Tansá Maromak husik ita?

“Tansá, oh, Jeová, mak Ita nafatin hamriik iha dook? Tansá Ita subar an iha tempu susar?” *—SALMO 10:1.

KUANDU ita lee iha jornál ka rona notísias, ita bele haree katak ita moris iha “tempu susar”. No mós, kuandu ita rasik hasoru susar ruma hanesan krime, dezastre oioin, ka ema neʼebé ita hadomi mate, dala ruma ita husu ita-nia an: ‘Maromak haree ka lae? Nia iha neʼebé? Nia hanoin haʼu ka lae?’

Maibé, oinsá se buat neʼebé ita hakarak Maromak atu halo ka hein nia atu fó mak karik ladún loos? Porezemplu: Hanoin toʼok labarik ida hirus tanba nia aman bá serbisu. Labarik neʼe hanoin tebes ninia aman no hakarak nia atu fila fali mai uma. Labarik sente katak ninia aman husik ona nia. Durante loron tomak, nia husu beibeik: “Apá iha neʼebé?”

Ita bele haree ho klaru katak labarik neʼe nia hanoin sala. Tuir loloos, ninia aman serbisu atu tau matan família. Oinsá ho ita kuandu ita dehan: “Tansá Maromak husik ita?” Karik ita-nia hanoin mós sala.

Porezemplu, ema balu karik hakarak Maromak atu fó kastigu kedas ba ema neʼebé halo sala. Ema seluk haree deʼit Maromak nuʼudar Pai Natál neʼebé sempre fó prezente, hanesan serbisu, kaben, ka manán lotaria.

Hanoin hanesan neʼe halo ita sente katak se Maromak la fó justisa lalais ka la fó buat neʼebé ita husu, neʼe katak Maromak la hanoin kona-ba ita-nia terus no lakohi hatene kona-ba ita-nia presiza. Maibé, hanoin hanesan neʼe la loos. Tuir loloos, Maromak Jeová serbisu hela atu tau matan ba ema hotu, maibé laʼós iha dalan neʼebé ema barak hakarak.

Se nuneʼe, agora Maromak halo saida? Atu hatán ba pergunta neʼe, ita presiza hanoin fali buat neʼebé akontese iha tempu uluk, kuandu Adão no Eva halo sala no ikusmai estraga ema hotu nia relasaun ho Maromak. Maski nuneʼe Maromak sei bele hadiʼa ida-neʼe.

Rezultadu aat husi sala

Hanoin toʼok kona-ba uma boot ida neʼebé uluk haree kapás tebes. Maibé, agora ninia kakuluk, odamatan, janela monu hotu, no iha nia liʼur ema mós estraga. Tanba iha buat barak neʼebé aat, presiza tempu atu halo uma neʼe sai diʼak fali.

Hanesan neʼe mós, hanoin toʼok kona-ba buat aat neʼebé mosu ba ema maizumenus tinan 6.000 liubá tanba Diabu Satanás lohi Adão no Eva atu kontra hasoru Maromak. Antes ida-neʼe akontese, Adão no Eva haksolok  ho saúde diʼak no iha esperansa atu moris ba nafatin hamutuk ho sira-nia bei-oan. (Gênesis 1:28) Maibé kuandu Adão no Eva halo sala, sira halo ema hotu nia moris sai aat.

Ita labele hanoin katak rezultadu husi Adão no Eva nia sala la kona ita. Bíblia hatete: “Husi ema ida deʼit [Adão] mak sala tama iha mundu, no tan sala, mate; nuneʼe mate toʼo ba ema hotu, basá ema hotu sala.” (Roma 5:12) Tuir loloos, sala la lori mate deʼit, maibé estraga mós ita-nia relasaun ho ita-nia Kriadór no kona ita-nia isin, neon, no sentimentu. Rezultadu neʼe hanesan ho uma ida neʼebé sai aat. Maromak nia atan ida iha tempu Bíblia, naran Job, koʼalia kona-ba ita-nia situasaun hodi dehan katak ema nia moris “badak deʼit no nakonu ho susar”.—Jó 14:1.

