Sena Mulamutobela Kristo?
Sena Mulamutobela Kristo?
“Nkabela muleenda obo ncobeni, . . . kamuciya bweendesya munzila eyo njiyonya.”—1 TES. 4:1.
1, 2. (a) Ino nzyintu nzi zipati nzyobakabona bantu banji ciindi Jesu naakali anyika? (b) Ino nkaambo nzi ciindi ncotupona mazuba aano acalo ncociyandika kapati?
SENA kuli nomwakayeeyede mbumwakali kukonzya kukkomana kuti nimwakali kupona ciindi Jesu naakali anyika? Mulakonzya kuyeeya mbwaakali kukonzya kumuponya Jesu akufwutuka kumalwazi manji. Naa mulakonzya kuyeeya mbocakali kukonzya kumukkomanisya ikumubona akumumvwa kaambaula Jesu akwiiya kuli nguwe naa kumubona kacita maleele. (Mk. 4:1, 2; Lk. 5:3-9; 9:11) Eelyo kaka nicakabota kujanika ciindi Jesu naakali kucita milimo eeyi! (Lk. 19:37) Kunyina zyalani iili yoonse kuzwa ciindi eeco iyakabona zyintu eezyi alimwi zyoonse nzyaakacita Jesu anyika “kukulipaila mwini” tazikainduluki.—Heb. 9:26; Joh. 14:19.
2 Nokuba boobo, ciindi ncotupona aano mazuba acalo cilayandika kapati. Ino nkaambo nzi? Tupona muciindi Imagwalo ncaamba kuti “ciindi cakumamanino” alimwi akuti “mazuba aakumamanino.” (Dan. 12:1-4, 9; 2 Tim. 3:1) Kuciindi eeci, Saatani wakatandwa kujulu. Lino-lino, uyakwaangwa akuwaalwa “mumulindi uutagoli.” (Ciy. 12:7-9, 12; 20:1-3) Ciindi ncimunya cino tuli acoolwe cakukambauka “makani mabotu aa-bwami” munyika yoonse mbwiizulwa, ikwaambila bantu bulangizi mbotujisi bwa Paradaiso—imulimo uutakaindululwi.—Mt. 24:14.
3. Ibuzuba bwamamanino katanaunka kujulu, ino ncinzi Jesu ncaakabaambila basikumutobela kuti bacite, alimwi ino eeci cakali kubikkilizya nzi?
3 Buzuba bwamamanino anyika katanaunka kujulu, Jesu wakaambila basikumutobela kuti: “Muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika.” (Inc. 1:8) Imulimo ooyu wakali kuya kubikkilizya kuyiisya munyika yoonse. Ino bakali kuucitila nzi mulimo ooyu? Bakali kuyanda kugwasya bantu kuba basikwiiya—ikuyungizya basikutobela Kristo, imamanino kaatanasika. (Mt. 28:19, 20) Ino ncinzi ncotweelede kucita ikuti katuyanda kubeleka mulimo ngwaakatupa Kristo?
4. (a) Ino majwi ngaakaamba Petro kulugwalo lwa 2 Petro 3:11, 12 aamba kuti tweelede kucita nzi? (b) Ino nkunzi nkotweelede kucenjela?
4 Amubone ncaakaamba mwaapostolo Petro: “Nywebo muleelede kuba bantu bali buti kukweenda munzila iisalala amukulemeka Leza? Mucilangila akuyandisya buzuba bwakusika kwa-Leza.” (2 Pet. 3:11, 12) Imajwi aa Petro alaamba mbociyandika kulangila mumazuba aano aamamanino kutegwa tuzumanane kucita kuyanda kwa Leza. Kuyanda kwa Leza ooku kubikkilizya kukambauka makani mabotu. Aboobo, tulikkomene kaka kubona bakwesu munyika yoonse kababeleka mulimo wakukambauka ngwaakatupa Kristo! Alimwi tulizyi kuti tweelede kucenjela ikutegwa inyika ya Saatani akutalondoka kwesu zitatulesyi kucita mulimo wa Leza cabusungu. Aboobo, atubone mbotukonzya kuzumanana kutobela Kristo.
