Krista Hnung I Zui Zêl Em?
Krista Hnung I Zui Zêl Em?
“Pathian tilâwm zâwnga . . . in awm a, chutianga awm zêl tûrin . . . kan ngên che u.”—1 THES. 4:1, C. L. Re-edited.
1, 2. (a) Isua hun laia mi tam tak khân eng thil ropui takte nge an hmuh? (b) Engvângin nge kan hun lai pawh hi hun pawimawh tak a nih?
ISUA leia a awm laia nun ve a ropui dân tûr chu i ngaihtuah ngai em? Chutiang châkna tûr chhan ṭha chu kan nei rêng a ni. Isua intihdamtîr a, natna khirh tak ṭhenkhat pumpelh chu i suangtuah pawh a ni thei. A nih loh pawhin, Isua hmuh leh a thu ngaihthlâk—a hnên aṭanga zir emaw, a thilmak tihte hmuh emaw—ngawr ngawr chu i ngaihtuah a ni thei bawk. (Mk. 4:1, 2; Lk. 5:3-9; 9:11) Chûng thilte Isua’n a ti lai hmuh chu a va ropui dâwn êm! (Lk. 19:37, 38) Chûng thilte chu a hun laia chhuante bâkin tuman an hmu leh ngai tawh lo va, Isua’n a ‘inthawina’ hmanga he leia a thil hlen chhuah pawh tihnawn a ni leh ngai tawh lo vang.—Heb. 9:26; Joh. 14:19.
2 Mahse, kan hun lai pawh hi hun pawimawh tak a ni. Engvângin nge a pawimawh? Tûnah hian Bible hrilh lâwk “tâwpna hun” leh “ni hnuhnûngahte” kan chêng mêk a. (Dan. 12:1-4, 9; 2 Tim. 3:1) He hun chhûng hian Setana chu vân aṭanga paih thlâk a ni a. Nakin lawkah, phuar a, ‘leilâwta’ paih luh a ni ang. (Thup. 12:7-9, 12; 20:1-3) Chu bâkah, he hun chhûngah hian thawh nawn leh ngai tawh loh tûr—Paradis lo thleng tûr beiseina—chu mite hnêna hrilh a, khawvêl puma “ram chanchin ṭha” puan chhuah theihna chanvo ropui tak chu kan nei bawk a ni.—Mt. 24:14.
3. Vâna a lâwn hma lawk khân Isua’n a hnungzuitute hnênah eng nge a hrilh a, chutah chuan eng nge tel?
3 Isua chuan vâna a lâwn hma lawkin a hnungzuitute hnênah: “Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” tiin a hrilh a. (Tirh. 1:8) Chutah chuan khawvêl pum huapa zirtîrna hna a tel a ni. Chu chuan eng nge a tum? A tum chu khawvêl tâwp hmaa zirtîra siam—Krista hnungzuitu siam belh—chu a ni. (Mt. 28:19, 20) Krista hnung zui zêl tûrin eng nge kan tih ang?
4. (a) Petera ṭawngkam 2 Petera 3:11, 12-a hmuh hian eng nge a sawi uar? (b) Eng thilah nge kan fîmkhur a ngaih?
4 Tirhkoh Petera ṭawngkam: “Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?” tih hi lo chhinchhiah teh. (2 Pet. 3:11, 12) Petera ṭawngkam chuan kan nun chu Pathian ngaihsak kawnga kan vawn reng theih nân, hêng ni hnuhnûngahte hian inring renga awm a pawimawhzia a sawi uar a ni. Chutah chuan chanchin ṭha hrilh a tel a. Khawvêl puma kan unaute’n Krista hna pêk thu hrilh rawngbâwlna taima taka an hlen chhuak hmuh chu a va hlimawm êm! Chutih rual chuan, nî tina Setana khawvêl nêksâwrna leh kan rochun tisa lam châknate’n Pathian rawng kan bâwlnaa ṭhahnem kan ngaihna a tih chauh loh nân kan fîmkhur a ngai tih kan hria a ni. Tûnah chuan, Krista hnung kan zui zêl theih dân i lo ngaihtuah ang u.
Pathian Pêk Mawhphurhna Chu Pawm Rawh
5, 6. (a) Eng chungchângah nge Paula’n Jerusalem-a a rinpuite a fak a, eng chungchângah nge a vaukhân thung? (b) Engvângin nge Pathian pêk mawhphurhna chu ho lam taka kan ngaih loh vang?
