Umlandzela Ngenkhutsalo Yini Khristu?
Umlandzela Ngenkhutsalo Yini Khristu?
‘Njengobe besenivele nenta, . . . chubekani nikhutsale kakhulu kukwenta loko.’—1 THES. 4:1.
1, 2. (a) Ngutiphi tintfo letinhle bantfu labanyenti bangesikhatsi saJesu labatibonela tona ngewabo? (b) Sibaluleke ngani lesikhatsi lesiphila kuso nyalo?
KWENTEKILE yini wafisa shengatsi kube bewuphila ngalesikhatsi Jesu alapha emhlabeni? Ungacabanga ngelitfuba lekwelashwa nguJesu futsi ukhululeke ekucindzetelekeni lokubangelwa tifo letitsite. Lesinye sizatfu mhlawumbe ungacabanga ngenjabulo yekumbona uphindze umuve akhuluma—ufundze kuye umbone ngisho enta timangaliso. (Mak. 4:1, 2; Luk. 5:3-9; 9:11) Bekutawuba kuhle kakhulu kubona Jesu enta yonkhe lemisebenti. (Luk. 19:37) Kusukela ngaleso sikhatsi, kute lesinye situkulwane lesike sabona tintfo letinjalo, futsi naloko lakwenta Jesu emhlabeni “ngenhlawulo lenguye cobo lwakhe,” angeke kuphindze kwenteke.—Heb. 9:26; Joh. 14:19.
2 Sikhatsi lesiphila kuso nyalo sibalulekile. Ngani? Ngobe nyalo siphila esikhatsini imiBhalo leyasibiketela ngekutsi “sikhatsi sekugcina” nobe ‘emalanga ekugcina.’ (Dan. 12:1-4, 9; 2 Thim. 3:1) Ngaleso sikhatsi, Sathane wacoshwa ezulwini. Ngekushesha utawuboshwa ajikijelwe ‘emgodzini longenamkhawulo.’ (Semb. 12:7-9, 12; 20:1-3) Ngiso kanye lesikhatsi lesiphila kuso lapho sinelitfuba leliyingcayizivele lekusakata ‘tindzaba letinhle tembuso’ emhlabeni wonkhe sitjele bantfu ngelitsemba lelitako lekuphila ePharadisi—lomsebenti ngeke uphindze wentiwe.—Mat. 24:14.
3. Yini Jesu layitjela balandzeli bakhe sekusele sikhatsi lesincane nje kutsi enyukele ezulwini, futsi kwenta loko bekutawufaka ekhatsi kwentani?
3 Kwatsi nje sekusele sikhatsi lesincane enyukele ezulwini, Jesu watjela balandzeli bakhe: “Niyawuba bofakazi bami eJerusalema, naseJudiya lonkhe, naseSamariya, kuze kube ngusekugcineni kwemhlaba.” (Imis. 1:8) Lomsebenti bewutawufaka ekhatsi kufundzisa emhlabeni wonkhe. Bewutawuba yini umgomo walomsebenti? Bewutawuba kwenta bafundzi—kwengeta balandzeli baKhristu—kusengakefiki kuphela. (Mat. 28:19, 20) Yini lokufanele siyente kute siphumelele ekufezeni lomyalo waKhristu?
4. (a) Emavi aPhetro latfolakala ku-2 Phetro 3:11, 12 agcizelela siphi sidzingo? (b) Yini lokufanele sihlale siyicaphela?
4 Ase unake nawa emavi lagcizelelwa nguPhetro: “Kufanele nibe bantfu labanjani? Kufanele nitinikele ngalokuphelele kuNkulunkulu niphile ngekumesaba yena, nilindzele kufika kwelilanga laNkulunkulu.” (2 Phet. 3:11, 12) Lamavi aPhetro agcizelela sidzingo sekuhlala silindzile kulamalanga ekugcina kute siciniseke kutsi ngaso sonkhe sikhatsi kuphila kwetfu kusekutinikeleni kuNkulunkulu. Loko kufaka ekhatsi kushumayela tindzaba letinhle. Kuyinjabulo lenkhulu kitsi kubona inshisekelo yebazalwane betfu emhlabeni wonkhe njengobe bachubeka nalomsebenti wekushumayela lesiwutfunywe nguKhristu. Ngesikhatsi lesifanako, siyacaphela kutsi kudzingeka sikuphaphamele kutsi kucindzeteleka kwetfu kwamalanga onkhe lokuletfwa live laSathane kanye nebutsakatsaka benyama yetfu, akulehlisi lizinga letfu lenshisekelo njengobe senta lomsebenti waNkulunkulu. Ase sibone indlela lesingachubeka ngayo silandzela Khristu.
