San Gado e du?

„Yehovah, * fu san ede yu e tanapu so fara fu mi? Fu san ede yu e go kibri te mi de na nowtu?”—PSALM 10:1.

TE WI e luku a nyunsu nomo, dan wi e si krin taki wi e libi na ini wan ten pe libisma „de na nowtu”. Te wan sari sani miti wi noso wi osofamiri, te sma e du ogri nanga wi, te wan seryusu ongoloku miti wi, noso te wan lobiwan fu wi dede, dan kande wi e aksi wisrefi: Gado e si san e pasa? A e broko en ede nanga wi? Gado de trutru?

A kan de so taki wi e fruwakti sani fu Gado fu di wi no abi wan yoisti denki? Fu eksempre: Kon meki wi taki dati wan yongu pikin e sari fu di en papa go na wroko. A pikin e misi en papa èn a e winsi taki en papa kon na oso. A pikin e denki taki en papa gowe libi en. Heri dei a e aksi: „Pe papa de?”

Wi kan si wantewante taki a fasi fa a pikin disi e denki, no bun. Fu taki en leti, na a momenti dati en papa e wroko fu sorgu gi a heri osofamiri. A kan de so taki a denki fu wi no bun tu te wi e bari: „Pe Gado de?”

Fu eksempre, son sma e winsi taki Gado tron wan krutuman di de nomonomo fu strafu wan sma di du wan ogri. Trawan e si Gado nomo leki wan sma di musu gi den sani, soleki wan wroko, wan trowpatna, noso di musu meki den wini wan bigi moni te den bai lòt.

Den sma dati di e prakseri so, e feni taki Gado no e broko en ede nanga wi noso taki a no e si san wi abi fanowdu. Den e prakseri na a fasi disi, soso fu di Gado no e tyari krutu kon wantewante noso fu di a no e gi den san den aksi. Ma a sani dati no kan tru noiti! Fu taki en leti, na a momenti disi Yehovah Gado e du sani fu sorgu gi libisma, ma a no e du dati na wan fasi di furu sma wani.

We, san Gado e du dan? Fu man piki na aksi dati, wi musu go baka na a bigin di Gado meki libisma èn di a matifasi na mindri Gado nanga libisma kon pori. Ma disi no ben wani taki dati den no ben kan abi wan bun matifasi nanga en baka.

Den takru bakapisi fu sondu

Prakseri wan oso di sma libi brokobroko furu yari langa. A daki fadon broko, den doro broko lusu, èn dorosei pori. Wan ten ben de di na oso disi ben bun, ma dati no de so moro. Te yu e luku o furu sani pori na a oso, dan a no o de wan makriki wroko fu meki en kon bun baka. A sani disi no o pasa na ini wán dei.

Poti prakseri now na a pori di kon tapu libisma sowan 6000 yari pasa di wan yeye, di nen  Satan, kori Adam nanga Eva fu opo densrefi teige Gado. Fosi a sani disi pasa, a fosi trowpaar ben abi wan bun gosontu èn a howpu fu libi fu têgo makandra nanga den bakapikin fu den (Genesis 1:28). Ma di Adam nanga Eva sondu, dan a ben de neleki den pori en gi libisma di ben musu gebore ete.

No prakseri taki den takru bakapisi fu a opo di sma opo densrefi teige Gado, na noti. Bijbel e taki: „Wán man [Adam] meki sondu kon na grontapu èn sondu fu en sei tyari dede kon” (Romesma 5:12). Boiti taki sondu tyari dede kon, a meki tu taki a matifasi di wi abi nanga wi Mekiman kon pori. A sani disi abi takru krakti tapu wi skin, tapu a fasi fa wi de, èn tapu wi denki. Leki bakapisi fu dati, wi kon de leki a brokobroko oso. A reti-ati man Yob taki krin fa a situwâsi fu wi de, di a taki dati libisma ’e libi syatu èn den lai problema’.—Yob 14:1.

