Kwoj ke Lor Kraist Joñõn Wõt Am Maroñ?

“Einwõt komij etetal, komin bareinwõt lõñlok wõt.”​—1 TESS. 4:1.

1, 2. (a) Ta men ko relap elõñ armij ro ilo ran ko an Jisõs rar maroñ loi? (b) Etke ran kein ar rej bareinwõt lukkun aurõk?

 KWONAÑIN ke kar lemnok kin joñõn an naj lukkun emõn elañe kwar mour ilo ien eo Jisõs ear ber ion lõl? Bwelen kwoj lemnok kin kejatrikrik eo bwe Jisõs enaj kejmour yuk im kin men in, kwojjab aikwij iñtan kin nañinmij eo am. Ak kwomaroñ lemnok bwe ej juõn men ekalõñliñ ñõn lo menin kabwilõñlõñ ko Jisõs ear kõmõni ak ñõn roñjake nan in katak ko an. (Mark 4:​1, 2; Luk 5:​3-9; 9:​11) Enaj kar juõn jerammõn elap elañe kwar maroñ ber ilo ien eo Jisõs ear kõmõni aolep jerbal kein! (Luk 19:37) Jen ien in, ejelok bar juõn ear lo men kein, im men eo Jisõs ear kõtõbrõke ion lõl ikijen an kar “katok kin E mõke” ejamin bar walok.​—Hib. 9:​26; Jon 14:19.

² Bõtab, ran kein ar rej bareinwõt lukkun aurõk. Etke? Kinke jej mour ilo ien eo me Baibel eo ej kanan kake einwõt “ien eo eliktata” im “ran ko eliktata.” (Dan. 12:​1-4, 9, UBS; 2 Tim. 3:1) Ilo ien in, kar jolõllok Setan jen lõñ. Ejjabto naj liabe im jolok e “na ilo abys eo.” (Rev. 12:​7-9, 12; 20:​1-3) Bareinwõt ilo ien in, eor iber jerammõn eo elap ñõn bõk kwonad ilo juõn jerbal me ejamin naj bar walok. Eñin bwe jen kwalok kin “gospel in an ailiñ in lõñ” ibelakin lõl ikijen ar karoñ armij ro kin  kejatrikrik eo kin Paredais eo enaj itok.​—Matu 24:14.

3. Mokta wõt jen an kar wõnliñlok ñõn lõñ, ta eo Jisõs ear jiroñ dri kalor ro an ñõn air kõmõne, im men in enaj kar kitibuj ta?

³ Mokta wõt jen an kar wõnliñlok ñõn lõñ, Jisõs ear jiroñ dri kalor ro an: “Kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.” (Jerb. 1:8) Jerbal in ñõn katakin enaj kar walok ibelakin lõl. Ta mejenkajik eo ñõn kõmõne jerbal in? Ñõn kõmõn dri kalor ro an Kraist mokta jen an itok jemlokõn. (Matu 28:19, 20) Ta eo jej aikwij kõmõne elañe jekõnan lo tõbrõk ilo ar kajejite jerbal in an Kraist?

4. (a) Ta aikwij eo nan ko an Piter ilo 2 Piter 3:​11, 12 rej kalikar kake? (b) Ta ko jej aikwij kejbãrok kij jeni?

⁴ Lemnok kin nan kein an dri jilik Piter: “Ta men eo komin wõjake ilo kõmõn wãnik im kabuñ rokwojarjar, ke komij kõtõmene im lipjerjer an ran in Iroij [Jeova] itok.” (2 Pit. 3:​11, 12) Nan kein an Piter rej kalikar kin aikwij eo ñõn ar lukkun ekil ilo ran kein eliktata im kõmõn bwe mour ko ar ren berber wõt ion jerbal ko ar ñõn Anij. Jerbal kein rej kitibuj ar kwalok nan kin nuuj eo emõn. Inem, ej juõn menin kalõñliñ elap ñe jej lo an ro jeer im jãter ibelakin lõl kijejeto in kõmõne jerbal in kwalok nan eo me Kraist ear kakien kij kake! Ilo ejja ien eo wõt, jej kile aikwij eo ñõn ar kejbãrok bwe ijjibed ko rej walok ran otemjej jen jukjuk in ber in an Setan im jen ar jab wãppen ren jab kadriklok kijejeto eo ar ñe jej kõmõne jerbal in an Anij. Kin men in, jen etale ewi wãwen jemaroñ kõmõn bwe jen wõnmanlok wõt im lor Kraist.

