¿Tukuy sonqomantachu Cristota qatikuchkanchik?

‘Chaynatamá kawsachkankichik, [. . .] aswan mastaraq chaynata kawsaychik.’ (1 TES. 4:1.)

1, 2. a) ¿Ima admirakuypaq kaqkunatam Jesuspa tiemponpi runakuna qawarqaku? b) ¿Imanasqataq kay tiempopas chayna admirakunapaq?

¿HAYKAPIPAS piensarqankichu Jesuspa tiemponpi kawsaspayki Israel llaqtapi tarikuyta? Ichapas munawaq karqa ñakarichisuqniki onqoymanta hampisunaykita. Otaq nisqankunata uyariyta chaynapi yachachisunaykipaq chaynataq milagronkuna rurasqanta qawanaykipaqpas (Mar. 4:1, 2; Luc. 5:3-9; 9:11). ¡Mayna allinchá kanman karqa paywan tarikuyqa hinaspa rurasqankunata qawayqa! (Luc. 19:37.) Manam huk tiempopi kawsaq runakunaqa chaykunata rikurqakuchu. Jesuspa ‘wañusqanwan’ huchata chinkachisqanqa mana imawanpas tupachiy atinam (Heb. 9:26; Juan 14:19).

² Ñoqanchikpas tukuy imapa pasanan tiempopim kawsachkanchik. Bibliapa nisqanman hinam ‘tukupay tiempokunapi’  kachkanchik (Dan. 12:1-4, 9; 2 Tim. 3:1). Satanasmi hanaq pachamanta wischumusqa karqa hinaspa tiempo chayamuchkanña watasqa kananpaq chaynataq “uku pozoman” otaq qaqaman wischuchikunanpaqpas (Apo. 12:7-9, 12; 20:1-3). Chaymantapas favorecesqam kanchik haykapipas manaña rurakunan llamkayta ruranapaq: ‘Diospa munaychakusqanmanta kay allin noticiata’ hinaspa Paraisopi kawsakuy kananmanta enteron Pachapi willanapaq (Mat. 24:14).

3. a) ¿Imatam qatiqninkunata Jesus kamachirqa manaraq hanaq pachaman kutichkaspa? b) ¿Imatawan ruranankumantam kamachirqa?

³ Manaraq hanaq pachaman kutichkaspanmi qatiqninkunata Jesus kaynata nirqa: ‘Ñoqamantam willakunkichik Jerusalen llaqtapi, lliw Judea lawpi, Samaria lawpi hinaspa kay pachapa cantonkama’, nispa (Hech. 1:8). Chayna nisqanmi qawachirqa enteron Pachapi yachachiy apakunanmanta. ¿Imapaq? Manaraq puchukay tiempo chayamuchkaptin runakuna Jesuspa qatiqnin kanankupaqmi (Mat. 28:19, 20). ¿Imatam rurananchik chay kamachikuyta allinta cumplinanchikpaq?

4. a) ¿Imatam yachachiwanchik 2 Pedro 3:11, 12 nisqan? b) ¿Ima pasawananchiktam mana saqekunanchikchu?

⁴ Kasukunanchikmi Pedropa kayna nisqanta: ‘¡Mayna chuya sonqom Diosta servispa kawsanaykichik [Diospa punchawnin chayamunanta suyaspa]!’ (2 Ped. 3:11, 12.) Arí, kay tukupay tiempopim Diospa serviqninkunaqa qawan-qawanlla kananchik hinaspa tukuy sonqomanta ‘Diosta servinanchik’, chaytaqa rurachkanchikmi allin noticiamanta willakuspapas. ¡Kusikunchikmi Jesuspa kamachisqanta enteron Pachapi iñiqmasinchikkuna ganasllawanña rurasqankuta qawaspanchik! Ichaqa, yachanchikmi Satanaspa munaychakusqan mana allinkuna hinaspa pantaq kasqanchikpas sapa punchaw sasachawasqanchikta, chaykunam hukmanyachinman kusisqa predicasqanchikta chaynataq sonqomanta Jesusta tukuypi qatikunanchiktapas. ¿Imatam rurananchik mana chayna pasawananchikpaq?

