¿Cristuta qatikantsikku?

“Yachacuyarqonquim noqacunapita Teyta Dios munashqanno cawaquita. Y tsenonam cawaquicayanqui.” (1 TES. 4:1.)

1, 2. a) ¿Jesuspa tiemponchö kawaqkuna imakunatataq rikäyarqan? b) ¿Imanirtaq noqantsikpis huk shumaq tiempochö kawantsik?

¿IMËLLAPIS yarparqunkiku Jesus kawanqan witsan Israelchö kawakï alläpa shumaq kanqanman? ¿Imanirtaq reqita munankiman karqan Jesusta? Itsachi qeshyëkipita kachakätsishunëkipaq. O itsa yachatsikunqankunata wiyanëkipaq o milagro ruranqanta rikänëkipaq (Mar. 4:1, 2; Luc. 5:3-9; 9:11). ¡Ima shumaqraq kanman karqan tsëchö këkar ruranqankunata rikëqa!  (Luc. 19:37.) Tsë tiempochö kawaqkunallam rikäyarqan, y hukkunaqa manam rikäyarqannatsu. Y “llapan nunapa jutsan perdonashqa cananpaq yawarninta ramar” wanunqanwanqa manam imapis igualantsu. ¡Alläpa valoryoqmi! (Heb. 9:26; Juan 14:19.)

² Pero noqantsik kawanqantsik tiempopis alläpa shumaqmi. ‘Ushanan tiempokuna’ nishpa Biblia qayanqanchömi kawëkantsik (Dan. 12:1-4, 9; 2 Tim. 3:1, QKW). Satanasmi ciëlopita qarpakämushqa y ichik tiempollatanam cadënawan watarkur hatun uchkuman hitarkuyanqa (Apo. 12:7-9, 12; 20:1-3 QKW). Hinamampis huk shumaq rurëta ruranapaqmi mandamarquntsik, y kë rurënöqa manam yapë rurakanqanatsu; “Diospa mandaquininman [y shumaq patsaman] yecuyänanpaq jinantin nasioncunacho” willakunapaqmi mandamarquntsik (Mat. 24:14).

3. a) ¿Ciëlota manaraq kutikur imata rurayänampaqtaq Jesus nirqan qateqninkunata? b) ¿Y mëyaq yachatsikuyänampaqtaq nirqan?

³ Ciëlota kutikunan këkaptinnam qateqninkunata Jesus kënö nirqan: “Noqa rurashqäcunata willacurnin, puriyanqui Jerusalencho, Judeacho, Samaria marcacunacho; y jinantin munduyaq[...] chäratsiyanqui” (Hech. 1:8). Këchö ninqankunam rikätsimantsik hinantin Patsaman kë willakï chänanta. ¿Imapaqtaq këta rurayänan karqan? Ushakë manaraq chämuptin Jesuspa qateqninman nunakuna tikrayänampaqmi (Mat. 28:19, 20). ¿Imatataq ruranantsik kë mandamanqantsikta cumplinapaq?

4. a) ¿Imatataq rikätsimantsik 2 Pedru 3:11, 12 texto? b) ¿Imaman ishkïpitataq cuidakunantsik?

⁴ Këchö apóstol Pedru ninqantam wiyakunantsik: ‘¿Manacu Dios Yaya munangannö llapan imaycatapis allillata rurarnin jutsannag shumag cawacuyanquiman, Dios Yayapa junagnin mas sas [ras] chämunanta shuyararnin?’ (2 Ped. 3:11, 12, NTCN). Këmi rikätsimantsik kë ushanan tiempokunachöqa mäkoq mäkoqllana këkänata y shonqupita patsë llapan puëdenqantsikman Diospita yachatsikurnin këkänata. ¡Alläpam kushikuntsik Jesus mandakunqanta wiyakurnin hinantin Patsachö cristiano mayintsikkuna yachatsikuyanqanta rikarnin! Pero tsënö kaptimpis, musyantsikmi Satanaspa mundon y hutsasapa kënintsik imëka yarpachakïman churamanqantsikta, y këqa manam Jesus ruranqanta kushishqa qatinata permitimashwantsu. ¿Imatataq rurashwan tsënö mana pasamänapaq?

Ruranapaq kaqta kushishqa rurashun

5, 6. a) ¿Ima kushikïpaqtataq Jerusalenchö cristiänokunata Pablu nirqan, pero imatataq yarpätsirqan? b) ¿Imanirtaq Dios mandamanqantsikkunata ichikllapaq churashwantsu?

