Yu e du a Kresten diniwroko fayafaya?
Yu e du a Kresten diniwroko fayafaya?
’Neleki fa unu e waka kaba, na so unu musu tan waka nanga moro faya.’—1 TES. 4:1.
1, 2. (a) Sortu bigi sani den sma na ini a ten fu Yesus ben e si? (b) Fu san ede wi kan taki dati wi e libi na ini wan tumusi prenspari ten?
OITI yu winsi taki yu ben libi na a ten di Yesus ben de na grontapu? Kon meki wi taki dati yu ben abi wan siki na a ten dati. Yu no ben o winsi taki Yesus ben dresi yu so taki yu no ben e pina moro fu a siki dati? Prakseri fa a ben o gi yu prisiri fu si èn fu yere Yesus. Yu no ben o breiti fu teki leri fu en, èn fu si fa a ben e du wondru? (Mark. 4:1, 2; Luk. 5:3-9; 9:11) A ben o de wan bigi grani trutru efu yu ben o man si fa Yesus ben e du ala den wondru dati! (Luk. 19:37) Sensi a ten dati, noiti moro den sani dati pasa na grontapu, èn den sani di Yesus du „nanga yepi fu en eigi libi di a gi leki wan srakti-ofrandi” no o pasa moro.—Hebr. 9:26; Yoh. 14:19.
2 Ma wi e libi tu na ini wan tumusi prenspari ten. Fu san ede wi kan taki dati? Fu di wi e libi now na ini a pisi ten di Bijbel e kari „a ten fu a kaba” èn „den lasti dei” (Dan. 12:1-4, 9; 2 Tim. 3:1). Na ini a pisi ten disi, den trowe Satan komoto na hemel. Heri esi, den sa tai en èn den sa fringi en go „na ini a dipi peti” (Openb. 12:7-9, 12; 20:1-3). A de so tu taki na ini a ten disi wi abi a bigi grani fu preiki a ’bun nyunsu fu a kownukondre’ na heri grontapu. Wi e fruteri sma fu a howpu di wi abi taki grontapu o tron wan Paradijs. Disi na wan wroko di no sa du noiti moro.—Mat. 24:14.
3. San Yesus taigi den bakaman fu en, syatu bifo a go na hemel, èn sortu wroko den ben o abi fu du?
3 Syatu bifo Yesus go na hemel, a taigi den bakaman fu en: „Unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori. 1:8). Den wortu disi e sori taki den ben o abi a wroko fu gi sma leri na heri grontapu. Fu san ede den ben o du a wroko dati? Fu di den ben musu meki disipel, noso den ben musu yepi tra sma fu tron bakaman fu Krestes, bifo a kaba kon (Mat. 28:19, 20). San wi musu du efu wi wani klari a wroko di Krestes gi wi?
4. (a) Sortu deki-ati wi e kisi na 2 Petrus 3:11, 12? (b) Gi san wi musu luku bun?
4 Luku san na apostel Petrus ben taki: „Un musu luku taki unu e tyari unsrefi na wan santa fasi èn taki unu e du sani di e sori taki unu e dini Gado na wan getrow fasi; boiti dati, un musu fruwakti a dei fu Yehovah!” (2 Petr. 3:11, 12) Den wortu fu Petrus e sori krin taki wi musu de na ai na ini den lasti dei, fu man poti a wani fu Gado na a fosi presi na ini wi libi. Wan fu den sani di Gado wani wi fu du, na fu preiki a bun nyunsu. Fu dati ede, a e gi wi furu prisiri fu si fa wi Kresten brada nanga sisa na heri grontapu e du a Kresten diniwroko fu den fayafaya! Na a srefi ten, wi e frustan taki wi musu luku bun taki den broko-ede fu a grontapu fu Satan, èn wi eigi sondu skin no e meki taki wi lasi faya gi a diniwroko fu Gado. Fu dati ede, meki wi luku fa wi kan sorgu taki wi e tan du a Kresten diniwroko fu wi fayafaya.
