Eme Ọghẹnẹ O bi Ru?

“O ỌNOWO! eme who je there omẹ abọ? Eme who je si oma no omẹ eva oke ukpokpoma?”—OLEZI 10:1.

OHWO o te rri izoẹme iyẹrẹ evaọ obe-usi hayo etẹlivisiọne, ọ rẹ ginẹ ruẹ inọ ma be rria “oke ukpokpoma.” Yọ oware uyoma u te te omai oma—wọhọ ethube, asidẹnte, hayo uwhu omoni mai—ma rẹ sae nọ inọ, Kọ Ọghẹnẹ ọ be ruẹ onana? Kọ ọ be daezọ mai? Kọ ọ tubẹ rrọ dede?

Kọ whọ sai roro no ẹdẹjọ inọ ẹsejọhọ ma sai wo eriwo ọthọthọ evaọ oghẹrẹ eware nọ ma re rẹro rai mi Ọghẹnẹ? Wọhọ oriruo: Dai roro kpahe ọmaha nọ eva e be dha inọ ọsẹ riẹ o n’uwou siẹe ba kpohọ iruo. Ẹro ọsẹ na o bi vo ọmọ na, ọ be jọ udu riẹ roro inọ dodokọ ọsẹ na o re si obọ no iruo na kpozi. Ọmọ na ọ rehọ e riẹ nọ ọsẹ na o gbabọkẹe. Okpẹdẹ na kpobi, o bi dhe ẹnẹnọ inọ, “Kọ ọsẹ mẹ rrọ?”

Ma rẹ nwane ruẹ inọ iroro ọmọ na e thọ. Whaọ, ọsẹ riẹ ọ rrọ obọ iruo be dhogbo epanọ ọ rẹ rọ ko uviuwou na. Kọ o sae jọnọ eriwo ọthọthọ ọ be hae lẹliẹ omai nọ ẹsejọ na inọ, “Kọ bovẹ Ọghẹnẹ ọ rrọ”?

Wọhọ oriruo, ahwo jọ a sae gwọlọ nọ Ọghẹnẹ ọ hae rọ uye kẹ ahwo nọ a ru eyoma ẹsiẹsiẹe. Amọfa a sai roro nọ Ọghẹnẹ yọ ohwo nọ o re ku ekẹ ku ahwo—nọ o re fi obọ họ kẹ ohwo duku iruo, wo ọzae hayo aye, hayo tube fi obọ họ kẹ ohwo kparobọ evaọ edhọ-ifio.

Evaọ eriwo ahwo otiọye na, nọ Ọghẹnẹ ọ gbẹ nwane kẹ ohwo oyoma uye ẹsiẹsiẹe he hayo nọ o gbe ru oware nọ a yare mi ei hi, koyehọ Ọghẹnẹ ọ rrọ eva gaga hayo ọ be ruẹ uye-oruẹ mai hi. Rekọ oyena yọ ọrue koikoi! Uzẹme riẹ họ, ma be ta ẹme na, Ọghẹnẹ ọ rrọ iruo, o bi ru oware nọ o te wha ewoma se uviuwou ohwo-akpọ kpobi, rekọ evaọ edhere nọ u wo ohẹriẹ no oghẹrẹ nọ ahwo buobu a bi roro.

Kọ eme Ọghẹnẹ o bi ru? Re ma sae kẹ uyo onọ yena, o gwọlọ nọ ma re si iroro mai kpohọ emuhọ ikuigbe ohwo-akpọ nọ ẹbẹbẹ ologbo ọ rọ ruọ usu ohwo-akpọ avọ Ọghẹnẹ. Rekọ ẹbẹbẹ nana o wo ifue.

Ebẹbẹ nọ Uzioraha O Wha Ze

Dai roro kpahe uwou jọ nọ o be rọ ẹmẹrera raha no anwọ ikpe buobu ze na. Idhe riẹ i zue no, ethẹ na e kpare no ikeleku fihotọ no, yọ otafe uwou na kpobi o raha no. Uwou nana o jọ wowoma okejọ—rekọ o gbẹ rrọ ere obọnana ha. Ma te roro kpahe epanọ uwou na o raha te no, ẹruẹrẹ riẹ o te jọ okolo iruo ho; o sae jọ oware asohẹrioke he.