Amwiizumine Milimo Njamupa Leza
5, 6. (a) Ino ncinzi Paulo ncaakabaambila basyominyina baku Jerusalemu, alimwi ino wakabacenjezya nzi? (b) Ino nkaambo nzi ncotweelede kuubikkila maano kapati mulimo ngwaakatupa Leza?
5 Mulugwalo ndwaakalembela Banakristo baku Jerusalemu, mwaapostolo Paulo wakabalumbaizya basyominyina akaambo kakuliyumya nobakali kupenzyegwa. Wakati: “Muyeeye mazuba aaciindi, eliya nomwakamana kumunikilwa, mwakali kukonzya kwiima munkondo impati yamapenzi.” Inzya, Jehova ulaluyeeya lusyomo lwabo. (Heb. 6:10; 10:32-34) Imajwi aaya ngaakaamba Paulo akabakulwaizya Banakristo bana Hebrayo. Pele mulugwalo oolu ndumunya Paulo wakacenjezya kuti ikuti twatacenjela, tulakonzya kuleka kumubelekela Leza cabusungu. Wakaamba kuti Banakristo beelede kucenjela kutegwa bataleki kutobela milawo ya Leza.—Heb. 12:25.
6 Ikucenjezya ooku kucibeleka aku Banakristo bamazuba aano. Tulizyi kuti tweelede kuubikkila maano mulimo wesu wa Bunakristo naa kubeleka mulimo wa Leza cabusungu. (Heb. 10:39) Kubelekela Leza ncintu ciyandika kapati cikonzya kutupa buumi.—1 Tim. 4:16.
7, 8. (a) Ino ncinzi cikonzya kutugwasya kuti tuzumanane kubeleka canguzu mumulimo wa Leza? (b) Kuti naa twabona kuti tatucibeleki cabusungu mbuli mbutwakali kucita kaindi, ino ncinzi ncotweelede kuyeeya kujatikizya Jehova a Jesu?
7 Ino ncinzi cikonzya kutugwasya kutegwa tutaleki kutobela malailile ngatupa Leza? Icintu comwe ciyandika kapati ncotweelede kucita nkuzinzibala kuyeeya ncotwakakonka notwakalyaaba. Twakamwaambila Jehova kuti tuyakucita kuyanda kwakwe mubuumi bwesu, alimwi tuyanda kuti tucizuzikizye ncotwakamusyomezya. (Amubale Matayo 16:24.) Aboobo, zimwi ziindi tweelede kukkala aansi akulibuzya kuti: ‘Sena ndicipona kweelana ambundakali kupona nindakabbapatizyigwa akulyaaba kuli Leza? Naa sena kuli mponditaciti kabotu aano mazuba?’
8 Kuti naa twabona kuti tatuciti kabotu, tulakonzya kuyeeya majwi aakulwaizya ngaakaamba musinsimi Zefaniya. Wakaamba kuti: “Maanza aako atabombi. Jehova Leza wanu mpali akati kanu, ngusilumamba uumuzundya. Ulamusekelela cakukondwa.” (Zef. 3:16, 17) Aaya majwi aakkazyika moyo akataanguna kwaambilwa bana Israyeli bansiku bakali mubuzike ku Babuloni nibakapiluka ku Jerusalemu. Aboobo, imajwi aaya acibeleka akubantu ba Leza aano mazuba. Alimwi ncotweelede kuziba ncakuti imulimo ngotucita ngwaa Jehova, aboobo Jehova a Mwanaakwe balatugwasya akutuyumya notucita milimo eeyi cabusungu. (Mt. 28:20; Flp. 4:13) Ikuti naa twazumanana kubeleka mulimo ooyu cabusungu, Leza uyakutulongezya alimwi uyakutugwasya kuti tuzumanane kucita kabotu kumuuya.
“Amusaangune Kuyandaula Bwami bwa-Leza”
9, 10. Ino ncinzi Jesu ncaakali kwaamba mucaano capobwe mpati, alimwi ino ncinzi ncotwiiya kucaano eeci?
