Kantsi Vele Ukuphi Nkulunkulu?

Bekungu-September 11, 2001, nga-8:46 ekuseni, ngesikhatsi indiza ishayisa umbhoshongo losenyakatfo wetakhiwo letimbili taseNew York City lowatiwa ngekutsi yi-World Trade Center, lokwaba sehlakalo sekucala sekuhlasela kwemaphekula kuletinyenti letalandzela. Ngemva kwemizuzu lengetulu kwalengu-102, kwase kufe bantfu cishe labangaba ngu-3 000.

December 26, 2004

Kutamatama kwemhlaba lokunesisindvo lesingu-9.0 magnitude, kwenteka ekhatsi nelwandle lolwatiwa ngekutsi yi-Indian Ocean. Lolwandle lwakhulula emagagasi lanemandla nalayingoti ate efika emaveni langu-11, lokufaka ekhatsi emave lase-Afrika lakhashane ngemakhilomitha langaba ngu-5 000 nawusuka endzaweni lapho kwacala khona lokutamatama. Ngelilanga linye nje vo! kwafa bantfu labangu-150 000 labanye balahleka, futsi labangetulu kwesigidzi basala bete indzawo yekufihla inhloko.

Nga-August 1, 2009: Indvodza leyayineminyaka lengu-42 budzala yayikhwele sidududu saselwandle nendvodzana yayo leneminyaka lesihlanu budzala ngalesikhatsi bashayisa indzawo yekubopha imikhumbi kutsi ingahambi nemoya. Lobabe wafa. Indvodzana yakhe kwembulwa kwembeswa, kwatsi ngakusasa nayo yafa. Umshana walobabe watsi: “Besinelitsemba lekutsi kutawenteka simangaliso, [umfana] elulame.”

Nawufundza ngekuhlasela kwemaphekula nobe ufundza ngetehlakalo temvelo nobe uvelelwa sehlakalo lesibuhlungu, uyatibuta kutsi Nkulunkulu uyakubona yini loko lokwentekako? Uyatibuta kutsi kantsi Nkulunkulu sewusilahlile yini vele? LiBhayibheli linemphendvulo leyenetisako, njengobe sitakubona loko.

[Emavi laveta Umtfombo wesitfombe ekhasini 3]

© Dieter Telemans/Panos Pictures

PRAKASH SINGH/AFP/Getty Images

© Dieter Telemans/Panos Pictures