Kwon Mõnõnõ in Bõk Erro ko Anij ej Liwõj ñõn Yuk

5, 6. (a) Ta eo Paul ear nebar dri tõmak ro mõtõn ilo Jerusalem kake, im ta eo ear kakkil ir jen air kõmõne? (b) Etke jej aikwij kaurõk erro ko ar Anij ear litoki?

⁵ Ilo letter eo an ñõn Kristian dri Hibru ro ilo Jerusalem, dri jilik Paul ear nebar dri tõmak ro mõtõn kin air kar drebij wõt air tiljek im kijenmij ilo ien ko mokta meñe rar iion matõrtõr. Ear ba: “Komin kememej ran ko remotelok, ke emwij kamramlok kom, kom ar kijenmij ilo iñtan ko relap.” Aet, Jeova ear kememej tiljek eo air. (Hib. 6:​10; 10:32-​34) Nan in nebar kein an Paul remaroñ kar lukkun kõkãtõk Kristian dri Hibru ro. Bõtab, ilo ejja letter in wõt, Paul ear bareinwõt kakkil ir nae juõn men me armij rekin kõmõne, im elañe rejjab kejbãrok ir jene emaroñ kadriklok kijejeto eo air ilo jerbal eo an Anij. Ear ba bwe dri Kristian ro rej aikwij kejbãrok ir jen air kõmõn jekben ñõn air lor kien ko an Anij.

⁶ Nan in kakkil in ñõn jab jekben jen ar mõnõnõ in bõk erro ko Anij ej litok ñõn kij ej bareinwõt jerbal ñõn dri Kristian ro ranin. Jej kile ar aikwij kate kij ñõn kajejit erro ko ar einwõt juõn dri Kristian im jab kõtlok bwe en driklok kijejeto eo ar ilo jerbal eo an Anij. (Hib. 10:39) Men in ej eindrein kinke jerbal in ekwojarjar jej kõmõne emaroñ melelen mour ak mij ñõn juõn armij.​—1 Tim. 4:​16.

7, 8. (a) Ta eo enaj jibõñ kij ñõn drebij wõt ar kijejeto ilo ar kõmõne jerbal eo an Anij? (b) Elañe ear driklok ar kijejeto jen kar mokta, ta eo jej aikwij kememej kin Jeova im Jisõs?

⁷ Ta eo enaj jibõñ kij ñõn bõprae ar jekben jen ar kajejit erro ko ar ñõn Anij? Juõn wãwen eaurõk ñõn ar anjo ion men in ej ikijen ar keini ar kalomõnlokjen kin melelen wujleplok eo ar. Eaurõk men in kinke jar kalimur ñõn Jeova bwe jenaj kõmõnmõn ankilan moktata ilo mour ko ar, im jekõnan kejbãrok kalimur in. ( Matu 16:24) Kin men in, jen ien ñõn ien jej aikwij kajitõkin kij mõke: ‘Ej eindrein wõt ke aõ lemnok jen ien eo iar baptais ñõn mour ekkar ñõn wujleplok eo aõ ñõn Anij? Ak ear ke driklok aõ kijejeto jen ien eo iar baptais?’

⁸ Elañe emol ar etale kij mõke im jej lo bwe edriklok ar kijejeto ilo jerbal eo ar ñõn  Jeova, emõn bwe jen kememej nan ko rekõkãtõk an dri kanan Zepanaia. Ear ba: “Bã ko beiũm ren jab mõjno! Iroij am Anij ej bed ibbam; Ej lewõj anjo ñõn yuk kin kajur eo an. Iroij enaj buñburuen kin yuk.” (Zep. 3:​16, 17, UBS) Nan kein rekainemõn rar jerbal mokta ñõn dri Israel ro ke rar jeblak ñõn Jerusalem jen Babilõn, ailiñ eo me ear kajebokweik ir. Bõtab, nan kein rej bareinwõt jerbal ñõn armij ro an Anij ranin. Kinke jerbal in jej kõmõne ej an Jeova, jej aikwij kememej bwe Jeova im Nejin rej rejetak im kakajur kij ñõn kajejit erro ko ar me Anij ear litoki. (Matu 28:20; Pil. 4:​13) Elañe jej kate kij ñõn wõnmanlok wõt im kõmõne jerbal eo an Anij ilo kijejeto, Anij enaj kejerammõn kij im jibõñ kij ñõn kõmõn wõnmanlok ko ilo jitõb.

“Bukot Mokta Ailiñ in Anij” ilo Kijejeto

9, 10. Ta eo wanjoñok eo an Jisõs kin juõn kejota elap ej kwalok kake, im ta eo jemaroñ katak jene?