⁵ Hebreus cartanchömi, apóstol Pablu Jerusalenchö këkaq cristiänokunata mana allikunata pasëkarpis tsarakuyanqampita kënö nirqan: “Yarpäyë Teyta Jesucristuman creyicuriyanqequi witsan imanö sufriyanqequitapis. Tse witsan imecata ñacarpis, manam ichicllapis qelanäriyarqequitsu”. Jehoväqa manam imëpis qonqanqatsu tsarakuyanqanta (Heb. 6:10; 10:32-34). Apóstol Pablu kënö niptin imaraq kushikïkuyarqan kë cristiänokuna. Tsënö nirpis, tsë cartallachömi willarqan, mana yachatsikuyänanrëkur imëkakunata nir mana tsapäkuyänampaq. Y Diosta wiyakï alläpa preciso kanqanta yarpätsirmi kënö nirqan: “Diosnintsic parlapämanqantsicta cäsucushun” (Heb. 12:25).

⁶ Kë ninqanqa unë tiempochönöllam kanampis alläpa preciso. Diosnintsik mandamanqantsikta rurëta mana munarllaqa manam këtam waktam ruranä nirninqa tsarakushwantsu. Diosnintsik mandamanqantsiktaqa manam ichikllapaq churanantsiktsu, ni mana nirëkarqa ruranantsiktsu  (Heb. 10:39, QKW). Yarpänantsikmi nunakuna salvakuyänampaq yanapë alläpa precisanqanta (1 Tim. 4:16).

7, 8. a) ¿Imata ruranqantsiktaq yanapamäshun Diosnintsikta kushishqa servinapaq? b) ¿Pikunataq yanapamäshun rurënintsikkunata cumplinapaq?

⁷ ¿Imaraq yanapamäshun Dios mandamanqantsikta mana cumplinarëkur imatapis mana ninapaq? Puntataqa, Jehoväta awninqantsikkunatam yarpänantsik. Awmi, Diostam awnirquntsik pëpa munënintaraq kawënintsikchö puntaman churanapaq, y awninqantsiknömi rurëta munantsik (lei Mateo 16:24). Tsëmi këta tapukunantsik: “¿Bautizakunqä hunaqnöllaku kanampis listo këkä Diosta awninqäta ruranäpaq? ¿O watakuna pasanqanmannöku awnikunqäta cumplïkätsu?”.

⁸ Kënö tapukurnin qepëkanqantsikta mäkurirqa, profeta Sofonías kënö ninqanta yarpäshun: “Ama alläpaqa llakikïtsu, Jehová Diosnikim qamwan këkan. Alläpa kallpayoq këninwanmi salvashunki. Y qamrëkurmi pasëpa kushikunqa” (Sof. 3:16, 17). Qallananchöqa këta awnirqan Babiloniachö esclavo kayanqampita kutimoq israelïtakunata. Pero kë awnikïqa noqantsikpaqwanmi. Yachatsikunapaq Jehová mandamashqam kikin y Tsurin yanapamantsik; pëkunam kallpata qomantsik llapan mandamanqantsikta kushishqa cumplinapaq (Mat. 28:20; Fili. 4:13). Shonqupita patsë rurashqaqa, Diosnintsik yanapamäshunmi más poqu cristiano tikranapaq.

Listo këkäshun ‘Diospa mandaquininta’ puntaman churanapaq

9, 10. ¿Imatataq yachatsikïkarqan Jesus hatun mikïpaq parlarnin, y noqantsikta imatataq yachatsimantsik?

⁹ Fariseokunapa mandaqnimpa wayinchö mikïkarmi, Jesus willakurqan huk nuna hatun mikïman invitakunqanta, tsë willakïwanmi rikätsikurqan tukïläya nunakuna Diospa gobiernonman yëkuyänampaq kaqta. Y nunakuna imatapis mana rurëta munar tukïta niyanqantapis rikätsikurqanmi (lei Lucas 14:16-21). Tsë hatun mikïman mana ëwayänanrëkurmi invitädokuna tukïta niyarqan: huk kaqmi nirqan, chakratam tsëraq rantirirqö, tsëmi rikaq ëwanä, hukninnam nirqan, yuntakunatam rantirirqö tsëmi rikaq ëwanä, huk kaqnam nirqan, tsëllaran casakurirqö, tsëmi shamïta puëdëtsu. ¡Këmi ulikï o llullakuyqa! Pipis huk chakrata o animalta rantinampaqqa, alliran rikapan. Tsëpenqa, ¿rikapänan precisarqantsuraq? ¿Y tsëraq casakurishqakunaqa, manatsuraq huk precisaq invitacionman ëwariyanman? ¡Rasuntachi mikïman convidakoq nunaqa piñakurqan!