9 Naakali kulya muŋanda yamweendelezi waba Farisi, Jesu wakaamba cikozyanyo capobwe lyacakulya cakumazuba. Mucikozyanyo eeco, wakaamba coolwe ncibakapegwa bantu baindene-indene cakuba mu Bwami bwa kujulu. Alimwi wakaamba kuti Banakristo beelede kwiicita milimo njobapedwe. (Amubale Luka 14:16-21.) Bantu bakatambwa kupobwe mucikozyanyo ca Jesu bakaamba cakabapa kutajanika ooko. Omwe wakaamba kuti uyanda kwaakulanga muunda ngwaakaula. Umwi wakaamba kuti wakaula ŋombe aboobo uyanda kuzyibona. Alimwi umwi wakaamba kuti: ‘Ndakakwata lino, tandikonzyi kuboola.’ Ootu tiitwakali twaambo tubotu. Imuntu iwuula muunda naa banyama uzilangila limwi katanaula, aboobo tiicakali kuyandika kuzilanga alimwi. Ino ncinzi cikonzya kupa kuti muntu wakakwata ino-ino akake kutambwa kupobwe eeli liyandika kapati? Nkakaambo kaako sikubatamba ncaakanyemena.
10 Bantu ba Leza boonse balakonzya kwiiya cintu cimwi kucaano ca Jesu. Ino ciiyo nzi eeco? Tatweelede kulekela zyintu nzyotuyanda mbuli zyeezyi zyaambwa mucikozyanyo ca Jesu kuti zitulesye kucita mulimo uuyandika kapati wakubelekela Leza. Ikuti naa Munakristo wabikkila buyo maano kuzyintu nzyayanda cilakonzya kupa kuti kataciti kabotu mumulimo wakumuuya. (Amubale Luka 8:14.) Kutegwa eeci citacitiki, tutobela majwi aa Jesu aakuti: “Amusaangune kuyandaula Bwami bwa-Leza abululami bwakwe.” (Mt. 6:33) Eelyo kaka cilakkomanisya kubona kuti babelesi ba Leza—ibana abapati—balaatobela malailile mabotu aaya! Ibanji bacinca buumi bwabo kutegwa bacikonzye kucita kabotu mumulimo wabo wakukambauka. Kweelana azyintu zibacitikila, balabona kuti kusaanguna kuyandaula Bwami bwa Leza kulakkomanisya kapati.
11. Ino makani nzi aamu Bbaibbele aamba ncociyandika kubelekela Leza cabusungu alimwi amoyo woonse?
11 Ikutondezya mbociyandika kubeleka cabusungu mumulimo wa Leza, atubone cakacitika ku Mwami Joasi waku Israyeli. Naakabona kuti bana Israyeli balazundwa abana Aramu, Joasi wakaunka kalila kuli Elisha. Musinsimi wakamwaambila kuti afwuse muvwi wakwe ampulungwido kulubazu lwa Aramu kutondezya kuti Jehova uyakubaaba bana Aramu mumaanza aabo. Eeci ceelede kuti cakamukulwaizya mwami. Mpoonya Elisha wakamwaambila Joasi kuti abweze mivwi akwiiyasa ansi. Joasi wakayasa buyo ziindi zyotatwe. Elisha wakanyema kapati akaambo kakuti Joasi tanaakayasa ansi ziindi zyosanwe naa zili cisambomwi, nkaambo naakacita oobo “n[aakab]azunda ba-Aramu mane kubamaninizya.” Aboobo, Joasi wakacikonzya buyo kuzunda ziindi zyotatwe. Akaambo kakuti tanaakacita cabusungu, Joasi tanaakazwidilila kweelana ambwaakeelede. (2 Bam. 13:14-19) Ino ncinzi ncotwiiya kumakani aaya? Jehova uyakutulongezya kapati ikuti katumubelekela amoyo woonse alimwi cabusungu.
