Wantuku masiyalh Jesús

Tuku kilhchanima kstalanina Cristo wankan

«Katat, kakistalani.» Wa uma tuku kawanilh Jesús makgapitsi tiku kanajlanikgolh (Mateo 9:9; 19:21). Xlakata naʼakgatekgsaw o namakgachakgxiya tuku kilhchanima kstalanina Cristo wankan, kaʼakxilhwi xtakgalhtin akgtutu xlakaskinka takgalhskinin.

¿La nakalikatsinikgo kstalaninanin Cristo xtalatamanin?

▪ Kstalaninanin Cristo makgantaxtikgo tuku masiyalh Jesús xlakata la nakalikatsinikgo amakgapitsin. Jesús wa: «Xlipaks nkatuwa wantu xlakaskintit nakatlawanikgoyan nchixkuwin, nachuna wixin natlawanikgoyatit». Pero ¿tuku xlitlawat kstalanina Cristo akxni wi tiku takgalhi taʼakglhuwit? Jesús mastalh uma tastakyaw: «Lakapalaj tunkan katalakkaxla nti malakgsiyuyan». Nachuna kawanilh: «Wampi wa lapi ni xmatsankgananikgotit [o ni xkatapatitit] wa nti nkamakgasitsin, na ni katikamatsankgananin mintalakgalhinkan minTlatkan nti wi nkakgapun» (Mateo 5:25; 6:15; 7:12).

Chu Jesús kamaxkilh uma tastakyaw tiku tamakgaxtokgkgonit: «Wixin katsiyatit la wan yama limapaksin [...], nama wan: “Ni kaxakgatli tanuj puskat pala wi mimpuskat”. Wanti maski kaj naʼukxilha chatum puskat, chu xla napuwan pi tunkan xla xtlawalh, pus tama chixku aya tlawanit talakgalhin kxnaku». Uma texto limasiya pi kstalanina Cristo nawili xtamasiy Jesús kxtalakapastakni chu kxnaku (Mateo 5:27, 28).

Chuna la tlawalh Jesús, xaxlikana kstalaninanin Cristo limakgxtakgkgo tuku kamakgapaxuwa xlakata nakamakgtayakgo amakgapitsin. Kaʼakxilhwi tuku lalh akxni Jesús kataʼalh xʼapóstoles nalichuwinankgo Dios. Xlakata lhuwa kskujkgonit chu nipara xkalimakgwaninit nawayankgo, tanukgolh kʼaktsu barco chu ankgolh lakgamakgat xlakata tlan xjaxkgolh. Pero latamanin katsikgolh niku xʼamakgolh Jesús chu kstalaninanin chu na anta ankgolh. Biblia wan: «Akxni ntakutli Jesús kputakutnu, tiʼukxilhli luwa lilhuwa. Kgayaj tikatsanikgolh, sampi xtachuna [...] [«borregos», NM] ni kgalhi xmapuchwanina. Pus chi titsukulh masiyunikgo lhuwa nkatuwaj» (Marcos 6:30-34). Kstalaninanin Cristo tlawakgo chuna la Jesús tlawalh wa xlakata liskujkgo putum kilhtamaku natlawakgo xtalakaskin Dios, maski akxni kaskinikan natlawakgo tuku ni xlakpuwankgonit natlawakgo.

 ¿Tuku xlakata xlichuwinatkan xalakwan xalaksasti tamakatsin?

▪ Jesús kamalakgachalh xtamakgalhtawakgen xlakata nalichuwinankgo xalakwan xalaksasti tamakatsin. Kawanilh xʼapóstoles: «Kaʼakgchuwinantit, nawanatit: “Wa xtapakgsin akgapun, talakatsuwinitta”» (Mateo 10:7). Tamakatsin nema xlichuwinankgo kstalaninanin Cristo lu xlakaskinka, xlakata Jesús wanilh Dios: «Wa cha yuma liwi latamat wantu xaliʼankgalhin, mpi nalakgapaskgoyan wix [«mi akstu», NM] Dios talulokgtat» (Juan 17:3).

Cristo na lichuwinalh pi kstalaninanin xtlawakgolh akgtum taskujut nema la uku lhuwa millones xʼamakgolh makgtayanankgo: «Na xapulh taliʼakgchuwinanit nawan xlikatlanka nkatuxawat yuma xatlan tamakatsinin xla tapakgsin; lakimpi paks nakgaxmatkgoy yuma ntalulokgtat xlipaks akgmakgat chixkuwin» (Mateo 24:14). Akxni tlakg katsiniyaw xlakata xTamapakgsin Dios chu xlakata Biblia, akinin kalitachuwinamputunaw amakgapitsin tuku katsinitilhamaw. Lhuwa kstalaninanin Jesús akxilhkgonit pi kamakgtaya akxni pulana kawanikgo xfamiliajkan xlakata tuku aku katsimakgolh (Juan 1:40, 41).

¿Tuku xlakata xlitamunutkan?

▪ Akxni Jesús xtamununita kkgalhtuchokgo wanikan Jordán, max wanilh xTlat: «Ukwi, lakimpi naktlaway mintalakaskin wix, kiDios» (Hebreos 10:7). Uma limasiya pi tiku tlawaputun xtalakaskin Dios na xlitamunut. Jesús mastalh uma limapakgsin: “Chuna mpi kapitit, na kamasiyunikgotit xlipaks akgmakgat chixkuwin, chu kakamunukgotit” (Mateo 28:19).

¿Tuku xlitlawat chu tuku tlan kitaxtuni tiku tamunu? Pulana, kstalaninanin Cristo tiku tamunukgonita xliskujnitkan Jehová xliputum xlatamatkan. Akxni chuna tlawakgo makgantaxtikgo xLimapakgsin Dios nema Jesús wa: «Xlipaks minaku nalipaxkiya Dios mimPuchina, chu xlipaks milistakna [o mi latamat], chu xlipaks mintalakapastakna» (Mateo 22:37). Pero Jesús na wa: «Komo wi tiku kistalaniputun, xakstu kalakgmakganka» (Mateo 16:24, NM). Tamunut limasiya pi kiʼakstukan kinkalakgmakgankanan, uma wamputun nialh natlawayaw tuku akinin lakaskinaw chu tlawayaw xtalakaskin Jehová. Nachuna tiku tamunukgonit tlan talalinkgo Dios chu tlan skinikgo nakatapati chu tlan katawilalh xtalakapastaknikan (1 Pedro 3:21).

[Epígrafe xla página 9]

Komo tlakg katsiputuna, kaʼakxilhti capítulo 18 xla uma libro, tlawakgonit xtatayananin Jehová.