Pathianin Eng Nge A Tih Le?

“Aw LALPA, [“Jehova,”New World Translation] engati nge hla taka i din ṭhin le? Engati nge mangan laitea i inthup ṭhin le?”—SAM 10:1.

CHANCHIN thar tlângpuite han bih zawkna mai pawh hian ‘manganna huna’ kan awm tawhzia a nemnghet a ni. Dân bawhchhiatna te, accident râpthlâk tak te, a nih loh leh hmangaihte thihna ang chite kan han tawh hian, Pathianin min hmu na nge? Min ngaihsak lo vem ni? Awm pawh a awm meuh vem ni le?, ti tein kan inzâwt mai thei.

Amaherawhchu, Pathian laka kan thil beiseite chuan ngaih dân dik lo a ṭanchhan thei tih i ngaihtuah ngai em? Entîr nân: A pa hnathawka a kal chhuah avânga lungawi lo naupang pakhat chu han mitthla teh. Naupang chuan a pa chu a ngai hle a, lo haw thuai tûrin a duh a. Kalsan leh hlamchhiah nia inhriatna neiin: “Khaw nge ka Pa hi?” tiin ni lêngin a zâwt ruai a ni.

Chu naupang ngaih dân dik lo chu awlsam têin kan hre thei a ni. Chutianga kalsan leh hlamchhiah nia a inhriat lai chuan, a pa chuan an chhûngkaw mamawh ngaihsakin hna a thawk reng si a. Keini pawhin, “Khaw nge Pathian chu?” tia kan zawh hian chutiang ngaih dân dik lo chu kan nei ve tihna a ni thei ang em?

Entîr nân, mi ṭhenkhat chuan Pathian chu thil sual titute hrem nghâl ṭhîn tûrin an duh a. Mi dangte chuan Pathian chu thilpêk chi hrang hrang—hnathawh tûr te, kawppui tûr te, a nih loh leh sum tam tak manna tûr lucky ticket te—petu vân lam Krismas Putar ang lek niin an thlîr a ni.

Chutiang thlîr dân aṭang chuan Pathianin thil sual titute a hrem nghâl loh emaw, kan thil ngente min pêk loh emaw hian kan hrehawm tawrhte min tawrhpui lo va, kan mamawhte a hre lo tihna a ni. Mahse, chutiang a ni lo rêng rêng! A nihna takah chuan, mi tam takte duh dân ang ni lo mah se, Pathian Jehova chuan mihringte tân tûn thlengin hna a thawk reng a ni.

Chuti chu, Pathianin eng nge a tih le? Chu mi chhân nân, siam ṭhat theih loh ni si lova Pathian leh mihringte inlaichînna nasa taka a chhiat lai, mihringte chanchin inṭanna lam chu kan chhui lêt a ngai a ni.

Sual Sawhkhâwk Ṭha Lo Takte

Kum tam tak chhûng ram chhe tawh in pakhat chu han mitthla teh. A chung khuhna chu a chhe tawh a, a kawngkhâr kawpzate pawh a tlain, a pâwn lamte pawh a chhe zo tawh a ni. Tûn hma chuan, he in hi a ṭha hle ṭhîn kha a ni a—tûnah erawh chutiang a ni tawh lo. A ram chhiat tawh êm avângin, siam ṭhat leh chu a hautakin, zan khat thil thu maia siam ṭhat theih pawh a ni lo vang.

Hmuh theih loh thlarau Setana’n kum 6,000 vêl kal ta khân, Adama leh Evi chu Pathian laka  hel tûrin a thlêm a; chu mi aṭanga lo awm a sawhkhâwk ṭha lo takte chu lo ngaihtuah ta ila. Chutiang thil a thlen hma chuan, mihring nupa hmasa berte chuan hrisêlna ṭha famkim an nei a, an chhuan lo awm tûrte nên chatuana nun beiseina an nei bawk a ni. (Genesis 1:28) Mahse, an han sual tâk hnu chuan mihring chhûngkua lo la piang tûrte chu an tichhe ta vek a ni.

Chu helna sawhkhâwk ṭha lo chu a namai lo hle. Bible chuan: “Mi pakhat [Adama] avângin sual khawvêlah a lût a, sual avângin thihna a lût bawk a,” tiin a sawi a ni. (Rom 5:12) Sual chuan thihna a thlentîr bâkah, Siamtu nêna kan inlaichînna pawh a tikhaw lo va, chu chuan kan taksa lam te, ngaihtuahna lam te, leh rilru lam te a nghawng a. Chuvângin, kan dinhmun chu in ram chhe tawh tak nên a inang a ni. Mi fel Joba chuan mihring chu “rei lo tê dam, buainaa khat a ni,” tia sawiin kan dinhmun chu dik takin a khaikhâwm a ni.—Joba 14:1.