Yemukela Imitfwalo Loyetfweswe NguNkulunkulu
5, 6. (a) Yini Pawula lawancomela yona emakholwa labekanye nawo eJerusalema, futsi wawacwayisa ngani? (b) Kungani kungakafaneli siwutsatse melula umtfwalo lesiwunikwe nguNkulunkulu?
5 Encwadzini yakhe lebeyiya kumaKhristu aseJerusalema, umphostoli Pawula wancoma emakholwa labekanye nawo ngemlandvo wawo wekubeketela ngisho nangalesikhatsi ashushiswa. Watsi: “Khumbulani emalanga ekucala, lekwatsi emvakwekukhanyiswa kwenu, nacinisela ekukhutsateleni kuhlangabetana netinhlupheko.” Jehova wayikhumbula imisebenti yabo yekwetsembeka. (Heb. 6:10; 10:32-34) Emavi aPawula ekuncoma nalakhutsatako, kufanele kutsi awakhutsata kakhulu emaKhristu langemaHebheru angaleso sikhatsi. Nobe kunjalo, encwadzini lefanako, Pawula wecwayisa mayelana nemkhuba webantfu lebekungatsi nawunganakwa, unciphise lizinga lekushisekela umsebenti waNkulunkulu. Watsi emaKhristu kufanele acaphele ‘angali’ nobe ente taba tekungayilandzeli imiyalo yaNkulunkulu.—Heb. 12:25.
6 Kucwayisa kwakhe ngalomkhuba ‘wekwala’ nobe kubeka taba endzabeni yekwemukela imitfwalo lesiyinikwe nguNkulunkulu, kuyasebenta ngisho nakumaKhristu lamuhla. Siyabona kutsi kufanele sitimisele, singacali siyitsatse melula lemitfwalo yetfu yebuKhristu nobe sivumele inshisekelo yetfu ngemsebenti waNkulunkulu kutsi inciphe. (Heb. 10:39) Khumbula, kwenta inkonzo lengcwele kusho kufa nekuphila.—1 Thim. 4:16.
7, 8. (a) Yini lengasisita kutsi sihlale sishiseka enkonzweni yaNkulunkulu? (b) Nangabe sesite inshisekelo lebesinayo ekucaleni, yini lokufanele sihlale siyikhumbula ngaJehova naJesu?
7 Yini letasisita kutsi singabeki taba tekungenti loko Nkulunkulu lakulindzele kitsi? Lokunye lokubalulekile lokutawusisita kutsi silwe nalomkhuba, kuzindla ngaloko lokushiwo sifungo setfu sekutinikela kuNkulunkulu. Sametsembisa Jehova kutsi kwenta intsandvo yakhe kutawuta kucala ekuphileni kwetfu, futsi sifuna kusigcina lesetsembiso. (Fundza Matewu 16:24, NW.) Ngako-ke, ngaletinye tikhatsi sidzinga kutsi kuma kancane sitibute: ‘Ngisativa nginemndlandla yini ngekutinikela kwami kuNkulunkulu njengoba bengitiva ngesikhatsi ngibhajatiswa? Inshisekelo yami yasekucaleni seyingilahlekele yini?’
8 Nangabe kutihlola kwetfu ngekwetsembeka kukhombisa kutsi ndzawana tsite sesilinciphisile lizinga emsebenti waJehova, kungaba kuhle kutsi sikhumbule emavi emphrofethi Zefaniya lakhutsatako. Watsi: ‘Tandla takho ungatiyeketsisi, Jehova Nkulunkulu wakho unawe, unemandla ekukusindzisa uyawukujabulela kakhulu wena.’ (Zef. 3:16, 17) Lamavi lacinisekisa kangaka acala ngekusebenta kuma-Israyeli asendvulo labuyela eJerusalema ngemuva kwekuba atfunjwe eBhabhulona. Lamavi asasebenta kubantfu baNkulunkulu ngisho nalamuhla. Njengobe lomsebenti lesiwentako uwaJehova, kufanele sihlale sikukhumbula kutsi yena neNdvodzana yakhe bayasisekela futsi bayasicinisa kute sikwati kuwenta ngenkhutsalo. (Mat. 28:20; Fil. 4:13) Nangabe silwela kuchubeka senta umsebenti waNkulunkulu ngenshisekelo, utawusibusisa futsi asisite kutsi sichubeka sitfutfuka.
