¿Imatataq noqantsikrëkur Dios rurëkan?

“Jehová, * ¿imanirtaq karullachö shäranki? ¿Imanirtaq llakinëpaq tiempokunachö tsinkakurkunki?” (SALMO 10:1.)

HUK rato noticiakunata rikärir o wiyarirqa rasllam cuentata qokurintsik “llakinëpaq tiempokunachö” kawëkanqantsikta. Y pipis mana allita ruramashqa, ima desgraciapis pasëkamashqa, kuyashqa kastantsikta oqrar o imëkakunata pasarqa, Diosnintsik tsëkunata imanir rikaranqantam höraqa tapukuntsik. ¿Manatsuraq tukïta pasëkanqantsikta rikan? ¿Mana kaqpaqtsuraq churamantsik?

Manaraq tsëta pensarmi, imëka mana allikuna pasananta imanir Diosnintsik haqinqantaraq puntata musyanantsik. Këman pensarishun: teytan trabajaq ëwanqanta huk wambra piñakunman. Y alläpa llakirnin hunaqnimpi o goyaypa pëpaq tapukur kakunman.

¿Allitatsuraq tsë wambra rurëkan teytanwan piñakurnin? Manam, pachankuna y hanankuna tarinampaqmi teytanqa trabajëkan. Y, ¿manatsuraq tsë wambrata pasanqannö noqantsiktapis pasëkämashwan Dios paqwë qonqëkamanqantsikta pensashqaqa?

Wakin nunakunaqa munayan Diosnintsik imëka policía cuenta llapan mana alli ruraqkunata hinan hora castiganantam. Wakin nunakunanam llapan munanqantsikta Diosnintsik qomänata munayan: Alli trabäjota, alli majata, o sortëokunachöpis ganatsimänata.

Tsëmi wakinkunaqa Diosman mañakuyanqanta tsë hora mana contestaptin, qonqëkunqanta, y imëka pasayanqanta ichikllapis mana cuentapaq churanqanta pensayan. Pero tsëqa manam rasuntsu. Wakinkuna mana cuentata qokuyaptimpis tsë wambrapa teytan cuentam Jehoväqa noqantsikrëkur trabajëkämun.

“¿Y imatataq noqantsikrëkur rurëkämun?” nir itsa tapukunki. Tsëta musyanapaqqa, nunakuna Patsachö kawar qallanqan witsankunamanmi yarpänantsik, tsë witsanmi punta teytantsikkuna hutsata rurarnin Diospita rakikäkuriyarqan. Tsënöpam alläpa mana alliman nunakuna chäyarqan, pero manam tsënöllatsu kakuyänan karqan.

¿Ima mana allimantaq nunakunata hutsa chätsishqa?

Pensari, qatayanqankuna limpu ushakashqa, punkunkuna hipikashqa y perqampis lluta pintar ushashqa unëna kakoq wayiman. Punta kanqanmanqa manam ichikllapis igualantsu. Paqwë ushakäkïkaqna kaptinmi pipis altsëta munaqqa, atska tiempota y alli trabajëtaraq wanan, y manam rasllatsu altsarinqa.

 Hoqta waranqa watanam pasarishqa Adanwan Eva Diosta mana wiyakuyänampaq Satanás ulipanqan o llullapangampita. Y pensari tsëpa culpan imëka mana allikunaman nunakuna chäyanqanta. Manaraq tsë pasaptinqa punta teytantsikkuna manam qeshyayarqantsu y pëkuna ni tsurinkunapis manam wanuyanmantsu karqan (Génesis 1:28). Diosta mana wiyakuyanqanchömi tsënö shumaq kawakuyänampaq kaqta paqwë oqrariyarqan.

“Adanmi jutsata rurecorqan, y tsenopam jutsa rure qallecorqan. Tserecurmi wani shamorqan” ninmi Biblia, y tsënö nirmi rikätsimantsik nunakunata alläpa mana alliman hutsa chätsinqanta (Romanos 5:12). Hina tsënöpam Kamakoq Yayantsikwan yamë kënintsikta, saludnintsikta y kushi kushi kënintsiktapis oqrarirqantsik. Tsënömi imëka ushakäkïkaq wayi cuenta nunakuna quedariyarqan: alläpa ankupëpaq o llakipaypä. Rasuntam Diospa sirveqnin Jobpis kënö nirqan: “Nunaqa wallka tiempollam kawan y imëka mana allikunatam pasan” (Job 14:1).