De klariklari fu tyari den frantwortu di Gado gi yu
5, 6. (a) Gi san Paulus ben prèise den brada nanga sisa fu en na ini Yerusalem, èn gi sortu sani a ben warskow den? (b) Fu san ede wi musu si a wroko di Gado gi wi, leki wan seryusu sani?
5 Na ini a brifi di na apostel Paulus ben skrifi gi den Kresten na ini Yerusalem, a ben prèise den brada nanga sisa fu en fu di den ben horidoro di den ben kisi frufolgu. A ben taki: „Tan prakseri den dei fu fositen, di unu ben e horidoro na ini wan hebi strei pe furu pina miti unu, baka di unu kon frustan sani moro krin.” Iya, Yehovah no ben frigiti taki den ben horidoro (Hebr. 6:10; 10:32-34). A no de fu taki, dati den wortu fu Paulus ben gi den Hebrew Kresten furu deki-ati. Ma na ini a srefi brifi dati, Paulus ben warskow den tu gi wan gwenti di libisma abi. Efu den no ben o luku bun nanga a gwenti dati, dan dati ben kan meki taki den lasi faya gi a diniwroko fu Gado. Paulus ben sori taki Kresten musu luku bun taki den no suku reide fu no gi yesi na den komando fu Gado.—Hebr. 12:25.
6 Na ini a ten disi, Kresten e kisi a warskow tu fu no suku reide fu no tyari den frantwortu di Gado gi den. Wi e frustan taki wi musu abi a fasti bosroiti fu du wi Kresten diniwroko na wan seryusu fasi ala ten, èn wi musu tan dini Gado fayafaya (Hebr. 10:39). Fu taki en leti, efu wi no e du a santa diniwroko fu wi fayafaya, dan disi kan meki taki sma lasi den libi.—1 Tim. 4:16.
7, 8. (a) San sa yepi wi fu tan dini Gado fayafaya? (b) Efu wi no de so fayafaya moro leki fosi, dan san wi musu hori na prakseri fu Yehovah nanga Yesus?
7 Fa wi kan sorgu taki wi no e suku reide fu no du san Gado e fruwakti fu wi? Wan prenspari fasi fa wi kan du dati, na fu denki dipi ten na ten, san a gi di wi gi wisrefi abra na Gado, wani taki. Fu taki en leti, wi pramisi Yehovah taki wi sa poti a wani fu en na a fosi presi na ini wi libi, èn wi wani du san wi pramisi en. (Leisi Mateyus 16:24.) Dati meki son leisi, wi musu aksi wisrefi: ’Mi abi a fasti bosroiti ete fu du san mi pramisi Gado di mi teki dopu? Noso mi no de so fayafaya moro leki fa mi ben de na a ten di mi teki dopu?’
8 Efu wi ondrosuku wisrefi èn wi kon si taki wi no e du so furu moro leki fosi, dan a ben o bun fu memre den krakti wortu fu a profeiti Sefanya. A ben taki: „No lasi-ati. Yehovah un Gado de na un mindri. A o frulusu unu leki wan sma di abi furu makti. A o prisiri srefisrefi nanga unu” (Sef. 3:16, 17). Na a fosi presi, Sefanya ben taki den wortu disi fu gi deki-ati na den Israelsma di ben drai go baka na Yerusalem, baka di den ben komoto na ini katibo fu Babilon. Ma na ini a ten disi, den wortu dati e gi a pipel fu Gado deki-ati tu. Fu di Yehovah gi wi a wroko di wi musu du, meki wi musu hori na prakseri taki Yehovah nanga en Manpikin e horibaka gi wi, èn den e gi wi a krakti fu man tyari den frantwortu di Gado gi wi (Mat. 28:20; Fil. 4:13). Efu wi e meki muiti fu tan du a wroko fu Gado fayafaya, dan a sa blesi wi, èn a sa yepi wi fu tan go na fesi.
’Suku a kownukondre fosi’ èn du dati fayafaya
9, 10. San Yesus tyari kon na krin na ini na agersitori fu a bigi neti-nyanyan, èn san wi e leri fu na agersitori dati?