5 Jerusalem khuaa Kristiante hnêna a lehkha thawnah Paula chuan a rinpuite chu tihduhdahna hnuaiah pawh rinawm taka an lo chhelna avângin a fak a. “Hmâna tihêna in awm hnua tuarna buai nasa tak in tuar lai nite kha hre leh rawh u,” tiin a hrilh a. Ni e, Pathian Jehova chuan an rinawmna chu a hre reng a ni. (Heb. 6:10; 10:32-34) Paula fakna duhawm tak chuan Hebrai Kristiante chu a tichak hle ngei ang. Mahse, chu lehkha thawnah vêk chuan, ani chuan mihring rilru âwn zâwng hi thunun a nih loh chuan Pathian rawngbâwlna kawnga kan ṭhahnemngaihna a tichau thei tih a vaukhân bawk a. Kristiante chu Pathian thupêk zâwm “duh lo,” a nih loh leh chhuanlam siam lo tûrin an fîmkhur tûr a ni a ti.—Heb. 12:25.
6 Pathian pêk mawhphurhna pawm lo tûra “chhuanlam” siamna kawnga vaukhânna chu tûn laia Kristiante tân pawh a ni a. Kan Kristian mawhphurhna chu ngaih hoh loh emaw, Pathian rawng bâwlnaa kan ṭhahnemngaihna chu tihchauh loh emaw kan tum tlat a pawimawh tih kan hria a ni. (Heb. 10:39) Chu bâkah, rawngbâwlna thianghlim hlan chu nunna leh thihna thil a ni.—1 Tim. 4:16.
7, 8. (a) Engin nge ṭhahnemngai taka Pathian rawng bâwl zêl tûrin min ṭanpui ang? (b) Atîra kan neih ṭhahnemngaihna chu kan hloh ṭhen a nih chuan, Pathian Jehova leh Isua chungchâng eng nge kan hriat reng ang?
7 Pathian laka kan mawhphurhna hlen loh nâna chhuanlam siam lo tûrin engin nge min ṭanpui ang? Min ṭanpui theitu kawng pawimawh tak pakhat chu kan inpumpêkna thutiam awmze chhût reng hi a ni. A awmzia chu Pathian Jehova hnênah a duh zâwng chu kan nunah kan dah pawimawh ber ang tih leh chu thutiam chu zawm kan duh tih kan tiam tihna a ni. (Mt. 16:24) Chuvângin, a châng chânga kan inngaihtuah a: ‘Ka baptisma chan hun lai ang tho khân Pathian hnêna ka intiamna mila nun tlat chu ka la tum reng em? A nih loh leh, ka baptisma chan laia ka ṭhahnemngaihna ang kha ka hlauh ṭhen em?’ tia kan inzawh ṭhin a ngai a ni.
8 Dik taka mahni kan inenfiahna aṭangin Pathian Jehova rawngbâwlnaah kan tlahniam tih lanna kan hmuh phawt chuan zâwlnei Zephania thu sawi mi tichak thei tak hi kan hre chhuak tûr a ni. Ani chuan: “I kut pawh zawi suh se . . . LALPA i Pathian chu i chungah a awm e, chhandamtu tûr mi chak tak chu: Lâwmin i chungah a hlim ang a,” tiin a sawi a ni. (Zep. 3:16, 17) Hêng thu thlamuanpuiawm takte hi atîrah chuan Babulon sal tânna aṭanga Jerusalema rawn kîrleh hmân lai Israelte tân a ni a. Tûn laia Pathian mite tân pawh a ni tho a ni. Kan hnathawh hi Pathian Jehova hna a nih avângin, chu Pathian min pêk mawhphurhna chu hlen chhuak tûrin Amah leh a Fapain min ṭanpuiin, min tichak tih kan hre reng tûr a ni. (Mt. 28:20; Phil. 4:13) Pathian hna chu ṭhahnemngai taka thawh chhunzawm kan tum tlat chuan, mal min sâwm ang a, thlarau lama hma sâwn zêl tûrin min ṭanpui bawk ang.
Ṭhahnemngai takin ‘A Ram Chu Zawng Hmasa Rawh’
9, 10. Ruai ropui tak ṭheh chungchâng Isua tehkhin thuin eng nge min hrilh a, chuta ṭang chuan eng nge kan zir theih?
