Ñee cayúninu dxiiñaʼ bisaanané Cristu laanu ne stale gana la?

«[Casi] bisiʼdi du laatu [...] sa tu, ne cayuni tu ni. Yanna rinaba du laatu jma rusi guni tu ni.» (1 TES. 4:1)

1, 2. 1) Xi guiráʼ cosa sicarú biʼyaʼ ca binni bibani ca dxi stiʼ Jesús que. 2) Xiñee laaca galán ca dxi nabáninu riʼ.

 ÑEE huayuudxí guxuíʼluluʼ pabiáʼ galán nibániluʼ ndaaniʼ guidxi Israel dxi bibani Jesús que la? Zándaca ñuuláʼdxiluʼ nusiándabe xiixa guendahuará ni nápaluʼ. O zándaca ñuuláʼdxiluʼ nucaadiágaluʼ laabe ne nusiidibe lii, o ñuuyaluʼ tobi de ca milagru bíʼnibe (Mar. 4:1, 2; Luc. 5:3-9; 9:11). ¡Pabiáʼ galán nga ñuʼnuʼ raqué ne ñácanu tobi de ca binni ni biʼyaʼ guiráʼ ni bíʼnibe! (Luc. 19:37.) Qué huayuuruʼ dxi guʼyaʼ binni guiráʼ ni biiyaʼ ca binni que. Ne ra bixii rini stiʼ Jesús biʼniʼ ti cosa ni qué ziuu dxi guibiguetaʼ gaca: guleebe donda ni napa binni (Heb. 9:26; Juan 14:19).

² Peru laaca galán ca dxi nabáninu riʼ. Xiñee yaʼ. Purtiʼ nabáninu lu ca últimu dxi ni maca bizeeteʼ Biblia (Dan. 12:1-4, 9; 2 Tim. 3:1). Maʼ guleecabe Binidxabaʼ de guibáʼ ne maʼ qué zandaa zaliibibe ne zalabe ndaaniʼ ti «bizé roʼ» (Apo. 12:7-9, 12; 20:1-3). Ne laaca maʼ gucuaanu ti dxiiñaʼ risaca ni qué ziuu dxi guibiguetaʼ gaca: gucheechenu ca diidxaʼ nacubi ne galán stiʼ Reinu lu guidubi naca  Guidxilayú ne gábinu binni zanda guibánicaʼ ndaaniʼ ti paraísu (Mat. 24:14).

3. 1) Xi gudxi Jesús ca discípulo stiʼ ante cheʼ guibáʼ. 2) Xi para chigaca dxiiñaʼ ca.

³ Ante cheʼ Jesús guibáʼ, gúdxibe ca discípulo stibe: «[Zuiʼ]tu stiidxa ndaani guidxi Jerusalén ne idubi Judea ne Samaria ne idubi naca guidxilayú» (Hech. 1:8). Ca diidxaʼ ca cusihuínnicani zaca ti dxiiñaʼ naroʼbaʼ ra guiziidiʼ guiráʼ ca binni ni nuu lu guidubi naca Guidxilayú. Xi para chigaca dxiiñaʼ ca yaʼ. Para gacanécabe binni gaca xpinni Cristu ante guinitilú ca cosa malu nuu lu Guidxilayú riʼ (Mat. 28:19, 20). Xi caquiiñeʼ gúninu para ganda gaca dxiiñaʼ biaananenu ca jneza yaʼ.

4. 1) Xi culuíʼ ca diidxaʼ ni zeeda lu 2 Pedro 3:11, 12 laanu. 2) Xidé caquiiñeʼ gápanu laanu.