Ma Gado drai baka gi libisma baka di Adam nanga Eva sondu? Nôno, kwetikweti! Fu taki en leti, sensi a ten dati teleki now, wi hemel Tata e du sani gi a bun fu libisma. Fu man frustan moro bun san a e du gi wi, luku dri sani di de fanowdu fu meki wan oso kon bun baka èn luku fa ibriwan fu den sani disi abi fu du nanga den sani di Gado du fu meki taki sani go bun baka nanga libisma.

1 A sma di abi na oso e go luku omeni sani pori na a oso èn a musu bosroiti efu a o meki en kon bun baka, noso efu a o broko en te na gron.

Wantewante baka di sma opo densrefi teige Yehovah Gado na ini Eden, Gado taki dati a o meki libisma kon bun baka. A ben taigi a yeye di ben meki sma opo densrefi: „Mi o meki yu nanga na uma tron feanti, èn yu pikin nanga en pikin o de feanti. A pikin fu na uma o masi yu ede, èn yu o gi a pikin fu na uma mankeri na en bakafutu.”—Genesis 3:15.

Nanga den wortu dati, Yehovah pramisi fu pori a sma di meki taki libisma opo densrefi teige Gado na ini Eden (Romesma 16:20; Openbaring 12:9). Boiti dati, Yehovah ben taki na fesi dati wan „pikin” ben o kon di ben o frulusu libisma fu sondu (1 Yohanes 3:8). * Na a fasi disi, Yehovah pramisi san a ben o du: Gado o meki den sani di a meki, kon bun baka, a no o pori den. Ma a sani disi ben o teki ten.

2 Wan sma e poti na tapu papira fa na oso o kon de.

Yehovah Gado ben gi den Israelsma wet èn a meki wan tempel pe den ben o anbegi en. Bijbel e taki: „Den sani dati e prenki den sani di musu kon ete” (Kolosesma 2:17). Neleki fa a papira e sori fa na oso o kon de, na so den sani disi e prenki wan moro bigi sani.

Fu eksempre, den Israelsma ben tyari meti leki ofrandi fu kisi pardon fu den sondu (Lefitikus  17:11). A sani disi ben e prenki wan moro bigi ofrandi di ben tyari hondrohondro yari baka dati. Disi na wan ofrandi di ben o meki libisma kisi trutru frulusu. * A heri fasi fa a tabernakel nanga a tempel ben de pe den Israelsma ben anbegi Gado, ben prenki den sani di a Mesias ben o du sensi a dede fu en leki wan srakti-ofrandi te go miti a ten te a ben o opo go na hemel.—Luku  a prenki na tapu bladzijde 7.

3 Wan temreman o bow na oso baka soleki fa a de na tapu a papira.

Yesus ben de a pramisi Mesias di ben o du den sani di den Israelsma ben e du te den ben tyari ofrandi èn a ben o gi en eigi libi fu frulusu libisma. Fu dati ede, Yohanes a Dopuman kari Yesus „A Pikin Skapu fu Gado di e puru a sondu fu grontapu” (Yohanes 1:29). Yesus ben de klariklari fu teki a frantwortu disi na en tapu. A ben taki: „Mi no saka komoto fu hemel fu du mi wani, ma fu du a wani fu en di seni mi kon.”—Yohanes 6:38.

A wani fu Gado ben de taki Yesus „gi en sili leki wan lusu-paiman fu frulusu furu sma”, èn sosrefi fu meki wan frubontu nanga den bakaman fu en gi wan Kownukondre (Mateyus 20:28; Lukas 22:29, 30). Nanga yepi fu a Kownukondre dati, Gado o meki den sani di a abi na prakseri gi libisma, kon tru. A boskopu fu Gado Kownukondre na „bun nyunsu” fu di a e sori taki Gado seti wan tirimakti na ini hemel fu tiri grontapu!—Mateyus 24:14; Danièl 2:44. *

A wroko fu meki sani kon bun baka e go doro

Bifo Yesus opo go na hemel, a gi den bakaman fu en a komando disi: ’Meki sma fu ala kondre tron disipel, èn dopu den na ini a nen fu a Tata, fu a Manpikin, èn fu a santa yeye . . . Dan unu o si taki mi sa de nanga unu ala dei te na a kaba fu a grontapu sistema.’—Mateyus 28:19, 20.

