Qiegħed Int Timxi bis-​Sħiħ Wara l-​Kristu?

‘Bħalma fil-​fatt qed timxu, komplu agħmlu dan iktar bis-​sħiħ.’—1 TESS. 4:1.

1, 2. (a) Liema affarijiet tal-​għaġeb raw b’għajnejhom stess ħafna nies fi żmien Ġesù? (b) Għala anki ż-​żmien li qed ngħixu fih hu żmien speċjali?

 QATT ħsibt dwar kemm kienet tkun xi ħaġa sabiħa li tgħix fiż-​żmien meta Ġesù kien fuq l-​art? Forsi taħseb dwar il-​prospett li tkun imfejjaq minn Ġesù u b’hekk ma jkollokx għalfejn tgħaddi minn tbatija minħabba xi mard fiżiku. Jew forsi taħseb dwar kemm kien ikun pjaċevoli li tkun tistaʼ tara u tismaʼ lil Ġesù u li saħansitra titgħallem minnu jew tarah iwettaq xi miraklu. (Mk. 4:1, 2; Lq. 5:3-​9; 9:11) Kemm kien ikun privileġġ tal-​għaġeb li kieku kont preżenti meta Ġesù wettaq dawn ix-​xogħlijiet! (Lq. 19:37) Minn dakinhar ’l hawn, ebda ġenerazzjoni ma esperjenzat affarijiet taʼ din ix-​xorta, u dak li wettaq Ġesù fuq l-​art “bis-​sagrifiċċju tiegħu stess,” mhux se jerġaʼ jsir.—Ebr. 9:26; Ġw. 14:19.

² Madankollu, anki ż-​żmien li qed ngħixu fih issa huwa żmien speċjali. Għala? Aħna qegħdin ngħixu f’dak li l-​Iskrittura bassret bħala “żmien it-​tmiem” u ‘l-​aħħar jiem.’ (Dan. 12:1-​4, 9; 2 Tim. 3:1) Matul dan il-​perijodu taʼ żmien, Satana tkeċċa mis-​sema. Dalwaqt, se jiġi marbut u mitfugħ “fl-​abbiss.” (Riv. 12:7-​9, 12; 20:1-​3) Huwa wkoll f’dan iż-​żmien li għandna l-​privileġġ grandjuż li niddikjaraw “l-​aħbar tajba tas-​saltna” mad-​dinja kollha. Dan nagħmluh billi ngħidu lin-​nies dwar it-​tama taʼ Ġenna tal-​art li ġejja—xogħol li qatt mhu se jerġaʼ jsir.—Mt. 24:14.

3. Ftit qabel ma telaʼ s-​sema, Ġesù x’qalilhom biex jagħmlu lis-​segwaċi tiegħu, u dan x’kien jinvolvi?

 ³ Ftit qabel ma telaʼ s-​sema, Ġesù qal lis-​segwaċi tiegħu: “Tkunu xhieda tiegħi f’Ġerusalemm u fil-​Lhudija kollha u fis-​Samarija u sa l-​iktar parti mbiegħda taʼ l-​art.” (Atti 1:8) Dan ix-​xogħol kellu jinvolvi attività taʼ tagħlim mad-​dinja kollha. B’liema għan? Li nagħmlu dixxipli—iżjed segwaċi tal-​Kristu—qabel ma jiġi t-​tmiem. (Mt. 28:19, 20) X’hemm bżonn nagħmlu sabiex jirnexxilna nwettqu l-​inkarigu li tana Kristu?

4. (a) Dak li qal Pietru fit-​2 Pietru 3:11, 12 jenfasizza liema bżonn? (b) Għal liema ħaġa jeħtieġ nibqgħu għassa?