⁹ Ke Jisõs ear mõña ilo mweo imõn juõn ian iroij ro an Parisi ro, ear kwalok juõn wanjoñok kin juõn kejota elap. Ilo wanjoñok in, ear kemelele kin jerammõn eo ear bellok ñõn ro im renaj bõk jerammõn eo ñõn iroij ilo Ailiñ eo an Anij ilõñ. Ear bareinwõt kalikar kin ta melelen ñe juõn ej jekben. (Riit Luk 14:16-​21, UBS.) Ilo wanjoñok eo an Jisõs, armij ro me kar kirtok ir rar jekben im ba bwe rejjab maroñ ber ilo ien kejota eo. Juõn iair ear ba bwe ear aikwij etal im lale melaj eo an me ej kab wiaiki. Bar juõn ear ba bwe ej kab mwij an wia jet kau ko im ear kõnan etal im lali. Im bar juõn ear ba: “Ej kab mwij aõ mare kiõ, im ijjab maroñ iwõj.” Wãwen jekben kein rejjab emõn. Juõn eo ej wia juõn melaj ak menin mour ko ekkã an etali lok iman mokta jen an wiaiki, inem ear jab juõn menin aikwij elap ñõn an lali tokelik. Im etke juõn eo ej kab mare ejjab maroñ etal ñõn kejota in elap? Eñin unin armij eo im ear lolorjake kejota eo elap ilo wanjoñok eo an Jisõs ear lukkun illu!

¹⁰ Aolep armij ro an Anij remaroñ katak jen wanjoñok in an Jisõs. Ta eo jemaroñ katak jene? Jejjab aikwij kõtlok bwe wãwen ko ilo mour eo ar ren oktõk im aurõklok jen jerbal eo ar ñõn Anij, einwõt men ko kar kwalok kaki ilo wanjoñok eo an Jisõs. Elañe juõn dri Kristian enaj kõtlok bwe wãwen ko ilo mour eo an ren men ko raurõklok, men in emaroñ kõmõn bwe en driklok kijejeto eo an ilo jerbal in kwalok nan. (Riit Luk 8:​14.) Ñõn ar bõprae men in jen an walok, jej aikwij jerbale nan in rejañ in an Jisõs: “A komin bukot mokta ailiñ in Anij, im kwojarjar eo An.” (Matu 6:​33) Ej juõn menin kõkãtõk elap ñõn kij ñe jej lo an dri korijer ro reridto im redrik an Anij jerbale nan in kakabilek in elap an aurõk! Ilo mol, elõñ rar bõk buñten ne ko ñõn kõmõn bwe mour eo air en lamwan ñõn air maroñ kalaplok ien ko air ilo jerbal in kwalok nan. Emwij air lo bwe ilo air kijejeto in bukot mokta ailiñ eo, men in ej bõktok lõñliñ eo emol im juburu elap.

11. Ta bwebwenato eo ilo Baibel ej kwalok kin aurõkin ar korijer ñõn Anij ilo kijejeto im kin juõn buru eyu?

¹¹ Ñõn kwalok kin aurõkin ar kijejeto ilo jerbal eo an Anij, jen lale juõn men ear walok ilo mour eo an Kiñ Joash ilo Israel. Kin an inebata kin jorran eo enaj kar walok elañe ailiñ in Siria enaj anjo ion Israel, Joash ear jõñlok ñõn dri kanan Ilaisha. Dri kanan in ear jiroñ e bwe en libonelok Siria jen windo eo ñõn kalikar bwe ikijen jibõñ eo an Jeova, renaj anjo ion ailiñ in. Men in en kar lukkun kakajurlok Joash. Tokelik, Ilaisha ear jiroñ Joash bwe en bõk mare ko im dreñlokwe lõl kaki. Joash ear dreñõt lõl jilu alen. Ilaisha ear illu kin men in ear kõmõne kinke elañe en kar dreñõt lõl lailim ak jiljino alen, men in enaj kar kalikar bwe ‘enaj kar kanuij  kokkure dri Syria ro.’ Ak kiõ Joash enaj anjo ion ailiñ in jilu wõt alen. Joash ear jab lo elap tõbrõk kinke ear jab emakõt ilo kijejeto. (2 Kiñ 13:14-​19) Ta eo jemaroñ katak jen bwebwenato in? Jeova enaj lukkun kejerammõn kij elañe jej kõmõne jerbal eo an ilo kijejeto im kin juõn buru eyu.

12. (a) Ta enaj jibõñ kij ñõn drebij wõt ar kijejeto ilo jerbal eo an Anij ke jej kijenmij kin wãwen ko rebin ilo mour eo ar? (b) Kwalok kin ewi wãwen kwoj bõk tokjen jen am boub wõt ilo jerbal in kwalok nan.