9 Di Yesus ben nyan wan nyanyan na a oso fu wan fu den fesiman fu den Fariseiman, dan a fruteri wan agersitori fu wan bigi neti-nyanyan. Na ini na agersitori dati, Yesus fruteri fu na okasi di difrenti sma ben abi fu tron memre fu a hemel Kownukondre. A ben sori tu san a wani taki te sma e suku reide fu no du wan sani di wan trawan e aksi fu en. (Leisi Lukas 14:16-21.) Na ini na agersitori fu Yesus, den sma di ben kisi wan kari fu go na a fesa ben kari difrenti reide fu san ede den no ben man go. Wan fu den ben taki dati a ben musu go luku a gron di a ben bai no so langa pasa. Wan trawan ben taki dati a bai wan tu kaw, èn taki a ben wani go luku den. Ete wan trawan ben taki: ’Didyonsro mi trow, èn dati meki mi no man kon.’ A no de fu taki dati disi ben de lawlaw reide. Fosi wan sma e bai wan gron noso wan kaw, dan nofo tron a e luku efu ala sani bun. Sobun, te wan sma bai den sani disi kaba, dan a no abi fu hasti ensrefi moro fu go luku efu den sani dati bun. Èn fu san ede wan sma di trow no so langa ete no ben o man teki a prenspari kari dati? Dati meki a no e fruwondru wi taki a masra na ini na agersitori ben atibron srefisrefi!
10 Ala sma di e dini Gado kan leri wan sani fu na agersitori disi fu Yesus. San wi kan leri? Noiti wi musu gi pasi taki wi eigi afersi, soleki den wan di kari na ini na agersitori fu Yesus, e kon prenspari moro a diniwroko fu Gado. Efu wan Kresten e poti en eigi afersi na a fosi presi, dan safrisafri a kan lasi faya gi a diniwroko. (Leisi Lukas 8:14.) Fu no meki dati pasa, dan wi e gi yesi na a rai disi di Yesus gi wi: „Fu dati ede, tan suku a kownukondre nanga En regtfardikifasi fosi” (Mat. 6:33). A e gi wi furu deki-ati fu si fa den futuboi fu Gado, yonguwan nanga owruwan, e gi yesi na a tumusi prenspari rai disi! Fu taki en leti, furu fu den tyari kenki kon na ini den libi so taki den kan du moro na ini a diniwroko. Densrefi e ondrofeni taki te den e suku a kownukondre fosi èn te den e du dati fayafaya, dan den de koloku trutru.
11. Sortu Bijbel tori e sori o prenspari a de fu dini Gado fayafaya èn nanga wi heri ati?
11 Fu sori o prenspari a de fu de fayafaya na ini a diniwroko fu Gado, dan luku san ben pasa na a ten fu Kownu Yoas fu Israel. Fu di Yoas ben frede taki den Siriasma ben o teki Israel abra, meki a go suku yepi na Elisa, èn a bigin krei. A profeiti taigi en fu sutu wan peiri komoto fu a fensre go na a sei fu Siria. Disi ben e prenki taki Yehovah ben o yepi den Israelsma fu wini a strei. A no de fu taki, dati a sani disi ben musu gi a kownu deki-ati. Baka dati, Elisa taigi Yoas fu teki den peiri fu en, èn fu naki den na tapu a gron. Yoas naki a gron dri tron. Elisa ben atibron na en tapu, bika efu Yoas ben naki a gron feifi noso siksi leisi, dan a ben o „wini den Siriasma, teleki nowan fu den tan abra”. Ma now Yoas ben o wini den feanti dri tron nomo. Fu di Yoas no handri fayafaya, meki a no ben abi bun bakapisi dorodoro (2 Kow. 13:14-19). San wi kan leri fu a tori disi? Yehovah sa blesi wi bogobogo soso te wi e du a wroko fu en nanga wi heri ati, èn te wi e du dati fayafaya.
12. (a) San sa yepi wi fu tan dini Gado fayafaya aladi wi e kisi fu du nanga problema? (b) Fruteri sortu wini a e tyari kon gi yu fu di yu e du a diniwroko fayafaya.