Maibé Maromak husik deʼit ema tanba sala neʼebé Adão no Eva halo ka lae? Lae duni! Tuir loloos, husi tempu neʼebá toʼo ohin loron, ita-nia Aman iha lalehan serbisu nafatin atu tau matan ba ema hotu. Atu hafolin liután buat neʼebé nia halo ba ita, mai ita hanoin kona-ba hakat tolu neʼebé ema presiza halo atubele hadiʼa fali uma neʼebé aat, no oinsá mak hakat ida-idak neʼe reprezenta buat neʼebé Maromak halo tiha ona atu hadiʼa ema nia problema hotu.

1 Kuandu uma-naʼin haree ninia uma neʼebé aat, nia tenke deside atu hadiʼa fali ka sobu uma neʼe.

Depois Adão no Eva kontra hasoru Maromak Jeová, Nia fó sai kedas Ninia hakarak atu hadiʼa ema nia problema hotu. Maromak hatete ba Satanás neʼebé lohi Adão no Eva: “Haʼu sei halo ó odi feto neʼe, no ó-nia bei-oan no feto neʼe nia bei-oan sei odi malu. Nia sei harahun ó-nia ulun no ó sei hakanek ninia ain-tuban.”—Gênesis 3:15.

Ho liafuan sira-neʼe, Maromak Jeová promete atu halakon Satanás neʼebé halo aat. (Roma 16:20; Apokalipse 12:9) Liután neʼe, Maromak Jeová fó-hatene nanis kona-ba “bei-oan” neʼebé sei salva ema hotu husi sala. * (1 Joao 3:8) Hodi promete buat sira-neʼe, Maromak fó sai buat neʼebé nia sei halo, neʼe mak atu hadiʼa fali ninia kriasaun, laʼós atu sobu. Maibé, atu hadiʼa ema nia problema hotu presiza tempu.

2 Uma-naʼin halo planu oinsá nia sei hadiʼa fali ninia uma boot.

Maromak Jeová fó ba ema Izraél ukun-fuan no mós fó ba sira planu kona-ba oinsá sira tenke harii templu atu sira bele adora nia. Bíblia hatete: “Buat hirak-neʼe hotu mak ilas deʼit sasán aban-bainrua nian.” (Koloso 2:17) Buat hirak-neʼe reprezenta buat ida neʼebé boot liu.

Porezemplu, ema Izraél hasaʼe  sakrifísiu atubele hetan perdua ba sira-nia sala. (Levítico 17:11) Ida-neʼe reprezenta sakrifísiu boot liu neʼebé sei salva ema hotu husi sala no mate, neʼe mak Jesus nia sakrifísiu. * Tabernákulu no templu, neʼebé ema Izraél uza atu fó adorasaun ba Maromak, iha buat oioin neʼebé reprezenta hakat sira neʼebé Jesus nuʼudar Mesias sei halo, husi tempu neʼebé nia fó ninia moris nuʼudar sakrifísiu toʼo nia bá lalehan.—Haree  kaixa iha pájina 7.

3 Hili tiha badain ida neʼebé sei halo tuir planu hodi halaʼo serbisu atu hadiʼa fali.

Jesus mak Mesias neʼebé Maromak promete ona, no hodi tuir dalan neʼebé ema Izraél hasaʼe sakrifísiu, nia fó ninia moris rasik nuʼudar sakrifísiu atu salva ema husi sala. Loloos, João Batista bolu Jesus “Bibi-Oan neʼebé kasu mundu nia sala”. (Joao 1:29) Jesus simu atu halo ida-neʼe ho laran. Nia hatete: “Basá haʼu tun mai husi lalehan laʼós atu halo haʼu-nia hakarak, maibé Ida neʼebé haruka haʼu mai nia hakarak.”—Joao 6:38.

Maromak nia hakarak mak hodi Jesus “saran nia moris atu soi ema barak”, inklui mós atu halo aliansa foun ho ninia dixípulu sira atu ukun hamutuk ho nia iha ninia Reinu. (Mateus 20:28; Lucas 22:29, 30) Liuhusi Reinu neʼe mak Maromak sei halo tuir ninia hakarak ba ema hotu. Mensajen kona-ba Maromak nia Reinu mak “lia-foun diʼak”, tanba fó sai katak Maromak sei harii governu ida iha lalehan neʼebé sei ukun mundu tomak!—Mateus 9:35; Daniel 2:44. *

Serbisu atu hadiʼa fali halaʼo nafatin

Antes Jesus saʼe ba lalehan, nia hatete ba ninia dixípulu sira: “Laʼo bá, hanorin nasaun hotu-hotu; sarani sira hodi Aman, Oan no espíritu santu nia naran . . . Haʼu sei hela nafatin hamutuk ho imi, toʼo mundu nia rohan.”—Mateus 28:19, 20.

