Nso ke Abasi Anam?

“O Jehovah, nsinam afo adade anyan ebiet? Nsinam edịbede ke ini nnanenyịn?” *—PSALM 10:1.

IKPÎKPU editop enyịn nse mme ibuotikọ mbụk n̄kpọntịbe ọsọn̄ọ ke nnyịn idu uwem ke “ini nnanenyịn.” Ndien ke ini n̄kpọ mmọn̄eyet etịbede ke ufọk nnyịn—oro edi, ke ini mme abiatibet ẹfiomode nnyịn, ke ini isobode mbabuat n̄kpọntịbe, m̀mê ke ini owo nnyịn akpade—nnyịn n̄ko imekeme ndibụp ite, Ndi Abasi okụt se iwọrọde mi? Ndi enye ekere aban̄a mi? Mmọn̄ọ, ndi enye akam ododu?

Edi ndi emekere ke ekeme ndidi se nnyịn iyomde Abasi anam oto ekikere emi mînenke? Ke uwụtn̄kpọ: Kere ban̄a ekpri eyen oro ayatde esịt ke ntak emi ete esie akade utom. Enye oyom ete esie ọnyọn̄ edi ufọk sia enen̄erede ọdọn̄ enye ndikụt ete esie. Eyen oro ekere ke ẹkpọn̄ imọ. Enye obụp ofụri usen oro ndien ndien ete, “Papa?”

Nnyịn imekeme ndisọsọp n̄kụt ke ekikere eyen oro inenke. Imọfiọk ke ete esie aka utom oro man ọnọ se ubon mmọ ẹyomde. Okûdi ekikere nnyịn ekeme nditie ntre ke ini ibụpde ite, “Abasi odu m̀mọ̀n̄”?

Ke uwụtn̄kpọ, ndusụk owo ẹkeme ndikere nte Abasi ekpedide andisobo emi akpan utom esie edide ndisọsọp nnọ anamidiọk ufen. Mbon en̄wen ẹda Abasi nte okpon-ubọk enọ, emi esitiede ke heaven ọnọ mme owo enọ—utọ nte utom, nsan̄a ndọ, m̀mê ndikam n̄n̄wam owo adia ke mbre mfọniso.

Ekikere mbiba ẹwụt ke edieke Abasi mîtreke ukwan̄ido m̀mê edieke enye mînọhọ nnyịn se iben̄ede, do ọwọrọ ke enye ikereke iban̄a ndutụhọ oro isobode, inyụn̄ ifiọkke se inanade nnyịn. Edi emi idịghe akpanikọ! Se idude edi nte ke idem idahaemi, Jehovah Abasi ke anam n̄kpọ man ọnọ ofụri ubonowo se mmọ ẹyomde, edi idịghe nte ediwak owo ẹben̄ede.

Ntre, nso ke Abasi anam? Man ibọrọ mbụme oro, oyom iti se iketịbede ke ntọn̄ọ ntọn̄ọ ubonowo ke ini ẹkenen̄erede ẹbiat itie ufan owo ye Abasi—edi idịghe taktak.

Utịp Idiọkn̄kpọ

Kere ban̄a ufọk emi atahade ke ediwak isua. Ọkọm ataha ama, usụn̄ ẹma ẹkịbe ẹduọn̄ọ, ẹma ẹnyụn̄ ẹbiat ibibene an̄wa. Odu ini emi ufọk emi ekeyede—edi iyehe aba. Ima ikere adan̄a nte ufọk emi abiarade, ndifiak ndiọn̄ ididịghe ifia ubọk kiet; ayada ini.

 Idahaemi, kere ban̄a nte ubonowo akabiarade ke n̄kpọ nte isua 6,000 emi ẹkebede ke ini Satan, emi edide spirit oro enyịn mîkwe, akatapde Adam ye Eve ẹsọn̄ ibuot ye Abasi. Mbemiso ini oro, Adam ye Eve ẹma ẹnyene mfọnmma nsọn̄idem ẹnyụn̄ ẹnyene idotenyịn ndidu uwem ke nsinsi ye nditọ mmọ oro ẹkenyenede ndimana ke ini iso. (Genesis 1:28) Edi ke ini mmọ ẹkenamde idiọk, eketie nte ke Adam ye Eve ẹbiat ubonowo oro mîkamanake kan̄a.

Kûda utịp nsọn̄ibuot oro ke ekpri n̄kpọ. Bible ọdọhọ ete: ‘Idiọkn̄kpọ okoto owo kiet [Adam] odụk ke ererimbot, n̄kpa onyụn̄ oto ke idiọkn̄kpọ oro odụk.’ (Rome 5:12) Ke ẹsiode n̄kpa oro idiọkn̄kpọ adade edi ẹfep, idiọkn̄kpọ iyakke idi ufan ye Andibot, inyụn̄ iyakke nnyịn ifọn ima. Emi anam nnyịn itie nte ntaha ufọk oro. Job, emi ekedide edinen owo, ama etịn̄ nte idaha nnyịn etiede ke ini enye ọkọdọhọde ke owo “omụhọ usen, onyụn̄ oyụhọ ukụt.”—Job 14:1.