“Funani Kucala UMbuso WaNkulunkulu” Ngenkhutsalo
9, 10. Nguliphi liphuzu lesilitfola emfanekisweni waJesu welidzili lelikhulu, futsi yini lesiyifundzako kuwo?
9 Ngalesikhatsi Jesu adla sidlo sakusihlwa emtini wembusi longumFarisi, wenta umfanekiso ngelidzili lelikhulu. Kulomfanekiso wachaza litfuba lelalivulekele bantfu labehlukahlukene kute bazuze uMbuso wemazulu. Waphindze wachaza nekutsi kusho kutsini ‘kubeka taba.’ (Fundza Lukha 14:16-21.) Bantfu labebamenyiwe kulelidzili, babeka taba ngekungeti kwabo kulo. Lomunye watsi utsenge lipulazi futsi kufanele ayelibona. Lomunye yena watsi utsenge tinkhabi ngako-ke uyetibona kutsi tinjani. Kantsi lomunye watsi: “Ngisandza kuteka umfati, ngaleso sizatfu ngingeke ngiphumelele.” Leti bekutaba letingasho lutfo ngobe umuntfu nakatsenga lipulazi nobe tinkhabi, ucale atibukisise kucala asengakatitsengi, ngako-ke kute sidzingo sekutsi aphindze atibuke ngemva kwaloko. Kutsi umuntfu usandza kushada kungamvimbela njani kutsi atsatse sinyatselo lesibaluleke kangaka? Kungako kungamangalisi kutsi yini lebangela lomuntfu lowente lelidzili kulomfanekiso atfukutsele kangaka!
10 Sonkhe njengebantfu baNkulunkulu singafundza kulomfanekiso waJesu. Yini lesingayifundza? Singafundza kutsi akukafaneli sivumele tinkinga tetfu leticishe tifanane naleto lokukhulunywe ngato emfanekisweni waJesu kutsi tisibambe kangangekutsi titsatsele inkonzo yaNkulunkulu indzawo. Nangabe umKhristu angatibeki tinkinga takhe endzaweni lefanele, inkhutsalo yakhe emsebentini wekushumayela ingancipha kancane kancane. (Fundza Lukha 8:14.) Kute sikuvimbele loko kungenteki, kudzingeka sisebentise secwayiso saJesu: “Funani kucala umbuso waNkulunkulu kanye nekulunga kwakhe.” (Mat. 6:33) Kuyasikhutsata kubona kutsi tikhonti taNkulunkulu—letisetincane naletikhulile—tiyasisebentisa leseluleko lesibalulekile! Ecinisweni, labanyenti sebente imetamo yekuphila imphilo lemelula kute babe nesikhatsi lesinyenti emsebentini wekushumayela. Batibonele ngewabo kutsi ‘kufuna kucala umbuso’ ngenkhutsalo kuholela enjabulweni sibili kanye nasekwenetisekeni.
11. Nguyiphi indzaba leseBhayibhelini lekhombisa kubaluleka kwekukhonta Nkulunkulu ngenkhutsalo nangenhlitiyo yonkhe?
11 Kute sikhombise kubaluleka kwekuba nenkhutsalo enkonzweni yaNkulunkulu, asewubuke nasi sentakalo lesenteka eNkhosini yaka-Israyeli Jehoyashi. Akhatsateke ngekubona kutsi emaSiriya atawehlula ema-Israyeli, Jehoyashi waya ku-Elisha wafike wamtsela ngetinyembeti. Umphrofethi Elisha wamtjela kutsi adubule umcibisholo awubhekise ngaseSiriya, lokwakuyawukhombisa kutsi lesive sitawuphumelela kulemphi sisitwa nguJehova. Loku kwakufanele kuyijabulise kakhulu inkhosi. Elisha waphindze watsi kuJehoyashi akatsatse imicibisholo adubule ngayo emhlabatsini. Jehoyashi wadubula nje katsatfu. Loko kwamtfukutselisa Elisha ngobe kudubula umhlaba emahlandla lasihlanu nobe lasitfupha bekutawusho kutsi “uyehlulile-ke iSiriya, wayibhubhisa yaphela.” Ngako-ke Jehoyashi abetawuyehlula tikhatsi letintsatfu nje kuphela. Ngesizatfu sekutsi abete inkhutsalo, imiphumela yaJehoyashi yaba mincane kakhulu. (2 Khos. 13:14-19) Ngusiphi sifundvo lesisitfola kulendzaba? Jehova utasibusisa nangabe senta umsebenti wakhe ngenhlitiyo yonkhe nangenkhutsalo.