¹⁰ Kë willakïqa noqantsiktapis yachatsimantsikmi, kikintsikpa munënintsikkuna Jehoväta servinata mana tsaparämänapaq. Kikintsikpa kaqllaman yarparäkushqaqa, Diosta kuyanqantsikmi ichikllapa ichikllapa ushakärinman (lei Lucas 8:14). Tsënö mana kanampaqmi Jesus kënö mandakunqanta imëpis wiyakunantsik: “Diospa mandaquinincho cawaquillatana, y pe munashqanno allicunata rurellatana tirayë” (Mat. 6:33). ¡Imanömi kushikuntsik tukïläya edäyoq cristiänokuna Jesus ninqanta wiyakoqta rikar! Wakin cristiänokunanäqa, más yachatsikuyänanrëkurmi wallka cösaskunallawanna kawakuyan. Tsënöpam rikäyashqa Diospa kaqta puntaman churë alläpa kushikïpaq kanqanta.

11. ¿Ima willakïtaq yachatsimantsik Diosta shonqupita patsë servi alläpa preciso kanqanta?

¹¹ Jehoväta shonqupita patsë servi alläpa preciso kanqanta maslla tanteanapaqqa, rikärishun Israelpa reynin Jehoás ruranqanta. Gobiernon, Siria nacionpa makinman ishkinampaq këkaptinmi, Eliseo kaqta ëwëkur yanapëkunampaq waqarëkar rogakurqan. Tsëmi profëtaqa, Siria markaman  apuntëkur huk ventanapita flëchëkunampaq nirqan. Tsëwanmi rikätsirqan Jehová yanapaptin chikeqninkunata vencinampaq kaqta. Këta musyarirqa alläpachi kushikunman karqan. Pero ¿tsënöku karqan? Manam. Tsë wakin kaq flëchakunawan patsata wilunampaq Eliseo niriptinmi, mana nirashpa kima kutilla patsata wilurirqan. Kënö ruranqanqa profëtata piñatsirqanmi, Siria markata chipyëpa ushakätsinampaqqa, atska kutim patsata wilunan karqan. Mana munëkar wilunqampitam, chipyëpaqa ushakätsirqantsu, sinöqa kima kutillam wakin wakinllata ushakätsirqan (2 Rey. 13:12-20). ¿Imatataq këwan yachakuntsik? Jehová yanapamänantsikta munarqa, llapan kallpantsikwanmi mandamanqantsikta ruranantsik.

12. a) ¿Imatataq rurashwan kushi kushilla Diosta servinapaq? b) ¿Imanötaq yanapashurqunki yachatsikïchö alli tsarakunqëki?

¹² Kawënintsikchö tukï hipanqantsikkunam yanapamantsik Jehoväta rasumpa kuyanqantsikta rikätsikunapaq. Atska cristiänokunam qellëninkuna pishiptin hipayan. Wakinkunanam qeshyapäkurnin, munayanqannöqa Jehoväta servita puëdeyantsu. Tsënö kaptimpis, imëkanöllapapis Cristu ruranqantaqa qatishwanmi. Tsëpaqmi yanapamäshun “Cristuta qatinapaq yanapakïkuna” nishqan recuadrom, y leinqantsikman yarparashqaqa kawënintsikchö yanapamäshunmi. Imëpis Diospita yachatsikïkarqa allim tsarakushun, hina alli kawakïta, kushikïta y yamë këtam tarishun (1 Cor. 15:58, QKW). Hinamampis, mäkoq mäkoqllam “Dyospa shamïnin junaqta” shuyaräshun (2 Ped. 3:12, QKW).

Imanö këkanqantsiktapis rikäkushun

13. ¿Imanötaq musyashwan Diosta llapan kawënintsikwan servikanqantsikta?

¹³ Kuyakïnintsiktaqa manam atska hora yachatsikur-raqtsu rikätsikuntsik. Ëka hörapis Jehoväta servinqantsikqa cada cristiänopitam. Tsëmi ishkë kima höralla willapäkoqkunapis Jehoväta kushitsiyan, tsëta rurayänanllapaq saludnin permitiptin (rikäri Marcos 12:41-44 ninqanta). Tsëmi cada cristiano tiemponta o saludninta shumaq rikanman, Jehoväta shonqupita patsë imanö  servikanqantapis musyanampaq. Hinamampis Jesuspa qateqnin karninmi, Jesus ruranqanta qatita munantsik (lei Romanos 15:5; 1 Cor. 2:16). ¿Jesuspaq imataq más precisaq karqan? Kikinmi tsëtaqa willakurqan Capernaum markachö täraq nunakunata kënö nirnin: “Jinantin marcacunachomi alli willaquita yachatsicunä presisan. Que patsamanmi Dios cachamashqa, pepa mandaquinincho nunacuna imano cayänanpaq canqanta willacunäpaq” (Luc. 4:43; Juan 18:37). Jesus imanö yachatsikunqanta yarparqa, rikäkushunmi imanöpis masta ruranapaq kaqta (1 Cor. 11:1).