9 Pharisai hotu pakhat ina chaw a ei laiin, Isua chuan zâna ruai ropui tak ṭheh chungchâng tehkhin thu a sawi a. Chutah chuan, vân ram beiseina chu mi chi hrang hrang hnêna pêk a nih thu a sawi a. “Chhuanlam” siam awmzia pawh a hrilhfiah bawk. (Luka 14:16-21 chhiar rawh.) Isua tehkhin thua mikual sâwmte chuan ruai ṭhehnaa tel lo tûrin chhuanlam an siam a. Pakhat chuan a lo lei thar en tûra kal a ngaih thu a chhuanlam a. A dangleh chuan a sebâwng lei thar en tûra kal a ngaih thu a chhuanlam bawk a. Mi dangleh chuan: “Nupui ka nei ta a, chuvângin ka kal thei lo,” tiin chhuanlam a siam bawk a ni. Chûngte chu chhuanlam tling lo vek an ni. Lo leh sebâwng lei tharte chuan an lei hmain an enfiah tlângpui ṭhîn a, chuvângin, a hnua enfiah tûra hmanhmawh chung chu a ngai tawh lo. A nih loh leh, engvângin nge miin inneih thar avâng maia sâwmna pawimawh tak chu a hnial kher ang? Chuvângin, tehkhin thua mikhual sâwmtu a thinrim hle pawh hi a mak lo ve!
10 Pathian mi zawng zawngte chuan Isua tehkhin thu aṭang hian zir tûr an nei thei a ni. Chu chu eng nge ni? Isua tehkhin thua a sawi ang chi mi mal thilte chu ngai pawimawh lutukin, Pathian rawng kan bâwlna a tihpên chu kan phal ngai tûr a ni lo. Kristiante’n mi mal thilte chungchânga thlîr dân inbûk tâwk an neih loh chuan, rawngbâwlnaa an ṭhahnemngaihna chu zawi zawiin a bo mai dâwn a ni. (Luka 8:14 chhiar rawh.) Chutiang a thlen loh nân Isua fuihna: “A ram leh a felna chu zawng hmasa zâwk rawh u,” tih thu milin kan nung a ni. (Mt. 6:33) Pathian chhiahhlawh a pui a pangte’n chu fuihna pawimawh tak an nunpui tih hmuhna chuan min va tiphûr tak êm! Dik takin, mi tam tak chuan rawngbâwlnaa hun tam zâwk an pêk theih nâna an nun tihsamkhai nân hma an la a. Ṭhahnemngai taka a ram zawn hmasakna chuan hlimna dik tak leh lungawina nasa tak a pe tih anmahni ngeiin an tawng a ni.
11. Eng Bible thuin nge Pathian rawngbâwlnaa thinlung zawng zawnga tih leh ṭhahnemngaih a pawimawhzia târ lang?
11 Pathian rawngbâwlnaa ṭhahnemngaih a pawimawhzia lantîr nân Israel Lal Jehoasa nuna thil thleng hi lo chhinchhiah teh. Ani chu zâwlneiin a thalte Suria lam hawia tukverha kâp chhuak tûrin a ti a, chu chu Pathian Jehova’n hnamte a hneh dâwn tih lantîrna a ni. Chu chuan lal chu a tichak hle ngei ang. Chutah, Elisha chuan Jehoasa hnênah a thala lei chhun tûrin a hrilh leh a. Ani chuan vawi thum chauh a chhun ta mai a. Chuvâng chuan Elisha chu a thinrim hle mai a, vawi nga emaw, vawi ruk emaw lei chhunna chu ‘Suria-hote boral dêr khawpa’ hnehna entîrna a ni si a. Tûnah chuan Jehoasa chuan vawi thum chauh a hneh dâwn ta tihna a ni. Ṭhahnemngaihna a neih tlêm avângin, Jehoasa chuan hlawhtlinna tluangtling a nei ta lo a ni. (2 Lal. 13: 14-19) He thu aṭang hian eng nge kan zir theih? Pathian Jehova chuan thinlung zawng zawng leh ṭhahnemngai taka a rawng kan bâwl chauhvin malsâwmna nasa takin min vûr ang.