12. (a) Yini lengasisita kutsi sigcine inkhutsalo yetfu emsebentini lesiwentela Nkulunkulu ngisho nobe sibhekene neluvivinyo? (b) Chaza kutsi uzuza njani ngekuchubeka uba matasatasa enkonzweni yekushumayela.
12 Tinkinga lesiba nato tiyayivivinya inkhutsalo kanye nekutinikela kwetfu enkonzweni yaNkulunkulu. Bazalwane nabodzadze labanyenti babhekene nesimo semnotfo lesihhohlokako. Labanye bahlaselwe kugula lokukhulu lokubenta bangakwati kwenta lokunyenti enkonzweni yaJehova. Nobe kunjalo, sonkhe senta imetamo yekugcina inkhutsalo yetfu futsi sichubeke silandzela Khristu njalo. Sicela ubuke teluleko kanye neluhla lwemibhalo ebhokisini lelitsi “Yini lengakusita kutsi uchubeke ulandzela Khristu?” Cabanga ngendlela longakusebentisa ngayo loko lokuvetiwe kulelibhokisi. Nawenta njalo, utawutfola tinzuzo. Kuba matasatasa emsebentini wekushumayela kuba nemiphumela lemihle, lecebisa kuphila kwetfu iphindze isiletsele kuthula nenjabulo. (1 Khor. 15:58) Ngetulu kwaloko, kutinikela ngemphefumulo wonkhe emsebentini lesiwentela Jehova kusisita kutsi ‘silindzele kufika kwelilanga laNkulunkulu.’—2 Phet. 3:12.
Tihlole Ngekwetsembeka
13. Singabonisa njani kutsi inkonzo yemphefumulo wonkhe isho kutsini kumuntfu ngemuntfu?
13 Kubalulekile kukhumbula kutsi kutinikela ngemphefumulo wonkhe akuyi ngesikhatsi losicitsa emsebentini wekushumayela. Timo tebantfu tiyehluka. Umuntfu loshumayela li-awa nobe lamabili inyanga ngayinye, angamjabulisa Jehova nangabe loko akwenta ngemandla akhe onkhe. (Catsanisa naMakho 12:41-44.) Ngako-ke, kute sati kutsi umsebenti lesiwentela Nkulunkulu ngemphefumulo wonkhe usho kutsini kitsi, kudzingeka sihlole indlela lesisebenta ngayo kanye netimo tetfu ngekwetsembeka. Njengebalandzeli baKhristu, sifuna kuvumelanisa imibono yetfu neyakhe. (Fundza Roma 15:5; 1 Khor. 2:16) Yini lebeyibaluleke kakhulu ekuphileni kwaJesu? Naku lakutjela sicumbi lebesiseKhaphanawume: “Kufanele ngishumayele liVangeli ngembuso waNkulunkulu nakulamanye emadolobha, ngobe Nkulunkulu ungitfume kwenta kona loko.” (Luk. 4:43; Joh. 18:37) Nasicabanga ngenkhutsalo Jesu labenayo ngemsebenti wakhe wekushumayela, kufanele sibuke simo lesikuso kute sibone kutsi ngukuphi lapho singatfutfukisa khona emsebentini wetfu wekushumayela.—1 Khor. 11:1.
14. Singayitfutfukisa ngatiphi tindlela inkonzo yetfu yekushumayela?
14 Kucabangisisa kahle ngetimo tetfu kungasenta sitfutfukise sikhatsi lesisicitsa enkonzweni. (Mat. 9:37, 38) Tinkhulungwane tebantfu labasha leticedze sikolwa, titfutfukise umsebenti wato wekushumayela futsi nyalo tijabulela kuba ngemahlahlandlela lakhutsele. Uyafuna yini nawe kujabulela lomsebenti? Labanye bazalwane nabodzadze balungise timo tabo bakhetsa kutfutsela kuletinye tindzawo nobe kulamanye emave lapho kunesidzingo lesikhulu sebamemeteli beMbuso. Kantsi labanye bafundze lolunye lulwimi kute basite bantfu labakhuluma lulwimi lwakulelinye live. Nanobe kutfutfukisa inkonzo lesiyentela Nkulunkulu kungaba yinsayeya, kodvwa kungasiletsela tibusiso letinyenti, futsi singasita bantfu labanyenti kutsi “bafinyelele ekulatini liciniso.”—1 Thim. 2:3, 4; 2 Khor. 9:6.
