’ Iku kuleya kwadiña kwamukunkulwayi. Muntu wunalandi iha wadimwenaña chadimu nawa wukulanda yimuna wayesekelaña chadimu henohu kanda yayilandi, dichi hichakeñekaña kuyimona hela kuyeseka hanyima yakujilandaku. Nawa muloñadi maluwi akatataka chiyanateli kukañeshela muntu kubula kwiteja mutambi wawuwahi wamuchidiwu? Chakadi nikujina, dihafumini muntu watelekeli chawija cheneni yohili chikupu.

¹⁰ Antu jaNzambi ejima anateli kudizila kunichi chishimu chaYesu. Hichumanyi? Hitwatela kwiteja nyidimu yetu, yidi neyi yatenawu muchishimu chaYesu kwikala yalema kubadika nyidimu yaNzambuku. Neyi mukwaKristu yobula kushinshika chiwahi hanyidimu yindi, nateli kufunta hanyima mumudimu windi. (Tañenu Luka 8:14.) Hakwila nawu tukañeshi yuma yamuchidiwu kubula kumwekana, twatela kulondela kukonkomwena kwaYesu kwakwila nawu: “Sambilenu kukeña wanta windi nikuloña kwindi, niyuma yejimiyi akayishilaku.” (Mat. 6:33) Twakoleshewaña hama hakumona ambuña jaNzambi, atwansi niakulumpi, anakuzatisha iku kufumba kwalema. Kafwampi, antu amavulu anapeleshi chihandilu chawu kulonda kuzataña mpinji yeneni mumudimu wakushimwina. Adizilaña kuyuma yiyahitañamu nawu ‘kusambila kukeña wanta’ chikupu kwaleñelaña kwikala namuzañalu waweni.

11. Nsañwinyi yamuBayibolu yahosha hakulema kwakwikala neyena nikumukalakela Nzambi namuchima wejima?

¹¹ Hakwila nawu twiluki chichalemena kwikala neyena mumudimu waNzambi, talenu chuma chamumwekeneni Mwanta wawaIsarela Yehowashi. Hamuloña wakwakamena nindi aSiriya akuyishinda aIsarela, Yehowashi wenjileña nakudila kudi Elisha. Kaprofwetu wamulejeli kwasila nsewu hanjanena kukabadi kawaSiriya kulonda kumwekesha nawu diyi nsewu yamushindu waYehova yoyi nsewu yakuyiimika nachu aSiriya mushindu. Chakadi nikujina, chumichi chadi kumuleñela mwanta kwikala wakola. Kuhiñahu, Elisha wamulejeli Yehowashi kunona nsewu jindi nakujeta heseki. Yehowashi wajeteli heseki mapampa kasatu. Elisha wahilili nachuma chenichi, muloña neyi wasili nsewu mapampa katanu hela katanu nakamu kwadi kumwekesha ‘kutapa aSiriya nichadi kuyinoñeshayi to-o.’ Ichi Yehowashi wadi kuyitapa hohu mapampa kasatu. Hamuloña wakubula kuzata neyena, Yehowashi wakañenyi kuyishinda aSiriya. (2 Anya. 13:14-19) Chumanyi  chitunateli kudizila kuniyi nsañu? Yehova wakatukiswila chikupu neyi tumukalakela neyena nawa namuchima wejima.

12. (a) Chumanyi chikutukwasha kutwalekahu kwikala neyena mumudimu waNzambi hampinji itunakuumika kukala muchihandilu chetu? (b) Shimunenu nkisu jimunahetelumu hamuloña wakukalakalaña chikupu mumudimu wakushimwina.