Edi ndi Abasi ama ọkpọn̄ ubonowo ke Adam ye Eve ẹma ẹkenam idiọkn̄kpọ? Baba! Ke nditịm ntịn̄, tutu esịm emi, Ete nnyịn eke heaven ke anam n̄kpọ ọnọ ubonowo. Man inen̄ede ifiọk se enye anamde ọnọ nnyịn, kere ban̄a n̄kpọ ita oro anade ẹnam man ẹdiọn̄ ufọk oro ye nte mmọ kiet kiet ẹnyenede ebuana ye se Abasi anamde man anam ubonowo afiak ọfọn ama.

1 Andinyene ama asan̄a ese ufọk, ana enye ebiere m̀mê ididọdiọn̄ m̀mê idiwowụri ufọk oro.

Ke ndondo oro ẹkesọn̄de ibuot ke Eden, Jehovah Abasi ama etịn̄ uduak esie ndinam ubonowo afiak ọfọn ama. Enye ọkọdọhọ spirit oro enyịn mîkwe, oro ekesịnde nsọk ọnọ nsọn̄ibuot oro, ete: “Nyesịn usua ke ufọt fo ye n̄wan ye ke ufọt mfri fo ye mfri esie. Enye ayanuak fi ibuot, afo oyonyụn̄ anuak enye nditịn̄ikpat.”—Genesis 3:15, NW.

Jehovah akada ikọ emi ọn̄wọn̄ọ ke iyosobo owo emi ekesịnde nsọk ọnọ nsọn̄ibuot oro ke Eden. (Rome 16:20; Ediyarade 12:9) N̄ko-n̄ko, Jehovah ama etịn̄ ke “mfri” ini iso ayafak ubonowo osio ke idiọkn̄kpọ. * (1 John 3:8) Jehovah ama etịn̄ in̄wan̄-in̄wan̄ se imọ idinamde: Imọ iyom ndidọdiọn̄, iyomke ndiwowụri edibotn̄kpọ imọ. Edi ayada ini mbemiso ẹnamde ubonowo afiak ọfọn ama.

2 Ewet mbuwed ufọk ewet ofụri ofụri nte ufọk oro editiede ẹma ẹdiọn̄ ẹma.

Jehovah Abasi ama ọnọ nditọ Israel mme ibet onyụn̄ ọnọ mbuwed temple, kpa ebiet emi mmọ ẹkenyenede ndituak ibuot nnọ enye. Bible ọdọhọ ete: “Mme n̄kpọ oro ẹdi mbukpọn̄ n̄kpọ eke edidide.” (Colossae  2:17) Mmọ ẹkeda ẹban̄a akamba n̄kpọ, ukem nte mbuwed ufọk.

Ke uwụtn̄kpọ, nditọ Israel ẹma ẹsiwa uwa unam man ẹfen mme idiọkn̄kpọ mmọ. (Leviticus 17:11) Edinam oro akada aban̄a akamba uwa oro ẹkenyenede ndiwa ke ata ediwak isua ẹma ẹkebe—kpa uwa emi edinọde ubonowo ata edinyan̄a. * Nte ataya ye temple oro nditọ Israel ẹkesituakde ibuot ẹketiede akada aban̄a se Messiah edinamde, ọtọn̄ọde ke ini emi enye edikpade n̄kpa uwa tutu esịm ini emi enye ọnyọn̄de heaven.—Se chart ke page 7.

3 Ẹmek ọbọpufọk emi editienede mbuwed udiọn̄ ufọk oro.

Jesus ekedi Messiah oro ẹken̄wọn̄ọde, emi edinamde n̄kpọ ekekem ye uwa oro nditọ Israel ẹkesiwade onyụn̄ ọnọ uwem esie man afak ubonowo. Ke akpanikọ, John Andinịm Owo Baptism okokot Jesus “Eyenerọn̄ Abasi oro emende mme idiọkn̄kpọ ererimbot efep.” (John 1:29) Jesus ama enyịme ndikpa. Enye ọkọdọhọ ete: “N̄kotoho ke heaven nsụhọde ndi ndinam uduak idemmi, edi ndinam uduak enye emi ọkọdọn̄de mi.”—John 6:38.

Abasi akaduak Jesus “ọnọ ukpọn̄ esie nte ufak ke ibuot ediwak owo” onyụn̄ anam ediomi kaban̄a Obio Ubọn̄ ye mme anditiene enye. (Matthew 20:28; Luke 22:29, 30) Obio Ubọn̄ oro ke Abasi edida anam se enye akaduakde aban̄a ubonowo. Ẹkot etop oro aban̄ade Obio Ubọn̄ Abasi “eti mbụk” sia enye anam ifiọk ke Abasi ọmọtọn̄ọ ukara ke heaven emi edikarade isọn̄!—Matthew 24:14; Daniel 2:44. *

Utom Edinam Mme Owo Ẹfọn Ẹma ke Aka iso

Mbemiso Jesus akafiakde ọnyọn̄ heaven, enye ama owụk mme anditiene enye ete: “[Ẹnam] mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit . . . Ndien, sese! Ami ndodu ye mbufo kpukpru usen tutu esịm utịt editịm n̄kpọ emi.”—Matthew 28:19, 20.