⁴ Naquiiñeʼ gusihuínninu nabáninu casi guníʼ apóstol Pedru que: «Lauyubi udii tu idubi xpida tu Dios para guni tu ni na, laga cabeza tu dxi stiʼ» (2 Ped. 3:11, 12). Lu ca últimu dxi riʼ, naquiiñeʼ gataná ca xpinni Dios ni nuu lu guidubi naca Guidxilayú ne gúnicaʼ biaʼ gándatiʼ para gúnicaʼ ni na Dios, casi gucheechecaʼ ca diidxaʼ nacubi ne galán. Cadi dxandíʼ riéchenu nga ora guidúʼyanu stale de ca xpinni Cristu cayúnicaʼ stipa pur gúnicaʼ dxiiñaʼ ni bisaanané Jesús laacaʼ la? Peru caquiiñeʼ gápanu laanu. Cumu nuunu ndaaniʼ guidxilayú ni nuu lu náʼ Binidxabaʼ, ne cumu nácanu binni ruchee la? zanda gucaacani laanu gusaananu de gucheechenu diidxaʼ ne stale gana ne maʼ qué gúninu dxiiñaʼ bisaanané Cristu laanu. Xi caquiiñeʼ gúninu para cadi guizaacanu nga yaʼ.

Gúninu ca dxiiñaʼ gudiicabe laanu ndaaniʼ xquidxi Dios ne stale gana

5, 6. 1) Xiñee guníʼ Pablu cayechené ca xpinni Cristu de Jerusalén, ne xi gúdxibe laacaʼ. 2) Xiñee naquiiñeʼ gusisácanu ca dxiiñaʼ bidii Dios laanu.

⁵ Lu carta stiʼ Hebreos ni bicaa Pablu ra nuu ca xpinni Cristu de Jerusalén, guniʼbe nayecheʼ nuube purtiʼ maʼ zinecaʼ stale iza de qué huasaanacaʼ de gúnicaʼ ni na Dios neca guzanándacabe laacaʼ. Laabe gúdxibe laacaʼ: «Laguietenalaʼdxi dxi nacubi binibiáʼ tu stiidxa Cristu, qué nixhacalaʼdxi tu, neca nabé naná ni udiʼdi tu». Riquiiñeʼ ñánnacabe qué zusiaandaʼ Jiobá guiráʼ ni bíʼnicabe pur cadi cusaanacabe laa (Heb. 6:10; 10:32-34). Ca diidxaʼ ni guníʼ apóstol que guluu cani gana ca xpinni Cristu que. Peru lu carta que laaca gúdxibe laacaʼ, para cadi gusaanacaʼ de gúnicaʼ xhiiñaʼ Dios ne stale gana la? caquiiñeʼ gúnicaʼ stipa para cadi guiábacaʼ lu ti trampa ra riaba stale binni: rireenecaʼ stale pretextu para cadi gúnicaʼ xhiiñacaʼ. Gúdxibe laacaʼ gápacaʼ laacaʼ ti cadi guireenecaʼ intiica cosa para gusaana de gucaadiágacaʼ Dios (Heb. 12:25).

⁶ Ca diidxaʼ ca laaca zacanécani laanu yanna riʼ cásica gucaneni ca xpinni Cristu dxiqué. Ca xpinni Cristu cadi naquiiñeʼ guyúbinu pretextu para cadi gúninu dxiiñaʼ bisaanané Dios laanu. Cadi naquiiñeʼ gúʼyanu ni casi xiixa ni qué risaca ne cadi gudiʼnu lugar chuʼ xiixa ni cuee gana laanu de gúninu dxiiñaʼ riʼ (Heb. 10:39). Cadi guiaandaʼ laanu nuu xquendanabani binni ra naxoo (1 Tim. 4:16).

7, 8. 1) Xi zacané laanu cadi gusaana de gúninu ni na Dios ne stale gana. 2) Xi naquiiñeʼ guietenaláʼdxinu pa gudiʼnu cuenta maʼ cadi cayúninu xhiiñaʼ Dios cásica dxiqué.