Sobun, di Yesus dede, dan a meki di a meki libisma kon bun baka, no kon na wan kaba. A sani disi ben o go doro „te na a kaba fu a grontapu sistema”. Dati na a ten te Gado Kownukondre o bigin fu teki a makti abra na grontapu. Now wi e libi na ini a ten dati. Wi sabi disi, fu di a marki di Yesus ben gi fu „a kaba fu a grontapu sistema”, e kon tru now. *—Mateyus 24:3-14; Lukas 21:7-11; 2 Timoteyus 3:1-5.

Tide na a dei, Yehovah Kotoigi na ini 236 kondre e gi yesi na a komando fu Yesus, fu di den e preiki a bun nyunsu fu Gado Kownukondre. Fu taki en leti, a tijdschrift di yu e leisi now, meki fu yepi yu kon sabi moro fu a Kownukondre dati èn san a o du. Na tapu bladzijde 2 fu ibri Waktitoren, yu sa si disi: „A tijdschrift disi e trowstu sma nanga a bun nyunsu taki heri esi Gado Kownukondre di de wan trutru tirimakti na hemel, sa tyari wan kaba kon na ala ogridu èn taki a sa kenki grontapu kon tron wan paradijs. A tijdschrift disi e gi sma deki-ati fu bribi na ini Yesus Krestes di dede gi wi so taki wi kan kisi têgo libi, èn di e tiri now leki a Kownu fu Gado Kownukondre.”

A no de fu taki dati now yu sa yere ete fu den ogri sani di sma e du fu gens tirimakti, fu rampu di e pasa, noso yusrefi kan ondrofeni wan sari sani. Ma te yu o studeri Bijbel yu o kon si krin taki Gado no gowe libi libisma. Na presi fu dati, „a no de fara fu nowan fu wi” (Tori fu den Apostel 17:27). A pramisi fu en taki a o meki den sani kon bun baka, di wi fosi papa nanga mama lasi, o kon tru seiker.—Yesaya 55:11.

[Futuwortu]

 [Schema/​Prenki na tapu bladzijde 7]

 (Efu yu wani si pe den sani disi skrifi, luku a tijdschrift)

„Wan kopi fu a trutru sani”—San a tabernakel ben prenki

NA ALTARI

Gado ben de klariklari fu teki na ofrandi fu Yesus. —HEBREWSMA 13:10-12.

A GRANPRIESTER

Yesus.—HEBREWSMA 9:11.

1 Tapu a dei di sma ben musu aksi pardon fu sondu, a granpriester ben tyari wan ofrandi gi den sondu fu a pipel.—LEFITIKUS 16:15, 29-31.

1 Tapu 14 Nisan fu a yari 33, Yesus gi en libi leki ofrandi gi wi.—HEBREWSMA 10:5-10; 1 YOHANES 2:1, 2.

A SANTA PRESI

Yesus di kon de a salfu manpikin fu Gado.—MATEYUS 3:16, 17; ROMESMA 8:14-17; HEBREWSMA 5:4-6.

A GARDEN

Yesus en skin, di ben de leki wan skotu di ben prati a libi fu en na grontapu nanga a libi fu en na hemel.—1 KORENTESMA 15:44, 50; HEBREWSMA 6:19, 20; 10:19, 20.

2 A granpriester ben pasa go na a tra sei fu a garden di ben prati a Santa Presi fu a Moro Santa Presi.

2 Baka di Yesus kisi wan opobaka, a ’go na a tra sei fu a garden’, fu di a opo go na hemel „fu go na fesi Gado gi a bun fu wi”.—HEBREWSMA 9:24-28.

MORO SANTA PRESI

Hemel.—HEBREWSMA 9:24.

3 Te a granpriester ben de kaba na ini a Moro Santa Presi, a ben teki pikinso fu a brudu fu na ofrandi èn a ben natinati a presi na fesi na ark fu a frubontu.—LEFITIKUS 16:12-14.

3 Di Yesus gi Gado a waarde fu a brudu fu en di trowe, dan na so fasi a meki wi kisi trutru pardon fu wi sondu.—HEBREWSMA 9:12, 24; 1 PETRUS 3:21, 22.