¿Tuku tlawama Dios?

«Kintikukan Dios, ¿wanchi [o tuku xlakata] makgat takgenuya? ¿Wanchi tatsekga akxni klakgaputsama y klaktanuma tu tuwaj?» (SALMO 10:1)

X LAKATA lamaw kilhtamaku niku anan “talakgaputsit” tunkun tasiya kperiódicos. Chu komo wi tiku wi tuku nitlan nakinkatlawaniyan o atanu tuku nakinkaʼakgspulayan max nawanaw: ¿Tuku xlakata Dios nitu tlawa xlakata ni chuna nakinkaʼakgspulayan? ¿Ni akxilha tuku kinkaʼakgspulaman?

Akxni nina kgalhtinanaw uma takgalhskinin pulana kalakpuwaw komo xlikana tlan chuna la lakapastakmaw. Katamalakxtumiw uma. Kalakpuwaw pi chatum aktsu kgawasa sitsima xlakata xtlat anit skuja. Lu lakaskin pi xmilha chu tantaku kgalhskininan niku wi xtlat.

¿Pi tlan nalakpuwan pi xtlat nialh katimilh? Ni, xlakata xtlat kaj anit skuja xlakata tlan namakgtakgalha xfamilia. Nachuna kinkaʼakgspulayan akxni wanaw pi Dios nialh katsi pi lamaw.

Makgapitsi latamanin lakaskinkgo pi Dios la policía xlitaxtulh tiku tunkun xkamalakgaxokgelh tiku xtlawakgolh tuku nitlan. Makgapitsi lakaskinkgo pi tunkun xkamaxkilh tuku skinikgo: akgtum taskujut, tiku xtatamakgaxtokgolh o xtlajakgolh lotería.

Xlakata chuna lakaskinkgo, makgapitsi lakpuwankgo pi xlakata Dios ni tunkun kamaxki tuku skinikgo kalimasiyani pi ni tsinu kuenta katlawani maski akxilha pi titaxtumakgolh lhuwa talakgaputsit. Pero uma nixlikana. Chuna la akxilhwi liʼakxilhtit xlakata xatlat, tlan nawanaw pi Dios la uku lhuwa skujma. Maski wantuku tlawama la uku ni wa tuku lakaskinkgo latamanin.

Max wana: «¿Tuku tlawama la uku?», xlakata natekgsa xatakgalhtin uma takgalhskinin, nalakapastakaw tuku tilalh akxni kamatsukika latamanin, akxni wi tuku nitlan lalh nema tlawalh pi nialhla tlan xtalalinkgolh Dios latamanin. Uma lu nitlan tuku kitaxtulh pero ni wamputun pi nialhla natalakkaxtlawa.

Tuku lu nitlan limilh talakgalhin

Kalilakpuwanti akgtum chiki nema makgasa nialhti kuentajtlawa: xakgstin nialh tlan, xmalakcha lakamaja chu lakgkgawasan lixkajni tlawakgonit kxlakatin. Uma chiki nipara tsinu tasiya chuna la akxni xasasti xwanit. Lu nitlan la tasiya chu maski wi tiku xkaxtlawaputulh lu lhuwa kilhtamaku chu taskujut xtalakaskilh; nila kaj lakapara namatlani.

Kalakapastakti la akgchaxan mil kata nema lhuwa tuku nitlan titaxtukgonit latamanin, akxni chatum tiku wanikan Satanás tlawalh pi Adán chu Eva nialh xkgalhakgaxmatkgolh Dios. Akxni ama kilhtamaku Adán chu Eva lu tlan xwilakgolh nipara tsinu xmakgkatsikgo tuku nitlan chu tlan nikxni xnikgolh, nachuna xkamanan (Génesis 1:28). Akxni lakgalhinankgolh lakxtlawakgolh  tuku lu tlan xkgalhikgo.

Chuna la wan Biblia, lu nitlan kakitaxtunilh putum latamanin: «Ntsukulh ntalakgalhin nkatuxawat nkaj xpalakata nchatum chixku [Adán], pus wa linin nkitaxtunilh ntalakgalhin» (Romanos 5:12). Nachuna, na nitlan kinkakitaxtunin xlakata nialhla talaliw kiMalakatsukinakan chu talakgalhilh kimaknikan, kintalakapastaknikan chu chuna la makgkatsiyaw. Akxni chuna lalh latamanin kaʼakgspulalh la chiki nema lichuwinaw pulana: lu nitlan wilakgolh. Wa xlakata, Job tiku xaʼakgstitum xwanit wa: «Chatum lataman ni lhuwa kilhtamaku latama chu lhuwa taʼakglhuwit kgalhi» (Job 14:1).