 Whaọ, roro kpahe oware uyoma nọ o via kẹ ahwo-akpọ oware wọhọ ikpe idu ezeza (6,000) nọ i kpemu, okenọ Setan, omama ẹzi jọ nọ a rẹ ruẹ hẹ o ru nọ Adamu avọ Ivi a rọ wọso Ọghẹnẹ. Re oyena o tẹ te via, imava ọsosuọ na a jẹ reawere omokpokpọ ogbagba avọ irẹro uzuazọ ebẹdẹ bẹdẹ nọ te ae te emọ rai a te reawere riẹ. (Emuhọ 1:28) Rekọ nọ a raha uzi, o tẹ wọhọ ẹsenọ Adamu avọ Ivi a rọ obọ raha uviuwou ahwo-akpọ nọ a ri ti yẹ hẹ na kuotọ.

Whọ rọ ubiẹro evere rri okpẹtu nọ ọkparesuọ yena ọ wha ze na ha. Ebaibol e ta nọ: “Umuomu orọ fiki omọvo [Adamu] vaha ruọ akpọ na, gbe uwhu fiki izieraha.” (Ahwo Rom 5:12) U te no uwhu nọ o wha ze, uzioraha o raha usu mai kugbe Ọnọ ọ ma omai, o tẹ jẹ wha enwoma abọ ugboma gbe iroro se omai. Fikiere, uyero mai o wọhọ uwou nọ o be raha no. Ọzae okiẹrẹe na Job ọ nwane riẹ uyero mai dhesẹ ziezi nọ ọ ta kpahe ohwo-akpọ inọ “uzuazọ okpẹkpẹe o wo; o tẹ jẹ vọ avọ uye.”—Job 14:1.

Kọ Ọghẹnẹ o gbabọkẹ ahwo-akpọ nọ Adamu avọ Ivi a raha uzi no? Vievie! Ẹhẹ, anwọ oke yena ze rite inẹnẹ, Ọsẹ obọ odhiwu mai ọ rrọ iruo, o bi ru oware nọ o te wha erere se ahwo-akpọ. Re whọ sai wo ovuhumuo kẹ oware nọ o bi ru kẹ omai na, joma roro kpahe eware esa jọ nọ i wuzou evaọ aruẹrẹ uwou gbe epanọ enana i ro wobọ kpahe oware nọ Ọghẹnẹ o bi ru kpahe uyero ohwo-akpọ.

1 Ọnọ o wo uwou ọ tẹ romatotọ rri uwou riẹ nọ u bi kie, ọ rẹ jiroro sọ ọ rẹ ruẹrẹ iẹe hayo kporo iei.

Nọ ọkparesuọ ọ roma via no evaọ ọgbọ Idẹn, Jihova Ọghẹnẹ ọ ta ẹjiroro riẹ via inọ ọ te wariẹ zihe ahwo-akpọ ziọ uyero ọsosuọ rai. Ọ ta kẹ omama ẹzi nọ o wha ọkparesuọ na ze inọ: “Me re ti fi egrẹ họ udevie ra avọ aye na, gbe udevie [ubi] ra avọ [ubi] riẹ. Ọ rẹ te nwa owhẹ uzou, whọ vẹ te royẹe ithihrawọ.”—Emuhọ 3:15.

Jihova ọ rọ ẹkwoma eme yena ya eyaa inọ ọ te raha ọnọ ọ wha ọkparesuọ ọgbọ Idẹn ze na. (Ahwo Rom 16:20; Eviavia 12:9) Ofariẹ, Jihova ọ ta inọ “ubi” jọ o te roma via nọ u ti siwi ahwo-akpọ no uzioraha. * (1 Jọn 3:8) Eyaa yena i dhesẹ ugogo oware jọ via: Ọghẹnẹ ọ be te ruẹrẹ uyero ahwo-akpọ, orọnikọ o ti gbabọkẹe he. Rekọ aruẹrẹ yena o te rehọ oke.

2 Ọwena-iwoho uwou ọ rẹ drọ omaa aruẹrẹ uwou na, nọ u re dhesẹ oghẹrẹ nọ uwou na o te jọ nọ a tẹ ruẹrẹ iẹe no.