Tibonelo LetiseBhayibhelini Lesingatilingisa
15, 16. Ngutiphi tibonelo lesingatilingisa kute silandzele Khristu ngenkhutsalo?
15 Labanye lababa baphostoli yini labayenta ngalesikhatsi Khristu abamema kutsi babe balandzeli bakhe? Naku liBhayibheli lelikushoko ngaMatewu: “Washiya konkhe labekwenta wamlandzela.” (Luk. 5:27, 28) Mayelana naPhetro kanye na-Andreya labebadweba tinhlanti, siyafundza: “Bashiya emanetha abo masinyane, bamlandzela.” Jesu waphindze wabona Jakobe naJohane labebachibela emanetha abo neyise. Yini labayenta ngesimemo saJesu? “Masinyane bamshiya uyise kanye nesikebhe, balandzela Jesu.”—Mat. 4:18-22.
16 Lesinye sibonelo lesihle lesifundza ngaso saSawula,lowashintja waba ngumphostoli Pawula. Nanobe abengumshushisi webalandzeli baKhristu, wayishintja indlela labephila ngayo waba ‘sitja lesikhetsekile’ kute afakaze ngelibito laKhristu. “Masinyane [Pawula] wacala kushumayela emasinagogeni ngaJesu atsi: ‘UyiNdvodzana yaNkulunkulu.’” (Imis. 9:3-22) Nanobe Pawula abeketelela bumatima kanye nekushushiswa, inkhutsalo yakhe ayizange iphele.—2 Khor. 11:23-29; 12:15.
17. (a) Ngusiphi sifiso lonaso mayelana nekuladzela Khristu? (b) Ngutiphi tibusiso lesitijabulelako ngekwenta intsandvo yaJehova ngenhlitiyo yonkhe nangemandla etfu onkhe?
17 Nakanjani sifuna kulingisa tibonelo talabafundzi futsi sisemukele ngemdlandla simemo sekuba balandzeli baKhristu. (Heb. 6:11, 12) Ngutiphi tibusiso lesitijabulelako njengobe silwela kulandzela Khristu ngenkhutsalo? Sitfola injabulo lenkhulu nasenta intsandvo yaNkulunkulu futsi siba nekwenetiseka lesikutfola ngekwemukela imisebenti leyengetiwe enkonzweni kanye nemitfwalo lesinayo ebandleni. (Hla. 40:8; fundza 1 Thesalonika 4:1.) Njengobe silandzela Khristu ngenkhutsalo, sijabulela tibusiso letinyenti letingapheli letifanana nekuthula kwengcondvo, kwenetiseka, injabulo, kwemukelwa nguNkulunkulu kanye nelitsemba lekuphila phakadze.—1 Thim. 4:10.
Usakhumbula Yini?
• Ngumuphi umsebenti lobalulekile lesiphatsiswe wona, futsi kufanele sibe namuphi umbono ngawo?
• Ngumuphi umkhuba webantfu lokufanele siwucaphele, futsi leni?
• Ngukuphi kutihlola ngekwetsembeka lokufanele sikwente?
• Yini lengasisita kutsi sichubeke silandzela Khristu?
[Imibuto Yesihloko Lesifundvwako]
[Libhokisi/Sitfombe ekhasini 31]
Yini Lengakusita Kutsi Uchubeke Ulandzela Khristu?
▪ Fundza liVi laNkulunkulu malanga onkhe futsi uzindle ngaloko lokufundzako.—Hla. 1:1-3; 1 Thim. 4:15.
▪ Thandaza njalo ucele lusito kanye nesicondziso semoya waNkulunkulu.—Zak. 4:6; Luk. 11:9, 13.
▪ Tihlanganise nalabo labakhombisa inkhutsalo lesuka enhlitiyweni ngemsebenti wabo wekushumayela.—Taga 13:20; Heb. 10:24, 25.
▪ Khombisa kutsi uyakubona kuphutfuma kwalesikhatsi lesiphila kuso.—Ef. 5:15, 16.
▪ Caphela imiphumela yekuba ‘netaba’ tekungayilandzeli imiyalo yaNkulunkulu.—Luk. 9:59-62.
▪ Ngaso sonkhe sikhatsi khumbula sifungo sekutinikela kwakho kanye netibusiso letinyenti letiba ngumphumela wekukhonta Jehova nekulandzela Khristu ngenhlitiyo yonkhe.—Hla. 116:12-14; 133:3; Taga 10:22.