Pero ¿imatataq Kamakoq Yayantsik rurarqan Adanwan Eva hutsata rurariyaptin? ¿Paqwëtsuraq nunakunata qonqëkurqan? Manam. Antis hutsapita horqamänapaqmi tsë witsampitana pëqa trabajëkan. Tsëta más musyarinapaqqa, nunakuna hutsannaq këman kutiyänampaq Dios rurëkanqanta, ushakäkïkaq wayita altsatsinampaq pipis imata ruranqanwan igualaratsishun.

1 Wayiyoqmi rikan altsatsinampaq o ushakätsinampaqpis.

Adanwan Eva hutsata rurariyaptinllam huchukïkaq wayita altsaq cuenta nunakunata hutsannaq këman “kutitsinampaq” kaqta Jehová rikätsikurqan. Kënömi Satanasta nirqan: “Warmitawan qamtam chikinatsikushqëki, qampa mirënikita pëpa mirënintawan. Pëmi halushunki peqachö y qamnam atakanchö kaninki” (Génesis 3:15).

Tsënömi Adantawan Ëvata mana wiyakoq këman ishkitseq Satanasta paqwë ushakätsinampaq nirqan Jehová (Romanos 16:20; Apocalipsis 12:9). Hina hutsapita nunakunata salvanampaq huk ‘mirë’ shamunampaq kaqtapis willakurqanmi (1 Juan 3:8). * Kë ishkanta awnikunqanmi rikätsikun nunakunata Dios mana “ushakätsinampaq” kaqta. Imam sïqa, imanömi tsë ushakäkïkaq wayita altsayänampaq atska tiempota wanayan, tsaq tsënöllam nunakuna hutsannaq këman kutiyänampaqpis atska tiemporaq pasanan karqan.

2 Imanö altsayänampaq kaqtam dibujan.

Jehoväqa israelïtakunata atska leykunatam qorqan y adorayänan templota imanö rurayänampaqpis nirqanmi. Y tsëkuna “shamoqpa wäninlla” o llantunlla kanqantam Bibliaqa nin (Colosenses 2:17, QKW). Leykunawan temploqa imëka wayipa plänon cuentalla karmi shamoq tiempopaq kaqta rikätsikurqan.

Tsë Leykunachömi mandakurqan israelïtakuna hutsankunapita  perdonashqa kayänanrëkur animalkunata pishtëkur kayayänampaq (Levítico 17:11). ¿Imatataq rikätsikurqan tsëta rurayanqankuna? Atska pachak watakuna pasariptin nunakunata hutsapita paqwë horqananrëkur Jehová ruranampaq kaqtam. * Y Tabernäculowan templo imanö kanqannam rikätsikurqan, wanunqampita ciëloman kutikunqanyaq Mesias o ‘mirë’ ruranampaq kaqta (rikäri 7 kaq päginachö këkaq läminata).

3 Dibujanqanta rikëkur wayita altsanampaqmi maestrota ashin.

Israelïtakuna animalkunata sacrifikäyanqannöllam Jesuspis nunakunarëkur wanurqan. Pëmi awnikushqa Mesias karqan o Juan Bautista ninqannöpis ‘Diospa achcasnin. Jinantin munducho nunacunapa jutsancunarecur wanoq’ (Juan 1:29). Llapan shonqunwanmi tsë rurëta munarqan, tsëmi kënö nirqan: “Que patsaman shamushqa cä manam quiquï munashqäcunata ruranäpaqtsu, sinoqa cachamaq Papänïpa muneninta ruranäpaqmi” (Juan 6:38).

Diospa munëninqa manam Jesus ‘yawarninwan nunacunata rescatananllapaqtsu’ karqan, sinöqa qateqninkunawan Diospa Gobiernonchö mandakuyänampaq huk conträtota rurayänampaqwanmi (Mateo 20:28; Lucas 22:29, 30). Tsë Gobiernoqa ciëlochö qallashqanam, ichikllanam pishin Patsachöpis mandakunampaq. Hina manam tsëllatsu, tsë Gobiernonwanmi Diosqa nunakunapaq allikunata ruramunqa. ¿Manaku tsëqa alläpa ‘alli willaquï’? ¿Manaku tsëtaqa nunakunata musyatsishwan? * (Mateo 24:14; Daniel 2:44.)

