O Lesona Tatou te Aʻoaʻoina Mai iā Iesu

Le Auala e Mulimuli ai iā Keriso

Pe a faatuatua tagata iā Iesu, sa masani ona ia fetalai atu: “Ia e mulimuli mai iā te aʻu.” (Mataio 9:9; 19:21) O le ā le uiga o le mulimuli iā Iesu, po o le avea o se Kerisiano? Seʻi mafaufau i tali o fesili tāua e tolu.

O le ā le auala e te faia ai isi?

▪ E tatau i se soo o Iesu ona usiusitaʻi i faatonuga i le auala e faia ai isi. O se faaaʻoaʻoga, na fetalai Iesu: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.” Ae ā pe a faatigā mai se isi iā te oe? Na fetalai Iesu: “Ia vave ona oulua faalelei ma lē ua molia oe.” Na fetalai atu foʻi o ia i ona soo: “Afai tou te lē faamagaloina mea sesē e fai mai e tagata, e lē faamagaloina foʻi e lo outou Tamā a outou mea sesē.”—Mataio 5:25; 6:15; 7:12.

Na fautua atu Iesu i ē ua faaipoipo: “Ua outou faalogo i nei upu, ‘Aua e te mulilua.’ Ae ou te fai atu iā te outou, ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” E taʻitaʻia le mafaufau ma le loto o se Kerisiano moni i aʻoaʻoga a Iesu.—Mataio 5:27, 28.

E faataulaga e Kerisiano moni o latou olaga sologa lelei e fesoasoani ai i isi. Sa ola faataulaga Iesu. A o alu se malaga talaʻi e vaivai ai, e leʻi maua se taimi e aai ai Iesu ma ona aposetolo. Ona ave lea o i latou e Iesu i le vaa i se mea tuufua e mālōlō ai. Ae na iloa e tagata le mea o le a alu i ai o ia, ma taufetuli e muamua atu i ona luma. Ua taʻua i le Tusi Paia: “Ina ua maliu ese o ia mai le vaa, ona ia silafia lea o le motu o tagata e toʻatele, ona tigā alofa ai lea o ia iā i latou, auā ua pei i latou o mamoe e leai se leoleo mamoe. Ona ia aʻoaʻo atu lea iā i latou i le tele o mea.” (Mareko 6:30-34) E te faataʻitaʻi iā Iesu pe a e faia mea ua fetalai mai le Atua e fai, e ui e fesagaʻia ai faigatā.

 Aiseā e tatau ai ona e talaʻi atu le tala lelei?

▪ Na aʻoaʻo e Iesu ona soo ina ia talaʻi atu le tala lelei. Na fetalai o ia i le ʻauaposetolo: “A outou ō, ia talaʻi atu: ‘Ua latalata mai le malo o le lagi.’” (Mataio 10:7) E tāua tele le feʻau a soo o Iesu. Na tatalo Iesu e faapea: “O le ola e faavavau foʻi lenei, ia latou iloa oe, le Atua moni e toʻatasi.”—Ioane 17:3.

Na valoia e Iesu se galuega o le a faia e le faitau miliona o ona soo. Na fetalai o ia: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma.” (Mataio 24:14) Pe afai ua e malamalama i le Malo o le Atua ma talitonu i mea o loo i le Tusi Paia, o le a e fiafia la e talaʻi atu mea ua e iloa. E amata e le toʻatele o soo o Iesu ona talaʻi atu le Malo o le Atua i o latou tauaiga.—Ioane 1:40, 41.

Aiseā e tatau ai ona e papatiso?

▪ Ina ua papatiso Iesu i le vai o Ioritana, e foliga mai na tatalo o ia: ‘Le Atua e, ua ou sau e fai lou finagalo.’ (Eperu 10:7) Pe afai e te fia faia le finagalo o le Atua, e tatau fo’i la ona e papatiso. Na poloaʻi Iesu: “Ia . . . fai tagata o nuu uma lava ma soo, ma papatiso atu iā i latou.”—Mataio 28:19.

O ā tiute tauave ma aogā e maua pe a papatiso? E auauna atu soo papatiso o Iesu i le Atua ma o latou ola atoa. Na taʻua e Iesu le Tulafono a le Atua lea e faapea mai: “Ia e alofa atu iā Ieova lou Atua ma lou lotoatoa, ma lou ola atoa.” (Mataio 22:37) Na fetalai foʻi o ia: “A fia mulimuli mai se tasi iā te aʻu, ia faafitia e ia o ia lava.” (Mataio 16:24) Ua faaatagia e le papatisoga le faaiʻuga a se tagata e faafitia e ia o ia lava, ae avea ma auauna a le Atua. E mafai e i latou ua iai i lenei mafutaga faapitoa, ona talosaga atu i le Atua mo se lotofuatiaifo mamā.—1 Peteru 3:21.

Mo nisi faamatalaga, tagaʻi i le mataupu e 18 o lenei tusi, lomia e Molimau a Ieova