⁷ Xi zanda gacané laanu para cadi gusaana de gúninu ca dxiiñaʼ gudiicabe laanu ndaaniʼ xquidxi Dios sin quíxhenu intiica pretextu yaʼ. Primeru la? cadi naquiiñeʼ gusaana de guiníʼ íquenu ni guninu dxi bidiʼnu laanu Jiobá. Dxi que, gúdxinu laabe, ni jma risaca lu xquendanabáninu nga gúninu ni nabe ne dxandíʼ racaláʼdxinu gúninu ni gúdxinu laabe que (biindaʼ Mateo 16:24). Nga runi, galán guinabadiidxanu laca laanu gatigá: «Ñee racaláʼdxeruaʼ guneʼ ni na Jiobá yanna  cásica dxi bidieeʼ stiidxaʼ laabe ne guyuaanisaʼ la? O maʼ huaxiéʼ runeʼ ni na Jiobá ra zidiʼdiʼ iza».

⁸ Pa ra guiníʼ ique chaahuinu ximodo nuunu gudiʼnu cuenta maʼ cadi cayúninu xhiiñaʼ Dios casi dxiqué la? guietenaláʼdxinu ca diidxaʼ ni guníʼ Sofonías ti cúʼcani gana laanu. Laabe guniʼbe: «Cadi gudiiluʼ lugar guiaba naluʼ. Jiobá Dios stiluʼ nuu ládetu. Casi tobi ni napa stale poder zulá laatu. Ziechenebe lii» (Sof. 3:16, 17). Ca diidxaʼ riʼ gucuá cani para ca israelita ni guyuu de esclavu ndaaniʼ guidxi Babilonia ne despué bibiguetaʼ Jerusalén. Peru laaca zanda uguucani gana laanu yanna. Cadi guiaandaʼ laanu Jiobá nga cayabi laanu gúninu xhiiñaʼ, racanebe laanu ne racané Xiiñibe laanu; laacabe zudiicabe stipa ni caquiiñenu ti ganda gúninu guiráʼ dxiiñaʼ gudiicabe laanu ndaaniʼ neza binni ridagulisaa (Mat. 28:20; Fili. 4:13). Pa gúninu xhiiñaʼ Dios ne stale gana la? zaguube ndaayaʼ laanu.

«Cadi gusaana[n]u de guyúbi[n]u primeru reinu stiʼ Dios»

9, 10. Xi bisihuinni historia ni guníʼ Jesús de binni ni biʼniʼ ti guendaroxhi, ne xi rusiidini laanu.

⁹ Laga cayócabe ralidxi ti xaíque stiʼ ca fariseu, guníʼ Jesús ti historia stiʼ ti binni ni biʼniʼ ti guendaroxhi. Lu historia que bisihuínnibe guca invitar stale binni guni mandárnecaʼ Cristu lu Reinu stiʼ guibáʼ. Ne laaca bisihuínnibe lu historia que nabé ruyubi binni pretextu para cadi guni xiixa (biindaʼ Lucas 14:16-21). Cani guca invitar lu historia ni guníʼ Jesús que, gudíxhecabe gadxé gadxé pretextu para cadi chécabe ra guca guendaroxhi que: tobi guníʼ casi guzíʼ ti layú ne napa xidé chiguuyaʼ ni; stobi na chiguuyaʼ ca yuze ni guzíʼ ne stobi que na qué zanda cheʼ purtiʼ deruʼ bichaganáʼ. Nin qué risaca ca pretextu gudixhe ca binni riʼ. Xiñee yaʼ. Purtiʼ ante siʼ binni ti layú primeru riguuyaʼ ni ne ante siʼ ti maniʼ primeru riguuyaʼ laame. Ngue runi, cadi caquiiñeʼ chiguuyabe ni guzíʼcabe que. Ñee dxandíʼ nga qué zanda guicaa ti binni ni deruʼ bichaganáʼ ti invitación nabé risaca la? Ngue runi, ¡nabé bidxiichi binni ni biʼniʼ invitación que!