Maski Jesus mate ona, serbisu atu hadiʼa ema nia problema seidauk hotu. Serbisu neʼe sei kontinua “toʼo mundu nia rohan”, neʼe mak tempu neʼebé Maromak nia Reinu sei komesa atu hadiʼa mundu. Tempu neʼe mak agora. Ita hatene ida-neʼe tanba sinál neʼebé Jesus fó-hatene nanis kona-ba “mundu neʼe atu hotu” sai loos ona. *—Mateus 24:3-14; Lucas 21:7-11; 2 Timoteo 3:1-5.

Ohin loron, Testemuña ba Jeová halo tuir Jesus nia mandamentu atu haklaken lia-foun diʼak kona-ba Maromak nia Reinu iha rai hamutuk 236. Tuir loloos, livru neʼebé Ita lee daudauk atu ajuda Ita aprende liután kona-ba Reinu neʼe no saida mak Reinu neʼe sei halo. Iha pájina 2 iha Livru Haklaken, Ita bele lee liafuan sira-neʼe: “Livru neʼe fó kmaan ba ema hodi haklaken lia-foun diʼak kona-ba Maromak nia Reinu, neʼebé mak governu ida iha lalehan, no lakleur tan sei halakon buat aat hotu no sei halo mundu tomak sai jardín furak ida. Livru neʼe ajuda ema atu tau fiar ba Jesus Kristu, neʼebé mate atu ita bele hetan moris rohan-laek, no neʼebé ukun daudauk nuʼudar Liurai iha Maromak nia Reinu.”

Agora daudauk, karik ita sei rona nafatin kona-ba terrorizmu ka dezastre naturál, ka ita hasoru terus tanba ema neʼebé ita hadomi mate. Maibé hodi estuda Bíblia, ida-neʼe sei ajuda ita atu fiar katak Maromak la husik ita. Tanba loloos, “nia la dook husi ita ida-ida”. (Apostolu 17:27) No Maromak nia promesa atu hadiʼa fali buat neʼebé Adão no Eva halakon sei sai loos duni.—Isaías 55:11.

[Nota–rodapé]

 [Tabela/Dezeñu iha pájina 7]

 (Atu hetan format kompletu, haree livru)

TABERNÁKULU KA SANTUÁRIU Reprezenta saida?

ALTÁR

Reprezenta Maromak simu Jesus nia sakrifísiu.—EBREU 13:10-12.

AMLULIK BOOT

Reprezenta Jesus.—EBREU 9:11.

1 Iha Loron Halo Dame nian, amlulik boot hasaʼe sakrifísiu ba povu nia sala.—LEVÍTICO 16:15, 29-31.

1 Iha loron 14, fulan-Nisan, tinan 33, Jesus fó ninia moris nuʼudar sakrifísiu ba ita hotu.—EBREU 10:5-10; 1 JOAO 2:1, 2.

FATIN SANTU

Reprezenta Jesus nuʼudar Maromak nia Oan kuandu Maromak kose nia ho espíritu santu.—MATEUS 3:16, 17; ROMA 8:14-17; EBREU 5:4-6.

KORTINA

Reprezenta Jesus nia isin nuʼudar ema, isin neʼe mak hanesan buat ida neʼebé haketak moris rai nian husi moris lalehan nian.—1 KORINTO 15:44, 50; EBREU 6:19, 20; 10:19, 20.

2 Amlulik boot tama liuhusi kortina neʼebé haketak Fatin Santu husi Fatin neʼebé Santu Liu Hotu.

2 Depois Jesus moris hiʼas fali, nia ‘tama liuhusi kortina’ hodi saʼe ba lalehan atu “mosu iha Maromak futar oin ba ita-nia diʼak”.—EBREU 9:24-28.

FATIN SANTU LIU HOTU

Reprezenta lalehan.—EBREU 9:24.

3 Iha Fatin Santu Liu Hotu nia laran, amlulik boot hisik raan sakrifísiu nian iha arka aliansa nia oin.—LEVÍTICO 16:12-14.

3 Tan Jesus fó ninia raan nia folin ba Maromak, ita bele hetan perdua ba ita-nia sala no halo dame ho Maromak.—EBREU 9:12, 24; 1 PEDRO 3:21, 22.