Pero ¿tuku tlawalh kinTlatikan xalak akgapun akxni Adán chu Eva lakgalhinankgolh? ¿Nialh xkakuentajtlawalh latamanin? Ni chuna, tunkun tsukulh liskuja xlakata nalakkaxtlawa la xwilakgolh latamanin. Xlakata tlakg naʼakgatekgsaw tuku Dios tlawama katamalakxtumiw akgtum chiki nema nialhti kuentajtlawa, kaxtlawaparakan. Kaʼakxilhwi pulaktutu tuku talakaskin chu tuku kilhchanima.

1 Xmalana chiki, nawan komo tlanku nakaxtlawakan o nalakxtlawakan.

Akxni tlawaka talakgalhin Jehová tunkun wa tuku lakpuwa natlawa xlakata “nakaxtlawaparakan”, Jehová wanilh Satanás: «Naktlawa pi wix chu puskat ni nalaʼakxilhputunatit, chu minkamanan chu xkamanan puskat ni nalaʼakxilhputunkgo. Xla naʼaktayamiyan chu wix natsankxkitiya» (Génesis 3:15).

Chuna, Jehová wa pi namalakgsputu Satanás wantiku tlawalh ni nakgalhakgaxmatnikan anta kʼEdén (Romanos 16:20; Apocalipsis [Revelación] 12:9). Na tiwa pi xchilh kgawasa tiku xwankanit pi namin xlakata xkalakgmaxtulh latamanin ktalakgalhin (1 Juan 3:8). * Uma pulaktiy tuku Dios wanit liwana limasiyalh pi ni xʼama «malakgsputu» latamanin. Pero lhuwa kilhtamaku xʼama titaxtu xlakata xkaxtlawaparaka.

2 Tlawakan xadibujo xlakata la nakaxtlawakan.

Jehová kamaxkilh limapakgsin israelitas chu lakkaxwililh la xʼamaka tlawakan templo xlakata xkakninanikgolh. Biblia lichuwinan pi uma tuku tlawalh Dios: «Wa cha ntu nkaj xaliʼukxilhtit ntu xlalh» (Colosenses 2:17). Limapakgsin chu templo xtachuna la akgtum dibujo xlakata la natlawakan akgtum chiki, akgtum liʼakxilhtit xlakata tuku xʼamaka tlawakan.

Akgtum limapakgsin, xwan pi israelitas xmakamastakgolh animales xlakata xkaxapanika xtalakgalhinkan (Levítico 17:11). ¿Tuku xkilhchanima uma tamakamastan? Wi tuku lu xlakaskinka xkilhchanima: akgtum tamakamastan nema xʼama tamasta akglhuwa ciento kata alistalh xlakata putum kilhtamaku xkalakgmaxtuka latamanin ktalakgalhin. * Nachuna, la xtatlawanit tabernáculo chu templo limasiyalh  tuku xʼama tlawa Mesías —tiku xwankanit pi namin— akxni mastalh xlatamat asta akxni alh kʼakgapun (kaʼakxilhti dibujo xla página 7).

3 Laksakkan chatum tiku nalakkaxtlawa chuna la wi xadibujo.

Chuna la israelitas xmakamastakgo animales xkilhchanima pi Jesús xʼama makamasta xlatamat xlakata nakalakgmaxtu latamanin. Jesús, Mesías xwanit wantiku xwankanit pi namin, o «xkalhnilu [o aktsu xborrego] Dios, nti namapanuniy xtalakgalhin ntachixkuwitat» chuna la wa Juan tiku xMununan (Juan 1:29). Jesús xatapaxuwan tlawalh taskujut nema liyawaka, xla wa: «Kit kminit katuxawat lakimpi naktlawaniy xtalakaskin kinTlat wanti kimakaminit, chu ni kaj wa kliminit lakimpi naktlaway wantu kaj kiakstu kintapaxuwan» (Juan 6:38; Hua Xasasti Talaccaxlan, [TXS] 1999).

Jehová ni kajwatiya xlakaskin pi Jesús xmastalh “xlatamat lakimpi chuna tlan nalilakgmaxtukgoy xlatamatkan lhuwa tachixkuwitat”, Jesús na xʼama katalakkaxla xtamakgalhtawakgen xlakata natamapakgsinankgo kxTamapakgsin (Mateo 20:28; Lucas 22:29, 30). Uma tamapakgsin mapakgsinamaja kʼakgapun chu nialh makgas namapakgsinan kKatiyatni. Chu Dios nalimaklakaskin uma limapakgsin xlakata namakgantaxti tuku lakpuwanit natlawa xpalakata latamanin. ¿Lakpuwana wix pi uma «xatlan tamakatsin», akgtum tamakatsin nema xlakaskinka natalichuwinan? * (Mateo 24:14; Daniel 2:44.)

Chuntiyaku talakkaxtlawanama

Akxni Jesús nina xʼan kʼakgapun, kamapakgsilh kstalaninanin: «Chuna mpi kapitit, na kamasiyunikgotit xlipaks akgmakgat chixkuwin, chu nalimunukgotit kxtukuwini xaTlat, chu kxtukuwini xaKam, chu kxtukuwini Spiritu Santo [...]. Na kakatsitit mpi xaliankgalhin nakkatalatamayan nchali chali, asta nasputa katuxawat» (Mateo 28:19, 20).