¹² Kukala kutwamonaña kwatuleñelaña kwiluka neyi chakwila tukweti iyena nawa neyi twadihana chikupu mumudimu waNzambi. Amana kwetu niahela amavulu anakuumika kukala kwamali. Amakwawu atiyaña kutama hamuloña wakwila yikatu yayileñelaña kubula kuzata chikupu mumudimu waYehova. Hela chochu, wejima wetu tunateli kukalakala nañovu kulonda kutwalekahu kwikala neyena nikumwimbujolaña Kristu chikupu. Mwani talenu njila ninsona jinasonekuwu muchikasha chinakwila nawu “Yumanyi Yikuyikwasha Kutwalekahu Kumwimbujola Kristu?” Talenu chimwatela kujizatisha. Neyi mwila mwenimu, mwakatambwila nkisu jajivulu. Kukalakalaña chikupu mumudimu wakushimwina kwatuleñelaña kwikala akola, chihandilu chetu chawahilañaku nawa kwatuleñelaña kwikala awunda nawa amuzañalu. (1 Kor. 15:58) Kubombelahu, kukalakala namuchima wejima mumudimu waNzambi kwatukwashaña ‘kutalila nakukeña nankashi chakenza ifuku daNzambi.’—2 Pet. 3:12.

Dilukenu Chimwekala

13. Tunateli kwiluka ñahi hamuntu hamuntu chalumbuluka kukalakala namuchima wejima?

¹³ Hela chochu, chachiwahi kwanuka netu, kukalakala namuchima wejima hichashindamena hampinji yitwakalakalaña mumudimu wakushimwinaku. Muntu himuntu wamonaña kukala kwashiyashana. Muntu wakalakalaña ora yimu hela ayedi mumudimu wakushimwina hakakweji nikakweji nateli kumuzañaleshaña Yehova neyi chakwila dihanakumini ñovu jindi. (Esekejenu Maku 12:41-44.) Dichi, hakwila nawu twiluki chalumbuluka kumukalakela Nzambi namuchima wejima hamuntu hamuntu, twatela kwiluka chitwekala. Hakwikala atumbanji twaKristu, cheñi twatela kutoñojokaña neyi chatoñojokañayi. (Tañenu Aroma 15:5; 1 Kor. 2:16) Indi Yesu watwamijiluku chumanyi muchihandilu chindi? Walejeli izaza dakuKaperinawu nindi: “Chiña nishimwina nsañu yawanta waNzambi yayiwahi nikunyikala yikwawu  yinashali nawa, muloña dichi chantemesheleluwu.” (Luka 4:43; Yow. 18:37) Kutoñojoka heyena dadiñayi nadu Yesu mumudimu windi wakushimwina, dishinshikenu kulonda mwiluki neyi chakwila munateli kuyilaku hambidi mumudimu wenu wakushimwina.—1 Kor. 11:1.

14. Munjilanyi mutwatela kuyilaku hambidi mumudimu wetu wakushimwina?

¹⁴ Kwiluka hakumina ñovu jetu kunateli kutuleñela kutachika kukalakalaña mpinji yeneni mumudimu wakushimwina. (Mat. 9:37, 38) Chakutalilahu, atwansi amavulu amanisha shikola katataka anakukalakalaña nañovu mumudimu wakushimwina nawa akweti muzañalu hamuloña wakukalakala chikupu mudimu wawupayiniya. Komana ninenu mwakeñaña kwikala namuzañalu wamuchidiwu? Amana kwetu niahela amakwawu adipima nakwiluka hakumina ñovu jawu chakwila afuukulahu kubuukila kwiluña dacheñi damwituña dawu hela kumatuña acheñi kudi kukankila kwawakwakushimwina aWanta. Cheñi amakwawu anadizi idimi dacheñi kulonda kukwasha añinza ahoshaña idimi dacheñi. Hela chakwila chakala kuyilaku hambidi mumudimu wetu wakushimwina, mwafumaña nkisu jajivulu nawa tunateli kukwashaku antu amavulu “eluki nsañu yalala chikupu.”—1 Tim. 2:3, 4; 2 Kor. 9:6.

Yakutalilahu yamuBayibolu Yitwatela Kwimbujola

15, 16. Yakutalilahu yawanyi yitwatela kwimbujola hakwikala atumbanji twaKristu akalakalaña neyena?