12. (a) Ino ncinzi ciya kutugwasya kuzumanana kubelekela Leza cabusungu notuli mumapenzi? (b) Amwaambe mbomugwasyigwa akaambo kakubeleka canguzu mumulimo wakukambauka.
12 Imapenzi aatucitikila mubuumi apa kuti katutabeleki cabusungu mumulimo wa Leza. Ibakwesu abacizyi banji bali aabuyumu-yumu bwa mali. Bamwi balatyompwa akaambo kakuti malwazi alabalesya kucita kabotu mumulimo wa Jehova. Nokuba boobo, aumwi ulakonzya ikusolekesya kutegwa azumanane kubeleka cabusungu alimwi akumutobela Kristo. Amubone twaambo tumwi alimwi amagwalo aali mukabbokesi kakuti: “Ino Ncinzi Ciyakutugwasya Kuzumanana Kumutobela Kristo?” Amubone mbomukonzya kutubelesya twaambo ootu. Ikuti naa mwacita oobo, muya kulongezyegwa ncobeni. Ikubeleka cabusungu mumulimo wamumuunda kulakonzya kupa kuti buumi bwesu bubote akutupa kuti tube aluumuno alukkomano. (1 Kor. 15:58) Kunze lyaboobo, kubelekela Leza amoyo woonse kulakonzya kutugwasya ‘kulangila buzuba bwa Leza.’—2 Pet. 3:12.
Amubone Nzyomucita Mubuumi Bwanu
13. Ino mbuti mbotukonzya kubona ncocaamba kubeleka amoyo woonse?
13 Ncibotu kuyeeya kuti kubeleka amoyo woonse tacaambi kubeleka ciindi cilamfwu mubukambausi. Bukkale bwamuntu aumwi buliindene. Imuntu uubeleka buyo woola lyomwe naa obilo amwezi mumulimo wamumuunda ulakonzya kumukkomanisya Jehova ikuti naa bukkale bwakwe mbobumuzumizya kucita oobu. (Amweezyanisye Marko 12:41-44.) Aboobo, ikutegwa tubone ncocaamba kubelekela Leza amoyo woonse, tweelede kulanga nzyotukonzya kucita. Mbotuli basikumutobela Kristo, aswebo tweelede kuzilanga zyintu mbuli mbwaakali kuzilanga awalo. (Amubale Ba-Roma 15:5; 1 Kor. 2:16) Ino ncinzi Jesu ncaakali kubikka mubusena bwakusaanguna mubuumi bwakwe? Wakaambila makamu aabantu ibaku Kapernauma kuti: “Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.” (Lk. 4:43; Joh. 18:37) Nomuyeeya Jesu mbwaakali kubeleka cabusungu, mweelede kubona nzyomukonzya kucita mubuumi kutegwa mubone naa mulakonzya kucita zinji mumulimo wakukambauka.—1 Kor. 11:1.
14. Ino muunzila nzi motukonzya kuyungizya ciindi mumulimo wesu wakukambauka?
14 Ikubona mbotupona cilakonzya kutugwasya kubona naa inga twayungizya ciindi ncotubeleka mumulimo wamumuunda. (Mt. 9:37, 38) Mucikozyanyo, bakubusi banji ibakamanizya ino-ino cikolo bayungizya ciindi ncobabeleka mumulimo wabo kwiinda mukucita bupainiya bwaciindi coonse. Sena andinywe inga mwacita oobo? Bakwesu abacizyi bamwi balabona kuti balakonzya kuunka kwaakubelekela kubusena kubulide basikumwaya ba Bwami mucisi cabo mweena naa kucisi cimbi. Alimwi ibambi baiya mwaambo umbi kutegwa bagwasye bantu ibaambaula mwaambo ooyo. Nokuba kuti kuyungizya ciindi mumulimo wesu cilakonzya kukatazya, kuli zilongezyo zinji alimwi tulakonzya kugwasya banji “kuboola kuluzibo lwakuziba lusinizyo.”—1 Tim. 2:3, 4; 2 Kor. 9:6.