⁴ Innota dak li enfasizza l-​appostlu Pietru: “Oqogħdu attenti x’tip taʼ persuni għandkom tkunu f’dawk li huma atti taʼ kondotta qaddisa u għemejjel taʼ devozzjoni lejn Alla, waqt li tistennew u żżommu dejjem f’moħħkom il-​preżenza tal-​jum taʼ Ġeħova!” (2 Pt. 3:11, 12) Il-​kliem taʼ Pietru jenfasizza l-​bżonn li nżommu għassa stretta f’dawn l-​aħħar jiem biex inkunu ċerti li ħajjitna tibqaʼ ffokata fuq għemejjel taʼ devozzjoni lejn Alla. Għemejjel bħal dawn jinkludu l-​ippritkar tal-​aħbar tajba. Għalhekk, kemm nifirħu meta nosservaw iż-​żelu taʼ ħutna madwar id-​dinja li bih qed iwettqu l-​inkarigu tal-​ippritkar mogħti minn Kristu! Fl-​istess ħin, aħna nagħrfu l-​bżonn li noqogħdu għassa sabiex il-​pressjonijiet taʼ kuljum li jkollna mid-​dinja taʼ Satana u mit-​tendenzi tal-​laħam li writna ma jnaqqsulniex iż-​żelu li bih qed inwettqu s-​servizz lejn Alla. Għalhekk, ejja nikkunsidraw kif nistgħu naċċertaw ruħna li nibqgħu nimxu wara l-​Kristu.

Aċċetta mill-​Qalb ir-​Responsabbiltajiet Mogħtijin Minn Alla

5, 6. (a) Pawlu għal liema ħaġa faħħar lil sħabu fit-​twemmin f’Ġerusalemm, u kontra liema ħaġa wissiehom? (b) Għala m’għandniex nieħdu ħafif ħafif ir-​responsabbiltajiet mogħtijin minn Alla?

⁵ Fl-​ittra tiegħu lill-​Kristjani f’Ġerusalemm, l-​appostlu Pawlu faħħar lil sħabu fit-​twemmin talli fil-​passat issaportew b’lealtà saħansitra anki taħt persekuzzjoni. Hu qal: “Ibqgħu ftakru fiż-​żmien taʼ qabel meta, wara li ġejtu mdawlin, issaportejtu taqbida kbira bis-​sofferenzi.” Tabilħaqq, Ġeħova ftakar fil-​lealtà tagħhom. (Ebr. 6:10; 10:32-​34) Dan il-​kliem taʼ Pawlu mimli mħabba u tifħir żgur li inkuraġġixxa ferm lil dawk il-​Kristjani Ebrej. Madankollu, f’din l-​istess ittra Pawlu wissa wkoll kontra tendenza umana li jekk ma tiġix kontrollata tistaʼ tnaqqas iż-​żelu taʼ dak li jkun għas-​servizz t’Alla. Hu stqarr li l-​Kristjani għandhom joqogħdu attenti li ma ‘jġibux skużi’ biex ma jsegwux il-​kmandamenti t’Alla.—Ebr. 12:25.

⁶ Din it-​twissija kontra t-​tendenza li l-​bnedmin ‘iġibu skużi’ biex ma jaċċettawx responsabbiltajiet mogħtijin minn Alla tapplika wkoll għall-​Kristjani llum. Aħna nagħrfu l-​bżonn li nkunu determinati li qatt ma nieħdu r-​responsabbiltajiet Kristjani tagħna ħafif ħafif jew li nħallu ż-​żelu tagħna għas-​servizz t’Alla jmajna. (Ebr. 10:39) Wara kollox, li nagħtu servizz sagru hu kwistjoni taʼ ħajja jew mewt.—1 Tim. 4:16.

7, 8. (a) X’se jgħinna nkomplu nkunu żelużi għas-​servizz t’Alla? (b) Jekk tlifna xi ftit miż-​żelu li kellna fil-​bidu, x’għandna niftakru dwar Ġeħova u Ġesù?