Ntre, n̄kpa Jesus iketreke utom edinam mme owo ẹfọn ẹma. Enye ayaka iso tutu esịm “utịt editịm n̄kpọ emi”—kpa ini emi Obio Ubọn̄ Abasi editọn̄ọde ndikara isọn̄ nnyịn. Ini oro enen̄ede ekpere. Ifiọk emi sia idiọn̄ọ oro Jesus ọkọnọde aban̄a “utịt editịm n̄kpọ emi” ke osu idahaemi. *—Matthew 24:3-14; Luke 21:7-11; 2 Timothy 3:1-5.

Mfịn, Mme Ntiense Jehovah ke ẹnam ewụhọ Jesus ke ndikwọrọ eti mbụk Obio Ubọn̄ Abasi ke idụt 236. Ke nditịm ntịn̄, ẹsio magazine emi afo okotde mi man an̄wam fi ekpep ekese aban̄a Obio Ubọn̄ oro ye se enye edinamde. Afo oyokụt ke ẹwet ikọ emi ke page 2 ke kpukpru nsiondi Enyọn̄-Ukpeme: “Magazine emi . . . ada eti mbụk ọdọn̄ kpukpru owo esịt nte ke ibịghike Obio Ubọn̄ Abasi, emi edide ata ukara ke heaven, eyetre kpukpru idiọkido onyụn̄ anam isọn̄ akabade edi Paradise. Enye esịn udọn̄ ọnọ nnyịn ete inyene mbuọtidem ke Jesus Christ, emi akakpade man nnyịn ikpenyene nsinsi uwem, emi onyụn̄ edide Edidem oro akarade idahaemi ke Obio Ubọn̄ Abasi.”

Edi akpanikọ ke afo emekeme ndisụk n̄kop mban̄a mme edinam oyomonsia m̀mê mme oto-obot afanikọn̄, mîdịghe n̄kpọ mmọn̄eyet ekeme ndiwọrọ fi ọkpọkpọ. Edi edieke ekpepde Bible, afo ọyọfiọk ke Abasi ikpọn̄ke ubonowo. Edi ke ‘enye iyomke usụn̄ ikpọn̄ owo nnyịn kiet kiet.’ (Utom 17:27) Ndien enye ayanam se enye ọn̄wọn̄ọde ndinam man inyene se akpa ete ye eka nnyịn ẹkeduọkde.—Isaiah 55:11.

[Mme Ikọ Idakisọn̄]

 [Chart/Ndise emi ke page 7]

(Ama oyom ndikụt nte enye enen̄erede etie, se idem n̄wed)

“Mbiet Ata Idem N̄kpọ”—Se Ataya Akadade Aban̄a

ITIEUWA

Abasi ndinyịme ndibọ uwa Jesus.—MME HEBREW 13:10-12.

AKWA OKU

Jesus.—MME HEBREW 9:11.

1 Akwa oku ama esiwa uwa kaban̄a idiọkn̄kpọ mme owo ke Usen Usio-Isop.—LEVITICUS 16:15, 29-31.

1 Ke Nisan 14, 33 E.N., Jesus ama awa uwem esie ke ibuot nnyịn.—MME HEBREW 10:5-10; 1 JOHN 2:1, 2.

EDISANA

Edibon Jesus ke spirit.—MATTHEW 3:16, 17; ROME 8:14-17; MME HEBREW 5:4-6.

IKPEHE

Ikpọkidem Jesus emi akabaharede uwem isọn̄ ye uwem eke heaven.—1 CORINTH 15:44, 50; MME HEBREW 6:19, 20; 10:19, 20.

2 Akwa oku ama esibe odụk edem ikpehe oro abaharede Edisana ye Ata Edisana.

2 Ke Jesus ama ekeset ke n̄kpa, enye ama ebe odụk ndamban̄a edem ikpehe eken ke ndidọk ndụk heaven “man enye ke emi akpada ke iso Abasi kaban̄a nnyịn.”—MME HEBREW 9:24-28.

ATA EDISANA

Heaven.—MME HEBREW 9:24.

3 Akwa oku ama odụk Ata Edisana, enye ama esịme ndusụk iyịp uwa ke iso ekebe ediomi. —LEVITICUS 16:12-14.

3 Ke ini Jesus akayakde ufọn iyịp oro enye ọkọduọkde ọnọ Abasi, enye ama osio isop idiọkn̄kpọ nnyịn edifọn edifọn.—MME HEBREW 9:12, 24; 1 PETER 3:21, 22.