Kusisqa cumplisun Dios servisqanchikpi rurayninchikkunata

5, 6. a) ¿Imanasqam Pablo alabarqa Jerusalenpi iñiqmasinkunata, hinaspa imayna mana kanankumantam nirqa? b) ¿Imanasqataq yanqallata hinaqa mana qawananchikchu Dios servisqanchikpi rurayninchikkunata?

⁵ Jerusalenpi kaq cristianokunaman Pablo qellqaspanmi, Hebreos libropi alabarqa tukuy tiempopi chaynataq qatikachasqa kaspankupas hinalla aguantasqankumanta. Nirqam: “Allin noticiawan kancharichisqa hina kasqaykichik punchawkunatayá yuyariychik. Chay punchawkunapiqa llumpayta ñakarispaykichikpas takyarqankichikmi”, nispa. Segurom kananku karqa Jehová Dios kasukusqankuta haykapipas mana qonqananmanta (Heb. 6:10; 10:32-34). Pablopa kuyakuywan nisqanqa kallpancharqachá Jerusalenpi cristianokunataqa. Chay cartasqallanpim Pablo qawachirqa, tukuy sonqonkumanta rurasqankuta imata nispapas mana saqenankupaq, runakunaqa rurayninchiktam mana cumplinchikmanchu imata nispapas. Diospa kamachisqanta kasukunankupaq yuyarichispanmi Pablo nirqa mana ‘qepanchakunankupaq’ otaq rurayninkuta imata nispapas mana saqenankupaq (Heb. 12:25).

⁶ Nisqanqa kunanpas ancha allinmi. Cristianokunaqa manam imata nispapas harkachikunachu Diospa kamachiwasqanchikkunata cumplinapaqqa. Chay ruraytaqa manam yanqallata hinaqa qawanachu nitaq kusikuywan servisqanchiktapas saqenachu (Heb. 10:39). Runakunapawan ñoqanchikpa vidanchikpas peligropim kachkan (1 Tim. 4:16).

7, 8. a) ¿Imataq yanapawasun Diosta kusisqallaña servinapaq? b) ¿Imatam mana qonqanachu Diosta serviy munasqanchik puntata hina manaña kaptin?

⁷ ¿Imataq yanapawasun imataña nispapas Diospaq rurananchikta mana saqerunapaq?  Puntataqa, Jehová Diosman qokuspanchik prometesqanchikpim yuyaymanana. Nirqanchikmi paypa munayninta ruray vidanchikpi puntapi kananta, chaytaqa cumpliytapunim munanchik (leey Mateo 16:24). Chaymi allin kanman kayna tapukuyqa: “¿Kallpanchasqachu kachkani bautizakusqay punchawpi hina Diosman prometekusqayta cumplinaypaq? Icha, ¿watakuna pasasqanman hinachu qonqachkani?”, nispa.

⁸ Sichum cuentata qokunchik puntata hina manaña rurasqanchikta, yuyarisun Diosmanta willakuq Sofoniaspa kayna nisqanta: “Amayá hukmanyaruychikchu [. . .]. Chawpikichikpim kachkan [. . .] Diosqa. Tukuy atiyniyoqmi payqa salvasunaykichikpaqqa. Qamkunaraykum llumpayta kusikunqa” (Sof. 3:16, 17). Chaynatam qallariyninpi nirqa Babiloniapi presochasqa kasqankumanta Jerusalenman kutimuq israelitakunata. Ichaqa hinallam kunanpas yanapawanchik. Manam qonqanachu munayninta ruranapaq Diospuni kamachiwasqanchikta, chaymi paypa chaynataq Churinpa yanapakuyninta chaskinchik, paykunam kallpata qowasun rurayninchikkunata cumplinanchikpaq (Mat. 28:20; Fili. 4:13, NM). Tukuy vidanchikwan servinapaq kallpanchakuptinchikqa, iñiyninchikpi ñawparinapaqmi bendeciwasun.