12 Te wi e kisi fu du nanga problema na ini a libi, dan dati kan meki en muilek gi wi fu dini Gado fayafaya. Furu brada nanga sisa abi en muilek fu di na ekonomia fu a kondre no e drai bun. Trawan di abi wan seryusu siki, e firi brokosaka fu di den no man du so furu moro na ini a diniwroko fu Yehovah. Toku, ibriwan fu wi kan du sani di kan yepi wi fu tan fayafaya na ini a Kresten diniwroko. Grantangi, luku den rai nanga den Bijbeltekst di kari na ini a faki di nen „San o yepi yu fu tan du yu Kresten diniwroko fayafaya?” Prakseri fa yu kan fiti den rai finifini. Efu yu e du dati, dan yu sa kisi furu blesi. Te wi e tan du a diniwroko fayafaya, dan dati sa yepi wi fu tan abi wan tranga bribi, fu abi moro prisiri na ini a libi, fu abi wan korostu firi, èn fu de koloku (1 Kor. 15:58). Èn te wi e dini Gado nanga wi heri ati, dan dati e yepi wi fu ’fruwakti a dei fu Yehovah èn fu hori bun na prakseri taki a dei dati o kon’.—2 Petr. 3:12.
Ondrosuku a situwâsi fu yu bun
13. Fa ibriwan fu wi kan kon sabi efu wi e du wi diniwroko nanga wi heri ati?
13 Ma a bun fu hori na prakseri taki te wan sma e du a diniwroko nanga en heri ati, dan a no abi trobi omeni yuru a e wroko na ini a diniwroko. A situwâsi fu ibri sma de tra fasi. Efu a gosontu fu wan sma e gi pasi taki a e preiki wán noso tu yuru nomo na ini wan mun, dan Yehovah sa breiti nanga dati. (Luku Markus 12:41-44.) Sobun, fu man sabi efu wi e dini Gado nanga wi heri ati, dan wi musu ondrosuku a situwâsi fu wi bun, fu si san wi man du èn san wi no man du. Leki bakaman fu Krestes, wi musu leri tu fu si sani soleki fa en e si sani (Leisi Romesma 15:5; 1 Kor. 2:16). San Yesus ben poti na a fosi presi na ini en libi? A ben taigi den ipi-ipi sma na ini Kaperna-um: ’Mi musu fruteri a bun nyunsu fu Gado kownukondre, bika na fu disi Gado ben seni mi kon’ (Luk. 4:43; Yoh. 18:37). Hori na prakseri fa Yesus ben e du a diniwroko fu en fayafaya, èn luku efu a situwâsi fu yu e gi pasi taki yu kan du moro na ini a diniwroko.—1 Kor. 11:1.
14. Na sortu fasi wi kan du moro na ini a diniwroko?
14 Te wi e ondrosuku a situwâsi fu wi bun, dan a kan taki wi e kon si taki wi kan du moro na ini a diniwroko (Mat. 9:37, 38). Fu eksempre, dusundusun fu den yonguwan fu wi di klari skoro, bigin du moro na ini a diniwroko, èn now den e prisiri fu di den e dini fayafaya leki pionier. Yu wani prisiri tu neleki den? Son brada nanga sisa luku a situwâsi fu den, èn den bosroiti fu froisi go na wan tra kontren na ini a kondre fu den pe moro Kownukondre preikiman de fanowdu. Noso kande den froisi go na wan tra kondre fu dini drape. Trawan leri wan tra tongo fu yepi sma di e taki a tongo dati. Aladi wi musu meki muiti fu man du moro na ini a diniwroko, toku dati e tyari furu blesi kon gi wi, èn wi kan yepi furu tra sma fu „kon sabi a waarheid soifri”.—1 Tim. 2:3, 4; 2 Kor. 9:6.
Teki na eksempre fu sma na ini Bijbel
15, 16. Na eksempre fu suma wi musu teki fu man de fayafaya bakaman fu Krestes?
