Inona no Nampianarin’i Jesosy Antsika

Momba ny Fanarahana ny Diany

Izao matetika no lazain’i Jesosy amin’ireo mino azy: “Andao hanara-dia ahy.” (Matio 9:9; 19:21) Inona no tafiditra amin’ny hoe manara-dia azy, na hoe lasa Kristianina? Diniho ireto lafin-javatra telo ireto.

Ahoana no tokony hifandraisanao amin’ny hafa?

▪ Tokony hanaraka ny toromarik’i Jesosy mahakasika ny fomba hifandraisana amin’ny hafa ny mpianany. Hoy, ohatra, i Jesosy: “Koa izay rehetra tianareo hataon’ny olona aminareo àry, dia mba ataovy aminy koa.” Ahoana raha misy olona mampahatezitra anao? Hoy i Jesosy: “Mifandamìna haingana amin’ilay mitory anao.” Hoy koa izy: ‘Raha tsy mamela ny heloky ny olona ianareo, dia tsy hamela ny helokareo koa ny Rainareo.’—Matio 5:25; 6:15; 7:12.

Nanoro hevitra ny mpivady i Jesosy hoe: “Efa renareo fa voalaza hoe: ‘Aza manitsakitsa-bady.’ Izaho kosa anefa milaza aminareo fa izay rehetra tsy mitsahatra mijery vehivavy ka maniry hanao firaisana aminy, dia efa nanitsakitsa-bady tao am-pony sahady.” Avelan’ny tena Kristianina hanan-kery eo amin’ny sainy sy ny fony ny fampianaran’i Jesosy.—Matio 5:27, 28.

Vonona hamoy zavatra mampiadana ny tena Kristianina mba hanampiana olona. Nahafoy tena i Jesosy. Nandeha nitory, ohatra, izy sy ny apostoliny, ka reraka sady tsy nahita fotoana hisakafoana. Nentin’i Jesosy an-tsambokely ho any amin’ny toerana mangina àry izy ireo mba hiala sasatra. Ren’ny olona anefa izany, ka nihazakazaka nialoha azy ireo tany ny olona. Hoy ny Baiboly: “Nony niala avy tao an-tsambokely i Jesosy, dia nahita vahoaka be. Nangoraka an’ireo anefa izy, satria toy ny ondry tsy misy mpiandry ireo. Ary nanomboka nampianatra azy zavatra maro izy.” (Marka 6:30-34) Manahaka an’i Jesosy ianao raha manao izay asain’Andriamanitra ataonao, na dia sarotra aza izany.

 Nahoana ianao no tokony hitory ny vaovao tsara?

▪ Nampianarin’i Jesosy hitory ny vaovao tsara ny mpanara-dia azy. Hoy izy tamin’ny apostoly: “Rehefa mandeha ianareo, dia mitoria hoe: ‘Efa manakaiky ny fanjakan’ny lanitra.’ ” (Matio 10:7) Tena sarobidy io hafatra io. Nivavaka toy izao i Jesosy: “Mba hahazoan’izy ireo fiainana mandrakizay, dia ilainy ny mianatra hahalala anao, ilay hany tena Andriamanitra.”—Jaona 17:3.

Niresaka momba ny asa iray hataon’ny mpanara-dia azy an-tapitrisany i Jesosy. Hoy izy: “Hotorina maneran-tany ity vaovao tsaran’ilay fanjakana ity, ho vavolombelona amin’ny firenena rehetra.” (Matio 24:14) Tsy isalasalana fa ho faly hiresaka an’izay fantatrao ianao, raha efa nianatra momba ny Fanjakan’Andriamanitra ary mino ny Baiboly. Maro ny mpanara-dia an’i Jesosy nanomboka nitory ny Fanjakan’Andriamanitra tamin’ny havany.—Jaona 1:40, 41.

Nahoana ianao no tokony hatao batisa?

▪ Toa nivavaka toy izao i Jesosy, rehefa natao batisa tao amin’ny reniranon’i Jordana: ‘Tonga mba hanao ny sitraponao aho, Andriamanitra ô.’ (Hebreo 10:7) Tokony hatao batisa koa ianao, raha te hanao ny sitrapon’Andriamanitra. Hoy i Jesosy: “Ataovy mpianatra ny olona any amin’ny firenena rehetra, ka ataovy batisa.”—Matio 28:19.

Inona no andraikitry ny Kristianina vita batisa sy ny soa azony? Manompo an’Andriamanitra amin’ny tenany manontolo izy. Nanonona an’izao Lalàn’Andriamanitra izao i Jesosy: “Tiavo i Jehovah Andriamanitrao amin’ny fonao manontolo sy ny tenanao manontolo.” (Matio 22:37) Hoy koa izy: “Raha misy te hanaraka ahy, aoka izy handa ny tenany.” (Matio 16:24) Asehon’ny olona iray amin’ny alalan’ny batisany fa nanapa-kevitra ny handa tena izy ka lasa fananan’Andriamanitra. Manana fifandraisana manokana amin’Andriamanitra izy, ka afaka mangataka feon’ny fieritreretana madio.—1 Petera 3:21.

Raha mila fanazavana fanampiny, dia jereo ny toko 18 ao amin’ity boky hoe Inona Marina no Ampianarin’ny Baiboly?, navoakan’ny Vavolombelon’i Jehovah ity.