Jihova Ọghẹnẹ ọ kẹ emọ Izrẹl ekru izi gbe omaa etẹmpol nọ a rẹ jọ gọe. Ebaibol e ta nọ: “Enana kpobi uwoho eware nọ e be tha.” (Ahwo Kọlọsi 2:17)  Wọhọ omaa uwou nọ a drọ, eware yena i dikihẹ kẹ oware ulogbo nọ o rrọ obaro tha.

Wọhọ oriruo, emọ Izrẹl a jẹ hae rọ erao dhe idhe re a ruẹsi wo erọvrẹ izieraha. (Iruo-Izerẹ 17:11) Oyena o riobọhọ idhe ilogbo jọ nọ a ti dhe evaọ obaro—idhe nọ e te wha esiwo se ahwo-akpọ. * Ọruẹrẹfihotọ uwou-udhu egagọ gbe etẹmpol nọ emọ Izrẹl a jẹ jọ gọ na gbe eware nọ a jẹ jarai ru e riobọ kpohọ ugogo eware jọ nọ Mesaya na o ti ru, muhọ no uwhu idheidhe riẹ rite ẹkparomatha riẹ kpohọ odhiwu.—Rri  ẹwẹ-obe avọ 7.

3 A re se ọbebabọ nọ o re lele omaa hayo ọruẹrẹfihotọ aruẹrẹ na.

Jesu họ Mesaya nọ a ya eyaa riẹ na, ọnọ o ti ru lele oghẹrẹ ọruẹrẹfihotọ nọ emọ Izrẹl a jẹ hai ro dhe idhe jẹ rọ uzuazọ riẹ ta ahwo-akpọ no igbo. Ẹhẹ, Jọn Ọhọahwo-Ame na o se Jesu “Omogodẹ Ọghẹnẹ, ọ nọ ọ wha izieraha akpọ na vrẹ!” (Jọn 1:29) Jesu ọ rọ unevaze jẹ owha-iruo yena rehọ. Ọ ta nọ: “Me no obọ odhiwu ze, ti ru orọ eva mẹ hẹ, rekọ orọ eva ọnọ o vi omẹ ze.”—Jọn 6:38.

Oreva Ọghẹnẹ kẹ Jesu họ re ọ “rọ uzuazọ riẹ ta ibuobu,” re ọ jẹ reọvọ Uvie kugbe ilele riẹ. (Matiu 20:28; Luk 22:29, 30) Ẹkwoma Uvie yena Ọghẹnẹ o ti ro ru ẹjiroro riẹ kẹ ahwo-akpọ gba. A se ovuẹ orọ Uvie Ọghẹnẹ na “usiuwoma” keme u ru omai riẹ inọ Ọghẹnẹ ọ rehọ egọmeti mu obọ odhiwu no nọ u ti su otọakpọ na.—Matiu 24:14; Daniẹl 2:44. *

Iruo Aruẹrẹ na E be Nyaharo

Taure o te tovrẹ kpohọ odhiwu, Jesu ọ kẹ ilele riẹ iruo inọ: “Wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri . . . ri, mẹ avọ owhai a gbẹ jọ kẹse kẹse, makọ te urere akpọ na.”—Matiu 28:19, 20.

Fikiere, iruo aruẹrẹ uyero ahwo-akpọ na i ti kuhọ họ nọ Jesu o te whu no. E te nyaharo rite “urere akpọ na”—okenọ Uvie Ọghẹnẹ u ti ro mu akpọ na họ esuo. Oke yena ma rrọ na. Ma riẹ ere keme oka nọ Jesu ọ kẹ kpahe “urere akpọ na” o be roma via enẹna. *—Matiu 24:3-14; Luk 21:7-11; 2 Timoti 3:1-5.