15 San wan tu fu den man di ben tron apostel du di Krestes kari den fu tron bakaman fu en? Luku san Bijbel e taki fu Mateyus: „Leifi libi ala sani, dan a opo èn a waka na Yesus baka” (Luk. 5:27, 28). Bijbel e taki disi fu Petrus nanga Andreas, di ben de fisiman: „Wantewante den libi den fisinèt èn den go waka na en baka.” Baka dati, Yesus si Yakobus nanga Yohanes, di ben de nanga den papa fu meki den fisinèt. Fa den handri di Yesus kari den fu tron bakaman fu en? „Wantewante den gowe libi a boto èn a papa fu den, èn den go waka na Yesus baka.”—Mat. 4:18-22.
16 Wan tra moi eksempre, na a di fu Saulus, di ben tron na apostel Paulus. Aladi a ben e frufolgu den bakaman fu Krestes fayafaya, toku a kenki en libi, èn Krestes ben ’teki en’ fu gi kotoigi fu a nen fu En. „Wantewante [Paulus] bigin preiki na ini den snoga taki Yesus na a Manpikin fu Gado” (Tori. 9:3-22). Paulus kisi furu problema, èn sma ben e frufolgu en, ma toku a no lasi faya gi a diniwroko.—2 Kor. 11:23-29; 12:15.
17. (a) Fa yu wani du a Kresten diniwroko fu yu? (b) Sortu blesi wi sa kisi te wi e du a wani fu Yehovah nanga wi heri ati?
17 A no de fu taki, dati wi wani teki a moi eksempre fu den disipel dati. Neleki den man dati, wi wani handri wantewante èn wi no wani draidrai fu teki a kari fu tron bakaman fu Krestes (Hebr. 6:11, 12). Sortu blesi wi e kisi te wi e tan meki muiti fu du wi Kresten diniwroko fayafaya? Te wi e du a wani fu Gado, èn te wi de klariklari fu teki tra grani nanga frantwortu na ini a gemeente, dan dati e gi wi furu prisiri. (Ps. 40:8; leisi 1 Tesalonikasma 4:1.) Iya, te wi e du ala san wi man fu du a Kresten diniwroko fayafaya, dan wi sa kisi furu blesi. Wi sa abi wan korostu firi, wi sa de koloku, Gado sa feni wi bun, èn wi sa abi a howpu fu kisi têgo libi.—1 Tim. 4:10.
Yu e memre disi ete?
• Sortu prenspari wroko wi kisi fu du, èn fa wi musu si a wroko disi?
• Gi sortu gwenti di libisma abi wi musu luku bun, èn fu san ede?
• Fu san ede wi musu ondrosuku a situwâsi fu wi bun?
• San sa yepi wi fu tan du a Kresten diniwroko fayafaya?
[Aksi fu a tori disi]
[Faki/Prenki na tapu bladzijde 27]
San o yepi yu fu tan du yu Kresten diniwroko fayafaya?
▪ Leisi Gado Wortu ibri dei, èn denki dipi fu den sani di yu e leisi.—Ps. 1:1-3; 1 Tim. 4:15.
▪ Begi Gado doronomo fu yepi yu, èn fu tiri yu nanga en santa yeye—Sak. 4:6; Luk. 11:9, 13.
▪ Abi demakandra nanga den wan di e du a diniwroko fayafaya.—Odo 13:20; Hebr. 10:24, 25.
▪ Kon frustan taki wi e libi na ini wan prenspari ten.—Ef. 5:15, 16.
▪ Hori na prakseri sortu takru bakapisi a e tyari kon te wan sma e suku reide fu no du a Kresten diniwroko fayafaya.—Luk. 9:59-62.
▪ Teki ten doronomo fu prakseri san yu pramisi Gado di yu gi yusrefi abra na en. Prakseri tu fu den bogobogo blesi di yu e kisi te yu e dini Yehovah nanga yu heri ati, èn te yu e du a Kresten diniwroko fayafaya.—Ps. 116:12-14; 133:3; Odo 10:22.