‘Puntata maskasun Diospa munaychakusqanta’

9, 10. ¿Imatam Jesus qawachirqa convido ruraq runawan rikchanachisqanpi, hinaspa imatam yachachiwanchik?

⁹ Fariseokunata kamachiqpa wasinpi mikuspanmi Jesus willarqa convido ruraqmanta huk rikchanachiyta, chaywanmi qawachirqa runakuna Diospa munaychakusqanpi kamachinankupaq invitasqa kasqankuta. Qawachirqataqmi runakuna imatapas rurayta mana munaspanku imayna disculpakusqankuta otaq imapas nisqankuta (leey Lucas 14:16-21). Rikchanachiypi invitasqa runakunam disculpakuyta qallaykurqaku: punta kaqmi nirqa rantisqan chakran qawaq rinanta, hukninñataq nirqa yunta rantisqan qawananta, hukninñataqmi nirqa chayraq casarakusqanrayku mana riy atisqanta. ¡Yanqakunawanmi harkachikurqaku! Chakrata otaq animalta rantiqkunaqa, manaraq rantichkaspankum chaytaqa qawanku. Hinaptinqa, ¿ima ruraytaq puntapi kanan karqa? ¿Manachu chayllaraq casarakuqpas chay allin invitacionman riyta atinman karqa? ¡Chayraykuchá convido rurachiq runaqa piñakurqa!

¹⁰ Kay rikchanachiymi hatun yachayta qowanchik: manam haykapipas Dios servisqanchikpi ruraykunamantaqa kikinchikpa rurayninchikkunataqa puntapi churanachu. Ñoqanchikpa kaqta puntapi churaptinchikqa, tukuy sonqowan servisqanchikmi chiriyarunman (leey Lucas 8:14). Mana chayna kananpaqmi kasukunanchik Jesuspa kayna kamachisqanta: ‘Puntataqa maskaychik Diospa munaychakusqantawan paypa munasqan allin rurayta’ (Mat. 6:33). ¡Maynatam kallpanchawanchik Jesuspa nisqanta hayka watayoq kaspankupas iñiqmasinchikkunapa kasukusqankuta qawayqa! Achkallañam manaña puntata hinachu tukuy imayoq kawsanku astawan predicanankupaq. Chaynapim cuentata qokunku Diospa Gobiernonta puntapi churasqankuwan ancha kusisqa kasqankuta.

11. ¿Ima willakuytaq qawachin tukuy kallpanchikwan Diosta serviy ancha allin kasqanta?

¹¹ Tukuy kallpawan Diosta serviy allin kasqanmanta entiendenapaqqa, qawasun Israelpi rey Joaspa vidanmanta. Israel tropakunam peligropi tarikurqa Aram nacionpa tropankuna vencerunanmanta, chaymi Eliseoman yanapananpaq rirqa weqe ñawintin. Eliseom Joasta kamachirqa Aram nacion lawman ventanamanta flechananpaq. Chayna rurasqanwanmi qawachichkarqa enemigonpa makinmanta Jehová Dios salvananta. Chayqa anchatam kallpanchanan karqa.  Ichaqa, ¿chaynachu karqa? Manam. Joasta flechankunawan pampata waqtananpaq Eliseo kamachiptinmi, kimsa kutillata waqtarqa. Chayna rurasqanwanmi Eliseo piñakururqa, 5 otaq 6 kutitam pampata waqtanan karqa ‘Aram nacionniyoq runakunata manaña chullallapas puchunankama wañuchinanpaqqa’. Mana ganasniyoq rurasqanraykum, Joasqa mana llapanpichu vencerqa aswanqa kimsa kutillapim (2 Rey. 13:14-19). ¿Imatam kay willakuyqa yachachiwanchik? Jehová Dios bendeciwananchikta munaspaqa, tukuy kallpanchikwanmi servinanchik.