12. (a) Harsatnate hmachhawn chung pawha ṭhahnemngai taka Pathian rawng bâwl zêl tûrin engin nge min ṭanpui ang? (b) Pathian rawngbâwlnaa buai reng chu i hlâwkpui dân sawi rawh.
12 Kan harsatna tawhte hi Pathian rawngbâwlnaa kan ṭhahnemngaih chen leh kan inpêk chen fiahtu a ni a. Unau tam tak chuan ei leh bâr lama harsatna an hmachhawn a. Mi dangte chu hrisêl lohnain Pathian Jehova rawng an bâwlna a tihṭhuanawp avângin an lunghnual bawk. Chuti chung pawh chuan, kan za hian ṭhahnemngai reng tûr leh Krista hnung zui zêl tûrin hma kan la thei tho a ni. Khawngaihin “Krista Hnung Zui Zêl Tûrin Engin Nge Ṭanpui Ang Che?” tih bâwma rawtna leh Bible châng târ lan ṭhenkhatte hi lo en la. Chûngte chu a theih ang tâwka i nunpui theih dân lo ngaihtuah ang che. Chutianga i tih chuan hlâwkna tak tak i seng ang. Rawngbâwlnaa buai rengna chuan kan chungah rah ṭha a chhuah a, kan nun a tihausain, remna leh hlimna nasa tak min thlen a ni. (1 Kor. 15:58) Chubâkah, tih tak zeta Pathian rawng bâwlna chuan ‘Pathian ni lo thlen hun tûr chu beisei leh ṭhahnemngai taka duh’ tûrin min ṭanpui ang.—2 Pet. 3:11, 12.
I Dinhmun Dik Takin Enfiah Rawh
13. Thinlung zawng zawnga rawng bâwl tih hian kan tân ṭheuhva awmzia a neih chu engtin nge kan hriat theih ang?
13 Thinlung zawng zawnga rawng bâwl tih hi rawngbâwlnaa kan hun hman tam lam sawina a ni kher lo tih hriat reng a ṭha. Mi tinte dinhmun chu a inang lo ṭheuh va. Miin thlawhhma rawngbâwlnaah thla tin dârkâr hnih khat lek pawh hmang mah se, a hrisêlna tlin tâwk a nih tak zet chuan Pathian Jehova a lâwm êm êm a ni. (Marka 12:41-44 nên khaikhin rawh.) Chuvângin, mahni tâna thinlung zawng zawnga Pathian rawngbâwl awmzia hre tûr chuan, kan theihna leh dinhmunte dik taka kan chhût a ngai a. Krista zuitu kan nih angin, kan thil thlîr dân pawh a thil thlîr dân anga siamrem ve kan duh bawk. (1 Korinth 2:16 chhiar rawh.) Isua chuan a nunah eng nge a dah pawimawh ber? Kapernaum khuaa mite hnênah chuan: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” tiin a hrilh a ni. (Lk. 4:43; Joh. 18:37) A rawngbâwlnaa Isua ṭhahnemngaihna chu hre rengin, rawng bâwlnaa i thawh tam lehzual theih leh theih loh hriat nân i dinhmun chu chhût ngun ang che.—1 Kor. 11:1.
14. Eng kawngtein nge kan rawngbâwlna kan zauh lehzual theih ang?
14 Kan dinhmun ngun taka kan chhût hnu chuan rawngbâwlnaah hun tam zâwk kan hmang thei tih kan hmu chhuak thei a ni. (Mt. 9:37, 38) Entîr nân, high school zo hlim ṭhalai tam takte chuan an rawngbâwlna zauhvin, ṭhahnemngai taka pioneer an thawhna aṭangin hlimna an tawng mêk a ni. Chutiang hlimna chu neih ve i duh em? Unau ṭhenkhat chuan an dinhmunte ngun taka chhûtin, an ram chhûng, a nih loh leh ram danga Lalram thuchhuahtu mamawh zualna hmuna insawn an rêl thlu a ni. Mi dangte chuan ṭawng dang hmang mite ṭanpui nân ṭawng dang an zir bawk. Kan rawngbâwlna zauh chu thil harsa tak a nih theih rualin, malsâwmna thlentu pawh a ni bawk a, mi dang tam tak ‘thutak hre’ tûrin kan ṭanpui thei bawk.—1 Tim. 2:3, 4; 2 Kor. 9:6.