¹⁵ Indi antu amakwawu ekalili apostolu elilidi hampinji hayitambikiliyi Kristu kwikala atumbanji twindi? Kutalisha hadi Matewu, nsañu yahosha nawu: “Hakushiya yuma yejima, hakunyamuka, hakumulonda.” (Luka 5:27, 28) Kutalisha hadi Petulu niAnderi, adiña ayibinda yanshi, twatañaña nawu: ‘Hohenohu ashiya nituleñi twawu, hiyakumulonda.’ Kuhiñahu, Yesu wamweni Yakoba niYowanu, adiñi nakutuñulula tuleñi twawu natata yawu. Atiyili ñahi namutambi waYesu? “Hohenohu ashiya niwatu nitata yawu, hiyakumulonda.”—Mat. 4:18-22.

¹⁶ Chakutalilahu chikwawu chachiwahi hichakutalilahu chaSawulu wekalili kapostolu Pawulu. Hela chakwila wadiña mukwakumwesha ihuñu atumbanji twaKristu, wahimpili chihandilu chindi nawa wekalili ‘nsaba yakutonda’ kulonda kutwala ijina daKristu. “Hohenohu [Pawulu] hakushimuna nsañu yaYesu mumashikola, nindi hiMwana kaNzambi.” (Yil. 9:3-22) Nawa hela chakwila womikili kukala kwakuvulu nimakabi, Pawulu halekeli kukalakala neyenaku.—2 Kor. 11:23-29; 12:15.

17. (a) Chumanyi chimunakufwila kwila kutalisha hakumwimbujola Kristu? (b) Nkiswinyi jitwadiluñishaña hamuloña wakukalakalaña yuma yakeñañayi Yehova namuchima wetu wejima nawa hakumina ñovu jetu?

¹⁷ Chakadi nikujina, tunakukeña kwimbujola yakutalilahu yayiwahi yawatumbanji wenawa nikwiteja namuchima wumu nawa chakadi kulaba. (Heb. 6:11, 12) Nkiswinyi jitwadiluñishaña hampinji yitunakufwila kumwimbujola Kristu chikupu? Twazañalala chikupu hakukalakalaña yuma yakeñañayi Nzambi nikutiya kuwaha kwenzaña hamuloña wakwiteja nyidimu yikwawu muchipompelu. (Mas. 40:8; tañenu 1 Atesalonika 4:1.) Eña, chitwakalakalaña nañovu hakumwimbujola Kristu, twadiluñishaña chikupu nkisu jahaya nyaka jidi neyi kubula kwakama, muzañalu, wuselewa waNzambi niwumi wahaya nyaka.—1 Tim. 4:10.

Munakwanuka?

• Mudimwinyi walema watwinkawu, nawa twatela kuwumona ñahi?

• Yaakwinyi yawantu yitwatela kutondolwela, nawa muloñadi?

• Yumanyi yitwatela kutoñojokahu chikupu?

• Yumanyi yikutukwasha kutwalekahu kumwimbujola Kristu?

[Malwihu aKuzatisha haKudiza]

[Chikasha/Mwevulu wudi hefu 27]

Yumanyi Yikuyikwasha Kutwalekahu Kumwimbujola Kristu?

▪ Kutañaña Izu daNzambi mafuku ejima nikutoñojoka chikupu hayuma yimunakutaña.—Mas. 1:1-3; 1 Tim. 4:15.

▪ Kulomba mafuku ejima kudi Nzambi kulonda yayikwashi nikuyinka spiritu yindi.—Zek. 4:6; Luka 11:9, 13.

▪ Dikundenuña nawantu akeña chikupu mudimu wakushimwina.—Yish. 13:20; Heb. 10:24, 25.

▪ Ilukenu nenu mpinji itunakushakamamu yinakehi dehi.—Efwes. 5:15, 16.

▪ Ilukenu yuma yatama yafumaña ‘mukuleyaleya.’—Luka 9:59-62.

▪ Mpinji yejima anukenuña hakudihana kwenu nawa ninkisu jajivulu jafumaña mukumukalakela Yehova nimukumwimbujola Kristu namuchima wejima.—Mas. 116:12-14; 133:3; Yish. 10:22.