¹² Wãwen ko rebin ilo mour remaroñ melejoñwe kijejeto im tiljek eo ar ñõn kõmõne jerbal eo an Anij. Elõñ ian ro jeer im jãter rej jelmae wãwen ko rebin ñõn kabwe aikwij ko air ilo mour. Ro jet rej inebata kinke rej jelmae nañinmij ko relap me rej bõprae ir jen air kalaplok kwonair ilo jerbal eo an Jeova. Meñe eindrein, kij kajjojo jemaroñ bõk buñten ne ko ñõn drebij wõt ar kijejeto im wõnmanlok im lor Kraist joñõn wõt ar maroñ. Joij im lali jet ian nan in rejañ ko im eon ko emwij kõlajrõki ilo box eo “Ta eo Enaj Jibõñ Yuk ñõn Am Wõnmanlok Wõt im Lor Kraist?” Kwon etale ewi wãwen kwomaroñ jerbali joñõn wõt am maroñ. Elañe kwoj kõmõne men in, kwonaj bõk elap jerammõn ko. Ilo ar boub wõt ilo jerbal in kwalok nan, men in enaj kõmõn ar jokkin wõt juõn, kakõmõnmõnlok mour eo ar, im bõktok ñõn kij elaplok ainemõn im mõnõnõ. (1 Kor. 15:58) Bareinwõt, ilo ar jerbal ñõn Anij kin aolepen ar, men in enaj jibõñ kij ñõn “lipjerjer an ran in Iroij itok.”​—2 Pit. 3:​12.

En Mol Am Etale Wãwen ko Ibõm

13. Ñõn kij kajjojo, ewi wãwen jemaroñ jela ta eo ej kitibuj ar jerbal kin aolepen ar?

¹³ Bõtab, jej aikwij kememej bwe ar jerbal kin aolepen ar ejjab ikijen jete auõ ko jej joloki ilo jerbal in kwalok nan. Wãwen ko iben kajjojo armij rej oktõk jen dron. Juõn armij eo eor an utame kin nañinmij me ej jolok juõn ak ruo auõ ilo jerbal in kwalok nan kajjojo aliñ, emaroñ kamõnõnõik buruen Jeova elañe eñin ej joñõn eo emaroñe. (Keiri Mark 12:41-​44.) Kin men in, ñõn ar jela elañe kij kajjojo jej jerbal ñõn Anij kin aolepen ar, ej aikwij mol ar etale maroñ ko ar im wãwen ko iber mõke. Einwõt dri kalor ro an  Kraist, jej aikwij bareinwõt bõk ejja lemnok eo wõt an. (Riit 1 Dri Korint 2:​16; Rom 15:5) Ta eo Jisõs ear likit moktata ilo mour eo an? Ear jiroñ jar eo jen Kaperneum: “Iaikwij bareinwõt kwalok Nan Emmõn kin Ailiñ in Anij ilo jikin ko jet, bwe eñin un eo Anij ear jilkintok iõ kake.” (Luk 4:​43, UBS; Jon 18:37) Kwon lemnok kin kijejeto eo an Jisõs ilo jerbal in kwalok nan ñe kwoj etale wãwen ko ibõm ñõn lale elañe kwomaroñ kalaplok ijo kwonam ilo jerbal in kwalok nan.​—1 Kor. 11:1.

14. Ilo wãwen it ko jemaroñ kalaplok jerbal in kwalok nan eo ar?

¹⁴ Ilo ar kanuij etale wãwen ko iber, emaroñ kõmõn bwe jen kile bwe jemaroñ kalaplok ien ko jej kajerbali ñõn kwalok nan. (Matu 9:37, 38) Ñõn wanjoñok, elõñ tausan jodrikdrik ro ej kab mwij air drioijlok jen jikuul rar kalaplok air jerbal in kwalok nan im rej kiõ lo lõñliñ eo ej itok jen air kijejeto in jerbal einwõt pioneer. Kwoj kõnan ke bõk ejja mõnõnõ in wõt? Jet ian ro jeer im jãter rar etale wãwen ko ibeir im kile bwe remaroñ emakõt ñõn jikin ko jet ilo ailiñ eo air, ak ñõn ailiñ ko jet, ijo me elap air aikwij dri kwalok ro ie. Bareinwõt ro jet rar katak bar juõn kajin ñõn air maroñ jibõñ armij ro jen ailiñ ko jet. Meñe ej juõn men ebin ñõn kalaplok jerbal in kwalok nan eo ar, ak ej bõktok elap jerammõn ko, im jemaroñ jibõñ elõñ armij ro “bwe ren item jela mol.”​—1 Tim. 2:​3, 4; 2 Kor. 9:6.