⁷ X’se jgħinna noqogħdu attenti li ma nġibux skużi biex ma nwettqux l-​obbligi tagħna lejn Alla? Mod importanti kif negħlbu din it-​tendenza hu billi nimmeditaw regolarment fuq it-​tifsir tal-​wegħda tad-​dedikazzjoni tagħna. Fi ftit kliem, aħna wegħedna lil Ġeħova li se npoġġu r-​rieda tiegħu l-​ewwel u qabel kollox f’ħajjitna, u aħna rridu nżommu din il-​wegħda. (Aqra Mattew 16:24.) Għalhekk, kultant ikun hemm bżonn li nieqfu u nistaqsu lilna nfusna: ‘Għadni nħossni determinat li ngħix skont id-​dedikazzjoni tiegħi lil Alla daqskemm kont meta  tgħammidt? Jew inkella tul is-​snin tlift xi ftit miż-​żelu li kelli?’

⁸ Jekk wara li neżaminaw lilna nfusna b’mod onest insibu li naqqasna xi ftit il-​pass, nagħmlu tajjeb li niftakru fil-​kliem inkuraġġanti li qal il-​profeta Sofonija. Hu qal: “Ħa ma jintelqux idejk. Ġeħova Alla tiegħek qiegħed f’nofsok. Bħala Wieħed setgħan, hu se jagħtik salvazzjoni. Se jithenna minħabba fik b’ferħ kbir.” (Sof. 3:16, 17) Dan il-​kliem rassiguranti l-​ewwel applika għall-​Israelin tal-​qedem li mill-​jasar f’Babilonja marru lura lejn Ġerusalemm. Madankollu, din l-​assiguranza għadha tapplika għan-​nies t’Alla llum. Peress li x-​xogħol li nagħmlu hu x-​xogħol taʼ Ġeħova, irridu nżommu f’moħħna li kemm Ġeħova u kemm Ibnu qed jappoġġawna u jsaħħuna biex inwettqu bis-​sħiħ ir-​responsabbiltajiet mogħtijin minn Alla. (Mt. 28:20; Flp. 4:13) Jekk nistinkaw biex nibqgħu nagħmlu x-​xogħol t’Alla biż-​żelu, hu se jberikna u se jgħinna nkomplu nagħmlu progress spiritwali.

‘Fittex l-​Ewwel is-​Saltna’ biż-​Żelu

9, 10. X’inhu l-​qofol tal-​parabbola taʼ Ġesù dwar l-​ikla kbira taʼ filgħaxija u x’tagħlima nistgħu nisiltu minnha?

⁹ Waqt ikla fid-​dar taʼ ħakkiem Fariżew, Ġesù ta tixbiha dwar ikla kbira taʼ filgħaxija. F’din it-​tixbiha hu ddeskriva l-​opportunità li ġiet offruta lil uħud differenti sabiex jingħataw is-​Saltna tas-​smewwiet. Hu wera wkoll xi jfisser li wieħed ‘iġib skużi.’ (Aqra Luqa 14:16-​21.) Il-​mistidnin fit-​tixbiha taʼ Ġesù ġabu skużi biex ma jmorrux il-​festa. Wieħed qal li kellu jmur jara l-​għalqa li kien għadu kemm xtara. Ieħor qal li xtara xi barrin u ried jipprovahom. Jerġaʼ ieħor qal: ‘Ma nistax niġi. Għadni kif iżżewwiġt.’ Dawn kienu skużi banali. Xi ħadd li jixtri għalqa jew xi bhejjem normalment jipprovahom qabel ma jixtrihom u mhux wara, u b’hekk ma jkunx hemm xi urġenza kbira biex jipprovahom. U għaliex għandu wieħed li jkun għadu kif iżżewweġ joqgħod lura milli jaċċetta stedina importanti bħal din? Mhux taʼ b’xejn li dak li stieden kien mgħaddab!