12. a) ¿Imatam rurananchik tukuy sonqomanta rurasqanchikta sasachakuykuna mana chinkarachinanpaq? b) ¿Imaynatam yanapasunki Diospa munayninta sapa kuti rurasqayki?

¹² Sasachakuykunawanmi yachanchik tukuy sonqomanta Dios servisqanchikta otaq manapas. Achka iñiqmasinchikkunam qollqemanta sasachakunku. Hukkunañataq mana allin tarikunku otaq onqonkupas, chaymi sasachakunku munasqankuman hina Diosta mana servispanku. Chayna kaptinpas, atichwanmi tukuy sonqonchikmanta Cristota kusisqa qatikuytaqa. Chaypaqmi yanapawasun “Cristota tukuy sonqomanta qatikunapaq yanapakuykuna” niq recuadropi Bibliamanta yachachikuykuna, chayta leespam yuyaymanana imaynata kasukunapaq. Achkapim yanapawasun. Diospa munasqanta sapa kuti ruraspanchikqa allintam takyasun hinaspa kawsakusun, chaynataq hawkayaytawan kusikuyta tarisun (1 Cor. 15:58). Chaymantapas ‘Diospa punchawnin chayamunanta suyaspam’ kawsasunchik (2 Ped. 3:12).

Imayna tarikusqanchiktam qawakunanchik

13. ¿Imaynatam yachachwan tukuy vidanchikwan Diosta servisqanchikta?

¹³ Tukuy sonqomanta rurasqanchiktaqa manam hayka tiempota predicaspallachu qawachisun. Imayna tarikusqanchikqa manam chaynallachu. Huk iñiqmasinchik onqosqanrayku huk otaq iskay horallata killapi predicaspanpas, Jehová Diostaqa agradachkanmanmi (tupachiy Marcos 12:41-44). Chaymi sapakama qawakunanchik imayna tarikusqanchikta hinaspam tapukunanchik: “¿Tukuy kallpaywanchu Diosta servichkani icha manachu?”, nispa. Cristopa qatiqnin kasqanchikraykum paypa piensasqanman hina piensananchik (leey Romanos 15:5;  1 Cor. 2:16). ¿Imatam puntapi churarqa? Kikinmi willawanchik Capernaum runakunaman kaynata nisqanpi: “Diospa munaychakusqanmanta allin noticiataqa wakin llaqtakunapipas willakunaymi, chaypaqmi ñoqataqa kachamuwarqa” (Luc. 4:43; Juan 18:37). Tukuy sonqonwan Jesuspa servisqanmanta yachaspam, ñoqanchikpas tanteananchik Diosta servisqanchikpi astawan ruray atisqanchikpi otaq manapas (1 Cor. 11:1).

14. ¿Imaynatam astawan predicachwan?

¹⁴ Imayna tarikusqanchikta allinta qawakuspaqa, yaqachá kallpanchasqa tarikusun astawan predicanapaq (Mat. 9:37, 38). Chaynatam waranqantin mozo-sipaskuna ruranku estudiasqankuta tukuruspanku, kunanqa kusisqam servichkanku precursor kaspanku. ¿Munawaqchu paykuna hina kusikuyta? Wakinkum tantearunku nacionninkupi otaq huk nacionpipas predicaqkunapa aslla kasqan lawman rinankupaq, hukkunañataq kallpanchakunku huk idiomata yachanankupaq chaynapi predicasqanku lawpi chayna rimaq runakunata yanapanankupaq. Astawan predicayqa sasapaschá kanman ichaqa bendicionkunatam tarisun, ejemplopaq achka runakunamanmi ‘cheqap yachachikuyta reqsichisun’ (1 Tim. 2:3, 4; 2 Cor. 9:6).

Qatikunanchikpaq allin ejemplokuna

15, 16. ¿Pikunam tukuy sonqonkumanta Jesusta qatikurqaku?