¹⁰ Rizíʼdinu ti cosa lu historia riʼ: qué chuʼ dxi gudiʼnu lugar gucueeza guiráʼ cani racaláʼdxinu laanu de gúninu xhiiñaʼ Jiobá, casi ca binni guníʼ Jesús que. Pa guicá íquenu gúninu ca nga la? chaahuidugá maʼ qué zúninu xhiiñaʼ Dios ne stale gana (biindaʼ Lucas 8:14). Para cadi guizaacanu zacá, naquiiñeʼ gúninu ni guníʼ Jesús riʼ: «Cadi gusaanatu de guyúbitu primeru reinu stiʼ Dios ne gúnitu ni jneza ni rinabaʼ Dios laatu» (Mat. 6:33, NM). ¡Nabé riéchenu ora ridúʼyanu stale xpinni Cristu nahuiiniʼ naróʼ zinándacaʼ conseju riʼ! Ne stale tu laa maʼ gudixhe ique guchaa modo nabani ti ganda guni jma lu xhiiñaʼ Jiobá. Zacá huayuuyacabe gástiruʼ sti cosa ni jma rusiecheʼ laacabe que quixhe íquecabe gúnicabe xhiiñaʼ Reinu.

11. Xi relatu cusihuinni nabé risaca nga gúninu xhiiñaʼ Dios de guidubi ladxidoʼno.

¹¹ Para ganda guiénenu pabiáʼ risaca nga gúninu xhiiñaʼ Dios ne stale gana la? guidúʼyanu xi bizaaca rey Jehoás de guidxi Israel. Guyuu reinu stibe ra naxoo purtiʼ ca binni de Siria guyuucaʼ nicaacaʼ ni, ngue runi guyebe ra nuu Eliseo ne dede daʼ nisa lube gunábabe laa gacané laabe. Eliseo gudxi laabe gundaabe ti flecha neza ra ventana neza ra nuu guidxi Siria. Ni bíʼnibe que bisihuinni zacané Jiobá laabe guni ganarbe enemigu que. Ni guca riʼ naquiiñeʼ niguuni gana laabe. Peru gúcani zacá la? Coʼ. Purtiʼ ora gudxi Eliseo laabe guicaabe ca flecha que ne ugázebe cani layú, Jehoás biʼniʼ ni chonna si biaje. Ni riguixhená que bidxiichi, purtiʼ para ñanda nusábacabe Siria de nunduuxecabe laa la? naquiiñeʼ nuchéndabe cani layú biaʼ gaayuʼ o xhoopaʼ biaje. Cumu huaxiéʼ gana  nápabe la? chonna si biaje gunda biʼniʼ ganarbe peru qué nunduuxebe guidxi que (2 Rey. 13:14-19). Xi rusiidiʼ relatu riʼ laanu yaʼ. Pa racaláʼdxinu uguu Jiobá ndaayaʼ laanu, caquiiñeʼ gúninu xhiiñabe de guidubi ladxidoʼno.

12. 1) Xi zanda gúninu para cadi cuee ca guendanagana ridxaagalunu gana laanu de gucheechenu diidxaʼ. 2) Xi huabeenduluʼ ra qué huasaana de gucheecheluʼ diidxaʼ.

¹² Ca guendanagana ni ridxaagalunu lu xquendanabáninu ca, rucaacani laanu gusihuínninu pa rúninu xhiiñaʼ Dios ne stale gana ne pa cayuni adorarnu laabe casi racaláʼdxibe. Stale xpinni Cristu cadíʼdicaʼ ra nagana purtiʼ qué gápacaʼ bueltu. Xcaadxi nápacaʼ xiixa guendahuará ni rucueeza laacaʼ de gúnicaʼ xhiiñaʼ Jiobá biaʼ ñuuláʼdxicaʼ. Peru nuu stale cosa ni zanda gúninu para chinándanu Cristu sin guireʼnu gana. Nga runi, galán guidúʼndanu ca conseju ne ca textu ni zeeda lu cuadru ra na «Cani zanda gacané laanu para cadi gusaana de chinándanu Cristu» ne guiníʼ íquenu ximodo zanda gúninu cani lu xquendanabáninu. Stale cosa nga ni zabeendunu. Pa qué gusaana de gucheechenu diidxaʼ la? zúnirunu ni rinabaʼ Dios laanu, zatadxí ladxidoʼno, zabáninu tobi si ne ziuʼnu nayecheʼ (1 Cor. 15:58). Ne laaca racaneni cadi guiaandaʼ laanu dxi stiʼ Jiobá (2 Ped. 3:12).