14. ¿Imatataq rurashwan Jehoväpita más yachatsikunapaq?

¹⁴ Ruranqantsikta rikanqantsikqa, itsa yanaparamashwan Jehoväpita más willakunantsikpaq (Mat. 9:37, 38). Tsënömi rurayashqa atska waranqa jövenkuna estudionkunata usharir, y kananqa kushishqam precursornö serviyan. ¿Pëkunanö kushishqa këta munankiku? Atskaq cristiänokunam Jehoväpita yachatsikïta wanayanqan markakunaman ëwayan, nacionninman o huk nacionkunamampis, wakinkunanam yachatsikuyanqan sitiochö huk idioma parlaqkunata yachatsiyänampaq huk idiömata yachakuyashqa. Jehová Diospita más yachatsikunapaq sinchikïqa sasam o ajam, pero atska bendicionkunatam tarintsik, y huk kaq bendicionmi “rasonpa caq yachatsiquicunata musyayäna[mpaq]” yanapakï (1 Tim. 2:3, 4; 2 Cor. 9:6).

Bibliachö parlanqan nunakunapita yachakushun

15, 16. Willakarami, ¿pikunataq Jesusta kuyakïwan qatiyarqan?

¹⁵ Jesuspa wakin qateqninkunaman yarpärishun. ¿Imatataq rurayarqan qateqninkuna kayänampaq Jesus invitaptin? Matëuqa “sharcur[mi], llapanta jaqirïcur, Jesuswan eucorqan” (Luc. 5:27, 28). Pescädota tsareq Pëdruwan Andresnam, tsë hora “atarayancunata jaqiricur, Jesusta qatircur eucuyarqan”. Santiäguwan Juannam, teytanwan atarräyata remendëkäyanqampita “tse öra papänin Zebedeuta lanchatawan jaqiricur, Jesusta qatircur eucuyarqan” (Mat. 4:18-22).

¹⁶ Saulowampis tsënöllam pasarqan. Unë cristiänokunata ushakätsita munar qatikachëkarnimpis, Jesuspita yachatsikunampaqmi ‘acrashqa’ karqan. Bibliam kënö nimantsik: “Qallaquicorqan willacurnin Teyta Jesus Diospa tsurin cashqanta ellucayänan wayicunacho” (Hech. 9:3-22). Y tukïta pasëkarnin y chikir qatikachäyaptimpis, kushishqallam Jehoväpita yachatsikurqan (2 Cor. 11:23-29; 12:15).

17. a) ¿Imatataq rurëta munanki Cristuta más alli qatinëkipaq? b) ¿Ima bendicionkunatataq chaskishun Diospa munëninta llapan kawënintsikwan rurarqa?

¹⁷ Llapantsikchi kë cristiänokuna rurayanqanta qatirnin Jesus invitamanqantsikta kushishqa chaskikïta munantsik (Heb. 6:11, 12). ¿Ima bendicionkunatataq chaskishun Jesusta qatirqa? Jehová munanqanta rurarmi, más kushishqa kashun y congregacionchö rurëkanqantsikkunapitapis mastam rurashun (Sal. 40:8; lei 1 Tesalonicenses 4:1). Llapan kawënintsikwan Cristuta qatirninqa, chaskishun yamë kawakïta, kushikïta, Diospa kuyakïninta y mana wanushpa kawakïtam (1 Tim. 4:10).

¿Yarpankiku?

• ¿Imata ruranapaqtaq Jehová mandamashqantsik y imanötaq chaskikuntsik?

• ¿Imanirtaq imatapis mana ruranantsikrëkur tukïta nishwantsu?

• ¿Imataq yanapamäshun Cristuta alli qatinapaq?

[Yachakunapaq kaqpa tapukïninkuna]

[29 kaq päginachö dibüju y recuadru]

Cristuta qatinapaq yanapakïkuna

▪ Llapan hunaq Diospa Palabranta lei y leenqëkiman yarparë (Sal. 1:1-3; 1 Tim. 4:15).

▪ Imëpis Diospa yanapakïninta y santo espïritunta mañakï (Zac. 4:6; Luc. 11:9, 13).

▪ Diosta serviyänampaq sinchikoqkunapa amïgon këta tïrë (Pro. 13:20; Heb. 10:24, 25).

▪ Ushanan tiempochö kawanqantsikta käyi o mayë (Efe. 5:15, 16).

▪ Dios mandamanqantsikta mana ruranarëkur tukïta ninqantsik mana alli kanqanta yarpë (Luc. 9:59-62).

▪ Jehoväta awninqantsikta yarpë, hina Pëta servinqantsikrëkur y Cristuta qatinqantsikrëkur bendicionkunata chaskinantsikmampis yarpë (Sal. 116:12-14; 133:3; Pro. 10:22).