¹⁵ Piensasun Jesuspa apostolnin kanankupaq runakuna imakunata rurasqankupi. ¿Imatam rurarqaku qatiqnin kanankupaq invitaptin? Mateom “tukuy imantapas saqeruspan paywan rirqa” (Luc. 5:27, 28). Pedrowan Andresmi challwaq karqaku, ichaqa ‘atarrayankuta saqeruspankum Jesuswan pasarqaku’. Jacobowan Juanñataq taytankuwan kuska atarrayankuta allichachkaspanku “botetawan taytankuta [chaylla] saqeruspa Jesustaña qatikurqaku” (Mat. 4:18-22).

¹⁶ Saulopas imakunatapas saqerqam, chaymantañam apostol Pablo karqa. Cristianokunata llumpayta qatikachaq kaspanpas, vidantam cambiarqa hinaspa Diospa ‘akllasqan’ karqa Jesusmanta willakunanpaq. Bibliam nin: ‘Saulom willakurqa huñunakunanku wasikunapi: “Jesucristoqa Diospa Churinmi”’, nispa (Hech. 9:3-22). Ñakarichisqa hinaspa qatikachasqa kaspanpas, Diostaqa hinallam kusisqa servirqa (2 Cor. 11:23-29; 12:15).

17. a) ¿Ima ruraytam munanki Jesusta tukuy sonqomanta qatikunaykipaq? b) ¿Ima bendicionkunatam chaskisun tukuy sonqonchikwan Diospa munayninta ruraspaqa?

¹⁷ Llapanchikchá munanchik chayna cristianokunata qatipakuytaqa hinaspa kusisqa chaynataq mana imawan harkachikuspa Cristopa invitasqanta kasukuytapas (Heb. 6:11, 12). ¿Ima bendicionkunatam chaskisun tukuy sonqomanta qatikuspaqa? Kusisqam tarikusun Diospa munayninta rurasqanchikmanta, congregacionpi astawan yanapakusqanchikmanta hinaspa Diosta servispa imakunatapas astawan rurasqanchikmanta (Sal. 40:8; leey 1 Tesalonicenses 4:1). Tukuy sonqomanta Cristota qatinapaq kallpanchakuspaqa, achka bendicionkunatam chaskisun: hawkayayta, sonqomanta kusikuyta, wiñay kawsay suyakuyta hinaspapas Diospa chaskisqanmi kasun (1 Tim. 4:10).

¿Yuyachkankichu?

• ¿Ima ancha valorniyoq kamachikuytam chaskirqanchik, hinaspa imaynatam qawananchik?

• Runakunapa, ¿imayna kasqanchikwanmi mana atipachikunachu, hinaspa imanasqa?

• ¿Imayna kasqanchiktam sapakama qawakunanchik?

• ¿Imakunam yanapawasun tukuy sonqonchikwan Cristota qatikunapaq?

[Kay yachachikuypa tapukuyninkuna]

[27 kaq paginapi dibujo hinaspa recuadro]

Cristota tukuy sonqomanta qatikunapaq yanapakuykuna

▪ Bibliata sapa punchaw leespam yuyaymanana (Sal. 1:1-3; 1 Tim. 4:15).

▪ Sapa kutim Diosta mañakuna yanapakuynintawan espiritunta qowananchikpaq (Zac. 4:6; Luc. 11:9, 13).

▪ Diosta servinankupaq kallpanchakuqkunapa amistadnintam maskananchik (Pro. 13:20; Heb. 10:24, 25).

▪ Manam qonqanachu ima tiempopi kawsasqanchikta (Efe. 5:15, 16).

▪ Diospa niwasqanchikta imata nispapas saqeruy mana allinpi tukusqantam mana qonqananchikchu (Luc. 9:59-62).

▪ Jehová Diosman qokuspanchik prometesqanchikpim yuyaymanana, chaynataq payta servisqanchikmantawan Cristota tukuy sonqomanta qatikusqanchikmanta bendicionkunapipas (Sal. 116:12-14; 133:3; Pro. 10:22).