Uma wamputun pi xlakata nalakkaxwiliparakan latamanin ni kgatsputli akxni nilh Jesús. Uma xʼamaku taliskuja asta akxni «nasputa katuxawat» o kakilhtamaku, akxni xTamapakgsin Dios xʼama mapakgsinan kKatiyatni. Katsiyaw pi la uku wilaw kxaʼawatiya kilhtamaku, xlakata kgantaxtuma tuku Jesús wa pi xʼama la, nema xlitakatsilh pi xtsukuma xaʼawatiya kilhtamaku (Mateo 24:3-14; Lucas 21:7-11; 2 Timoteo 3:1-5). *

La uku xtatayananin Jehová liwana makgantaxtimakgolh taskujut nema kaliyawaka, lichuwinamakgolh xTamapakgsin Dios. Chu lichuwinamakgolh k236 países. Nachuna limaklakaskinkgo likgalhtawakga la uma Makatsinina xlakata namakatsininankgo xlakata xTamapakgsin Dios chu tuku natlawa. Chuna lichuwinan kxlimaktiy página uma revista: «Revista Makatsinina tlawamaka, xlakata [...] lu tlan kamamakgkatsini latamanin xlakata kamakatsinima pi xTamapakgsin Dios —akgtum xaxlikana tamapakgsin nema wi kʼakgapun— nialh makgas namasputu tiku lixkajni xtayat chu natlawa pi Katiyatni akgtum paraíso nawan. Na makgtayanan pi nakanajlanikan Jesucristo xMapakgsina uma tamapakgsin, wantiku nilh xlakata tlan namakglhtinanaw latamat nema ni kgalhi xlisputni».

Chu xlakata kgalhimaw kilhtamaku akxni chuna nakgantaxtu, max chuntiya naʼanankgo makgninanin tiku makgapekuanankgo chu tuku masputunan o max nakinkalakgchanan wi tuku nitlan natitaxtuyaw. Maski max chuna natitaxtuyaw, akxni nalikgalhtawakgayaw Biblia nakinkamakgtayayan nakatsiyaw pi Dios nikxni kinkamakgxtakgan. Xlikana, Dios «ni makgat kinkawilanin nchatunu nkinin» (Hechos 17:27). Nachuna wix liwana nakanajlaya, pi tuku Dios wanit namakgantaxti, latamanin nakgalhiparakgo putum tuku makgatsankgakgolh kinatlatnikan (Isaías 55:11).

[Notas nema wilakgo kpágina]

 [Epígrafe xla página 7]

«LIMASIY TUKU XʼAMA KGANTAXTU» ¿Tuku xkilhchanima tabernáculo?

NIKU MASTAKAN TAMAKAMASTAN

Dios xmakgamakglhtinamputun xtamakamastan Jesús (HEBREOS 13:10-12).

XAPUXKU SACERDOTE

Jesús (HEBREOS 9:11).

1 Kilhtamaku akxni kXapakan Talakgalhin, xapuxku sacerdote xmakamasta tuku xlixapaka xtalakgalhin kachikin (LEVÍTICO 16:15, 29-31).

1 14 xla nisán kata 33 Jesús makamastalh xlatamat kimpalakatakan (HEBREOS 10:5-10; 1 JUAN 2:1, 2).

SANTO

Chuna la litaxtulh Jesús Katiyatni xlakata xlimasiyakanit pi xkgawasa Dios chu xʼama an kʼakgapun (MATEO 3:16, 17; ROMANOS 8:14-17; HEBREOS 5:4-6).

CORTINA

Xmakni Jesús nema xkgalhi kkatiyatni xtlawa pi nila xlatamalh kʼakgapun (1 CORINTIOS 15:44, 50; HEBREOS 6:19, 20; 10:19, 20).

2 Xapuxku sacerdote xtanu kSantísimo anta niku cortina xlimapitsikanit xaSanto chu Santísimo.

2 Jesús tanucha niku xlimapitsikanit cortina akxni malakastakwanika, alh kʼakgapun «ntitanucha [...] nakinkapalakachiwinanachan kxlakatin [«Dios», NM]» (HEBREOS 9:24-28, TXS [1999]).

SANTÍSIMO

Akgapun (HEBREOS 9:24).

3 Anta kSantísimo, sacerdote tsankglh tsankglh xmami xkgalhni animales nema xmakamastakan, kxlakatin caja nema wanikan xla talakkaxlan (LEVÍTICO 16:12-14).

3 Akxni makamastalh kxtapalh xkgalhni nema stajtamakgalh, Jesús tlawalh pi xatakgatsin nakinkatapatikanan (HEBREOS 9:12, 24; 1 PEDRO 3:21, 22).