Lor Joñok ko ilo Baibel

15, 16. Wõn ro jemaroñ kajeoñwe joñok ko air einwõt dri kalor ro rekijejeto an Jisõs?

¹⁵ Ewi wãwen an kar jet ro im rar erom dri jilik emakõt ke Jisõs ear kir ir ñõn air lor e? Ikijen Matu, bwebwenato eo ej ba: “E ar likit men otemjej im jutõk, im lor E.” (Luk 5:​27, 28) Kin Piter im Andru, ro me kar dri añwõr, ej ba: “Emõkõj air ilok jen ok ko air im lor E.” Tokelik Jisõs ear lo Jemes im Jon, ro im rar kanõri ok ko air iben jemeir. Ewi wãwen air kar emakõt ke Jisõs ear kir ir? Baibel ej ba: “Emõkõj air to im ilok jen wa eo im jemeir im lor E.”​—Matu 4:​18-​22.

¹⁶ Bar juõn joñok emõn ñõn lore ej kin Saul, eo ear erom dri jilik Paul. Meñe ear juõn eo ear lukkun matõrtõr dri kalor ro an Kraist, ear oktõk im erom ‘jãbi eo kar kãlet e’ ñõn kwalok kin etan Kraist. “Im emõkõj an kwalok Jisõs iloan imõn kwelok ko, bwe E Nejin Anij.” (Jerb. 9:​3-​22) Im meñe ear aikwij kijenmij iomin elõñ wãwen ko rebin im matõrtõr, Paul ear drebij wõt an kijejeto.​—2 Kor. 11:23-​29; 12:15.

17. (a) Ta kõnan eo am ikijen am lor Kraist? (b) Ta jerammõn ko jej lõñliñ kaki kin ar kõmõnmõn ankilan Jeova kin aolepen buruer im ar kajur?

¹⁷ Ejelok berre jekõnan kajeoñwe joñok kein remõn an dri jilik ro im mõnõnõ in emakõt ñõn nan in kir eo ñõn lor Kraist. (Hib. 6:​11, 12) Ta jerammõn ko jenaj lõñliñ kaki ñe jej wõnmanlok wõt im kate kij ñõn lor Kraist ilo kijejeto im ilo joñõn eo jemaroñe? Jej lo lõñliñ eo emol ilo ar kõmõnmõn ankilan Anij im lo juburu eo me ej itok jen ar bõk jerbal im erro ko jet ilo congregation eo. (Sam 40:8; riit 1 Dri Tessalonika 4:1.) Aet, ke jej kate kij ñõn lor Kraist, jej lõñliñ kin jerammõn ko rej ñõn indrio einwõt ainemõn ilo lemnok, juburu, buñburu eo an Anij, im jerammõn eo ñõn mour indrio.​—1 Tim. 4:​10.

Kwoj Kememej Ke?

• Ta jerbal eo eaurõk kar letok ñõn kij, im en ewi wãwen ar lemnok kake?

• Ta men eo armij ro ekkã air kõmõne me jej aikwij bõprae kij jene, im etke?

• Ta etale eo jej aikwij kõmõne?

• Ta eo enaj jibõñ kij ñõn ar wõnmanlok wõt im lor Kraist?

[Study Questions]

[Box/​Pija ilo pei 27]

Ta eo Enaj Jibõñ Yuk ñõn Am Wõnmanlok Wõt im Lor Kraist?

▪ Riit im kalomõnlokjen kin Nan in Anij ran otemjej.​—Sam 1:​1-3; 1 Tim. 4:​15.

▪ Niknik ilo jar ñõn kajitõk jibõñ im tel jen jitõb eo an Anij.​—Zek. 4:6 UBS; Luk 11:​9, 13.

▪ Kobalok iben ro rej kwalok air kijejeto ilo jerbal in kwalok nan.​—Ken. 13:20; Hib. 10:24, 25.

▪ Kile joñõn an karu ien ilo ran kein jej mour ie.​—Ep. 5:​15, 16.

▪ Kwon kile kauwatata ko renaj walok ñe jej “jikbin.”​—Luk 9:​59-​62.

▪ Ien otemjej kwon lemnok kin wujleplok eo am im kin jerammõn ko rar walok ñõn kwe ikijen am jerbal ñõn Jeova im lor Kraist kin aolepen buruõm.​—Sam 116:12-​14; 133:3; Ken. 10:22.