¹⁰ In-​nies t’Alla kollha jistgħu jieħdu tagħlima mill-​parabbola taʼ Ġesù. X’inhi din it-​tagħlima? M’għandna qatt inħallu l-​affarijiet persunali, bħal dawk li ssemmew fit-​tixbiha taʼ Ġesù, isiru tant importanti għalina li nibdew inġibuhom qabel is-​servizz tagħna lil Alla. Jekk Kristjan ma jżommx l-​affarijiet persunali fil-​post li għandu jkollhom fil-​ħajja, iż-​żelu tiegħu fil-​ministeru se jmajna bil-​mod il-​mod. (Aqra Luqa 8:14.) Biex nevitaw li dan jiġri, aħna ngħixu bit-​twissija taʼ Ġesù f’moħħna: “Mela, ibqgħu fittxu l-​ewwel is-​saltna u s-​sewwa tiegħu.” (Mt. 6:33) Kemm hu inkuraġġanti meta tara li l-​qaddejja t’Alla—kemm żgħar u kemm kbar—qed japplikaw dan il-​parir vitali! Fil-​fatt, ħafna għamlu bidliet biex jissimplifikaw l-​istil taʼ ħajja tagħhom sabiex ikunu jistgħu jqattgħu iktar ħin fil-​ministeru. Huma jitgħallmu mill-​esperjenza tagħhom stess li meta jibqgħu jfittxu l-​ewwel is-​saltna biż-​żelu, iħossu ferħ veru u sodisfazzjon kbir.

11. Liema rakkont Bibliku jenfasizza l-​importanza li naqdu lil Alla biż-​żelu u b’qalbna kollha?

¹¹ Ejja nagħtu ħarsa lejn ġrajja li seħħet fil-​ħajja tas-​Sultan Ġeħogħas taʼ Israel. Din tenfasizza l-​importanza li nkunu żelużi fis-​servizz t’Alla. Konċernat dwar dak li deher li kien se jiġri lil Israel f’idejn is-​Sirja, Ġeħogħas mar jibki għand Eliżew. Il-​profeta qallu biex mit-​tieqa jispara vleġġa lejn is-​Sirja, u dan kien ifisser rebħa permezz taʼ id Ġeħova kontra dan il-​ġens. Ċertament dan kellu jinkuraġġixxi lis-​sultan. Eliżew imbagħad qal lil Ġeħogħas biex jieħu l-​vleġeġ u jidrob l-​art bihom. Ġeħogħas darab l-​art tliet darbiet. Minħabba f’hekk, Eliżew kien  mgħaddab għaliex li Ġeħogħas jidrob l-​art ħames jew sitt darbiet kien se jfisser li ‘jidrob lis-​Sirja sa ma jtemmha.’ Issa Ġeħogħas kien se jkollu biss tliet rebħiet parzjali. Minħabba li aġixxa b’nuqqas taʼ żelu, Ġeħogħas ma kellux suċċess għalkollox. (2 Slat. 13:14-​19) Liema lezzjoni nistgħu nitgħallmu minn dan ir-​rakkont? Ġeħova se jberikna bil-​kbir biss jekk aħna nagħmlu x-​xogħol tiegħu b’qalbna kollha u biż-​żelu.

12. (a) X’se jgħinna nibqgħu żelużi fis-​servizz t’Alla hekk kif niffaċċjaw l-​isfidi tal-​ħajja? (b) Spjega kif qed tibbenefika mill-​fatt li tkun bieżel fil-​ministeru.

¹² Iż-​żelu u d-​devozzjoni tagħna għas-​servizz t’Alla jiġu mġarrbin mill-​isfidi tal-​ħajja. Ħafna aħwa qegħdin jiffaċċjaw ċirkustanzi ekonomiċi li huma taʼ sfida. Oħrajn jinsabu frustrati minħabba li xi marda serja tillimita dak li jistgħu jagħmlu fis-​servizz taʼ Ġeħova. Xorta waħda, kull wieħed u waħda minna jistaʼ jieħu passi biex ikun ċert li jibqaʼ żeluż u li jkompli jimxi bis-​sħiħ wara l-​Kristu. Jekk jogħġbok innota xi ftit mis-​suġġerimenti u mill-​iskritturi mniżżlin fil-​kaxxa “X’Se Jgħinek Tkompli Timxi Wara l-​Kristu?” Ara kif tistaʼ tapplikahom bis-​sħiħ. Jekk tagħmel dan, se taħsad benefiċċji veri. Jekk inkunu beżlin fil-​ministeru jkollna stabbiltà f’ħajjitna, ħajja iktar pjaċevoli, u paċi u ferħ akbar. (1 Kor. 15:58) Iktar minn hekk, jekk nagħmlu s-​servizz t’Alla b’ruħna kollha, niġu megħjunin ‘inżommu dejjem f’moħħna l-​preżenza tal-​jum taʼ Ġeħova.’—2 Pt. 3:12.