Guiduʼyaʼ chaahuinu ximodo nuunu

13. Xi zacané laanu gánnanu pa cayúninu xhiiñaʼ Dios de guidubi ladxidoʼno.

¹³ Peru cadi purtiʼ si rúninu stale hora ra rucheechenu diidxaʼ guininu cayúninu dxiiñaʼ ca ne stale gana. Xiñee yaʼ. Purtiʼ cadi guiráʼ diʼ ca xpinni Cristu zanda gúnicaʼ dxiiñaʼ riʼ cásica runi xcaadxi ni. Zándaca ti xpinni Cristu gucheeche diidxaʼ ti hora o chupa hora lu ti beeu ne gusiecheʼ Jiobá biaʼ cayuni, pa biaʼ ca nga zanda gúnibe pur xiixa guendahuará ni nápabe (zanda gúʼndaluʼ Marcos 12:41-44). Nga runi, cada tobi de laanu naquiiñeʼ guʼyaʼ chaahuiʼ xi zanda guni ne ximodo nuu ti guʼyaʼ pa cayuni ni na Dios de guidubi ladxidóʼ. Ne cumu nácanu discípulo stiʼ Cristu, racaláʼdxinu gácanu cásica maestru stinu (biindaʼ Romanos 15:5; 1 Cor. 2:16). Xi jma gucuá ique Cristu guni yaʼ. Laca laabe bicábibe ora gúdxibe ca  binni de Capernaum sicaríʼ: «Napa xidé chaa xcaadxi guidxi. Chi güe nia binni modo runi mandar Dios, purti para nga bendáʼ» (Luc. 4:43; Juan 18:37). Ra guidúʼyanu guiráʼ stipa biʼniʼ Jesús para bicheeche diidxaʼ, zacaneni laanu gánnanu pa zanda gúninu jma lu xhiiñaʼ Reinu (1 Cor. 11:1).

14. Xi zanda gúninu para gucheechenu diidxaʼ jma.

¹⁴ Ora guiduʼyaʼ chaahuinu ximodo nuunu zudiʼnu cuenta zanda gucheechenu diidxaʼ jma (Mat. 9:37, 38). Zacá huayuni mil de hombrehuiiniʼ ne dxaapahuiiniʼ ni maʼ binduuxeʼ scuela ne yanna maʼ nácacaʼ precursor ne rucheechecaʼ diidxaʼ ne stale gana. Ñuuláʼdxiluʼ ñuni sentirluʼ ni runi sentírcabe ca la? Nuu xpinni Cristu huaguixhe íquecaʼ chindézacaʼ sti ladu ra jma caquiiñeʼ chuʼ tu gucheeche diidxaʼ ne huayúnicabe ni ndaaniʼ xquídxicabe o ndaaniʼ sti guidxi. Xcaadxi huaziidicaʼ sti diidxaʼ para ganda gacanecaʼ ca binni ni zeeda de sti ladu ni nabeza neza ra rucheechecaʼ diidxaʼ. Ora quixe íquenu gúninu jma lu xhiiñaʼ Jiobá zándaca gácani nagana para laanu, peru laaca ricaanu stale ndaayaʼ ne tobi de ca ndaayaʼ ca nga gacanenu jma binni «ganna ca ni dxandíʼ» (1 Tim. 2:3, 4; 2 Cor. 9:6).

Ca ejemplu ni rieeteʼ lu Biblia ni zanda chinándanu

15, 16. Bizeeteʼ ejemplu stiʼ caadxi binni ni yenanda Cristu.

¹⁵ Guiníʼ íquenu de chupa chonna de ca hombre ni beeda gaca apóstol stiʼ Jesús. Xi bíʼnicabe ora gucuaacabe invitación de gueeda gácacabe discípulo stibe yaʼ. «Oraqueca biasa, [Mateu] bisaana irá ngue, zinanda laabe.» (Luc. 5:27, 28.) Pedru ne Andrés chupa hombre runi guuzeʼ «oraqueca bisaana ca tarraya stica zinanda ca laabe». Despué, ora yendá Jesús ra nuu Santiago ne Juan dxi cayuni chaahuinecaʼ bixhózecaʼ tarraya, «oraqueca bisaana[caʼ] bixhoze[caʼ] ne bisaana[caʼ] canuá que, zinanda[caʼ]» laabe (Mat. 4:18-22).

