Ifyo Tusambilila Kuli Yesu

Pa fya Kuba Umusambi wa kwa Kristu

Abantu nga batetekela Yesu, ilingi alebeba ukuti: “Ube umusambi wandi.” (Mateo 9:9; 19:21) Finshi umuntu afwile ukucita pa kuti abe umusambi wa kwa Yesu, e kutila Umwina Kristu? Natulande pa masuko ku mepusho yatatu ayacindama.

Bushe mufwile ukulamona shani bambi?

▪ Umusambi wa kwa Yesu afwile ukulakonka ifyo Yesu afundile pa fyo tufwile ukulamona bambi. Ku ca kumwenako, Yesu atile: “E ico, fyonse ifyo mufwaya abantu ukuti balemucitila, e fyo na imwe mulebacitila.” Nomba kuti mwacita shani nga ca kutila umuntu amulufyanya? Yesu atile: “Uleyangufyanya ukumfwana” no ukulufyenye. Aebele abasambi bakwe no kuti: “Nga tamubelela uluse abamulufyanya, na Shinwe wa mu muulu takamubelele uluse ku fyo mulufyanya.”—Mateo 5:25; 6:15; 7:12.

Yesu afundile abaupana ukuti: “Mwalyumfwa ukuti batile, ‘Wilacita ubucende.’ Lelo ine ndemweba nati onse uwatwalilila ukulolekesha umwanakashi no kumukumbwa, ninshi nacita kale ubucende nankwe mu mutima wakwe.” Kanshi mu fyo batontonkanya, Abena Kristu ba cine balakonka ifyo Yesu asambilishe.—Mateo 5:27, 28.

Abena Kristu ba cine balaipusula pa kuti bafwe bambi. Yesu aleipusula sana. Ku ca kumwenako, inshita imo Yesu na batumwa bakwe balibombeshe mu mulimo wa kushimikila ica kuti tabakwete ne nshita ya kulya. E ico Yesu asendele abatumwa bakwe mu bwato ku ncende imo ukwali tondolo pa kuti babe beka no kutuushako. Lelo abantu balishibe uko baleya kabili balibatangilile. Baibolo itila: “Pa kufuma mu bwato, amwene ibumba ilikalamba, kabili aumfwile uluse, pantu bali nge mpaanga ishabula kacema. Kabili atendeke ukubasambilisha ifintu ifingi.” (Marko 6:30-34) Na imwe bene kuti mwapashanya Yesu nga mulecita ifyo Lesa amweba ukucita, nangu ca kutila limo kuti mwakwata amafya pa kucite fyo fintu.

 Mulandu nshi mulingile ukulashimikilako bambi imbila nsuma?

▪ Yesu asambilishe abasambi bakwe ukulashimikila imbila nsuma. Aebele abatumwa bakwe ukuti: “Ilyo muleya, mulebila amuti, ‘Ubufumu bwa mu muulu nabupalama.’” (Mateo 10:7) Imbila nsuma iyo abasambi ba kwa Yesu babila yalicindama nga nshi. Yesu apepele ukuti: “Nomba pa kuti babe no mweo wa muyayaya, kano baishiba imwe mwe Lesa wa cine mweka.”—Yohane 17:3.

Yesu alisobele umulimo uo abasambi bakwe abengi nga nshi bali no kubombako. Atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse.” (Mateo 24:14) Nga ca kutila mwalisambilila pa Bufumu bwa kwa Lesa kabili mwalicetekela ne fyo Baibolo isambilisha, ukwabula no kutwishika mukalafwaisha ukwebako bambi ifyo mwaishiba. Abasambi ba kwa Yesu abengi batendekelapo ukushimikila pa Bufumu bwa kwa Lesa kuli balupwa lwabo.—Yohane 1:40, 41.

Mulandu nshi mulingile ukubatishiwilwa?

▪ Lintu Yesu abatishiwe mu mumana wa Yordani, afwile apepele ukuti: ‘Naisa ku kucita ukufwaya kwenu, mwe Lesa.’ (AbaHebere 10:7) Kanshi na imwe nga mulefwaya ukucita ukufwaya kwa kwa Lesa, mufwile ukubatishiwa. Yesu aibele abasambi bakwe ukuti: ‘Kalengeni aba nko shonse ukuba abasambi, mulebabatisha.’—Mateo 28:19.

Bushe umuntu nga abatishiwa, mulimo nshi akwata kabili fisuma nshi fifumamo? Abasambi ba kwa Yesu ababatishiwa babombela Lesa no mweo onse. Yesu alandile pe Funde lya kwa Lesa ilitila: “Uletemwa Yehova Lesa obe no mutima obe onse, no mweo obe onse.” (Mateo 22:37) Kabili atile: “Umuntu nga alefwaya ukunkonka, aikaane umwine.” (Mateo 16:24) Ulubatisho cilangililo ca kuti umuntu napingulapo ukuikaana no kuti nomba wa kwa Lesa. Abantu abaikaana kuti balomba Lesa ukubapeela kampingu musuma.—1 Petro 3:21.

Nga mulefwaya ukwishiba na fimbi, moneni icipandwa 18 muli ici citabo. Abalemba ici citabo ni Nte sha kwa Yehova.