Analizza b’Onestà ċ-​Ċirkustanzi Tiegħek

13. Kif nistgħu nkunu nafu xi jfisser għalina personalment is-​servizz t’Alla b’ruħna kollha?

¹³ Madankollu, tajjeb niftakru li s-​servizz t’Alla li nagħmlu b’ruħna kollha mhuwiex biss kwistjoni taʼ kemm inqattgħu ħin fil-​ministeru. Iċ-​ċirkustanzi taʼ kulħadd huma differenti. Individwu li jqattaʼ biss madwar siegħa jew tnejn fil-​ministeru kull xahar jistaʼ jogħġob ħafna lil Ġeħova, jekk dan huwa tassew dak kollu li saħħtu tippermettilu jagħmel. (Qabbel Marku 12:41-​44.) Għalhekk, sabiex inkunu nafu xi jfisser għalina personalment is-​servizz t’Alla b’ruħna kollha, jeħtieġ nanalizzaw b’onestà ċ-​ċirkustanzi u l-​abbiltajiet tagħna. Bħala segwaċi taʼ Kristu  rridu wkoll inġibu l-​ħarsa tagħna fi qbil mal-​ħarsa tiegħu. (Aqra Rumani 15:5; 1 Kor. 2:16) Ġesù x’poġġa l-​ewwel f’ħajtu? Hu qal lill-​folol f’Kafarnahum: “Irrid inxandar l-​aħbar tajba tas-​saltna t’Alla . . . , għax għal dan intbgħatt.” (Lq. 4:43; Ġw. 18:37) Żomm f’moħħok kemm Ġesù kien żeluż fil-​ministeru u mbagħad evalwa ċ-​ċirkustanzi tiegħek biex tara jekk tistax tespandi l-​ministeru.—1 Kor. 11:1.

14. B’liema modi nistgħu nespandu l-​ministeru tagħna?

¹⁴ Jekk inqisu bis-​serjetà ċ-​ċirkustanzi tagħna, għandna mnejn naslu għall-​konklużjoni li nistgħu nqattgħu iżjed ħin fil-​ministeru. (Mt. 9:37, 38) Pereżempju, bosta eluf taʼ żgħażagħ fostna li għadhom kif spiċċaw l-​iskola espandew il-​ministeru tagħhom, u issa qed jesperjenzaw il-​ferħ li jiġi meta wieħed jaqdi biż-​żelu bħala pijunier. Tixtieq tesperjenza dan il-​ferħ int ukoll? Xi aħwa eżaminaw iċ-​ċirkustanzi tagħhom u ddeċidew li setgħu jmorru jgħixu f’xi nħawi oħrajn f’pajjiżhom stess, jew saħansitra barra minn pajjiżhom fejn il-​bżonn għal pubblikaturi tas-​Saltna hu akbar. Jerġaʼ oħrajn tgħallmu lingwa oħra biex jgħinu lil uħud li jitkellmu b’lingwa barranija. Waqt li jistaʼ jkun taʼ sfida li nespandu l-​ministeru tagħna, dan iġib barkiet kbar u nistgħu ngħinu lil ħafna oħrajn “jaslu għall-​għarfien eżatt dwar il-​verità.”—1 Tim. 2:3, 4; 2 Kor. 9:6.

Eżempji Bibliċi taʼ Min Isegwihom

15, 16. Liema eżempji taʼ wħud li kienu segwaċi żelużi taʼ Kristu nistgħu nimitaw?