¹⁶ Sti ejemplu galán ni nápanu nga stiʼ Saulo, hombre ni beeda gaca apóstol Pablu. Neca guzanándabe ca xpinni Cristu, bichaabe modo nabánibe ne gulí Jesús laabe para chigüibe de laa. Relatu que na: «Qué nindaa de ngue bizulú be byuíʼ be stiidxa Jesús ndaani ca yuʼduʼ, cayabi be binni Jesús nga Xiiñi Dios» (Hech. 9:3-22). Neca gudíʼdibe lu stale guendanagana ne guzanándacabe laabe qué ñuu dxi nusaana de nucheechebe diidxaʼ ne stale gana (2 Cor. 11:23-29; 12:15).

17. 1) Xi racaláʼdxiluʼ gúniluʼ para cadi gusaana de chinándaluʼ Cristu. 2) Xi zabeendunu pa gúninu ni na Dios de guidubi ladxidoʼno.

¹⁷ Guiranu racaláʼdxinu chinándanu ejemplu stiʼ ca xpinni Cristu riʼ ne guicaanu invitación stiʼ Cristu de guidubi ladxidoʼno (Heb. 6:11, 12). Xi ndaayaʼ zacaanu pa qué gusaana de chinándanu laabe yaʼ. Zadxá tipa ladxidoʼno purtiʼ cayúninu ni canabaʼ Dios laanu, zúninu jma ndaaniʼ neza binni ridagulisaa ne zuyúbinu modo gucheechenu diidxaʼ jma (Sal. 40:8; biindaʼ 1 Tesalonicenses 4:1). Pa gúninu stipa pur chinándanu Cristu de guidubi ladxidoʼno la? zabeendunu stale cosa: ziuʼnu nayecheʼ, zatadxí ladxidoʼno, ziuulaʼdxiʼ Dios ni cayúninu ne zanda cuézanu gudii Dios laanu ti guendanabani ni qué zaluxe (1 Tim. 4:10).

Rietenalaʼdxuʼ la?

• Xi dxiiñaʼ nabé risaca gucuaanu ne ximodo naquiiñeʼ guidúʼyanu ni.

• Gunáʼ nga trampa ra riaba stale binni ni naquiiñeʼ gápanu laanu ne xiñee.

• Xiñee galán guiníʼ ique chaahuinu ximodo nuunu.

• Xi zacané laanu cadi gusaana de chinándanu Cristu.

[Guendarinabadiidxaʼ stiʼ párrafo]

[Cuadro ne dibuju/foto ni zeeda lu yaza 27]

Cani zanda gacané laanu para cadi gusaana de chinándanu Cristu

▪ Guidúʼndanu Stiidxaʼ Dios guiráʼ dxi ne guiníʼ íquenu de laani (Sal. 1:1-3; 1 Tim. 4:15).

▪ Cadi gusaana de guinábanu Dios gacané laanu ne gudii espíritu stiʼ laanu (Zac. 4:6; Luc. 11:9, 13).

▪ Guyúbinu guidxaaganu cani rucheeche diidxaʼ ne stale gana (Pro. 13:20; Heb. 10:24, 25).

▪ Naquiiñeʼ gánnanu xi tiempu nabáninu (Efe. 5:15, 16).

▪ Naquiiñeʼ gánnanu xi zazaaca pa quíxhenu pretextu (Luc. 9:59-62).

▪ Galán guiníʼ íquenu gatigá ni guninu dxi bidiʼnu laanu Dios ne guiráʼ ca ndaayaʼ ni ricaa binni pur guni ni na Jiobá ne chinanda Cristu de guidubi ladxidóʼ (Sal. 116:12-14; 133:3; Pro. 10:22).