Zui Tûr Bible Entîrnate
15, 16. Ṭhahnemngai taka Krista hnung zui chungchângah tute nge kan entawn theih?
15 Engtin nge tirhkoh lo ni ta ṭhenkhatte khân Krista’n amah zui tûra a kohna an chhân lêt? Matthaia chungchângah thuziak chuan: “Engkim a kalsan a, a tho va, a zui ta a,” tiin a sawi. (Lk. 5:27, 28) Sangha man lai mêk Petera leh Andria chungchâng chu: “Lênte chu kalsanin an zui ta nghâl a,” tiin kan chhiar bawk. Chu mi hnuah Isua chuan Jakoba leh Johana an pa hnêna an lênte siam ṭha lai chu a va hmu leh a. Anni chuan Isua sâwmna chu engtin nge an chhân? “Lawng leh an pa chu an kalsan a, an zui ta nghâl” a ni.—Mt. 4:18-22.
16 Entawn tûr dang leh chu tirhkoh Paula lo ni ta Saula hi a ni. Ani chu Krista hnungzuitute nasa taka sawisatu ni ṭhîn mah se, a inthlâk thleng a, Krista hming pu tûra “bêl ruat” a lo ni ta a. Paula chuan “inkhâwmna inahte chuan Isua chu Pathian Fapa a nihzia thu a tlângaupui ta nghâl a.” (Tirh. 9:3-22) Harsatna leh tihduhdahna te tâwk ṭhîn mah se, a ṭhahnemngaihna chu a hloh ngai lo.—2 Kor. 11:23-29; 12:15.
17. (a) Krista hnung zui chungchângah eng nge i châk zâwng? (b) Thinlung zawng zawng leh chakna zawng zawnga Pathian Jehova duh zâwng kan tih avângin eng malsâwmnate nge kan dawn?
17 Chûng zirtîrte entawn tûr ṭha siam chu zui a, Krista hnung zui tûra sâwmna chhân lêt nghâl vat chu kan duh ngei ang. (Heb. 6:11, 12) Ṭhahnemngai taka Krista zui zêl kan tum avângin eng malsâwmnate nge kan dawn? Pathian duh zâwng tihnaah hlimna dik tak kan hmu a, kohhrana rawngbâwlna leh mawhphurhna dang chelh belhna aṭanga lo awm lungawina chu kan nei bawk. (Sâm 40:8; 1 Thessalonika 4:1 chhiar rawh.) Ni e, Krista zui tûra theih tâwp kan chhuah hian, rilru thlamuanna te, lungawina te, Pathian pawm nihna te, leh chatuan nun beiseina te ang chi malsâwmna tluantling kan dawng a ni.—1 Tim. 4:10. (w10-E 04/15)
Kan Hre Chhuak Thei Em?
• Eng hna pawimawh tak nge pêk kan nih a, chu chu engtin nge kan thlîr ang?
• Mihring rilru âwn zâwng eng lakah nge kan invên ngai a, engvâng nge?
• Eng inenfiahna dik tak nge kan neih ang?
• Engin nge Krista hnung zui zêl tûrin min ṭanpui ang?
[Zirlai Atâna Zawhnate]
[Phêk 29-naa bâwm/milem]
Krista Hnung Zui Zêl Tûrin Egin Nge Ṭanpui Ang Che?
▪ Nî tin Pathian Thu chhiar la, i thil chhiarte chu chhût ngun rawh.—Sâm 1:1-3; 1 Tim. 4:15.
▪ Pathian thlarau ṭanpuina leh kaihhruaina dîlin ṭawngṭai fo rawh.—Zak. 4:6; Lk. 11:9, 13.
▪ Rawngbâwlnaa ṭhahnemngaihna lantîrtute kâwm rawh.—Thuf. 13:20; Heb. 10:24, 25.
▪ Kan hun hmâwr tawhzia kan hria.—Eph. 5:15, 16.
▪ “Chhuanlam” siamnain a nghawng chhuah chu hre tlat rawh.—Lk. 9:59-62.
▪ I inpumpêkna thutiam leh Pathian Jehova rawng i bâwlna leh thinlung zawng zawnga Krista hnung i zui avânga malsâwmna i dawnte chhût fo rawh.—Sâm 116:12-14; 133:3; Thuf. 10:22.