¹⁵ Xi wħud li saru appostli kif irreaġixxew meta Kristu sejħilhom biex ikunu segwaċi tiegħu? Dwar Mattew, ir-​rakkont jgħid: “Telaq kollox, qam, u mar warajh.” (Lq. 5:27, 28) Dwar Pietru u Indrì li kienu qed jistadu, naqraw: “Mill-​ewwel abbandunaw ix-​xbieki, u marru warajh.” Imbagħad, Ġesù ra lil Ġakbu u lil Ġwanni li kienu qed isewwu x-​xbieki tagħhom flimkien ma’ missierhom. Kif irreaġixxew għall-​istedina taʼ Ġesù? “Minnufih telqu d-​dgħajsa u lil missierhom, u marru warajh.”—Mt. 4:18-​22.

¹⁶ Eżempju ieħor mill-​aqwa hu dak taʼ Sawl li iktar tard sar l-​appostlu Pawlu. Għalkemm kien persekutur fanatiku tas-​segwaċi taʼ Kristu, hu biddel ħajtu u sar “strument magħżul” biex iġorr isem Kristu. “Minnufih [Pawlu] beda jippriedka fis-​sinagogi dwar Ġesù, li Dan hu l-​Iben t’Alla.” (Atti 9:3-​22) Avolja kellu jissaporti ħafna tbatijiet u persekuzzjonijiet, Pawlu qatt ma tilef iż-​żelu tiegħu.—2 Kor. 11:23-​29; 12:15.

17. (a) X’inhi x-​xewqa tiegħek rigward li timxi wara l-​Kristu?(b) Liema barkiet ingawdu hekk kif nagħmlu r-​rieda taʼ Ġeħova b’qalbna u b’saħħitna kollha?

¹⁷ Ċertament irridu nimitaw l-​eżempji mill-​aqwa taʼ dawn id-​dixxipli u naġixxu bil-​ħerqa u bla ma noqogħdu naħsbuha darbtejn. (Ebr. 6:11, 12) Liema barkiet se ngawdu hekk kif nitħabtu biex insegwu lil Kristu bis-​sħiħ u biż-​żelu? Se jkollna ferħ ġenwin meta nagħmlu r-​rieda t’Alla u se nesperjenzaw is-​sodisfazzjon li jiġi meta naċċettaw iżjed privileġġi taʼ servizz u responsabbiltajiet fil-​kongregazzjoni. (Salm 40:8; aqra l-​1 Tessalonikin 4:1.) Hekk kif nistinkaw bil-​ħeġġa biex nimxu wara l-​Kristu, se ngawdu barkiet kbar u dejjiema bħalma huma l-​paċi tal-​moħħ, is-​sodisfazzjon, il-​kuntentizza, l-​approvazzjoni t’Alla, u l-​prospett taʼ ħajja taʼ dejjem.—1 Tim. 4:10.

Tiftakar Int?

• Liema xogħol importanti ngħatajna, u kif għandna nqisuh?

• Għal liema tendenza umana għandna noqogħdu għassa, u għala?

• X’għandna nanalizzaw b’onestà?

• X’se jgħinna nibqgħu nimxu wara l-​Kristu?

[Mistoqsijiet taʼ Studju]

[Kaxxa/Stampa f’paġna 27]

X’Se Jgħinek Tkompli Timxi Wara l-​Kristu?

▪ Aqra l-​Kelma t’Alla kuljum u immedita fuq dak li taqra.—Salm 1:1-​3; 1 Tim. 4:15.

▪ Itlob spiss għall-​appoġġ u l-​gwida tal-​ispirtu t’Alla.—Żak. 4:6; Lq. 11:9, 13.

▪ Assoċja ma’ dawk li juru żelu mill-​qalb għall-​ministeru.—Prov. 13:20; Ebr. 10:24, 25.

▪ Agħraf l-​urġenza taż-​żminijiet li qed ngħixu fihom.—Efes. 5:15, 16.

▪ Kun konxju tal-​konsegwenzi serji li hemm meta wieħed ‘iġib skużi.’—Lq. 9:59-​62.

▪ Irrifletti regolarment fuq il-​wegħda tad-​dedikazzjoni tiegħek u l-​barkiet abbundanti li jiġu meta taqdi lil Ġeħova u meta timxi wara l-​Kristu b’qalbek kollha.—Salm 116:12-​14; 133:3; Prov. 10:22.