Zikozyanyo Zili mu Bbaibbele Nzyotweelede Kutobela
15, 16. Ino nzikozyanyo zyabani nzyotukonzya kwiiya kutegwa tube basikumutobela Kristo basungu?
15 Ino mbuti bamwi ibakaba baapostolo mbobakacita Kristo naakabaita kuti bamutobele? Kujatikizya Matayo, Ibbaibbele lyaamba kuti: “Wasia zyoonse, wanyamuka wamucilila.” (Lk. 5:27, 28) Kujatikizya Petro a Andreya ibakali bazubi banswi, tubala kuti: “Mpawo bakasia insabwe zyabo, bakamutobela.” Amane Jesu wakabona Jakobo a Johane ibakali abausyi kabasuma tunsabwe twabo. Ino bakacita buti Jesu naakabatamba? “Mpawo bakasia bwaato awisaabo, bakamutobela.”—Mt. 4:18-22.
16 Cikozyanyo cibotu acimbi nca Saulo iwakazi kuba mwaapostolo Paulo. Nokuba kuti wakali kubapenzya basikumutobela Kristo, wakacinca bukkale bwakwe akuba ‘uusalidwe’ kutegwa atole zyina lya Kristo. “Ndilyonya [Paulo] wakakambauka muzikombelo kuti Jesu Mwana a-Leza.” (Inc. 9:3-22) Alimwi nokuba kuti wakali mumapenzi manji ngaakali kuliyumya, Paulo tanaakaleka kubeleka cabusungu.—2 Kor. 11:23-29; 12:15.
17. (a) Ino ncinzi ncomweelede kucita kutegwa mumutobele Kristo? (b) Ino nzilongezyo nzi nzyotujana akaambo kakucita kuyanda kwa Jehova amoyo woonse?
17 Tweelede kutobela zikozyanyo zyabasikwiiya ba Jesu aaba akuzumina kutambwa kuti tube basikutobela Kristo. (Heb. 6:11, 12) Ino nzilongezyo nzi nzyotujana akaambo kakuzumanana kutobela Kristo? Tulakkomana kapati notucita kuyanda kwa Leza anotupegwa milimo imwi mumbungano. (Int. 40:8; amubale 1 Ba-Tesalonika 4:1.) Masimpe, notusoleka canguzu kumutobela Kristo tulalongezyegwa aluumuno lutamani, tulakkutila, tulatambulwa a Leza akuba abulangizi bwakupona kukabe kutamani.—1 Tim. 4:10.
Sena Muciyeeyede?
• Ino mulimo nzi uuyandika kapati ngotwakapegwa, alimwi ino mbuti mbotweelede kuubeleka?
• Ino nzyintu nzi nzyotweelede kucenjelela, alimwi ino nkaambo nzi?
• Ino ncinzi ncotweelede kulanga-langa?
• Ino ncinzi ciyakutugwasya kuti tuzumanane kutobela Kristo?
[Mibuzyo yaciiyo]
Kabbokesi/[Cifwanikiso icili apeeji 27]
Ino Ncinzi Ciyakutugwasya Kuzumanana Kumutobela Kristo?
▪ Kubala Jwi lya Leza abuzuba akuzinzibala kuyeeya nzyomubala.—Int. 1:1-3; 1 Tim. 4:15.
▪ Kupaila lyoonse kutegwa mugwasyigwe akusololelwa amuuya wa Leza.—Zek. 4:6; Lk. 11:9, 13.
▪ Kumvwana abantu babeleka cabusungu mumulimo wamumuunda.—Tus. 13:20; Heb. 10:24, 25.
▪ Kuzyiba kuti tupona kuciindi camamanino.—Ef. 5:15, 16.
▪ Kuzyiba cikonzya kumucitikila kuti mwacileka kumutobela.—Lk. 9:59-62.
▪ Lyoonse kamuzinzibala kuyeeya cikonke ncimwakacita azilongezyo nzimujana nomubelekela Jehova akutobela Kristo amoyo woonse.—Int. 116:12-14; 133:3; Tus. 10:22.