Mahse, Adama leh Evi te an sual hnuah, Pathianin mihringte chu a hlamchhiah mai em? Mai lo ve! A nihna takah chuan, chuta ṭanga tûn thleng hian kan Pa vâna mi chuan mihringte tân hna a la thawk reng a. Kan tâna a hnathawh hriat thiam lehzual nân, in ram chhe tawh tuai ṭhat nâna thiltih ngai pathum leh chûng chu mihringte dinhmun siam ṭhat nâna Pathian thiltihte nên a inkûngkaih dân hi lo ngaihtuah ta ila.

1 In neitu chuan a in ram chhe tawh chu a endik hnuah a siam ṭha dâwn nge, a ṭhiat dâwn tih thu tlûkna a siam a ngai.

Eden huana helna a chhuah hnu lawkah, Pathian Jehova chuan mihringte dinhmun siam ṭhat a tum thu a puang chhuak nghâl a. Helna phêna awm hmuh theih loh thlarau thil siam hnênah chuan: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” tiin a sawi a ni.—Genesis 3:15.

Chûng thute hmangin, Pathian Jehova chuan Eden huana helna chawk chhuaktu chu a tiboral dâwn tih min tiam a. (Rom 16:20; Thu Puan 12:9) Chu bâkah, Pathian Jehova chuan nakina lo lang tûr ‘thlah’ chuan mihringte chu sual ata a la tlan dâwn tih a sawi lâwk bawk. * (1 Johana 3:8) Chutiang chuan, Pathian Jehova’n a thiltih tum chu tlang takin a sawi a ni: A thil siamte chu ṭhiat lovin, a siam ṭha leh dâwn tih chu. Mahse, mihringte dinhmun siam ṭha tûr chuan hun a ngai ang.

2 In rel thiam chuan a thawm ṭhat dân tûr târ langtu lemziak chiang tak a buatsaih.

Pathian Jehova chuan Israelte hnênah dân thupêk leh amah an biakna tûr biak in sak dân tûr riruang a pe a. Bible chuan: “Chûng chu thil lo thleng tûrte hlim a ni,” tiin a sawi. (Kolossa 2:17) In thawm ṭhat dân tûr lemziak ang bawkin, chûngte chuan thil ropui zâwk engemaw an entîr a ni.

Entîr nân, Israelte chu an sualte ngaihdam nân ranin an inthawi  ṭhîn a. (Leviticus 17:11) Chu thiltih chuan a hnu kum zabi tam taka hlan tûr—mihringte tlanna dik tak petu tûr—inthawina ropui zâwk chu a lo entîr lâwk a ni. * Israelte’n Pathian biak nâna an hman biak bûk leh biak in ruangâm ngei chuan nakina Messia, a nih loh leh ‘thlah’ lo ni tûrin inthawi nâna a thih aṭanga vâna a lâwn chhoh thlenga thil a la tih tûrte chu a entîr lâwk a ni.—Phêk 7-naa chart chu en rawh.

3 In rel thiam lemziak zuia thawm ṭhatu tûr chu thlan a ni.

Isua chu Israelte inthawina dân hlimthla zui a, mihringte tlan nâna a nun petu tûr thutiam Messia chu a ni a. Baptistu Johana chuan, “Pathian Berâm No, khawvêl sual kalpuitu tûr saw!” tiin a ko hial a ni. (Johana 1:29) Isua chuan chu chanvo chu inhuam takin a pawm a. Heti hian a sawi a ni: “Mahni duhzâwng ti tûrin vân aṭanga lo chhuk ka ni lo va, mi tîrtu duhzâwng ti tûra lo chhuk ka ni zâwk e,” tiin.—Johana 6:38.

Isua tâna Pathian duh zâwngah chuan ‘mi tam tak tlan nâna a nun pêk’ mai ni lovin, a hnungzuite Ram thuthlung thlunpui pawh a tel a ni. (Matthaia 20:28; Luka 22:29, 30) Chu Lalram chu a ni, Pathianin mihringte tâna a thiltum hlen chhuah nâna a hman tûr chu. Pathian Ram chanchin chu “chanchin ṭha” tia koh a ni, Pathianin leia rorêltu tûr vân sawrkâr a din tih a hrilhfiah avângin!—Matthaia 24:14; Daniela 2:44. *

Siam Ṭhat Lehna Hna Chu Chhunzawm A Ni

Isua chuan vâna a lâwn hma khân a hnungzuitute hnênah: “Hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, . . . Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tiin thu a pe a.—Matthaia 28:19, 20.