Kanan witsampis Jehoväqa altsëkanmi

Manaraq ciëloman kutikurmi Jesus qateqninkunata kënö nirqan: ‘Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq, y creyicoq caqtana bautisayanqui Dios Yayapa, Tsurin Jesucristupa y Santu Espiritupa jutincho. Y [...] noqaqa qamcunawanmi quecashaq imecamayaqpis, asta que patsapa ushenin [“witsanyaq”, NM]’ (Mateo 28:19, 20).

Nunakunarëkur Jehová rurëkanqankunaqa manam Jesus wanunqanllachötsu usharirqan. Hina kë Patsapa ushëninman apakoq witsanchöpis rurëkanraqmi, tsë witsanchömi Diospa Gobiernon Patsata dominar qallëkunan karqan. Kananqa tsë tiempokunachönam kawëkantsik y Jesus willakunqankuna cumplikëkaqta rikarmi tsëta musyantsik (Mateo 24:3-14; Lucas 21:7-11; 2 Timoteu 3:1-5). *

Kanan witsanqa Jehoväpa testïgonkuna më tsëchömi Diospa Gobiernompita yachatsikïkäyan; 236 nacionkunachö. Hinamampis Täpakoq revistanwanmi Diospa Gobiernompita y imata ruranampaq kaqtapis rikätsikuyan. Tsëmi tsë revistakunapa ishkë kaq päginanchö kënö nin: “Kë Täpakoq revistaqa [...] llapan nunakunapa shonquntam kushitsin, Diosnintsikpa Gobiernon kë Patsachö mana allikunata ushakäratsir, kë Patsata shumaq huertaman tikratsinanta willakurnin. Hinamampis yanapamantsik Jehová churashqan Rey Jesucristuman fënintsik kanampaqmi, pëmi wanurqan mana wanushpa kawakïta tarinapaq”.

Tsë witsan chämunanta shuyanqantsikyaqqa itsa kanqaraq terrorismokuna, terremötokuna o imëka desgraciakunapis pasamäshunraq. Imanö kaptimpis, Bibliapita yachakurmi cuentata qokunki Diosnintsik imëpis mana haqimanapaq kaqta. Pëqa “manam karuchowtsu noqantsikkunapita” (Hechos 17:27, QKW). Hinamampis punta teytantsikkuna oqrayanqanta Diosnintsik yapë altsanampaq kaqtam cuentata qokurinki (Isaías 55:11).

[Päginapa ura kuchunchö willakïkuna]

 [7 kaq päginachö dibüjukuna y recuadru]

(Imanö yarqamunqanta rikëta munarqa, kikin publicacionta rikäri)

“RETRATU CUENTALLA”​—¿Imakunapa reträtun cuentataq karqan tabernáculo?

ALTAR

Nunakunarëkur Jesus yawarninta ramanqanta Dios chaskinqan (HEBREUS 13:10-12).

SUMO SACERDOTE

Jesus (HEBREUS 9:11).

1 Hutsapita Pagakuyänan Hunaqchömi, llapan israelïtakunapa hutsankunapita sumo sacerdote sacrificiota ruraq (LEVÍTICO 16:15, 29-31).

1 14 de nisán 33 watachömi Jesus noqantsikrëkur wanurqan (HEBREUS 10:5-10; 1 JUAN 2:1, 2).

SANTO

Tsënömi Jesus tikrarqan, bautizakurirnin y Diospita santo espïrituta chaskirirnin (MATEO 3:16, 17; ROMANOS 8:14-17; HEBREUS 5:4-6).

CORTINA

Jesuspa cuerpon, Patsachö kawëtawan ciëlochö kawëtam rakeq (1 CORINTIOS 15:44, 50; HEBREUS 6:19, 20; 10:19, 20).

2 Sumo sacerdötem Santopita Santïsimoman cortïnapa yëkoq.

2 Kawariramurmi cortïnapa yëkoq cuenta Jesus ciëloman “yecushqa biennintsic Diosta mañacamunanpaq” (HEBREUS 9:24-28).

SANTÍSIMO

Cielo (HEBREUS 9:24).

3 Santïsimoman yëkurirnam, sumo sacerdote arca del pacto nishqanman sacrificanqan animalpa yawarninta shututseq (LEVÍTICO 16:12-14).

3 Yawarnimpa chaninwanmi Jesusqa hutsantsikpita paqwë pagakurqan (HEBREUS 9:12, 24; 1 PEDRU 3:21, 22).