Nẹnẹ Isẹri Jihova a be jọ ekwotọ udhusoi akuava gbe ọgba gbezeza (236) ru lele ujaje Jesu na inọ a ta usiuwoma Uvie Ọghẹnẹ. Ẹhẹ, a kere emagazini nana nọ who bi se na re u fi obọ họ kẹ owhẹ riẹ kpahe Uvie yena ziezi gbe oware nọ u ti ru. Whọ rẹ jọ ẹwẹ-obe 2 Uwou-Eroro Na kpobi ruẹ ẹme nana: “Emagazini nana o . . . be rehọ emamọ usi na sasa ahwo oma inọ kẹle na Uvie Ọghẹnẹ, onọ o rrọ uvi egọmeti evaọ obọ odhiwu, u ti si emuemu kpobi no kẹle u ve ti nwene otọakpọ na zihe ruọ aparadase. O be ta udu họ ahwo awọ re a fi ẹrọwọ họ Jesu Kristi, ọnọ o whu re ma sai wo uzuazọ ebẹdẹ bẹdẹ, nọ o bi su enẹna wọhọ Ovie ọrọ Uvie Ọghẹnẹ.”

Uzẹme, makọ enẹna whọ rẹ gbẹ sai yo usi ozighi-ọkparesuọ hayo ọraha ọrọ okpẹtu nọ a robọ so ho, yọ eware okpẹtu e rẹ sae via kẹ owhẹ dede. Rekọ uwuhrẹ Ebaibol o te kẹ owhẹ imuẹro inọ Ọghẹnẹ ọ re te nya siọ ahwo-akpọ ba ha. Uzẹme, “otheri omai ọvuọvo abọ họ.” (Iruẹru Ikọ Na 17:27) Eyaa riẹ inọ o ti zihe oware nọ ọsẹgboni ọsosuọ mai a kufiẹ zihe ze e te seba erugba ha.—Aizaya 55:11.

[Oruvẹ-obotọ]

 [Omaa-iruo/Iwoho nọ e rrọ ẹwẹ-obe avọ 7]

(Rọkẹ onọ a ruẹrẹhọ ziezi, rri obe na)

 “Utiọ Uvi Riẹ”—Oware nọ Uwou-Udhu Egagọ na U Dikihẹ Kẹ

ARUẸRI NA

Unevaze nọ Ọghẹnẹ ọ rọ jẹ idhe Jesu rehọ.—AHWO HIBRU 13:10-12.

OZERẸ OKPEHRU

Jesu.—AHWO HIBRU 9:11.

1 Evaọ Ẹdẹ Omavoro, ozerẹ okpehru na o re dhe idhe rọkẹ izieraha ahwo na.—IRUO-IZERẸ 16:15, 29-31.

1 Evaọ Nisan 14, 33 C.E., Jesu ọ rọ uzuazọ riẹ dheidhe fiki mai.—AHWO HIBRU 10:5-10; 1 JỌN 2:1, 2.

ỌRẸRI NA

Ọkwa Jesu wọhọ Ọmọ Ọghẹnẹ nọ a rọ ẹzi wholo.—MATIU 3:16, 17; AHWO ROM 8:14-17; AHWO HIBRU 5:4-6.

OHỌ-ARUẸRI NA

Ugboma Jesu, nọ o wọhọ ohọ nọ o hẹriẹ uzuazọ otọakpọ no uzuazọ obọ odhiwu.—1 AHWO KỌRINT 15:44, 50; AHWO HIBRU 6:19, 20; 10:19, 20.

2 Ozerẹ okpehru na ọ rẹ ruọ ofẹ obei orọ ohọ-aruẹri nọ o hẹriẹ Ọrẹri na no Ọrẹri Erẹri na.

2 Nọ Jesu ọ kparoma no uwhu ze no, ‘ọ tẹ ruọ ofẹ obei orọ ohọ-aruẹri na’ ẹkwoma etovrẹ kpohọ odhiwu “re ọ rehọ oma via eva obọ aro Ọghẹnẹ fiki mai.”—AHWO HIBRU 9:24-28.

ỌRẸRI ERẸRI NA

Odhiwu.—AHWO HIBRU 9:24.

3 Nọ ozerẹ okpehru na ọ tẹ rueva Ọrẹri Erẹri na no, ọ vẹ frẹ abọjọ azẹ arao nọ o ro dhe idhe na ku aro etehe ọvọ na.—IRUO-IZERẸ 16:12-14.

3 Jesu o bru Ọghẹnẹ avọ aghare azẹ riẹ nọ o hwẹ, rọ ere ru omai wo omavoro hayo erọvrẹ kẹ izieraha mai.—AHWO HIBRU 9:12, 24; 1 PITA 3:21, 22.