Chuvângin, mihringte dinhmun siam ṭhatna chu Isua thih khân a tâwp mai lo. Chu chu ‘khawvêl tâwpna hun thleng’—Pathian Ramin leia ro a rêl ṭan hun thleng—chhunzawm zêl a ni ang. Tûn hi chu mi hun chu a ni a. Chu mi kan hriat theih chhan chu ‘khawvêl tâwpna hun’ chungchânga Isua hrilh lâwk chhinchhiahna a thlen famkim mêk vâng a ni. *—Matthaia 24:3-14; Luka 21:7-11; 2 Timothea 3:1-5.

Tûn laiah, ram 236-a Jehova Thuhretute chuan Pathian Ram chanchin ṭha chu hrilin Isua thupêk chu an zâwm a. Dik takin, tûna i chhiar mêk magazine hi chu Lalram leh chu miin a thlen tûr malsâwmnate chungchâng hriat tam lehzual nâna buatsaih a ni. Vênnainsâng chhuak apianga a phêk 2-naah he thuziak hi i hmu zêl ang: “He magazine hian . . . vâna sawrkârna tak tak, Pathian Ram chuan suahsualna zawng zawng chu a titâwp thuai ang a, leilung hi paradis-ah a chantîr thuai dâwn tih chanchin ṭha-in mite a thlamuan a. He magazine hian tûna Pathian Rama Lalber nia rorêl mêk, chatuana nunna kan neih theih nâna thi ta, Isua Krista rinna min neihtîr a ni,” tih hi.

Tûnah chuan mi fîrfiakte beihna emaw, leilung chhiatna thleng emaw chu i la hre zêl pawh a ni thei a, a nih loh leh chhiatna râpthlâk tak i la tâwk zêl pawh a ni thei. Mahse, Bible zirna chuan Pathianin mihringte a kalsan lohzia ring tlat tûrin a pui ang che. Min kalsan ahnêkin, “ani chuan min hlat lo ṭheuh” zâwk a ni. (Tirhkohte 17:27) Tin, kan nu leh pa hmasa berte hloh tâk dinhmun siam ṭha tûra a thutiam chu a hlawhtling ngei ngei ang.—Isaia 55:11. (w10-E 05/01)

[Footnote-te]

 [Phêk 7-naa chart/milemte]

(A lan dân tûr dik tak hriat nân, a lehkhabu en rawh)

‘A TAK ANPUI’ Biak Bûkin A Entîr Chu

MAICHAM

Isua inthawina Pathianin pawm a duhna. —HEBRAI 13:10-12.

PUITHIAM LALBER

Isua.—HEBRAI 9:11.

1 Inremna Nî-ah, puithiam lalber chuan mipuite tân sual thawina a hlân. —LEVITICUS 16:15, 29-31.

1 C.E. 33, Nisan 14 khân, Isua chuan kan tân a nun a pe.—HEBRAI 10:5-10; 1 JOHANA 2:1, 2.

HMUN THIANGHLIM

Pathian thlarau lam fa anga Isua nihna.—MATTHAIA 3:16, 17; ROM 8:14-17; HEBRAI 5:4-6.

PUANZAR

Isua lei lam leh vân lam nun daidangtu a taksa.—1 KORINTH 15:44, 50; HEBRAI 6:19, 20; 10:19, 20.

2 Puithiam lalber chu Hmun Thianghlim nêna daidanna puanzâr paltlangin Hmun Thianghlim Ber-ah a lût.

2 A thawhleh hnuah Isua chu “Pathian hmaah kan aia ding tûrin” vânah a lâwn a; chutiang chuan, ‘puanzâr a paltlang.’—HEBRAI 9:24-28.

HMUN THIANGHLIM BER

Vân.—HEBRAI 9:24.

3 Hmun Thianghlim Ber chhûng a thlen chuan, puithiam lalber chuan inthawina ran thisen chu thuthlung bâwm hmaah a theh.—LEVITICUS 16:12-14.

3 Isua chuan a thisen hlutna chu hlânin, kan sualte tân tlanna dik tak a pe.—HEBRAI 9:12, 24; 1 PETERA 3:21, 22.